Frustan sortu frantwortu Krestes kisi fu Gado èn saka yusrefi na en ondro

„NA A bigin Gado meki hemel nanga grontapu” èn ala sani di a ben meki ben de „heri bun” (Gen. 1:1, 31). Di Yehovah meki libisma a pramisi den wan tumusi moi libi. Ma di Adam nanga Eva opo densrefi teige Gado na ini Eden, dan dati ben pori a prisiri fu libisma gi wan pisi ten. Toku a sani di Yehovah ben abi na prakseri gi grontapu èn gi a libisma famiri no ben kenki. Gado ben sori taki den bakapikin fu Adam di ben e gi yesi na en, ben o kisi frulusu te fu kaba. A tru anbegi ben o seti kon bun baka èn Gado ben o tyari wan kaba kon na Satan Didibri nanga ala den ogri di a du (Gen. 3:15). Ala sani o de „heri bun” baka, neleki na a bigin. Yehovah o du disi nanga yepi fu en Manpikin, Yesus Krestes (1 Yoh. 3:8). Fu dati ede, a de tumusi prenspari taki wi frustan sortu frantwortu Krestes kisi fu Gado èn taki wi saka wisrefi na en ondro.​—Tori 4:12; Fil. 2:9, 11.

SORTU FRANTWORTU KRESTES KISI?

² Te wi e prakseri a frantwortu di Krestes kisi fu Gado, dan wi musu hori na prakseri taki a frantwortu fu en abi fu du nanga difrenti sani. Yesus na a Frulusuman fu libisma, a Granpriester, na Edeman fu a Kresten gemeente, èn now en na Kownu fu Gado Kownukondre tu. Te wi e denki dipi fu den difrenti frantwortu disi, dan dati e yepi wi fu kisi moro warderi gi den sani di Gado seti èn a e meki wi kisi moro lobi gi Krestes Yesus. Bijbel e fruteri wi san na den difrenti frantwortu fu en.

³ Na a ten di Krestes ben de na grontapu, a ben de krin taki na en ben o yepi libisma fu kon bun baka nanga Gado (Yoh. 14:6). Leki a Frulusuman fu libisma, Yesus gi ensrefi leki wan lusu-paiman gi furu sma (Mat. 20:28). Yesus no sori wi nomo fa Gado wani taki wi musu libi. Ma en na a moro prenspari sma di Yehovah e gebroiki fu du san a abi na prakseri gi libisma. En na a wan-enkri sma di kan yepi wi fu kon bun baka nanga Gado (Tori 5:31; 2 Kor. 5:18, 19). Di Yesus dede leki wan srakti-ofrandi èn di a opo baka, dan a opo a pasi gi libisma di e gi yesi na Gado, fu kisi têgo blesi fu Gado Kownukondre di e tiri komoto fu hemel.

⁴ Leki Granpriester fu wi, Yesus „man frustan den swakifasi fu wi” èn a man yepi den sma na grontapu di e gi yesi na en fu kisi pardon fu den sondu. Na apostel Paulus ben taki: „Wi no abi wan granpriester di no man frustan den swakifasi fu wi. Ma wi abi wan granpriester di no ben abi sondu èn di kisi tesi na ala fasi neleki wi.” Dan Paulus gi den wan di e poti bribi na ini Yesus Krestes a deki-ati fu no lasi na okasi di den kisi fu kon bun baka nanga Gado. A taigi den: „Sobun, meki wi go na fesi a kownusturu fu Gado di e sori wi bun-ati èn meki wi taki nanga en sondro fu frede, so taki a kan abi sari-ati nanga wi èn a kan sori wi bun-ati fu yepi wi na a yoisti ten.”​—Hebr. 4:14-16; 1 Yoh. 2:2.

⁵ Yesus na a Edeman fu a Kresten gemeente tu. Neleki fa den fosi Kresten no ben abi wan libisma fanowdu fu tiri den, na so a de tu nanga wi na ini a ten disi. Yesus e tiri wi nanga yepi fu a santa yeye èn nanga yepi fu brada di Gado poti leki skapuman. Den brada disi musu gi frantwortu na Yesus èn na en hemel Tata fu a fasi fa den e sorgu na ipi fu Gado (Hebr. 13:17; 1 Petr. 5:2, 3). Na ini wan profeititori Yehovah ben taki fu Yesus: „Luku, mi gi den pipel wan kotoigi, wan fesiman, nanga wan edeman” (Yes. 55:4). Yesus srefi ben sori taki a profeititori disi kon tru di a taigi den disipel fu en: „Un no musu meki sma kari unu fesiman tu, bika wán sma nomo na un Fesiman, dati na Krestes.”​—Mat. 23:10.

