KAPITEL 8
Den e lowe gi wan ogri-ati tiriman
YOSEF NANGA EN OSOFAMIRI E LOWE GO NA EGEPTE
YOSEF NANGA EN OSOFAMIRI E FROISI GO NA NASARET
Yosef e wiki Maria fu gi en wan prenspari nyunsu. Na ini wan dren wan engel taigi Yosef: „Opo, teki a yongu pikin nanga en mama èn lowe go na Egepte. Tan drape teleki mi piki yu baka. Bika Herodes o suku fu kiri a yongu pikin.”—Mateyus 2:13.
Wantewante Yosef nanga Maria e lowe nanga a pikin fu den na neti. Koloku taki den gowe wantewante, bika Herodes yere taki den lukuman kori en. A ben taigi den fu kon taigi en pe Yesus de, ma na presi fu du dati den lukuman drai go baka na a kondre fu den. Herodes ati bron srefisrefi. Fu di a wani kiri Yesus nomonomo, meki a e seni sma go na Betlehem èn na a heri kontren drape fu kiri ala den boi di no ben pasa tu yari ete. A du disi fu di den lukuman fu Owstusei ben taki dati Yesus sa abi a yari dati.
A de wan ogri-ati sani fu kiri ala den pikin boi! Wi no sabi omeni boi den kiri, ma a babari nanga a krei fu den mama di lasi den pikin fu den, na a kontru fu wan profeititori di Gado ben meki a profeiti Yeremia skrifi.—Yeremia 31:15.
Na a ten dati Yosef lowe nanga en osofamiri go na Egepte èn den tan libi drape. Wan neti wan engel fu Yehovah e kon na en baka na ini wan dren. A e taigi Yosef: „Opo, teki a yongu pikin nanga en mama èn go na a kondre Israel, bika den sma di ben suku fu kiri a yongu pikin, dede” (Mateyus 2:20). Dati meki Yosef e bosroiti taki en nanga en osofamiri kan drai go baka na den mamakondre. Na so wan tra profeititori na ini Bijbel e kon tru di e taki dati Gado ben o kari en Manpikin komoto na Egepte.—Hosea 11:1.
Soleki fa a sori, dan Yosef ben wani go tan baka na Yudea, kande krosibei fu a foto Betlehem pe den ben e tan, fosi den ben lowe go na Egepte. Ma a e yere taki Arkelayus, na ogri-ati manpikin fu Herodes na kownu fu Yudea now. Na ini wan dren Gado e warskow Yosef gi a sani disi. Fu dati ede, Yosef nanga en osofamiri e go moro fara na noordsei. Den e go tan na ini Nasaret, na ini a kontren fu Galilea di de farawe fu a tempel na ini Yerusalem. Na drape Yesus e gro kon bigi. Na so wan tra profeititori e kon tru di e taki: „Den o kari en wan Nasaretsma.”—Mateyus 2:23.