KAPITEL 40
Fa wi kan gi Gado prisiri
SAN wi kan du fu gi Gado prisiri? Wan sani de di wi kan gi en?— Yehovah e taki: „Ibri werdri meti fu busi na fu mi.” A e taki sosrefi: „A solfru na fu mi, èn a gowtu na fu mi” (Psalm 24:1; 50:10; Hagai 2:8). Toku wan sani de di wi kan gi Gado. San na dati?—
Yehovah e gi wi na okasi fu bosroiti efu wi wani dini en, noso efu wi no wani du dati. A no e dwengi wi fu du san a wani. Meki wi pruberi fu kon sabi fu san ede Gado meki wi na so wan fasi taki wi kan bosroiti efu wi wani dini en, noso efu wi no wani du dati.
Kande yu sabi san na wan robot. Dati na wan masyin di meki na so wan fasi taki a sa du iniwan sani di a mekiman fu en wani en fu du. Sobun a robot srefi no man bosroiti fu ensrefi san a wani du. Yehovah ben kan meki wi alamala leki robot. A ben kan meki wi na so wan fasi taki wi man du soso san a wani wi fu du. Ma Gado no du dati. Yu sabi fu san ede?— We, son preisani na robot. Te yu e pusu wan knop, dan den e du soso san a mekiman fu den wani den fu du. Oiti yu si so wan preisani?— Furu tron sma e kon weri fu prei nanga wan preisani di e du soso den sani gi san a meki. Gado no wani taki wi musu gi yesi na en fu di wi na robot di meki fu du dati. Yehovah wani taki wi musu dini en fu di wi lobi en èn fu di wi wani gi yesi na en.
Fu san ede Gado no meki wi leki a robot disi?
Fa yu denki wi hemel Tata e firi te wi e gi yesi na en fu di wisrefi wani dati?— We, taigi mi, fa yu papa nanga mama e feni a fasi fa yu e tyari yusrefi?— Bijbel e taki dati wan koni manpikin ’e gi en papa prisiri’, ma taki wan don manpikin ’e meki en mama sari’ (Odo 10:1). Yu no si taki yu papa nanga yu mama e prisiri te yu e du san den aksi yu fu du?— Ma fa den e feni en te yu e trangayesi den?—
Fa yu kan gi Yehovah èn yu papa nanga mama prisiri?
Now meki wi prakseri wi hemel Tata, Yehovah. A e taigi wi fa wi kan gi en prisiri. Grantangi, teki yu Bijbel èn opo en na Odo 27:11. Drape Gado e taki nanga wi: ’Sori taki yu koni, mi manpikin [noso, wi kan taki sosrefi, mi umapikin], èn gi mi ati prisiri, so taki mi kan gi wan piki na a sma di e spotu mi.’ Yu sabi san a wani taki fu spotu wan sma?— We, wan sma ben kan spotu yu fu di a e lafu yu èn a e taki dati yu no man du san yu taki. Fa Satan e spotu Yehovah?— Meki wi luku fa a e du dati.
Kande yu sabi ete taki wi leri na ini kapitel 8 fu a buku disi taki Satan wani fu de Nomru Wán èn taki a wani ala sma fu gi yesi na en. Satan e taki dati sma e anbegi Yehovah soso fu di Yehovah sa gi den têgo libi te den e anbegi en. Baka di Satan kisi Adam nanga Eva so fara taki den trangayesi Yehovah, dan Satan suku fu strei nanga Gado. A taigi Gado: ’Sma e dini yu soso fu kisi sani fu yu. Efu yu e gi mi na okasi, dan mi kan meki ala sma gowe fu yu.’
Fa Satan ben suku fu strei nanga Yehovah, baka di Adam nanga Eva sondu?
A tru taki a no den srefi wortu disi skrifi na ini Bijbel. Ma te wi e leisi fu a man Yob, dan wi e kon si krin taki Satan ben taigi Gado so wan sani. A ben de prenspari trutru gi Satan èn gi Yehovah sosrefi fu kon sabi efu Yob ben o de getrow na Gado. Meki wi opo wi Bijbel na Yob kapitel 1 nanga 2 fu si san ben pasa.
