Fa a Kownukondre preikiwroko fu wi orga?

Syatu fosi Yesus dede, a ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Ma fa a preikiwroko ben o man du na heri grontapu? Te wi e waka baka na eksempre fu Yesus di a ben de na grontapu.​—Lukas 8:1.

Wi e pruberi fu miti sma na den oso. Yesus leri den disipel fu en fu preiki a bun nyunsu na ibri oso (Mateyus 10:11-13; Tori fu den apostel 5:42; 20:20). Den preikiman fu a fosi yarihondro ben kisi wan spesrutu kontren pe den ben musu preiki (Mateyus 10:5, 6; 2 Korentesma 10:13). Na so a de tu na ini a ten disi taki a preikiwroko fu wi orga bun èn taki ibri gemeente kisi wan kontren pe den musu preiki. Disi e meki taki wi man du san Yesus ben taki „fu preiki gi a pipel èn fu fruteri den finifini” fu a bun nyunsu.​—Tori fu den apostel 10:42.

Wi e du muiti fu miti sma na ala presi. Yesus ben gi wi na eksempre tu fu preiki na presi pe furu sma e go, soleki na sesyoro noso na presi pe sma ben go teki watra (Markus 4:1; Yohanes 4:5-15). Wi e taki tu nanga sma fu Bijbel na ala presi, soleki na strati, na wenkri, na presi pe sma e go koiri, noso na telefon. Te wi e kisi wan okasi, dan wi e preiki tu gi sma na ini a birti, na wrokope, na skoro, èn gi famiriman. Den muiti disi di wi e du, meki taki milyunmilyun sma na heri grontapu yere ’a bun nyunsu taki sma o kisi frulusu’.​—Psalm 96:2.

Yu sabi wan sma di yu wani fruteri a bun nyunsu fu Gado Kownukondre? Yu wani fruteri en sortu howpu a kan abi? No hori a boskopu disi gi yusrefi, ma fruteri sma a boskopu disi so esi leki yu man!

• Sortu „bun nyunsu” wi musu preiki?

• Na sortu fasi Yehovah Kotoigi e preiki neleki Yesus?