Sorgu taki a gemeente abi freide èn taki a tan krin

IBRI yari dusundusun sma e kon na a oso fu a tru anbegi fu Yehovah soleki fa Bijbel profeititori ben taki (Mika 4:1, 2). Wi breiti srefisrefi fu gi den sma dati wan switikon na ini „a gemeente fu Gado”! (Tori 20:28) Den e warderi na okasi di den abi fu dini Yehovah makandra nanga wi èn den e prisiri fu de na ini na agersi paradijs di krin èn pe freide de. A santa yeye fu Gado èn den bun rai na ini a Wortu fu en e yepi wi fu sorgu taki a gemeente abi freide èn taki a tan krin.​—Ps. 119:105; Sak. 4:6.

² Te wi e gi yesi na den rai fu Bijbel, dan dati e meki wi „tron nyun sma di kisi nyun fasi” (Kol. 3:10). Wi no e poti furu prakseri na pikinpikin trobi èn na problema nanga trawan. Fu di wi e si sani soleki fa Yehovah e si den, meki wi no e gi pasi taki sani fu grontapu e tyari pratifasi kon na wi mindri. Disi e meki taki wi man wroko makandra na ini wánfasi nanga den brada nanga sisa fu wi na heri grontapu.​—Tori 10:34, 35.

³ Ma ten na ten problema e opo kon di kan pori a freide nanga a wánfasi na ini a gemeente. Fa dati kan pasa? Furu tron a e pasa te sma no e gi yesi na den rai fu Bijbel. Te now wi abi fu feti nanga den sondu firi di wi leki libisma abi. Nowan fu wi kan taki dati wi no abi sondu (1 Yoh. 1:10). Wan sma kan meki wan fowtu di kan meki taki a gemeente no krin moro te fu kaba. A kan taki wi du noso taki wan sani sondro fu denki fosi, so taki wi hati den firi fu trawan. Ma tra sma kan taki noso du sani tu di e hati den firi fu wi (Rom. 3:23). San wi kan du fu meki en bun nanga trawan te den sortu problema disi opo kon?

⁴ Fu di Yehovah lobi wi, meki a hori ala den sani disi na prakseri. A Wortu fu en e sori wi san fu du te den problema disi opo kon. Wi kan kisi yepi tu fu lobi-ati owruman di de leki skapuman. Te wi gi yesi na den Bijbel rai di den e gi wi, dan dati kan yepi wi fu libi bun nanga trawan èn fu abi wan bun nen na Yehovah. Efu wi e kisi piri-ai fu di wi du wan ogri, dan wi no abi fu tweifri taki a piri-ai dati na wan fasi fa wi Tata na hemel e sori taki a lobi wi.​—Odo 3:11, 12; Hebr. 12:6.

FA FU LUSU PIKINPIKIN TROBI?

⁵ Ten na ten, a kan pasa taki pikinpikin trobi noso problema e opo kon na mindri sma fu a gemeente. Den problema disi musu lusu wantewante na wan fasi di e sori taki wi lobi makandra (Ef. 4:26; Fil. 2:2-4; Kol. 3:12-14). Kande yu srefi si taki furu problema di e opo kon na mindri yu nanga wan brada noso sisa kan lusu te yu e gebroiki a rai fu na apostel Petrus fu „lobi makandra nanga un heri ati, bika lobi e tapu bun furu sondu” (1 Petr. 4:8). Bijbel e taki: „Wi alamala e sondu furu tron” (Yak. 3:2). Te wi e du gi trawan san wi wani den du gi wi, dan wi o de klariklari fu gi den pardon te den e meki pikinpikin fowtu èn wi no o prakseri den tori dati moro.​—Mat. 6:14, 15; 7:12.

