Gado e meki wan frubontu nanga Abraham

SOWAN 350 yari pasa sensi a Frudu na ini a ten fu Noa ben kon. Abraham fu owruten ben e libi na ini a moi èn gudu foto Ur, di de na ini a kontren di nen Irak now. Abraham ben de wan man di ben abi wan tranga bribi. Ma now a e kisi tesi tapu a bribi fu en.

Yehovah ben taigi Abraham fu gowe libi a kondre pe a gebore, èn fu froisi go na wan tra kondre, di ben kon de Kanan te fu kaba. Abraham gi yesi wantewante. A gowe makandra nanga en osofamiri, èn sosrefi en wefi Sara, nanga en brada pikin Lot. Baka di den waka wan langa pisi ten, den go tan na ini tenti na ini Kanan. Na ini wan frubontu di Yehovah meki nanga Abraham, a pramisi en taki a ben o meki Abraham tron wan bigi pipel, èn taki ala den famiri na grontapu ben o kisi blesi nanga yepi fu en. Boiti dati, a ben taigi Abraham taki den bakapikin fu en ben o kisi a kondre Kanan.

Sani ben go bun nanga Abraham nanga Lot. Den ben kon abi bun furu skapu nanga kaw. Sondro fu denki ensrefi, Abraham meki Lot teki sortu pisi kontren a ben wani. Lot ben teki a fatu pisi gron na a distrikt fu Yordan-liba èn a go libi krosibei fu a foto Sodom. Ma den man fu Sodom ben libi wan hurulibi, èn den ben du bigi sondu teige Yehovah.

Bakaten, Yehovah Gado gi Abraham a dyaranti taki den bakapikin fu en ben o kon de so furu leki den stari na hemel. Abraham poti bribi na ini a pramisi dati. Ma Abraham en lobi wefi, Sara, no ben meki pikin ete. Bakaten di Abraham ben abi 99 yari èn Sara pikinmoro ben abi 90 yari, Gado taigi Abraham taki Abraham nanga Sara ben o meki wan manpikin. Soleki fa Gado ben taki, dan Sara trutru ben meki Isak. Abraham ben abi tra pikin, ma nanga yepi fu Isak a Frulusuman di Gado ben pramisi na ini Eden, ben o kon.

Na a ten dati, Lot nanga en osofamiri ben e libi na ini Sodom. Ma a reti-ati man Lot no ben kon de leki den sma fu a foto di ben e libi wan hurulibi. Di Yehovah bosroiti fu krutu den sma fu Sodom, dan a seni engel fu warskow Lot gi a pori di ben o kon. Den engel ben de nomonomo taki Lot nanga en osofamiri lowe komoto na ini Sodom, èn den no ben musu drai luku go na baka. Baka dati, Gado meki faya nanga ston di e bron fadon komoto fu hemel kon na tapu Sodom nanga na ogri foto Gomora, di ben de krosibei. Na so ala den sma na ini den foto disi kisi pori. Lot nanga den tu umapikin fu en ben man lowe gowe. Ma a wefi fu Lot ben drai luku go na baka, kande fu di a ben angri fu den sani di a libi na baka. A lasi en libi fu di a no ben gi yesi.

​—Den tori disi teki puru fu Genesis 11:10–19:38.