Fa yu kan abi wan osofamiri-libi di Gado feni bun?

1. Fu san ede Yehovah Kotoigi abi wan koloku osofamiri-libi?

SMA sabi Yehovah Kotoigi leki sma di abi wan koloku osofamiri-libi. Professor Bryan Wilson fu na Oxford Universiteit ben skrifi: „Den Kotoigi e gi sma bun rai . . . di abi fu du nanga a trowlibi, a fasi fa sma musu tyari densrefi, fa den musu kweki pikin, èn sosrefi tra sortu rai. [Den] e gebroiki den krakti rai na ini den Santa Buku fu Bijbel fu yepi sma fu libi na a yoisti fasi.” A no de fu taki dati Gado Wortu yepi yu tu fu kon abi wan koloku osofamiri-libi.

2. (a) San e pasa nanga osofamiri na ini a ten disi? (b) Na ini sortu Bijbel buku wi o suku rai di abi fu du nanga na osofamiri-libi?

² Now di a dei fu Yehovah e kon moro krosibei, Satan e suku fu broko osofamiri. Dati meki furu sma no e frutrow sma fu den eigi osofamiri moro, soleki fa a ben de na ini a ten fu Mika. A profeiti ben skrifi: „No bribi yu mati. . . . Luku bun san yu e taigi yu wefi di e didon na yu sei. Bika manpikin e wisiwasi den papa, èn umapikin e meki trobi nanga den mama. Wefi e meki trobi nanga a mama fu den masra. Sma abi feanti na ini den eigi osofamiri” (Mika 7:5, 6). Yu e libi na ini wan grontapu pe na osofamiri-libi no e waka bun, ma yu du tranga muiti fu sorgu taki a sani disi no pasa nanga yu. A sani disi yepi yu fu kon abi wan koloku osofamiri-libi soleki fa Gado wani. Kande yu du san skrifi na ini tekst soleki Deuteronomium 6:5-9, Efeisesma 5:22–6:4, nanga Kolosesma 3:18-21. Ma yu ben sabi taki den buku fu den 12 profeiti abi rai di kan yepi yu fu kon abi wan koloku osofamiri-libi? Na ini a kapitel disi, wi o poti prakseri na wan tu fu den rai dati di de fu feni na ini den buku disi. Ma yu no musu luku den rai dati wawan. Pruberi fu kon sabi sortu tra sani yu kan leri fu den buku disi. Na a kaba fu a kapitel disi, wan tu tekst skrifi di o yepi yu fu teki leri fu den 12 buku disi.

A „NO LOBI BROKOTROW KWETIKWETI”

3, 4. (a) Fa furu sma na ini a ten disi e pruberi fu lusu problema na ini den trowlibi? (b) Sortu fowtu denki sma na ini a ten fu Maleaki ben abi fu a trowlibi?

³ A fosi sani di wi o luku, na a matifasi na mindri wan masra nanga en wefi. No so langa pasa, sma no ben gaw fu broko trow te den ben abi problema na ini a trowlibi. Sma no ben e kisi primisi makriki fu broko trow. Na ini a di fu 19 yarihondro, a ben de so taki te wan sma na ini Ingrisikondre ben wani broko trow, dan den ben musu kisi primisi fu na asamblei. Na so na osofamiri no ben e broko makriki. Ma now sani de heri tra fasi. Wan buku e taki: „Sensi a Di Fu Tu Grontapufeti, moro nanga moro sma na ini furu kondre e broko trow . . . Sma e denki heri tra fasi now fu brokotrow . . . èn furu sma feni a sani dati bun” (Encyclopædia Britannica). Srefi na ini kondre soleki Korea, pe sowan tin yari pasa sma no ben e broko trow makriki, a sani disi kon tron wan aladei sani. Na ini a ten disi, sma na ini furu kondre feni taki a bun te sma di abi problema na ini a trowlibi e broko trow.

⁴ Na a ten fu Maleaki na ini a di fu feifi yarihondro Fosi Krestes, furu Dyu ben e broko trow. Maleaki ben taigi den: „Yehovah srefi si fa unu ben e bedrigi un wefi di unu ben teki sensi di unu yongu.” Fu di den masra ben e bedrigi den wefi fu den, meki den uma ’ben e geme èn den ben e krei langalanga watra-ai’ na a altari fu Yehovah. Boiti dati, den kruka priester ben e tapu ai gi den ogri-ati sani dati!​—Maleaki 2:13, 14.

