„Mi lobi a Tata”

1, 2. San na apostel Yohanes tyari kon na krin fu a lasti neti di den apostel ben de makandra nanga Yesus?

WAN owru man e dopu en pen go na ini enki èn a e prakseri furu sani di pasa fositen. A man disi na Yohanes, èn en na a lastiwan di de na libi ete fu den apostel fu Yesus Krestes. Now a abi pikinmoro 100 yari èn a e prakseri wan prenspari sani di pasa sowan 70 yari kaba. A e prakseri a lasti neti di en nanga den tra apostel ben de nanga Yesus bifo a dede. Nanga yepi fu a santa yeye fu Gado, Yohanes man memre finifini san ben pasa a neti dati èn a e skrifi den sani dati.

² A neti dati, Yesus ben taki krin taki heri esi sma ben o kiri en. Na Yohanes wawan skrifi fu san ede Yesus taki dati a de klariklari fu dede na wan ogri-ati fasi. Yohanes skrifi: „Fu meki grontapu sabi taki mi lobi a Tata, meki mi e du san a Tata taigi mi fu du. Opo, kon meki wi gowe fu dya.”​—Yohanes 14:31.

3. Fa Yesus sori taki a lobi en Tata?

³ „Mi lobi a Tata.” Noti ben de moro prenspari gi Yesus leki a sani dati. A no ben e taki a sani dati ibri tron baka fu sori o prenspari a de. Fu taki en leti, Yohanes 14:31, na a wan-enkri tekst na ini Bijbel pe Yesus e taki krin dati a lobi en Tata. Ma Yesus ben du sani fu sori taki a lobi en Tata. A lobi di a ben abi gi Yehovah ben de fu si ibri dei. A deki-ati di Yesus ben abi, a fasi fa a ben gi yesi, èn a fasi fa a horidoro, ben de buweisi di e sori taki a lobi Gado. Ala sani di a ben du na ini a diniwroko fu en, ben de fu di a ben abi a lobi disi.

4, 5. Sortu lobi wi musu abi soleki fa Bijbel e sori, èn san wi kan taki fu a lobi di Yesus ben abi gi Yehovah?

⁴ Na ini a ten disi, son sma feni taki lobi na wan swakifasi. Kande den e denki fu lobi puwema nanga lobisingi pe sma e sori tranga lobifiri fu wan momenti nomo. Bijbel e taki fu a lobi disi tu, ma a e du dati na wan moro lespeki fasi leki fa sma e du dati na ini a ten disi (Odo 5:15-21). Ma Gado Wortu e taki moro fu wan tra sortu lobi. A lobi disi a no wan switi firi nomo di e tan fu wan pisi ten, èn a no abi fu du nanga den rai di sabiman e gi fu a fasi fa sma musu sori lobi. A lobi disi abi fu du nanga na ati èn nanga a frustan. A e komoto fu na ati èn a e kruderi nanga hei gronprakseri. Boiti dati wan sma e sori a lobi disi nanga den bun sani di a e du. A lobi disi no e tan fu wan pisi ten nomo. Bijbel e taki: „Lobi no e kaba noiti.”​—1 Korentesma 13:8.

⁵ Fu ala libisma di ben de na grontapu, Yesus na a sma di lobi Yehovah moro. Yesus srefi ben taki dati a moro bigi komando fu Gado na: „Yu musu lobi Yehovah yu Gado nanga yu heri ati, nanga yu heri sili, nanga yu heri frustan, èn nanga ala yu krakti” (Markus 12:30). Nowan sma du a sani disi so bun leki Yesus. Fa Yesus ben kon abi a lobi disi? Fa a sorgu taki a tan abi wan tranga lobi gi Gado di a ben de na grontapu? Fa wi kan waka baka na eksempre fu en?

Noiti ete tu sma lobi makandra so

6, 7. Fa wi du sabi taki Odo 8:22-31 no e taki fu koni nomo, ma a e taki fu Gado Manpikin?

⁶ Yu nanga wan mati kon moro bun baka di unu du wan wroko makandra? Efu dati de so, dan a moi sani dati di yu ondrofeni kan yepi yu fu frustan sortu lobi ben kon de na mindri Yehovah nanga en wan-enkri Manpikin. Wi taki furu leisi kaba fu Odo 8:30, ma meki wi go luku den tra vers lontu a tekst disi moro fini. Na ini vers 22 te go miti 31, Bijbel e taki fu koni leki a de wan sma. Fa wi du sabi taki den wortu disi abi fu du nanga Gado Manpikin?

