Fa Yesus ben kisi kibri

SON leisi Yehovah e du tumusi wondru sani fu kibri yonguwan di no man kibri densrefi. Te yu e go koiri na wan boitipresi, dan yu ben kan si wan fasi fa Yehovah e du disi. Ma a kan taki na ini a bigin, yu no sa frustan trutru san e pasa.

Yu e si wan fowru e frei kon na gron krosibei fu yu. A gersi leki a fowru kisi mankeri. A e srepi wan fu den frei fu en èn a e waka gowe te yu e pruberi fu go krosibei na en. Ala leisi te yu e waka baka a fowru, dan a e waka gowe moro esi so taki yu no man kisi en. Ne, wantronso, a fowru e frei gowe. Notinoti no ben pasa nanga en frei! Yu sabi san a fowru ben e du?—

We, krosibei fu yu pe a fowru ben frei kon na gron, den pikin fowru fu en ben e kibri na ini a grasi. A mama fowru ben frede taki yu ben o feni den èn taki yu ben o du den ogri. Fu dati ede a ben du neleki a ben kisi mankeri, èn a tyari yu gowe fu pe den pikin fowru ben de. Yu sabi suma kan kibri wi neleki fa wan mama fowru e kibri den pikin fu en? Bijbel e agersi Yehovah nanga wan fowru, wan aka, di e yepi den pikin fu en.​—Deuteronomium 32:11, 12.

A pikin di Yehovah lobi moro furu, na en lobi Manpikin, Yesus. Di Yesus ben de na hemel, a ben de wan makti yeye leki en Tata. A ben man sorgu gi ensrefi. Ma di Yesus gebore leki wan beibi na grontapu, dan a no ben man du noti gi ensrefi. A ben abi sma fanowdu fu kibri en.

Fu man du a wani fu Gado na grontapu, dan Yesus ben musu gro kon bigi èn a ben musu tron wan volmaakti bigisma. Ma bifo dati ben kan pasa, dan Satan pruberi fu kiri Yesus. A moi fu kon sabi fa Satan pruberi fu kiri Yesus di ben pikin ete, èn fa Yehovah kibri Yesus. Yu wani yere a tori dati?—

Syatu baka di Yesus gebore, dan Satan e meki wan sortu stari skèin na a Owstusei fu hemel. Astrologiaman, sma di e ondrosuku den stari, e waka hondrohondro kilometer baka a stari, teleki den doro na Yerusalem. Drape den e aksi sma pe a kownu fu den Dyu ben o gebore. Te den e aksi sma di sabi san Bijbel e taki fu a tori disi, dan den sma dati e piki: „Na Betlehem.”​—Mateyus 2:1-6.

Herodes, a takru kownu na ini Yerusalem, e kon yere taki a nyun kownu disi gebore no so langa pasa na ini a foto Betlehem di de krosibei. Fu dati ede a e taigi den astrologiaman: ’Go suku a pikin, èn te yu feni en, dan yu musu kon baka fu fruteri mi.’ Yu sabi fu san ede Herodes wani sabi pe Yesus de?— Na fu di Herodes dyarusu èn fu di a wani kiri en!

Fa Gado e kibri en Manpikin?— We, te den astrologiaman e feni Yesus, dan den e gi en kado. Bakaten Gado e warskow den astrologiaman na ini wan dren fu no drai go baka na Herodes. Fu dati ede den e teki wan tra pasi go na oso èn den no e drai go baka na Yerusalem. Te Herodes e kon sabi taki den astrologiaman gowe, dan a e atibron srefisrefi. Fu di Herodes wani kiri Yesus, meki a e taigi sma fu kiri ala den boi na ini Betlehem di no doro tu yari ete! Ma te dati e pasa, dan Yesus no de drape moro.

Yu sabi fa Yesus e kisi kibri?— Baka te den astrologiaman gowe na den oso, dan Yehovah e warskow Yosef, a masra fu Maria, fu lowe gowe farawe te na Egepte. Drape Herodes no man du Yesus nowan ogri. Wan tu yari baka dati, di Maria nanga Yosef gowe libi Egepte makandra nanga Yesus dan Gado e gi Yosef wan tra warskow. A e taigi en na ini wan dren fu froisi go tan na Nasaret, pe nowan sma no sa man du en ogri.​—Mateyus 2:7-23.

