KAPITEL 25

Fa mi kan tapu nanga a gwenti fu prei nanga mi syenpresi?

„Di mi ben abi aiti yari, mi kon kisi a gwenti fu prei nanga mi syenpresi. Bakaten mi kon sabi fa Gado e denki fu a sani disi. Ibri leisi te mi no ben man hori misrefi fu du en, mi ben e firi brokosaka. Mi ben e denki: ’Fa Gado kan lobi wan sma leki mi?’”​—Luiz.

TE YU abi sowan 12 yari, dan den seksfiri fu yu kan kon moro tranga. Dati meki yu kan kon abi a gwenti fu prei nanga yu syenpresi.a Furu sma feni taki a sani disi a no wan takru sani, fu di yu no e du nowan sma ogri. Ma toku a bun fu no bigin nanga a sani disi. Na apostel Paulus ben skrifi: „Sobun, kiri den difrenti pisi fu un skin di kan meki taki unu kisi . . . sekslostu” (Kolosesma 3:5). Te yu e prei nanga yu syenpresi, dan yu no e kiri den sekslostu. Na presi fu dati, yu e meki den kon moro tranga. Boiti dati, prakseri den sani disi:

● A gwenti fu prei nanga yu syenpresi kan meki yu kon tron wan sma di e denki ensrefi nomo. A momenti te wan sma e prei nanga en syenpresi, ala en prakseri de na den firi fu en wawan èn a no e denki nowan tra sani.

● Den sma di abi a gwenti fu prei nanga den syenpresi kan si trawan soso leki sani di den kan gebroiki fu abi seks.

● Fu di den sma di abi a gwenti disi e denki densrefi nomo, meki den kan kisi problema na ini den sekslibi te den trow.

Na presi fu prei nanga yu syenpresi teleki den seksfiri gowe, du muiti fu basi den seksfiri fu yu (1 Tesalonikasma 4:4, 5). Bijbel e gi wan moi rai di kan yepi yu na ini a tori disi. A e taki dati a moro bun fu no du sani di kan meki den seksfiri fu yu opo kon èn fu no poti yusrefi na ini den situwâsi dati (Odo 5:8, 9). Ma san yu kan du efu yu kon abi a gwenti kaba fu prei nanga yu syenpresi? Kande yu pruberi fu tapu nanga a sani disi, ma yu no man. Kande yu feni taki noiti yu o man kenki èn noiti yu o man libi soleki fa Gado wani. Na so wan boi di nen Pedro ben e denki fu ensrefi. A taki: „Ibri leisi te mi no ben man hori misrefi, mi ben e firi brokosaka. Mi ben denki taki noiti mi ben o man kisi pardon fu mi sondu. A ben muilek gi mi fu begi.”

Efu yu e firi so tu, no lasi-ati. Howpu de ete. Furu yongusma èn bigisma srefi ben man tapu nanga a gwenti fu prei nanga den syenpresi. Yu man du dati tu!

San yu kan du te yu abi konsensi fonfon

Soleki fa wi si kaba, dan furu sma e kisi konsensi fonfon te den abi a gwenti fu prei nanga den syenpresi. Disi kan meki den firi sari. Te yu e „sari na wan fasi di Gado feni bun”, dan disi kan meki taki yu o wani du moro muiti fu tapu nanga a gwenti disi (2 Korentesma 7:11). Ma te yu e sari tumusi, dan dati kan meki yu lasi-ati so te, taki yu no o wani feti nanga a takru gwenti disi moro.​—Odo 24:10.

Sobun, pruberi fu si a situwâsi fu yu leki fa a de trutru. Bijbel e sori taki a gwenti fu prei nanga yu syenpresi na wan sani di no krin. A kan meki yu tron wan srafu fu „ala sortu lostu” èn yu kan kisi tra gwenti tu di no bun (Titus 3:3). Toku a gwenti disi no de so wan bigi sondu leki hurudu noso sutadu (Yudas 7). Efu yu e feti nanga en, yu no abi fu denki taki yu du wan sondu di yu no man kisi pardon fu en. San prenspari, na taki yu musu tan feti nanga a takru gwenti disi èn taki yu no gi abra noiti!

Kande yu e firi brokosaka fu di yu no ben man tapu yusrefi fu du a sani disi baka. Toku awinsi yu no ben man hori yusrefi wan leisi, disi no wani taki dati yu na wan ogri sma. Dus no gi abra. Na presi fu dati, yu musu go luku san meki taki yu du a sani disi baka èn san yu kan du fu no du en moro.

