„Memre den wan di e teki fesi na un mindri”

DEN wortu disi fu na apostel Paulus skrifi na ini Hebrewsma 13:7. Sensi a Pinksterfesa fu a yari 33, den apostel fu Masra Yesus Krestes ben de a tiri skin di ben e teki fesi na ini a nyun Kresten gemeente di ben seti na a ten dati (Tori 6:2-4). Na a ten fu a yari 49, a no den apostel fu Yesus wawan ben de a tiri skin. Di a bosroiti teki taki sma no ben abi fu besnèi moro, dan „den apostel nanga den owru man na ini Yerusalem” ben de na ini a grupu disi (Tori 15:1, 2). Na den ben abi a frantwortu fu seti sani di ben abi fu du nanga den Kresten, awinsi pe den ben de. Den ben e seni brifi gi den gemeente èn den ben e meki den kon sabi sortu bosroiti den teki. Den sani disi ben e gi den gemeente deki-ati èn na so fasi ala den bakaman fu Yesus ben kan abi wánfasi. Den gemeente ben e gi yesi na den brada disi di ben e teki fesi èn den ben e saka densrefi na den ondro. Disi meki taki Yehovah tan blesi den èn taki den gemeente ben e tan gro.​—Tori 8:1, 14, 15; 15:22-31; 16:4, 5; Hebr. 13:17.

² Baka di den apostel dede, furu sma drai baka gi a bribi (2 Tes. 2:3-12). Soleki fa Yesus ben taki na ini na agersitori fu a bun siri nanga a takru wiwiri, dan a takru wiwiri (den falsi Kresten) ben o sai na mindri a bun siri (den salfu Kresten). Na ini den hondrohondro yari di pasa den tu grupu disi gro makandra teleki a kotiten noso „a pisi ten te a kaba fu a grontapu disi de krosibei” (Mat. 13:24-30, 36-43). Na a pisi ten dati den difrenti salfu Kresten si fa Yesus horibaka gi den, ma nowan grupu ben de ete di Yesus ben e gebroiki fu teki fesi na ini a Kresten gemeente (Mat. 28:20). Ma Yesus ben taki dati disi ben o kenki na a ten fu a kotiwroko.

³ „Suma na trutru a koni srafu di de fu frutrow?” Disi na a aksi di Yesus poti di a bigin fruteri wan agersitori di ben musu tyari kon na krin san ben o de „a marki” di ben o sori taki „a kaba fu a grontapu disi de krosibei” (Mat. 24:3, 42-47). Yesus ben sori taki a koni srafu di de fu frutrow ben o sorgu taki a pipel fu Gado ben e kisi leri „na a reti ten”. Na ini a ten fu den fosi Kresten Yesus gebroiki wan grupu man fu teki fesi na presi fu gebroiki wán sma nomo. Na so a de tu taki na ini a ten disi fu a kaba Yesus e gebroiki a koni srafu di de fu frutrow fu teki fesi, na presi fu gebroiki wán sma nomo.

SUMA NA „A KONI SRAFU DI DE FU FRUTROW”?

⁴ Suma Yesus ben poti fu gi den bakaman fu en leri? A no de fu taki dati a ben o gebroiki salfu Kresten na grontapu fu du dati. Bijbel e kari den „wan grupu priester di o tiri leki kownu” èn di kisi a wroko fu „’fruteri na ala sei fu den kefalek moi fasi’ fu a sma di kari [den] komoto na ini a dungru fu kon na ini en tumusi moi leti” (1 Petr. 2:9; Mal. 2:7; Openb. 12:17). Ma na ala den salfuwan na grontapu na a koni srafu di de fu frutrow? Nôno. Wan leisi Yesus du wan wondru pe a gi nyanyan na moro leki 5000 mansma, sosrefi na den umasma nanga den yongu pikin di ben de drape. A ben gi den disipel a nyanyan, dan den disipel prati en gi den sma di ben de drape (Mat. 14:19). Yesus gebroiki wan pikin grupu sma fu gi furu sma nyanyan. Na a srefi fasi a e gebroiki wan pikin grupu sma fu gi furu sma leri na ini a ten disi.

⁵ Sobun, ’a futuboi di de fu frutrow, a koniwan’ na wan pikin grupu salfu brada di abi a frantwortu fu sreka leri fu Gado di de leki nyanyan èn fu prati dati gi sma. Den e du disi sensi a ten di Krestes bigin tiri leki kownu (Luk. 12:42). Na ini den lasti dei, den salfu brada di de „a koni srafu di de fu frutrow” e wroko makandra na a edekantoro fu wi. Den salfu brada disi na a Tiri Skin fu Yehovah Kotoigi na ini a ten disi, sobun na den e teki fesi na ini na organisâsi.