Yu e si fa Yehovah kibri en Manpikin?— Suma yu denki de leki den pikin fowru di a mama fu den kibri na ini a grasi? Iya, suma de leki Yesus di a ben de pikin? A no yu?— Sma de di wani du yu ogri tu. Yu sabi suma na den sma dati?—

Bijbel e taki dati Satan de leki wan lew di e bari fu di a wani nyan wi. Èn neleki fa lew gwenti fu luru pikin meti, na so Satan nanga den ogri yeye fu en gwenti fu luru pikin-nengre (1 Petrus 5:8). Ma Yehovah tranga moro Satan. Yehovah kan kibri den pikin fu en, èn awansi sortu ogri Satan e du nanga den, Yehovah kan meki sani kon bun baka.

Yu sabi ete fu kapitel 10 fu a buku disi san Didibri nanga den ogri yeye fu en e pruberi fu meki wi du?— Iya, den e pruberi fu meki wi abi seks demakandra di Gado no feni bun. Ma suma wawan mag abi seks demakandra?— Iya, tu bigisma, wan man nanga wan uma, di trow nanga makandra.

Ma a sari fu taki, dati son bigisma lobi fu abi seks nanga pikin-nengre. Te den e du dati, dan boi nanga meisje ben kan bigin du takru sani di den leri fu den bigisma disi. Den pikin disi e bigin gebroiki den syenpresi fu den na wan fasi di no fiti. Na dati ben pasa wan langa ten pasa na ini a foto Sodom. Bijbel e taki dati den sma drape, „yongu boi te go miti owru man”, pruberi fu abi seks nanga den man di ben kon na Lot.​—Genesis 19:4, 5.

Sobun, neleki fa Yesus ben musu kisi kibri, na so yu tu musu kisi kibri so taki bigisma, noso tra pikin srefi, no sa pruberi fu meki yu abi seks nanga den. Furu tron den sma disi sa du neleki den na yu mati. Kande den e taigi yu taki den sa gi yu wan kado srefi, efu yu e pramisi fu no taigi trawan san den wani du nanga yu. Ma neleki Satan nanga den ogri yeye fu en, den sma disi e denki densrefi nomo. Den e prakseri soso den eigi prisiri. Èn na fu dati ede meki den wani abi seks nanga pikin. A sani disi no bun kwetikweti!

Yu sabi san den ben kan du fu abi prisiri?— We, den ben kan pruberi fu wrifi a syenpresi fu yu nanga den anu. Wan tra sani di den ben kan du srefi, na fu wrifi a syenpresi fu den na a di fu yu. Ma noiti yu musu meki iniwan sma prei nanga yu toitoi noso puni. Srefi yu eigi brada, yu sisa, yu mama, noso yu papa no musu du dati. Nowan enkri sma no musu prei nanga den pisi disi fu yu skin.

Fa yu kan sorgu taki sma di e du den sortu sani disi no e du dati nanga yu?— A moro prenspari sani, na taki yu no musu meki nowan enkri sma prei nanga yu syenpresi. Efu wan sma e pruberi fu du disi, dan yu musu taki nanga wan krakti èn tranga sten: „No du! Mi o taigi wan sma!” Èn efu a sma e taki dati na yu meki a sani dati pasa, dan yu no musu bribi dati. A no tru. No frede, ma go fruteri wan trawan san a sma du, awansi suma na a sma di du dati nanga yu! Srefi te a e taigi yu taki nowan sma musu sabi fu a sani di yu nanga en du, toku yu musu fruteri wan tra sma. Awansi a e pramisi fu gi yu moi sani, èn awansi a e tapu skreki gi yu, toku yu musu go fruteri wan tra sma.

Yu no abi fu frede, ma yu musu luku bun. Te yu papa nanga mama e warskow yu gi sma èn gi presi pe ogri ben kan miti yu, dan yu musu arki den. Te yu e du dati, dan yu no e gi wan takru sma na okasi fu du yu ogri.