⁷ Na ini vers 22, koni e taki: „Na Yehovah srefi meki mi. Mi ben de a fosi sani di a meki, iya, a fosiwan fu ala den sani di a meki langa ten pasa.” A tekst no kan taki fu koni nomo, fu di noiti koni ben „meki”. Koni no ben abi wan bigin, fu di Yehovah noiti no abi wan bigin, èn ala ten a ben koni (Psalm 90:2). Ma a Manpikin fu Gado, na „a fosiwan fu ala sani di Gado meki”. Gado ben meki en èn a de a fosiwan fu ala sani di Yehovah meki (Kolosesma 1:15). A Manpikin ben de kaba bifo grontapu nanga hemel ben meki, soleki fa skrifi na ini Odo. Leki a Wortu, noso a Takiman fu Gado, en na a wan-enkri sma di sori a koni fu Yehovah dorodoro.​—Yohanes 1:1.

8. San a Manpikin ben du fosi a kon na grontapu, èn san wi kan prakseri te wi e fruwondru fu den moi sani na hemel èn na grontapu?

⁸ San a Manpikin ben e du na ini den milyunmilyun yari fosi a kon na grontapu? Vers 30 e taki dati a ben de sei Gado leki „wan tumusi bun wrokoman”. San dati wani taki? Kolosesma 1:16 e taki: „Nanga yepi fu en, Gado meki ala tra sani na hemel èn na grontapu . . . Gado meki ala tra sani nanga yepi fu en èn gi en.” Sobun, Yehovah, a Mekiman, gebroiki en Manpikin, a Tumusi Bun Wrokoman, fu meki ala tra sani. Iya, nanga yepi fu en a meki den yeye na hemel, ala tra sani na hemel, èn a grontapu nanga den furu difrenti bon nanga meti. Boiti dati, a yepi fu meki a moro moiwan fu ala mekisani na grontapu, èn dati na libisma. Fu taki en leti, a fasi fa a Tata wroko makandra nanga en Manpikin, wi kan agersi nanga a fasi fa tu sma e wroko makandra fu bow wan oso. A wan sma e kon nanga a prakseri fa na oso musu bow èn a trawan e bow na oso soleki fa a sma poti na tapu papira. Te wi e fruwondru fu den furu sani di Gado meki, dan fu taki en leti wi e prèise a Sma di ben kon nanga a prakseri fa fu meki den sani dati (Psalm 19:1). Ma wi kan prakseri tu fa a Mekiman nanga en „tumusi bun wrokoman” ben de nanga prisiri di den ben e wroko so langa nanga makandra.

9, 10. (a) San meki taki Yehovah nanga en Manpikin kon abi so wan tranga lobi gi makandra? (b) San kan meki taki yu kisi moro lobi gi yu hemel Tata?

⁹ Te tu sondu libisma e wroko krosibei nanga makandra, dan son leisi a muilek gi den fu feni en nanga makandra. Dati no de so nanga Yehovah nanga en Manpikin! A manpikin wroko milyunmilyun yari nanga en Tata èn ’ala ten a ben breiti, fu di a ben de nanga en’ (Odo 8:30). Iya, a Manpikin ben prisiri fu de nanga en Tata, èn a Tata ben firi so tu. A no de fu taki dati a Manpikin kon gersi en Tata moro nanga moro, fu di a ben leri fu sori den fasi fu Gado. Fu dati ede a no e fruwondru wi taki a Tata nanga a Manpikin kon abi so wan tranga lobi gi makandra! Nanga leti wi kan taki dati noiti ete tu sma lobi makandra so.

¹⁰ Ma san dati wani taki gi wi? Kande yu e denki taki noiti yu kan abi so wan matifasi nanga Yehovah. A tru taki nowan fu wi abi a hei posisi fu a Manpikin. Ma wi abi wan heri moi grani. No frigiti taki Yesus ben kon moro krosibei na en Tata, fu di a ben wroko makandra nanga en. Na wan lobi-ati fasi Yehovah e gi wi a grani fu „wroko makandra” nanga en (1 Korentesma 3:9). Aladi wi e teki na eksempre fu Yesus te a abi fu du nanga a diniwroko, toku ala ten wi musu hori na prakseri taki wi na sma di e wroko makandra nanga Gado. Na so fasi a lobi di wi abi gi Yehovah e kon moro tranga. Wan moro moi grani no de, a no so?