⁶ Krestes e gebroiki a grupu salfu brada disi fu tyari sani kon na doro di abi fu du nanga profeititori fu Bijbel èn na a yoisti ten a e meki den sori wi fa wi musu gebroiki den leri fu Bijbel na ini wi libi. Sma e kisi a leri disi na den difrenti gemeente fu Yehovah Kotoigi (Yes. 43:10; Gal. 6:16). Na ini Bijbel ten wan srafu di sma ben e frutrow ben e sorgu taki ala sani go bun na ini na oso fu en basi. Na so a de tu taki a koni srafu di de fu frutrow kisi a frantwortu fu sorgu gi ala den anbegiman di de na ini osofamiri fu Gado. Sobun, a koni srafu e luku den gudu fu en masra. A e seti a preikiwroko èn den programa gi den kring konmakandra nanga den kongres. A koni srafu e poti brada tu leki owruman fu tyari difrenti frantwortu na ini na organisâsi èn a e sorgu taki buku meki di e leri sma fu Bijbel. Ala den sani disi e tyari wini tu gi den wan di Bijbel e kari „futuboi” fu Gado.​—Mat. 24:45.

⁷ Ma, suma na den „futuboi” disi? Den na den sma di e kisi leri fu a koni srafu. Na a bigin fu den lasti dei ala den futuboi dati ben de salfuwan. Ma bakaten sma di de fu a bigi ipi „tra skapu” ben kon de na ini a grupu disi tu (Yoh. 10:16). Ala tu grupu e kisi a srefi leri di a koni srafu e gi sma.

⁸ Te Yesus o kon fu krutu èn fu strafu ogrisma na a ten fu a bigi banawtu, dan a o poti a koni srafu fu luku „ala den sani di a abi” (Mat. 24:46, 47). Den brada di de a srafu disi o kisi a grani fu go na hemel. Makandra nanga den trawan fu a grupu fu den 144.000 sma, den o tiri nanga Krestes. Aladi a koni srafu di de frutrow no o de moro na grontapu, toku Yehovah nanga Yesus o poti sma na grontapu leki „tiriman” fu sori den wan di e saka densrefi na ondro a Mesias Kownukondre, san den musu du.​—Ps. 45:16.

FU SAN EDE WI MUSU „MEMRE DEN WAN DI E TEKI FESI”?

⁹ Furu sani de fu san ede wi musu „memre den wan di e teki fesi” èn fu san ede wi musu sori taki wi e frutrow den. Fu san ede a bun te wi e du dati? Na apostel Paulus ben taki: „Den e luku unu leki sma di o abi fu gi Gado frantwortu fu san den e du. Dan den o sorgu unu nanga prisiri èn no nanga geme, bika disi no ben o bun gi unu” (Hebr. 13:17). A prenspari fu gi yesi na den wan di e teki fesi èn fu saka wisrefi na den ondro, bika na den musu yepi wi fu abi wan tranga bribi èn fu meki sani waka bun nanga wi.

¹⁰ Na 1 Korentesma 16:14 Paulus e taki: „Ala sani di unu e du, un musu du nanga lobi.” Den brada di e teki fesi e sori a lobi dati na ini ala den bosroiti di den e teki gi a pipel fu Gado. Luku san 1 Korentesma 13:4-8 e taki fu lobi: „Lobi abi pasensi èn a abi switifasi. Lobi no e dyarusu, a no e meki bigi èn a no abi heimemre, a no e tyari ensrefi na wan fasi di no fiti, a no e suku en eigi bun èn a no e mandi esi. A no e tan memre na ogri di trawan du. A no e prisiri nanga sani di no bun, ma a e prisiri nanga sani di tru. A e frudrage ala sani, a e bribi ala sani, a e howpu ala sani, èn a e horidoro awansi san e pasa. Lobi no e kaba noiti.” Fu di den brada e sori a lobi disi, meki ala ten wi kan abi a frutrow taki den bosroiti di den e teki bun gi den anbegiman fu Yehovah. A fasi fa den brada e tiri wi e sori wi tu taki Yehovah lobi wi.