⁶ Ma te yu srefi si taki yu du noso taki wan sani di hati den firi fu wan trawan, dan na yu musu meki a muiti fu meki en bun baka nanga en. No frigiti taki a sani disi o abi krakti tapu a matifasi fu yu nanga Yehovah. Yesus ben taigi den disipel fu en: „Fu dati ede, te yu e tyari yu ofrandi go na a altari èn drape yu e memre taki yu brada abi wan sani nanga yu, dan libi yu ofrandi drape na fesi na altari èn go meki en bun nanga yu brada fosi. Baka dati yu kan gi yu ofrandi te yu drai kon baka” (Mat. 5:23, 24). A kan taki unu no frustan makandra bun. Efu dati de so, dan taki nanga a sma fu a tori. Te ala sma na ini a gemeente e taki krin nanga makandra, dan dati e yepi wi fu frustan makandra bun èn fu lusu problema di e opo kon fu di wi na sondusma.

YEPI DEN WAN DI ABI BIJBEL RAI FANOWDU

⁷ Son leisi, owruman kan si taki a de fanowdu fu gi wan sma rai, so taki a sma kan kenki a fasi fa a e denki. A no ala ten a makriki fu du dati. Na apostel Paulus ben skrifi den Kresten na ini Galasia: „Brada, srefi efu wan sma meki wan fowtu sondro fu a sabi, dan unu leki lepi Kresten musu pruberi na wan safri-ati fasi fu tyari so wan sma kon na tapu a reti pasi baka.”​—Gal. 6:1.

⁸ Te owruman e sorgu na ipi bun, dan den kan kibri a gemeente gi furu sani di kan meki den lasi a bribi fu den èn den kan sorgu taki sani no tron seryusu problema. Owruman e meki muiti fu du san Yehovah ben pramisi di a taigi a profeiti Yesaya: „Ibriwan fu den o de leki wan kibripresi gi tranga winti èn gi sibibusi. Den o de leki wan liba di e lon na wan kontren sondro watra èn leki a kowrupe fu wan bigi ston na ini wan kontren di drei.”​—Yes. 32:2.

LUKU BUN NANGA DEN WAN DI NO E TYARI DENSREFI NA WAN FASI DI FITI

⁹ Na apostel Paulus ben warskow gi sma di ben e tyari densrefi na wan fasi di kan pori a gemeente. A ben taki: „Wi e taigi unu . . . taki efu wan brada no e tyari ensrefi na wan fasi di fiti èn a no e du san wi ben leri unu, dan un no musu bumui nanga en moro.” Baka dati a fruteri san a ben wani taki nanga den wortu dati. A skrifi: „Efu wan sma no e du san wi taki na ini a brifi disi, dan un musu luku bun nanga en. No bumui nanga en moro, so taki a kan firi syen. Toku un no musu si en leki wan feanti, ma tan gi en rai leki wan brada.”​—2 Tes. 3:6, 14, 15.

¹⁰ Son leisi wan sma e du wan sani di no de so seryusu taki a musu puru fu a gemeente. Ma kande a e sori taki a no abi lespeki gi den wet di Gado gi wi. A kan taki a sma lesi srefisrefi, taki a lobi fu krutu trawan, noso taki a no e sorgu en skin. Kande a e „bumui nanga tra sma tori” (2 Tes. 3:11). A kan de so tu taki a e du sani fu kisi wini fu trawan na moni sei, noso taki a abi a gwenti fu arki noso luku sani di no fiti kwetikweti. A fasi fa a e tyari ensrefi ogri so te, taki sma kan taki takru fu a gemeente èn taki a kan pori den tra Kresten brada nanga sisa na ini a gemeente.

¹¹ A fosi sani di den owruman o du, na taki den o gi so wan sma Bijbel rai. Efu den warskow en difrenti leisi, ma a no e gi yesi na den rai di a e kisi, dan den owruman kan teki a bosroiti fu hori wan lezing fu warskow a gemeente. Owruman musu luku bun efu a de fanowdu fu hori so wan lezing fu warskow a gemeente èn efu a situwâsi de so seryusu taki trawan kan naki futu. Na ini a lezing a takiman o warskow den brada nanga sisa fu no tyari densrefi na wan fasi di no fiti. A o taki tu fu a problema di a sma abi, ma a no o kari a nen fu a sma di e tyari ensrefi na a fasi dati. Den sma di sabi a tori di kon na fesi na ini lezing o sorgu taki den no du prisiri sani nanga a sma. Ma den o tan du sani nanga en di abi fu du nanga na anbegi, fu di Bijbel e taki dati wi musu tan gi so wan sma „rai leki wan brada”.

