Wan sani di e yepi wi fu no frede moro

YU FENI en makriki fu dini Yehovah?— A Bigi Leriman no ben taki dati a ben o makriki fu du dati. A neti bifo sma kiri Yesus, dan a taigi den apostel fu en: „Efu grontapu e teige unu, dan sabi taki den ben teige mi bifo den ben teige unu.”​—Yohanes 15:18.

Petrus ben meki bigi taki a no ben o libi Yesus noiti, ma Yesus ben taki dati a srefi neti dati Petrus ben o taki dri leisi dati a no sabi en. Èn dati na soifri san Petrus ben du! (Mateyus 26:31-35, 69-75) Fa so wan sani ben kan pasa?— A pasa fu di Petrus ben kon frede, èn den tra apostel ben kon frede tu.

Yu sabi fu san ede den apostel ben kon frede?— Na fu di den misi fu du wan prenspari sani. Te wi e kon sabi san na a sani disi, dan dati kan yepi wi fu dini Yehovah awansi san sma e taigi wi èn awansi san den e du nanga wi. Ma meki wi bigin luku san ben pasa tapu a lasti neti di Yesus ben de nanga den apostel fu en.

A fosi sani di den du, na taki den hori a Paskafesa nanga makandra. Na a fesa disi di ben e hori ibri yari, sma ben e nyan spesrutu sani. A fesa ben de fu memre a pipel fu Gado taki den ben kisi frulusu fu a katibo na ini Egepte. Baka dati, Yesus e fruteri den fu wan tra spesrutu nyanyan. Wi sa taki fu en na ini wan tra kapitel èn wi sa fruteri sosrefi fa a nyanyan dati e yepi wi fu memre Yesus. Baka a nyanyan dati, Yesus gi den apostel fu en deki-ati, èn a tyari den go na ini a dyari fu Getseimanei. Den ben lobi fu go na a presi dati.

Yesus e go en wawan na ini a dyari fu begi. A e taigi Petrus, Yakobus, nanga Yohanes tu taki den musu begi. Ma den e fadon na sribi. Dri leisi Yesus e gowe en wawan fu begi, èn ala den dri leisi te a e drai kon baka a e feni Petrus nanga den trawan e sribi! (Mateyus 26:36-47) Yu sabi fu san ede den ben musu tan na ai fu begi?— Meki wi taki fu a tori disi.

Moro fruku a neti dati, Yudas Iskariot ben de na a Paskafesa makandra nanga Yesus nanga den tra apostel. Kande yu e memre ete taki Yudas ben tron wan fufuruman. Now a e tron wan toriman. A sabi a presi na ini a dyari fu Getseimanei pe Yesus gwenti fu kon makandra nanga den apostel fu en. Fu dati ede Yudas e tyari srudati go drape fu grabu Yesus. Te den doro drape, dan Yesus e aksi den: „Suma unu e suku?”

Den srudati e piki: „Yesus.” Yesus no frede, èn fu dati ede a e piki: „Na mi.” Den srudati e fruwondru so te fu a deki-ati fu Yesus, taki den e hari go nanga baka èn den e fadon na gron. Ne Yesus e taki: ’Efu na mi unu e suku, dan libi den apostel fu mi meki den gowe.’​—Yohanes 18:1-9.

Te den srudati e grabu Yesus èn e tai en anu, dan den apostel e kon frede èn den e lon gowe. Ma Petrus nanga Yohanes wani sabi san e pasa, èn fu dati ede den e waka na den man baka, ma den no e go tumusi krosibei. Te fu kaba, den e tyari Yesus go na a oso fu Kayafas, a granpriester. Fu di a granpriester sabi Yohanes, meki na uma-srafu di musu opo a portu gi sma, e meki en nanga Petrus pasa go na ini a fesidyari.

Den priester kon makandra kaba na a oso fu Kayafas fu hori wan krutu. Den wani taki Yesus musu dede. Fu dati ede den e tyari kotoigi kon na inisei di e fruteri lei fu Yesus. Den sma e naki Yesus wan tu kofu nanga klap. Petrus de krosibei te den sani disi e pasa.