5. (a) Fa Yehovah e denki fu brokotrow? (b) Fu san ede a de wan seryusu sani te wan sma e bedrigi en trowpatna?

⁵ Fa Yehovah ben feni a takru denki di sma na ini a ten fu Maleaki ben abi fu a trowlibi? „’Mi no lobi brokotrow kwetikweti’, na so Yehovah, a Gado fu Israel taki.” Maleaki ben taki tu dati Yehovah „no kenki” (Maleaki 2:16; 3:6). Yu e frustan san den tekst disi wani taki? Gado ben sori kaba taki a no lobi te sma e broko trow (Genesis 2:18, 24). Na so a ben e denki na ini a ten fu Maleaki èn na so a e denki ete na ini a ten disi. Son sma ben kan bosroiti fu broko trow, soso fu di den no feni a patna fu den bun. Awansi fa den ati lai triki, toku Yehovah e ondrosuku en (Yeremia 17:9, 10). A sabi sortu triki sma kan gebroiki fu broko trow, awansi fa den e pruberi fu sori taki den abi leti fu du dati. Iya, „a sma di wi musu gi frantwortu, e si ala sani krin èn nowan sani kibri gi en”.​—Hebrewsma 4:13.

6. (a) Te yu abi a srefi denki leki Yehovah, dan fa yu o si brokotrow? (b) San na a moro prenspari sani di Yesus ben wani leri wi di a ben taki fu brokotrow?

⁶ Kande a trowlibi fu yu e waka bun, ma toku a bun fu hori na prakseri fa Yehovah e denki fu a trowlibi. Ala sma abi en fowtu, sobun wi kan fruwakti taki problema nanga kesekese sa de na ini a trowlibi. Ma yu ben o bosroiti fu broko trow, soso fu di yu wani lusu den problema fu yu esi-esi? Te yu nanga yu patna e meki trobi, dan yu ben o taigi en taki yu wani broko trow? Furu sma du dati, ma te wi sabi fa Gado e denki fu a trowlibi, dan dati musu gi wi deki-ati fu du moro muiti fu meki a trowlibi waka bun. A tru taki Yesus Krestes ben taki dati wán sani nomo e gi sma a reti fu broko trow, èn dati na hurudu. Hurudu na ala sortu seks demakandra di wan sma abi nanga wan trawan di no de en trowpatna. Ma san na a moro prenspari sani di Yesus ben wani leri wi? A ben taigi den sma di ben e arki en: „San Gado tyari kon na wán nowan sma musu prati.” Iya, Yesus ben sori taki a wèt di Yehovah ben meki Maleaki skrifi sowan 450 yari na fesi, ben teri ete.​—Mateyus 19:3-9.

7. Fa a rai na ini Maleaki kan yepi yu fu kon abi wan bun matifasi nanga yu trowpatna?

⁷ Ma fa wan Kresten kan tan abi wan bun matifasi nanga en trowpatna? Maleaki ben gi wi a rai disi: „Un musu luku bun sortu denki unu abi èn unu no musu du ogri nanga trawan” (Maleaki 2:16). Dati wani taki dati wi musu luku bun nanga den firi di wi abi na ini wi ati. Efu wi e ’luku bun nanga a denki fu wi’, dan wi no o poti tumusi furu prakseri na wan sma di no de wi trowpatna (Mateyus 5:28). Kon meki wi taki dati wi e firi switi te wan sma di no de wi trowpatna e gi wi a firi taki a lobi wi. Disi ben o sori taki wi no e luku bun nanga a denki fu wi. Dati meki wan prenspari sani di o yepi wi fu kon abi wan bun matifasi nanga a trowpatna fu wi, na a rai di den 12 profeiti e gi wi fu luku bun nanga a ’denki fu wi’.

8, 9. Fu san ede a tori fu Hosea nanga Gomer skrifi na ini Bijbel?