¹² Wi howpu taki a fasi fa den tra brada nanga sisa e tyari densrefi o yepi a sma di no e tyari ensrefi na wan fasi di fiti fu firi syen so taki a tyari kenki kon. Te a de krin taki a sma bigin tyari ensrefi bun baka, dan a no de fanowdu moro fu luku bun nanga so wan sma.

FA FU LUSU SON SERYUSU PROBLEMA?

¹³ Te wi de klariklari fu frigiti na ogri di wan sma du wi èn fu gi en pardon, dan dati no wani taki dati wi no e broko wi ede nanga a fowtu di a trawan meki noso taki wi e agri nanga a sani di a du. A no ala ten wi kan taki dati wan sma no man yepi fu di en na wan sondu sma. A no bun tu te wi e du neleki a fowtu di a sma meki na wan pikin sani aladi a de wan seryusu sondu (Lef. 19:17; Ps. 141:5). A Wetfrubontu ben e sori taki a wán sondu kan ogri moro a trawan. Na so a de tu gi wi leki Kresten na ini a ten disi.​—1 Yoh. 5:16, 17.

¹⁴ Yesus ben taki fu wan tu spesrutu sani di wi musu du te seryusu problema de na mindri wi brada nanga sisa. Luku san Yesus ben taki fu a tori disi: „Efu yu brada du wan sondu teige yu, [1] go sori en san na a sondu te yu nanga en wawan de. Efu a e arki yu, dan yu wini yu brada. Ma efu a no e arki yu, [2] dan tyari ete wán noso tu sma nanga yu, so taki tu noso dri kotoigi kan taki efu wan tori tru noso efu a no tru. Efu a no e arki den, [3] dan taki nanga a gemeente. Efu a no e arki a gemeente srefi, dan meki a de gi yu leki wan grontapusma èn leki wan sma di e teki belasting-moni gi lanti.”​—Mat. 18:15-17.

¹⁵ Na agersitori di Yesus gi baka dati na ini Mateyus 18:23-35 e sori taki wan fu den sondu di kari na ini Mateyus 18:15-17 abi fu du nanga moni, gron, nanga tra gudu di sma abi. Fu eksempre, a kan taki sma no e pai a moni di den leni noso taki den e du wan kruka sani. Noso a kan taki wan sma e taki ogri-ati lei fu wan trawan di kan pori a nen fu a sma dati.

¹⁶ Te yu abi buweisi taki wan sma na ini a gemeente du so wan seryusu sondu teige yu, dan yu no musu de esi fu go na den owruman fu go aksi den fu yepi yu lusu a tori. Soleki fa Yesus ben taki, dan a fosi sani di yu musu du, na fu go taki nanga a sma di du wan sani teige yu. Pruberi fu seti a tori nanga a sma èn no kari tra sma kon na ini a tori. Hori na prakseri dati Yesus no ben taki: ’Go wán leisi nomo fu sori en san na a sondu fu en’. Sobun, efu biginbigin a sma no wani taki dati a fowtu èn efu a no wani aksi pardon, dan a ben o bun fu go na en wan tra leisi fu taki fu a tori. Efu a tori kan seti na a fasi disi, dan a sma di du a sondu o warderi en srefisrefi taki yu no fruteri trawan san a du noso taki yu no pori a bun nen di a abi na ini a gemeente. Na a fasi dati yu o „wini yu brada”.

¹⁷ Efu a sma di du a sondu e teki a frantwortu fu den sani di a du, efu a aksi pardon, èn efu a meki sani kon bun baka, dan a no de fanowdu fu tyari a tori go moro fara. Aladi den sortu sani disi na seryusu sondu, toku den sani disi na tori di den tu sma srefi kan seti nanga makandra.