Meki ten fu denki dipi fu a lobi nanga a sari-ati di Gado sori gi libisma. A psalm skrifiman David, di ben abi swakifasi tu, ben taki: „Neleki fa wan papa abi sari-ati nanga den manpikin fu en, na so Yehovah abi sari-ati nanga den sma di e anbegi en, bika Gado sabi heri bun fa wi meki. A e hori na prakseri taki na fu doti wi meki” (Psalm 103:13, 14). Dus Yehovah e hori na prakseri taki wi na sondusma èn a de ’klariklari fu gi wi pardon’ (Psalm 86:5). Ma a wani tu taki wi du muiti fu tron moro bun sma. Sobun, san yu kan du fu tapu nanga a gwenti disi?

Luku san yu e du fu abi prisiri. Yu e luku felem, telefisi programa, noso website di e meki den seksfiri fu yu opo kon? A psalm skrifiman ben taki wan koni sani di a begi Gado: „No meki mi ai si sani di no bun.”b​—Psalm 119:37.

Dwengi yusrefi fu denki tra sani. Wan Kresten di nen William taki: „Fosi yu o go sribi, leisi wan sani di abi fu du nanga Bijbel. A prenspari srefisrefi fu sorgu taki disi na a lasti sani di de na yu prakseri fosi yu go sribi.”​—Filipisma 4:8.

Taki nanga wan sma fu a problema fu yu. Kande yu e syen fu taki fu a tori disi nanga wan sma. Ma a kan de wan bigi yepi efu yu taki nanga wan sma di yu e frutrow! Dati na san wan Kresten di nen David kon si. A taki: „Wan leisi mi taki nanga mi papa di wi ben de wi wawan. Noiti mi o frigiti san a taki. A lafu eife, dan a taigi mi: ’Mi breiti taki yu taigi mi a sani disi.’ A ben sabi taki a no ben makelek gi mi fu taki fu a tori disi. Ma a sani di a taki gi mi deki-ati fu tan feti nanga a takru gwenti disi.

Dan mi papa sori mi wan tu Bijbeltekst di yepi mi fu si taki mi a no wan ogri sma, ma baka dati a sori mi wan tu tekst di meki mi frustan o seryusu a sani disi de. A taigi mi taki mi ben musu du muiti fu no du a sani disi wan pisi ten èn baka dati wi ben o taki fu a tori disi baka. A taigi mi tu taki mi no ben musu lasi-ati efu wan leisi mi no ben man hori misrefi. Na presi fu dati, mi ben musu tan meki muiti fu hori misrefi fu wan moro langa ten.” Te fu kaba David taki: „A ben de wan bigi yepi gi mi taki wan tra sma ben sabi sortu problema mi ben abi èn taki a ben pruberi fu yepi mi.”c

[Futuwortu]

PRENSPARI TEKST

„Wai pasi gi den lostu di yongu sma abi. Ma du muiti fu de wan reti-ati sma, fu abi bribi, fu sori lobi èn fu abi freide. Du dati makandra nanga den wan di e kari Masra nen nanga wan krin ati.”​—2 Timoteyus 2:22.

SAN YU KAN DU

Begi fosi den seksfiri fu yu kon tranga. Aksi Yehovah Gado fu gi yu „krakti di bigi pasa marki” fu man pasa a tesi disi.​—2 Korentesma 4:7.

YU BEN SABI A SANI DISI?

Nofo tron sma di no man dwengi densrefi e meki den seksfiri fu den basi den. Ma wan trutru man noso uma man dwengi ensrefi, awinsi a de en wawan.

SAN MI O DU

Mi kan tan abi krin prakseri efu mi ․․․․․

Na presi fu du nomo san mi e firi, mi o ․․․․․

Den sani di mi wani aksi mi papa noso mama fu a tori disi na ․․․․․

SAN YU E DENKI?

● Fu san ede a prenspari fu hori na prakseri taki Yehovah de „klariklari fu gi sma pardon”?​—Psalm 86:5.

● Gado meki libisma nanga seksfiri, ma a taki tu dati wi musu leri fu basi den firi fu wi. Sobun, san a sabi taki yu man du?

[Prenspari pisi]

Di mi tapu nanga a takru gwenti disi, mi kon abi wan krin konsensi na fesi Yehovah èn dati na wan sani di mi no wani lasi noiti!’’​—Sarah

[Prenki]

Te yu e lon èn yu fadon, dan yu no abi fu bigin na a bigin baka. Dus te yu no man hori yusrefi wan leisi, dan disi no wani taki dati ala a muiti di yu du fu tapu nanga a gwenti disi na fu soso.