⁸ A no de fu taki dati yu abi a fasti bosroiti fu sorgu taki a trowlibi fu yu e tan waka bun. Toku yu sa kisi problema na ini a trowlibi. San yu kan du te problema e opo kon, spesrutu te yu feni taki na a patna fu yu abi a fowtu? Memre san wi ben leri kaba fu Hosea na ini kapitel 2 nanga 4 fu a buku disi. Hosea en wefi, Gomer, ben tron ’wan uma di ben e du hurudu’ èn bakaten a hari go „na baka den freiri fu en”. Bakaten den freiri fu en gowe libi en, a kon pôti èn a tron wan srafu. Hosea teki Gomer baka aladi a no ben makriki gi en, èn a kisi a rai fu sori lobi gi en. Fu san ede? Fu prenki san ben e pasa na mindri Yehovah nanga Israel. Yehovah ben de leki wan „masra” gi en pipel, èn den ben de leki wan wefi gi en.​—Hosea 1:2-9; 2:5-7; 3:1-5; Yeremia 3:14; Yesaya 62:4, 5.

⁹ Frukufruku kaba, den Israelsma ben meki Yehovah firi sari fu di den ben go anbegi tra gado (Eksodes 32:7-10; Krutuman 8:33; 10:6; Psalm 78:40, 41; Yesaya 63:10). A tin-lo kownukondre na noordsei ben du wan tumusi takru sani di den anbegi wan pikin kaw (1 Kownu 12:28-30). Boiti dati, den Israelsma no ben e poti frutrow tapu Yehovah, a Masra fu den, ma den ben e suku yepi na politiek makti. Wan ten ben de taki den ben e hari go na baka Asiria, neleki wan krasi sabanaburiki (Hosea 8:9). Fa yu ben o firi efu yu trowpatna ben o tyari ensrefi na a fasi dati?

10, 11. Efu sani no e waka bun na ini yu trowlibi èn a fowtu de na yu patna, dan fa yu kan du leki Yehovah?

¹⁰ Na a ten fu Hosea, moro leki 700 yari ben pasa sensi den Israelsma ben meki wan frubontu nanga Yehovah. Toku Gado ben de klariklari fu gi den pardon efu den ben o drai kon baka na en. A kan taki Hosea bigin du profeitiwroko bifo 803 Fosi Krestes. Sobun Yehovah tan hori pasensi nanga Israel moro leki 60 yari langa èn a du dati moro leki 200 yari langa nanga Yuda! Yehovah ben gebroiki a situwâsi fu Hosea en osofamiri leki wan agersitori fu gi a pipel fu en deki-ati fu sori berow. Aladi a ben abi bun reide fu broko trow nanga Israel, toku a tan seni profeiti fu go yepi na agersi wefi fu en fu drai kon baka na en. Yehovah ben du dati aladi a no ben makriki gi en.​—Hosea 14:1, 2; Amos 2:11.

¹¹ Efu yu abi problema na ini yu trowlibi, èn na a patna fu yu abi a fowtu, dan yu ben o du a srefi sani di Yehovah du? Yu ben o meki muiti fu meki en bun baka nanga a trowpatna fu yu? (Kolosesma 3:12, 13) Yu musu abi sakafasi fu man du dati. A no de fu taki dati a fasi fa Yehovah handri nanga den Israelsma na wan moi eksempre gi wi! (Psalm 18:35; 113:5-8) Gado ’ben taki na wan switi fasi nanga den Israelsma’, èn a begi den srefi. Wi leki sondu libisma abi moro reide fu taki na wan switi fasi nanga a trowpatna fu wi, a no so? Iya, wi abi moro reide fu lusu problema èn fu tapu den fowtu fu makandra. A moi fu sabi taki a muiti di Yehovah du ben abi bun bakapisi. Wan grupu sma di ben tan abra fu a pipel dati ben opo den ati di den ben de na ini katibo na Babilon, èn bakaten den drai go baka na den kondre, èn den kari Yehovah ’Mi trowmasra’.​—Hosea 2:14-16.a

12. Te yu e denki dipi fu a fasi fa Yehovah ben handri nanga na agersi wefi fu en, dan fa dati kan yepi yu na ini yu trowlibi?

¹² Efu wan seryusu problema e opo kon, dan a tranga muiti di yu e du fu meki sani bun baka nanga a trowpatna fu yu o tyari wini kon. Aladi na agersi wefi fu Gado ben du wan bigi sondu, toku Gado ben de klariklari fu gi en pardon. Te yu luku en bun, a pipel ben du hurudu, fu di den ben go anbegi falsi gado. Nofo tron den problema di tru Kresten abi na ini a trowlibi, no bigi so. Furu problema e bigin fu di trowpatna e taigi makandra hati sani. Sobun, efu yu trowpatna taigi yu sani di e hati yu, dan prakseri san ben miti Hosea èn sosrefi Yehovah (Odo 12:18). A sani dati kan yepi yu fu gi yu trowpatna pardon.