A fasi fa Yesus sorgu taki a tan abi wan tranga lobi gi Yehovah

11-13. (a) Fu san ede a bun fu si lobi leki wan sani di e libi, èn fa a yongu Yesus ben sorgu taki a tan abi wan tranga lobi gi Yehovah? (b) Fa a Manpikin fu Gado sori taki a wani teki leri fu Yehovah fosi a kon na grontapu, èn bakaten di a ben de na grontapu?

¹¹ A bun fu si a lobi na ini wi ati leki wan sani di e libi. Neleki fa wi musu kweki wan moi bromki èn sorgu en so taki a kan gro bun, na so wi musu kweki lobi tu so taki a e kon moro tranga. Te wi no e luku a bromki èn wi no e sorgu en, dan a o flaw èn te fu kaba a o dede. Yesus no ben e si a lobi di a abi gi Yehovah leki wan sani di e kon fu ensrefi. A ben sorgu taki a lobi fu en tan tranga di a ben de dyaso na grontapu. Meki wi go luku fa a du dati.

¹² Prakseri baka di a yongu Yesus ben taki sondro fu frede, di a ben de na a tempel na Yerusalem. Memre den sani di a ben taigi en papa nanga mama di ben bruya fu di den ben e suku en. A ben taki: „Fu san ede unu ben musu go suku mi? Unu no sabi taki mi musu de na ini na oso fu mi Tata?” (Lukas 2:49) Soleki fa a sori, dan leki wan yongu boi Yesus no ben man memre ete fa en libi ben de fosi a kon na grontapu. Toku a lobi di a ben abi gi en Tata, Yehovah, ben tranga srefisrefi. A ben sabi taki a e sori lobi gi en Tata te a e anbegi en. Sobun, nowan tra presi na grontapu ben de so prenspari gi Yesus leki na oso fu en Tata, di ben de a presi fu a tru anbegi. A ben lobi fu de drape, èn a ben sari fu gowe baka. Boiti dati a no ben e go sidon luku sani nomo. A ben wani leri moro fu Yehovah èn taki fu den sani di a sabi. A firi dati no ben kon di a ben abi 12 yari, èn a firi dati no gowe bakaten tu.

¹³ Fosi a Manpikin kon na grontapu, a ben de fayafaya fu teki leri fu en Tata. Wan profeititori di skrifi na ini Yesaya 50:4-6 e sori taki Yehovah gi en Manpikin spesrutu leri di abi fu du nanga den sani di a ben o du leki a Mesias. Aladi a ben musu leri tu sortu tesi ben o miti en leki a Salfuwan fu Yehovah, toku a Manpikin ben de fayafaya fu teki leri. Bakaten, di Yesus kon na grontapu èn a gro kon bigi, a tan abi a faya fu go na a oso fu en Tata fu anbegi en drape èn fu gi leri drape soleki fa Yehovah wani. Fu dati ede Bijbel e taki dati Yesus ben gwenti go na a tempel èn na a snoga (Lukas 4:16; 19:47). Efu wi wani tan abi wan tranga lobi gi Yehovah, dan wi musu de fayafaya fu go na den Kresten konmakandra pe wi e anbegi Yehovah, pe wi e kisi moro sabi fu en, èn pe wi e leri fu abi moro warderi gi en.

14, 15. (a) Fu san ede Yesus ben wani de en wawan son leisi? (b) Fa den begi fu Yesus e sori taki a ben lobi èn lespeki en Tata?

¹⁴ Yesus ben tranga a lobi di a abi gi Yehovah tu fu di a ben e begi doronomo. Aladi a ben de wan man di abi switifasi èn di a ben lobi fu abi demakandra nanga trawan, toku a moi fu si taki a ben feni en prenspari tu fu de en wawan. Fu eksempre, Lukas 5:16 e taki: „Ibri leisi a ben e go na a drei sabana fu begi.” Mateyus 14:23 e taki tu: „Baka di a seni den sma gowe, dan en wawan kren na tapu a bergi fu go begi. A ben lati kaba, ma toku en wawan ben drape.” Yesus ben wani de en wawan na den okasi disi èn na tra okasi tu. A no ben du dati fu di a ben e hori ensrefi aparti noso fu di a no lobi fu de makandra nanga trawan, ma a ben du dati fu di a ben wani de en wawan nanga Yehovah fu taigi en Tata san de tapu en ati.