Na uma-srafu di ben opo a portu gi Petrus nanga Yohanes, e si Petrus. A e taki: „Yu ben de tu nanga Yesus!” Ma Petrus e taki dati a no sabi srefisrefi suma na Yesus. Baka wan pisi ten, wan tra meisje e si Petrus èn a e taigi den sma di e tanapu krosibei fu en: „A man disi ben de nanga Yesus.” Agen Petrus e taki dati a no sabi en. Wan pisi ten baka dati, wan grupu sma e si Petrus èn den e taigi en: ’Yu musu fu de wan fu den.’ Fu a di fu dri leisi Petrus e taki dati a no tru. A e taki: ’Mi no sabi a man!’ Petrus e sweri srefi taki a no e lei, èn Yesus e drai luku en.​—Mateyus 26:57-75; Lukas 22:54-62; Yohanes 18:15-27.

Yu sabi fu san ede Petrus ben lei?— Iya, fu di a ben frede. Ma fu san ede a ben frede? San a no ben du fu kan abi moro deki-ati? Denki a sani pikinso. San Yesus ben du fu kisi deki-ati?— A ben begi Gado, èn Gado yepi en fu abi deki-ati. Èn memre taki Yesus ben taigi Petrus dri leisi fu begi èn fu tan na ai. Ma san ben pasa?—

Ibri leisi, Petrus ben fadon na sribi. A no ben begi, èn a no ben tan na ai. Fu dati ede a no ben de srekasreka di sma grabu Yesus. Bakaten na a krutu, di sma naki Yesus èn di den seti sani fu meki sma kiri en, dan Petrus kon frede srefisrefi. Ma san Yesus ben taigi den apostel fu en wan tu yuru nomo na fesi? San den ben musu fruwakti?— Yesus ben taigi den taki neleki fa grontapu ben teige en, na so grontapu ben o teige den tu.

Now, meki wi prakseri fa a sani di pasa nanga Petrus, ben kan pasa nanga wi tu. Kon meki wi taki dati yu de na skoro, èn tra pikin e bigin taki takru sani fu sma di no e taki a fraga odi, noso di no e hori Kresneti. San yu o du te wan sma e drai luku yu èn e aksi yu: „A tru taki yu no e taki a fraga odi?” Noso trawan fu den e taki: „Wi yere taki yu no e hori Kresneti srefi!” Yu ben o frede fu taki dati de so trutru?— Yu ben o prakseri fu lei, neleki fa Petrus ben du dati?—

Bakaten, Petrus ben firi sari srefisrefi fu di a taki dati a no ben sabi Yesus. Di a kon frustan san a ben du, dan a go na dorosei èn a krei. Iya, a sori berow èn a drai go baka na Yesus (Lukas 22:32). Now, denki a sani disi pikinso. San kan yepi wi fu no kon frede so te taki wi e taki wan srefi sortu sani leki san Petrus ben taki?— Memre taki Petrus no ben begi èn a no ben tan na ai. Sobun, san yu denki wi musu du fu de wan bakaman fu a Bigi Leriman?—

A no de fu taki dati wi musu begi Yehovah fu yepi wi. Di Yesus begi, dan yu sabi san Gado du gi en?— A seni wan engel kon fu tranga en (Lukas 22:43). Den engel fu Gado kan yepi wi?— Bijbel e taki: „Na engel fu Yehovah e seti ensrefi lontu den wan di e frede En, èn a e frulusu den” (Psalm 34:7). Ma fu man kisi yepi fu Gado, dan wi musu du moro leki fu begi nomo gi a yepi dati. Yu sabi san moro wi musu du?— Yesus ben taigi den bakaman fu en fu tan na ai. Fa yu denki wi kan du dati?—

Wi musu arki bun te wi de na den Kresten konmakandra èn wi musu poti prakseri na san wi e leisi na ini Bijbel. Ma wi musu begi Yehovah doronomo sosrefi, èn wi musu aksi en fu yepi wi so taki wi kan dini en. Te wi e du dati, dan wi sa kisi yepi fu no frede moro. Dan wi sa prisiri te wi e kisi na okasi fu fruteri trawan fu a Bigi leriman nanga en Tata.