13. Te wi e luku taki Yehovah ben wani taki a tranga-ede pipel fu en sori berow, dan san wi kan leri fu dati?

¹³ Ete wan sani de di wi kan leri fu a tori disi. Yu denki taki Gado ben de klariklari fu meki sani bun baka nanga en pipel, aladi den ben e tan du hurudu? Luku san Gado ben taigi Hosea fu a pipel disi: „Meki a tapu nanga a huru di a e huru, èn no meki a du sutadu moro” (Hosea 2:2). A pipel ben musu sori berow èn den ben musu ’du sani di e sori taki den abi berow’ (Mateyus 3:8). Sobun, na presi taki yu e poti prakseri nomo na den fowtu fu yu trowpatna, luku yu eigi fowtu. Efu yu du wan hati sani nanga yu trowpatna, dan a bun te yu e pruberi fu meki sani bun baka nanga en. Te yu e begi en pardon èn kenki den fasi fu yu, dan kande a sa gi yu pardon.

GEBROIKI DEN „TITEI FU LOBI” TE YU E GI PIRI-AI

14, 15. (a) Te yu e luku Maleaki 4:1, dan fu san ede yu musu si en leki wan seryusu frantwortu fu gi yu pikin leri? (b) Fa yu kan yepi den pikin fu yu fu kon sabi Yehovah?

¹⁴ A fasi fa Yehovah ben e libi nanga den Israelsma e leri wi moro sani di wi kan fiti na ini na osofamiri-libi, soleki fa wi kan si na ini den 12 profeiti. Den buku disi e sori wi fa fu yepi den pikin fu wi. A no makriki srefisrefi fu kweki pikin na ini a ten disi. Papa nanga mama musu si a frantwortu fu den leki wan seryusu sani. Bijbel e taki: „Yehovah di e tiri den legre taki: . . . ’A dei di e kon o bron [sma] gowe, so taki nowan rutu noso taki fu den tan abra’” (Maleaki 4:1). Na a krutudei dati, Yehovah o luku fa papa nanga mama (den rutu) ben libi, dan a o bosroiti fa a o krutu den yongu pikin fu den (den taki), fu di na papa nanga mama abi a frantwortu fu kweki den pikin disi (Yesaya 37:31). Na a fasi fa papa nanga mama e libi o sori efu sani o waka bun nanga den yongu pikin fu den (Hosea 13:16). Efu yu (a rutu) no abi wan bun nen na Yehovah, dan san o pasa nanga yu yongu pikin (den taki) na a bigi dei fu en atibron? (Sefanya 1:14-18; Efeisesma 6:4; Filipisma 2:12) Ma a muiti di yu e du fu sorgu taki Yehovah feni yu bun kan tyari wini kon gi den yongu pikin fu yu.​—1 Korentesma 7:14.

¹⁵ Baka di na apostel Paulus ben taki fu a profeititori fu Yoèl di e sori o prenspari a de fu kari a nen fu Yehovah, dan a skrifi: „Fa den o kari en efu den no bribi na ini en? Fa den o bribi na ini en efu den no yere fu en?” (Romesma 10:14-17; Yoèl 2:32) Paulus ben e taki fu a preikiwroko fu wi, ma yu kan fiti a rai disi tu te yu e gi yu pikin leri. Fa den kan poti bribi na ini Yehovah efu den no yere fu en? Yu e teki nofo ten ibri dei fu leri yu pikin o bun Yehovah de? Yu e yepi den fu kon abi tranga lobi gi en èn gi a tiri di a gi den? A no de fu taki dati sani o waka bun nanga yonguwan te den gwenti yere sma na oso e taki fu Yehovah.​—Deuteronomium 6:7-9.