¹⁵ Te Yesus ben begi, dan son tron a ben e gebroiki a wortu „Abba, Tata” (Markus 14:36). Na ini a ten fu Yesus, a wortu „Abba”, ben de wan moi wortu di sma ben gebroiki na ini na osofamiri fu kari den papa. Nofo tron disi ben de wan fu den fosi wortu di wan pikin ben leri. A wortu disi e sori taki wan pikin abi lespeki gi en papa. Boiti taki a wortu disi e sori o bun a Manpikin e taki nanga en Tata di a lobi, a e sori tu taki a Manpikin abi dipi lespeki gi Yehovah, en Tata. Na ini den begi fu Yesus di skrifi na ini Bijbel wi e si taki a lobi en Tata trutru èn a e lespeki en. Fu eksempre, na ini Yohanes kapitel 17, na apostel Yohanes skrifi a langa fayafaya begi di Yesus ben begi na a lasti neti fu en libi. A e naki wi ati trutru te wi e leisi a begi dati èn a de tumusi prenspari fu begi na a fasi dati tu. A no de so taki wi musu gebroiki den srefi wortu fu Yesus, ma wi musu pruberi fu taki san de tapu wi ati te wi e taki nanga wi hemel Tata, èn wi musu du dati so furu leki wi kan. Te wi e du dati, dan wi e sorgu taki wi tan abi wan tranga lobi gi en.

16, 17. (a) San Yesus ben taki fu sori taki a lobi en Tata? (b) Fa Yesus sori taki en Tata lobi fu gi sani?

¹⁶ Soleki fa wi si kaba, dan Yesus no ben taki den wortu disi ibri tron baka: „Mi lobi a Tata.” Ma furu leisi a ben taki sani fu sori taki a lobi en Tata. Fa so? Yesus srefi ben taki: „Mi Tata, Masra fu hemel nanga grontapu, mi e prèise yu na fesi ala sma” (Mateyus 11:25). Di wi ben studeri Pisi 2 fu a buku disi, dan wi si taki Yesus ben lobi fu prèise en Tata, fu di a ben yepi sma fu kon leri sabi En. Fu eksempre, a ben agersi Yehovah nanga wan papa di ben de klariklari fu gi en manpikin di ben libi wan yayolibi, pardon. A papa ben e wakti fu a yonkuman kon na oso baka, èn di a si en fu farawe, a lon go miti en èn a brasa en (Lukas 15:20). A no de fu taki dati a e naki na ati fu iniwan sma di e leisi a pisi disi pe Yesus e sori taki Yehovah abi lobi èn taki a de klariklari fu gi pardon.

¹⁷ Nofo tron Yesus ben e prèise en Tata fu di a Tata lobi fu gi sani. A ben gebroiki na eksempre fu sondu papa fu sori taki wi kan de seiker taki wi Tata sa gi wi en santa yeye te wi abi dati fanowdu (Lukas 11:13). Yesus ben taki sosrefi fu a howpu di a Tata e gi nanga En heri ati. Yesus srefi ben angri fu kisi a howpu di a ben abi, èn dati na taki a ben o kisi wan presi baka na sei en Tata na ini hemel (Yohanes 14:28; 17:5). A ben fruteri den bakaman fu en fu a howpu di Yehovah e gi a „pikin ipi” fu Krestes, èn dati na taki den o libi na ini hemel èn tiri makandra nanga a Mesias Kownu (Lukas 12:32; Yohanes 14:2). Boiti dati, a ben trowstu wan ogriman di ben de fu dede, nanga na howpu taki a o libi na ini Paradijs (Lukas 23:43). Te Yesus ben e taki na a fasi disi fu den sani di en Tata pramisi, dan dati seiker ben yepi en fu tan abi wan tranga lobi gi Yehovah. Furu bakaman fu Krestes kon si taki a moro bun sani di e yepi den fu kon kisi wan moro tranga lobi gi Yehovah èn wan moro tranga bribi, na te den e fruteri sma fu en èn fu a howpu di a e gi den.

Yu o lobi Yehovah neleki fa Yesus du dati?