¹¹ Neleki fa den brada di ben e teki fesi na ini a ten fu den fosi Kresten ben de sondusma, na so den wan di e teki fesi na ini a ten disi na sondusma tu. Iya, na ini a ten di pasa Yehovah gebroiki sondu libisma fu meki den prakseri fu en kon tru. Noa ben bow wan ark èn a ben e preiki fu a pori di Yehovah ben o tyari kon na ini a ten fu en (Gen. 6:13, 14, 22; 2 Petr. 2:5). Moses ben kisi a frantwortu fu tyari a pipel fu Yehovah komoto na ini Egepte (Eks. 3:10). Gado gebroiki sondu libisma fu skrifi Bijbel (2 Tim. 3:16; 2 Petr. 1:21). Wi na ini a ten disi no e lasi frutrow na ini na organisâsi fu Yehovah, aladi a e gebroiki sondusma fu tiri a preikiwroko èn fu sori wi fa fu meki disipel. Na presi fu dati wi e kisi deki-ati fu di wi sabi taki sondro a yepi fu Yehovah, na organisâsi no ben o man du nowan fu den sani di den e du nownow. A koni srafu ondrofeni furu sani èn den kisi furu tesi, ma ala ten den meki a yeye fu Gado tiri den. A pisi fu Yehovah organisâsi di de na grontapu e kisi furu blesi na ini a ten disi. Dati meki wi e tan horibaka gi na organisâsi èn wi e tan frutrow en nanga wi heri ati.

FA WI KAN SORI TAKI WI E FRUTROW YEHOVAH NANGA DEN SANI DI A SETI?

¹² Brada di e kisi frantwortu na ini a gemeente kan sori taki den e frutrow Yehovah nanga den sani di a seti, te den de klariklari fu teki a frantwortu èn fu tan du den wroko bun (Tori 20:28). Leki Kownukondre preikiman wi e preiki fayafaya, wi e go baka na sma di wani sabi moro èn wi e studeri Bijbel nanga sma (Mat. 24:14; 28:19, 20). Fu kisi wini fu ala den moi sani di a koni srafu e leri wi, wi e sreka wisrefi gi den gemeente konmakandra, den kring konmakandra nanga den kongres, èn wi e go na den tu. Wi e kisi wini tu fu a deki-ati di wi kan gi makandra te wi de nanga den Kresten brada nanga sisa fu wi.​—Hebr. 10:24, 25.

¹³ Te wi e gebroiki den gudu fu wi fu horibaka gi na organisâsi, dan wi e sori tu taki wi e frutrow na organisâsi (Odo 3:9, 10). Te den brada nanga sisa fu wi de na nowtu, dan wi e yepi den wantewante (Gal. 6:10; 1 Tim. 6:18). Wi e du disi fu di wi lobi makandra. Ala ten wi e suku okasi fu sori Yehovah nanga na organisâsi fu en taki wi e warderi den bun di a e du gi wi.​—Yoh. 13:35.

¹⁴ Ete wan fasi fa wi e sori taki wi e frutrow na organisâsi, na te wi e horibaka gi den bosroiti di a e teki. Dati wani taki dati wi de klariklari fu du san den brada di kisi spesrutu frantwortu, soleki den kring-opziener nanga den owruman e taigi wi fu du. Den brada disi na sma tu di „e teki fesi”. Dati meki wi musu gi yesi na den èn wi musu saka wisrefi na den ondro tu (Hebr. 13:7, 17). Kande wi no e frustan fu san ede den e teki son bosroiti, ma wi sabi taki ala ten sani o waka bun gi wi te wi e horibaka gi den bosroiti dati. Na a fasi disi wi e sori taki wi e saka wisrefi na ondro Masra Yesus Krestes.

¹⁵ Iya, wi kan frutrow a koni srafu trutru. Satan di de a gado fu a grontapu disi e du ala san a man fu gi Yehovah nanga en organisâsi porinen (2 Kor. 4:4). No meki Satan kori yu! (2 Kor. 2:11) A sabi taki „en ten syatu” èn taki heri esi den o trowe en go na ini a dipi peti di no abi gron. Dati meki a de nomonomo fu puru someni sma leki a man na a sei fu Gado (Openb. 12:12). Ma meki wi tan du muiti fu kon moro krosibei na Yehovah, awinsi san Satan e suku fu du nanga wi. Meki wi frutrow dorodoro tapu Yehovah èn na tapu na organisâsi di a e gebroiki fu tiri en pipel na ini a ten disi. Na dati o meki taki wi tan libi na ini wánfasi nanga wi brada nanga sisa.