16. Soleki fa Mika 6:3-5 e sori, dan fa yu kan teki na eksempre fu Yehovah te yu e gi den pikin fu yu piri-ai?

¹⁶ Te pikin de yonguyongu, dan a no muilek fu kisi den fu go na Kresten konmakandra. Ma te den e kon moro bigi, dan den e bigin kisi den eigi denki. San yu musu du efu wanwan leisi den pikin fu yu e bigin opo densrefi teige yu? Yu kan teki leri fu den 12 profeiti te yu e luku fa Yehovah ben handri nanga Israel nanga Yuda (Sakaria 7:11, 12). Fu eksempre, te yu e leisi Mika 6:3-5, dan luku fa Yehovah e taki nanga a pipel fu en. Den Israelsma ben du sondu, ma toku Gado e kari den „mi pipel”. A begi den: „Grantangi mi pipel, memre . . . ” A no krutu den, ma a pruberi fu doro den ati. Fu san ede yu no e teki na eksempre fu Yehovah te yu e gi den pikin fu yu piri-ai? Awansi sortu fowtu den meki, no taigi den hati sani, ma meki den firi taki yu lobi den. No krutu den, ma begi den tangitangi fu kenki den fasi fu den. Poti aksi gi den fu kon sabi fa den e denki. Pruberi fu doro den ati so taki den e taigi yu fa den e firi.​—Odo 20:5.

17, 18. (a) Fu san ede yu musu gi den pikin fu yu piri-ai? (b) Fa yu kan tan tyari den pikin fu yu nanga den „titei fu lobi”?

¹⁷ Fu san ede yu e gi den pikin fu yu piri-ai? Son papa nanga mama e du dati fu di den no wani meki na osofamiri kisi syen. Yehovah e sori fu san ede a ben gi a pipel fu en piri-ai: „Mi leri Efrayim fu waka. Nanga mi anu mi ben opo en, . . . Nanga titei fu libisma, iya, nanga titei fu lobi mi ben e tyari mi pipel” (Hosea 11:3, 4). Na ini a tekst disi, Hosea e agersi a matifasi di Yehovah abi nanga Israel, nanga a matifasi di wan papa abi nanga a manpikin fu en. Yu e si kaba fa wan lobi papa noso mama fu owruten ben e yepi a pikin fu en fu waka nanga titei di a ben e hori na ini en anu? Te a pikin ben naki futu, dan den titei ben e hori en fu a no fadon, èn den e tyari en tu pe a ben musu waka.​—Yeremia 31:1-3.

¹⁸ Yu sa sori a srefi lobi di Gado ben sori gi den Israelsma? Ibri tron baka den ben e drai baka gi Gado, ma a no ben de gaw fu lusu den titei fu lobi. Son leisi na pikinpikin sani e meki taki yonguwan e naki futu, ma tan gebroiki den titei fu lobi fu yepi den. Hori na prakseri taki aladi Yehovah ben lobi en pipel, toku a no tapu ai gi den ogri di den du. A poti prakseri na a sondu fu den, a gi den piri-ai na wan lobi-ati fasi, èn a teki ten fu gi den a yepi di den ben abi fanowdu. Efu yu e si taki yu manpikin noso yu umapikin e suku fu drifi komoto fu a tru anbegi, dan no tapu ai gi a sani dati. Pruberi fu tyari en kon baka na wan lobi-ati fasi. Iya, gebroiki den titei fu lobi fu yepi en na ini a muilek pisi ten disi. Meki ten gi den pikin fu yu di abi problema. A sani disi prenspari srefisrefi. Meki ten gi den!

19. Fu san ede yu no musu lasi howpu gi yu pikin?

¹⁹ Hosea ben si na fesi taki wan grupu Israelsma di ben tan abra ben o gi yesi na a rai fu Gado. A ben taki: „Den Israelsma o drai kon baka èn den o suku Yehovah, a Gado fu den, nanga David, a kownu fu den. Beifibeifi den o kon na Yehovah meki a sori den bun-ati na a kaba fu a pisi ten dati” (Hosea 3:5). Iya, den Israelsma di ben tan abra ben teki a piri-ai di Gado ben gi den. Abi a frutrow taki yu pikin o du dati tu. Pruberi fu si den bun fasi fu den. Taki na wan switi fasi nanga den, ma tan hori yusrefi na den leri fu Bijbel. Awansi a pikin fu yu trangayesi now, toku a kan taki a o gi yesi bakaten.

LUKU BUN NANGA TAKRU KOMPE!

20. Sortu aksi fu yonguwan e kisi piki na ini den buku fu den 12 profeiti?

²⁰ San yonguwan kan leri fu den 12 profeiti? Kande yu papa nanga mama lobi kari 1 Korentesma 15:33 te den e warskow yu gi takru kompe. Ma kande sonwan fu unu e aksi unsrefi: ’A de wan takru sani trutru fu de mati nanga sma di no e anbegi Yehovah?’ We, yu kan kisi piki tapu na aksi dati na ini den buku fu den 12 profeiti.

