Gado en nyun grontapu pe vrede de​—Yu kan libi drape

GADO ben poti Adam nanga Eva na ini a dyari fu Eden. Den ben kon trangayesi èn den dede, ma toku gado gi den bakapikin fu den, sobun wi sosrefi, na okasi fu libi fu têgo na ini a Paradijs. Bijbel e pramisi: „Na den regtfardikisma srefi sa abi grontapu leki a gudu fu den, èn den sa libi na tapu fu têgo.”​—Psalm 37:29.

Bijbel e taki fu „nyun hemel” nanga „wan nyun grontapu” (Yesaya 65:17; 2 Petrus 3:13). Den „hemel” di de now na den libisma tirimakti fu a ten disi, ma Yesus Krestes nanga den sma di e tiri makandra nanga en na ini hemel sa de den „nyun hemel”. A sa de wan moi sani trutru te den nyun hemel disi, sobun Gado en regtfardiki tirimakti fu vrede, e tiri a heri grontapu!

Ma san na a „nyun grontapu” dan?— A nyun grontapu sa de den bun sma di lobi Yehovah. Yu musu sabi taki te Bijbel e taki fu „a grontapu”, dan son leisi dati a no a gron srefi, ma den sma di e libi na grontapu (Genesis 11:1; Psalm 66:4; 96:1). Sobun, den sma di de a nyun grontapu sa libi leti dyaso na tapu a grontapu disi.

Na a ten dati, a disiten grontapu fu ogrisma no sa de moro. Hori na prakseri taki a Frudu fu a ten fu Noa ben pori wan grontapu fu ogrisma. Èn soleki fa wi leri, a grontapu fu ogrisma na ini a ten disi sa kisi pori na Armagedon. Meki wi luku now fa a sa de fu libi na ini a nyun grontapu fu Gado baka Armagedon.

Yu wani libi fu têgo na ini Paradijs na tapu a nyun grontapu fu Gado pe vrede sa de?— Nowan datra kan meki wi libi fu têgo. Nowan perki no de di kan sorgu taki wi no e dede. A wan-enkri fasi fa wi kan libi fu têgo, na fu kon krosibei na Gado. Èn a Bigi Leriman e fruteri wi fa wi musu du dati.

Meki wi teki wi Bijbel èn meki wi opo en na Yohanes kapitel 17, vers 3. Dyaso wi e feni den wortu fu a Bigi Leriman: „Efu wan sma wani kisi têgo libi, dan den musu tan leri sabi yu, a wan enkri tru Gado, èn a sma di yu seni kon, Yesus Krestes.”

Sobun, san Yesus ben taki dati wi musu du fu man libi fu têgo?— A fosi sani di wi musu du, na taki wi musu kon sabi wi hemel Tata, Yehovah, èn sosrefi en Manpikin, di ben gi en libi gi wi. Disi wani taki dati wi musu studeri Bijbel. A buku disi, Teki leri fu a Bigi Leriman, e yepi wi fu du dati.

Ma te wi e kon leri sabi Yehovah, dan fa dati sa yepi wi fu libi fu têgo?— We, neleki fa wi musu nyan ibri dei, na so wi musu teki leri fu Yehovah ibri dei. Bijbel e taki: „Sma no musu libi fu brede wawan, ma fu ibri wortu di Yehovah mofo taki.”​—Mateyus 4:4.

Wi musu kon leri sabi Yesus Krestes tu, bika Gado seni en Manpikin fu teki wi sondu puru. Bijbel e taki: „Nowan tra sma kan gi wi frulusu.” Èn Bijbel e taki sosrefi: „A sma di e bribi na ini a Manpikin, e kisi têgo libi” (Tori fu den Apostel 4:12; Yohanes 3:36). We, wi e bribi trutru na ini Yesus? Wi e bribi taki sondro en wi no man libi fu têgo?— Te wi e bribi dati, dan wi sa tan teki leri fu a Bigi Leriman ibri dei, èn wi sa du san a e taki.

Wan moi fasi fa wi kan teki leri fu a Bigi Leriman, na fu leisi a buku disi ibri tron baka, fu luku ala den prenki èn fu prakseri fu den. Luku efu yu kan piki den aksi di poti na den prenki. Boiti dati, leisi a buku nanga yu mama noso yu papa. Efu yu papa nanga mama no de fu leisi nanga yu, dan leisi en nanga tra bigisma èn nanga tra pikin. A no ben o moi efu yu ben kan yepi trawan fu teki leri fu a Bigi Leriman, so taki den kan sabi san den musu du fu libi fu têgo na ini a nyun grontapu fu Gado?—

Bijbel e taki: „Grontapu e pasa gowe.” Ma baka dati, Bijbel e fruteri fa wi kan libi fu têgo na ini a nyun grontapu fu Gado. A e taki: „A sma di e du a wani fu Gado, e tan fu têgo” (1 Yohanes 2:17). Sobun, fa wi kan libi fu têgo na ini a nyun grontapu fu Gado?— Iya, te wi e leri sabi Yehovah nanga en lobi Manpikin, Yesus. Ma wi musu du tu san wi leri. A ben o bun efu yu studeri a buku disi, so taki yu sa man du ala den sani disi.