Na ini Yob kapitel 1, wi e leisi taki Satan de leti drape na ini hemel te den engel e kon na Yehovah. Fu dati ede Yehovah e aksi Satan: „Pe yu komoto?” Satan e piki taki a ben waka e luku lontu na grontapu. Sobun Yehovah e aksi en: ’Yu no si Yob, taki a e dini mi èn taki a no e du nowan ogri?’—Yob 1:6-8.
Ma Satan no e agri nanga dati. Wantewante a e taki: ’Yob e anbegi yu soso fu di nowan problema no e miti en. Efu yu e tapu fu kibri en èn fu blesi en, dan a sa fluku yu na ini yu fesi.’ Fu dati ede Yehovah e piki: ’A bun, Satan, yu kan du iniwan sani di yu wani nanga en, ma nanga Yob srefi yu no musu du noti.’—Yob 1:9-12.
San Satan e du?— A e meki sma fufuru den kaw nanga buriki fu Yob èn a e kiri srefi den sma di e sorgu den meti disi. Baka dati, faya e koti na loktu èn e kiri den skapu nanga skapuman. Bakaten, sma e kon fufuru den kameili èn den e kiri den sma di e sorgu den meti disi. Te fu kaba, Satan e meki wan bigi winti wai di e naki na oso broko pe den tin pikin fu Yob de na ini, èn den alamala e lasi den libi. Aladi den sani disi e pasa, toku Yob e tan dini Yehovah.—Yob 1:13-22.
Te Yehovah e si Satan baka, dan a e taigi en taki Yob de getrow ete. Ma Satan no wani yere dati, èn fu dati ede a e taki: ’Gi mi na okasi nomo fu meki a kon siki, dan a sa fluku yu leti na ini yu fesi.’ Fu dati ede Yehovah e gi pasi taki Satan e meki Yob kon siki, ma a e warskow en fu no kiri Yob.
San Yob ondrofeni, èn fu sani ede a sani disi gi Gado prisiri?
Wantronso Satan e meki Yob kon siki so te taki en heri skin e kisi soro. Den soro disi e tingi so te taki nowan sma no wani de krosibei fu en. Srefi a wefi fu Yob e taigi en: „Fluku Gado èn dede!” Sma di e du neleki den na mati fu Yob e kon luku en. Den sma disi e taigi en taki na fu di a ben du ogri, meki a ben abi so furu problema. A sani disi e meki Yob firi moro brokosaka. Aladi Satan meki Yob kisi so furu problema nanga sari, toku Yob e tan dini Yehovah getrow.—Yob 2:1-13; 7:5; 19:13-20.
Fa yu denki Yehovah ben feni en taki Yob ben de so getrow?— A ben gi Yehovah prisiri, bika a ben kan taigi Satan: ’Luku Yob! A e dini mi fu di a wani du dati.’ Yu sa de leki Yob? Yu wani de wan sma di Yehovah kan teki leki wan eksempre fu sori taki Satan na wan leiman?— Satan e taki dati a kan meki iniwan sma tapu fu dini Yehovah. A de wan grani trutru fu man sori taki dati no tru. A no de fu taki dati Yesus ben si disi leki wan grani.
Noiti a Bigi Leriman meki Satan kori en fu du wan sani di no bun. Prakseri nomo fa na eksempre fu en gi en Tata prisiri! Yehovah ben kan sori go na Yesus èn a ben kan piki Satan: ’Luku mi Manpikin! A tan getrow na mi dorodoro fu di a lobi mi!’ Prakseri tu fa Yesus lobi fu gi en Tata prisiri. Fu di Yesus lobi fu du dati, meki a ben de klariklari srefi fu dede na wan pina-udu.—Hebrewsma 12:2.
Yu wani de leki wi Bigi Leriman èn yu wani gi Yehovah prisiri?— We, dan tan leri moro fara san Yehovah wani yu fu du, èn gi en prisiri fu di yu e du den sani dati!
Leisi san Yesus ben du fu gi Gado prisiri èn san wi sosrefi musu du, na Odo 23:22-25; Yohanes 5:30; 6:38; 8:28; nanga 2 Yohanes 4.