⁶ Bijbel e sori wi fa Yesus e prakseri fu wi èn taki a de klariklari fu yepi wi. Na ini Mateyus 11:28-30 Yesus e gi wi a kari disi: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka. Bika a tyatyari fu mi switi fu tyari èn mi lai lekti.” Yesus Krestes e tiri a Kresten gemeente na wan safri-ati fasi èn na wan fasi di e meki wi kisi krakti baka. Disi e sori taki en na „a moro bun skapuman” di de neleki en hemel Tata, Yehovah Gado.​—Yoh. 10:11; Yes. 40:11.

⁷ Na ini a fosi brifi di Paulus skrifi gi den Korentesma, a ben fruteri den ete wan sani di abi fu du nanga a frantwortu fu Yesus Krestes. A ben taki: „A musu tiri leki Kownu teleki Gado poti ala den feanti fu en na ondro en futu. Ma te ala sani de na a Manpikin ondro kaba, dan a o saka ensrefi na ondro Gado di ben poti ala sani na en ondro. Na so Gado kan de ala sani gi ala sma” (1 Kor. 15:25, 28). Fosi Yesus kon na grontapu, a ben de a „tumusi bun wrokoman” fu Gado, a fosiwan fu ala den sani di Gado meki (Odo 8:22-31). Di Gado seni Yesus kon na grontapu, dan a tan du a wani fu Gado ala ten. Yesus kisi a moro hebi tesi di wan sma kan kisi. Toku a horidoro èn a tan gi yesi na en Tata te na dede (Yoh. 4:34; 15:10). Fu di a tan du a wani fu Gado te na dede srefi, meki Gado gi en wan opobaka fu go na hemel èn a gi en a reti fu de Kownu fu Gado Kownukondre (Tori 2:32-36). Leki Kownu fu a Kownukondre, Yesus kisi a tumusi prenspari frantwortu fu Gado fu tiri den furu dusundusun makti engel. Makandra nanga en den o puru ala libisma tirimakti nanga ala ogridu na grontapu (Odo 2:21, 22; 2 Tes. 1:6-9; Openb. 19:11-21; 20:1-3). Te fu kaba na Gado Kownukondre wawan, di abi Krestes leki Kownu, o tiri heri grontapu.​—Openb. 11:15.

FA WI KAN SORI TAKI WI E SAKA WISREFI NA YESUS ONDRO?

⁸ Yesus Krestes, a moro bun eksempre fu wi, no abi sondu. A kisi a frantwortu fu sorgu gi wi èn a e du dati na wan lobi-ati fasi. Efu wi wani kisi wini fu dati, dan wi musu tai hori na Yehovah èn wi musu tan waka nanga na organisâsi fu en di e go na fesi.

⁹ Den fosi Kresten ben e frustan heri bun sortu frantwortu Gado ben gi Krestes. Dati meki den ben e wroko makandra na ini wánfasi èn den ben e saka densrefi na ondro Krestes leki edeman di ben e tiri den nanga yepi fu a santa yeye (Tori 15:12-21). Luku san na apostel Paulus ben taki fu a wánfasi di ben de na ini a Kresten gemeente fu den salfuwan. A ben skrifi: „Fu di wi abi lobi meki wi musu gro na ala fasi, aladi wi e saka wisrefi na ondro Krestes di de na ede. Na en meki taki ala den pisi fu a skin e fiti bun na makandra. Den e wroko makandra na ini wánfasi, fu di ibri skrufu fu a skin e du san de fanowdu. Te ibri pisi fu a skin e du san a musu du, dan a skin e gro kon tranga, fu di den lobi makandra.”​—Ef. 4:15, 16.

¹⁰ Ibri sma na ini a gemeente musu wroko makandra nanga den trawan èn den alamala musu horibaka gi Krestes leki edeman. Na so ala sma na ini a gemeente e kisi wan moro tranga bribi èn den o „kon de wán trutru” fu di den lobi makandra.​—Yoh. 10:16; Kol. 3:14; 1 Kor. 12:14-26.

¹¹ Den sani di e pasa na grontapu e buweisi taki den profeititori na ini Bijbel e kon tru èn den e sori krin taki Yesus Krestes tron Kownu sensi 1914. Nownow a e tiri na mindri den feanti fu en (Ps. 2:1-12; 110:1, 2). San disi wani taki gi den sma di e libi now na grontapu? Heri esi Yesus o sori taki en na Kownu fu den kownu èn Masra fu den masra te a o krutu den feanti fu Gado (Openb. 11:15; 12:10; 19:16). Dan Krestes o frulusu den wan di de na en reti-anusei èn di Gado feni bun. Na dati Yehovah ben pramisi na a ten di den fosi libisma trangayesi en (Mat. 25:34). Wi breiti srefisrefi taki wi kon frustan san na a frantwortu di Gado gi Krestes. Meki wi tan wroko makandra nanga Krestes leki edeman, fu klari a wroko di musu du na heri grontapu na ini den lasti dei disi!