18. San na a moro prenspari fasi fa wi musu waka baka Yesus, èn fu san ede wi musu du dati?

¹⁸ Difrenti fasi de fa wi musu waka baka Yesus. Ma a moro prenspari fasi na disi: Wi musu lobi Yehovah nanga wi heri ati, sili, frustan nanga krakti (Lukas 10:27). Wi no kan taki nomo dati wi lobi Yehovah trutru, ma wi musu luku tu o furu wi e du fu sori a lobi dati. A no ben de nofo gi Yesus fu firi taki a lobi en Tata, noso fu taki nomo „Mi lobi a Tata”. A ben taki: „Fu meki grontapu sabi taki mi lobi a Tata, meki mi e du san a Tata taigi mi fu du” (Yohanes 14:31). Satan taki dati nowan libisma ben o dini Yehovah fu di den lobi en trutru, ma fu di den e suku den eigi wini nomo (Yob 2:4, 5). Fu man gi a moro bun piki tapu na ogri-ati lei fu Satan, dan nanga deki-ati Yesus sori grontapu o furu a lobi en Tata. A gi yesi te na dede srefi. Yu o teki na eksempre fu Yesus? Yu o sori grontapu taki yu lobi Yehovah Gado trutru?

19, 20. (a) Sortu prenspari reide de fu san ede wi wani de doronomo na den Kresten konmakandra? (b) Sortu okasi wi e kisi te wi e studeri, te wi e denki dipi fu sani, èn te wi e begi?

¹⁹ A de fanowdu taki libisma sori lobi gi Yehovah, fu di na so den meki. Fu dati ede Yehovah seti sani gi wi fu anbegi en na wan fasi di o meki taki wi o kon abi wan moro tranga lobi gi a Tata. Te yu e go na den Kresten konmakandra, dan hori na prakseri taki yu de drape fu anbegi yu Gado. Wan tu sani di abi fu du nanga na anbegi dati, na taki yu e begi makandra nanga yu heri ati, yu e singi prèisesingi, yu e arki bun èn yu e teki prati te dati kan. Den konmakandra disi e gi yu na okasi tu fu gi yu Kresten brada nanga sisa deki-ati (Hebrewsma 10:24, 25). Te yu e anbegi Yehovah doronomo na den Kresten konmakandra, dan dati sa yepi yu fu abi wan moro tranga lobi gi Gado.

²⁰ Na so a de tu taki wi o kisi wan moro tranga lobi gi Gado te wi e studeri, te wi e denki dipi fu sani, èn te wi e begi. Si den sani disi leki okasi fu de yu wawan nanga Yehovah. Te yu e studeri a Wortu fu Gado èn te yu e denki dipi fu en, dan na so fasi Yehovah e meki yu kon sabi den prakseri fu en. Te yu e begi, dan yu e opo yu ati gi en. Hori na prakseri taki begi wani taki moro leki fu aksi Gado sani nomo. Begi na wan okasi tu fu taki Yehovah tangi fu den blesi di yu kisi èn fu prèise en fu den kefalek sani di a du (Psalm 146:1). Boiti dati, a moro bun fasi fa yu kan taki Yehovah tangi èn sori taki yu lobi en, na te yu e prèise en na fesi ala sma. Iya, du dati fayafaya èn nanga prisiri.

21. O prenspari a de fu lobi Yehovah, èn san wi sa go luku na ini den kapitel di e kon?

²¹ Lobi gi Gado na a moro prenspari sani di o meki yu de koloku fu ala ten. Lobi gi Gado na a wan-enkri sani di Adam nanga Eva ben abi fanowdu fu gi yesi, èn dati ben de a wan-enkri sani di den no ben kon abi. Lobi gi Gado na a moro prenspari sani di yu abi fanowdu fu pasa iniwan tesi di yu e kisi tapu yu bribi, fu kakafutu gi iniwan sani di kan meki yu fadon, èn fu horidoro te yu e kisi tesi. Dati na a moro prenspari sani fu man waka baka Yesus. A no de fu taki dati te wi lobi Gado, dan wi musu lobi tra sma tu (1 Yohanes 4:20). Na ini den kapitel di e kon, wi o go luku fa Yesus sori lobi gi tra sma. Na ini a tra kapitel wi sa go luku fu san ede so furu sma ben feni en makriki fu go na Yesus.