21-23. (a) San yongu sma kan leri fu a fasi fa den Edomsma ben tyari densrefi? (b) Suma na yu trutru mati?

²¹ Aladi den buku fu den 12 profeiti moro furu abi fu du nanga a pipel fu Gado, toku a buku Obadya e taki fu den Edomsma di Bijbel e kari brada fu den Israelsma (Deuteronomium 2:4).b Tra fasi leki furu fu den tra profeiti buku, Obadya e taki langalanga nanga den Edomsma. Prakseri a pipel disi. A ben de na a ten fu 607 Fosi Krestes di den Babilonsma ben e lontu Yerusalem. Aladi den Edomsma ben de famiri fu Yakob, toku den ben horibaka gi den Babilonsma! „Broko a foto! Broko en te na gron!”, na dati den Edomsma ben e bari (Psalm 137:7; Obadya 10, 12). Den ben e meki mofo fu teki a kondre fu Yuda abra. Den ben e nyan srefi nanga den Babilonsma, èn na ini den Owstusei kondre a sani dati ben kan sori taki den tu pipel disi ben meki wan frubontu.

²² Luku san Obadya e taki fu den Edomsma: „Den srefi sma [den Babilonsma] di meki wan frubontu nanga unu, kori unu. Den sma di libi bun nanga unu, kon wini unu. Den sma di e nyan nanga unu, o poti wan nèt fu fanga unu, fu di unu de leki wan sma di no abi koni” (Obadya 7). San pasa nanga den Edomsma di ben drai baka gi den brada, Yakob, èn di tron mati fu den Babilonsma? Te fu kaba, den Babilonsma di ben de na ondro a tiri fu Nabonidus, pori den Edomsma. Na a ten fu Maleaki, Gado ben meki den bergi fu Edom tron wan brokopresi pe soso sabanadagu ben e tan.​—Maleaki 1:3.

²³ Prakseri den sma di e taki dati den na yu mati èn di no e anbegi Yehovah. Yu no si taki ’den srefi boi [noso meisje] di meki wan frubontu’ nanga makandra nofo tron e bedrigi makandra èn e „poti wan nèt fu fanga” den mati fu den? Te yu kon si taki na kori den e kori yu, dan san den e taki? Kande den sa feni taki den mati di den kori lobi bribi ala sani, èn taki den no koni nofo fu si te trawan e bedrigi den. Na a srefi sani disi den Babilonsma ben du nanga den mati fu den, den Edomsma! Yu denki taki den sortu mati dati ben o broko den ede trutru nanga yu te problema ben o miti yu? (Obadya 13-16) Ma prakseri Yehovah Gado nanga a pipel fu en na ini a ten disi. Ala ten Yehovah de klariklari fu yepi yu. A o horibaka gi yu na ini muilek ten. A pipel fu en sori tu taki den na ’trutru mati di e sori lobi ala ten’ èn taki den na brada „di gebore fu te nowtu de”.​—Odo 17:17.

WARDERI A MORO PRENSPARI MATIFASI DI DE

24, 25. San musu de a moro prenspari sani na ini wi libi?

²⁴ Iya, a matifasi di famiriman abi nanga makandra prenspari srefisrefi, èn a bun te wi e meki a kon moro tranga. Den 12 profeiti e leri wi furu sani di kan yepi wi fu du dati. A ben o bun fu ondrosuku den buku disi èn fu luku san yu kan leri fu den. Disi o yepi yu fu kon sabi moro bun fa yu kan kon abi wan moro bun osofamiri-libi. Ma yu denki taki wan koloku osofamiri-libi na a moro prenspari sani gi den anbegiman fu Gado na ini a ten disi?

²⁵ A moi fu sabi san Yoèl ben taki fu a dei fu Yehovah di de krosibei: „Tyari a pipel kon na wán. Meki den kon santa. . . . Meki a trowmasra komoto fu en kamra èn meki a trowmisi komoto fu en kamra tu” (Yoèl 2:15, 16). Ibri sma na ini na osofamiri ben musu kon makandra fu anbegi Yehovah. Srefi sma di no ben trow so langa ete! Nowan enkri sani musu de moro prenspari gi wi leki fu kon makandra gi na anbegi fu Gado. Fu di a dei fu Yehovah e kon esi-esi, meki wi musu si en leki wan tumusi prenspari sani fu abi wan bun nen na Gado. Na ini a lasti pisi fu a buku disi, wi o luku sortu sani wi musu du nanga prisiri na ini a ten disi.