¹⁸ Efu yu no man wini yu brada te yu taki nanga en fu a sani di a du te „yu nanga en wawan de”, dan yu musu du soleki fa Yesus ben taki. Yu kan „tyari ete wán noso tu sma nanga yu” fu taki baka nanga en fu a tori. Den sma di yu e tyari go musu de sma di wani yepi a brada tu. A ben o moro bun efu den srefi sabi san a sma du. Ma efu sma no de di sabi a tori, dan yu kan bosroiti fu tyari wán noso tu sma fu de nanga yu na a takimakandra di yu o abi nanga a sma. Den kan de sma di abi ondrofeni na ini a tori dati èn den kan yepi yu fu luku efu a sani di a sma du, na wan sani di fowtu trutru. Owruman di yu e teki leki kotoigi na ini wan afersi no e teki presi gi a gemeente na a momenti dati, fu di a no den owruman fu a gemeente poti den fu du a wroko dati.

¹⁹ Ma kon meki wi taki dati a tori no seti ete aladi yu meki muiti na difrenti okasi fu taki nanga a sma di yu nanga en wawan ben de èn di yu tyari wán noso tu tra sma go nanga yu fu taki nanga en. Efu yu e firi leki yu no kan libi a tori so, dan yu musu go taki nanga den owruman fu a gemeente. Memre taki yu e du disi fu di yu wani taki freide de na ini a gemeente èn fu di yu wani hori en krin. Efu yu go taki a tori nanga den owruman, dan libi a problema gi den èn frutrow tapu Yehovah. Noiti yu musu gi pasi taki yu naki futu, noso taki yu lasi yu prisiri na ini a diniwroko fu Yehovah, soso fu di wan tra sma du wan sani di no bun.​—Ps. 119:165.

²⁰ Den brada di musu luku den skapu fu Yehovah o ondrosuku a tori. Efu den kon si taki a sma sondu teige yu trutru, taki a no wani sori berow, èn taki a no e du nowan muiti srefi fu seti a tori baka na wan fasi di fiti, dan a kan de fanowdu taki wan komte fu owruman puru a sma fu a gemeente. Na a fasi dati den e kibri na ipi èn den e sorgu taki a gemeente tan krin.​—Mat. 18:17.

SAN MUSU PASA TE WAN SMA DU SERYUSU SONDU?

²¹ Sondu soleki hurudu, sutadu, homo-sekslibi, a kosi di sma e kosi Gado, a fadon di sma e fadon komoto na bribi, nanga afkodrei na seryusu sondu. Dati meki a no nofo efu wi kisi pardon fu a sma teige suma wi ben du den ogri dati (1 Kor. 6:9, 10; Gal. 5:19-21). Fu di den ogri dati kan meki taki a gemeente no krin moro, meki den owruman musu sabi te den sortu sani disi pasa, so taki den kan du wan sani (1 Kor. 5:6; Yak. 5:14, 15). A kan taki wan sma e go na den owruman fu fruteri den sortu sondu ensrefi du noso taki wan sma e go fruteri den fu wan sondu di a sabi taki wan tra sma du (Lef. 5:1; Yak. 5:16). Awinsi fa den owruman e kon sabi fu wan seryusu sondu di wan dopu Kotoigi du, toku den musu seti sani fu meki tu owruman ondrosuku a tori fosi. Efu a kon na krin taki a tori di den yere de so trutru èn taki buweisi de di e sori taki a sma du wan seryusu sondu, dan den owruman fu a gemeente o seti wan krutu komte fu no moro mendri leki dri owruman fu poti prakseri na a tori dati.

²² Den owruman e luku na ipi bun èn den e suku fu kibri den gi iniwan sani di kan pori a bribi fu den. Ma den e du muiti tu fu gebroiki Gado Wortu na wan koni fasi fu piri-ai gi iniwan sma di meki wan fowtu, èn den o pruberi fu meki a matifasi fu den nanga Gado kon bun baka (Yud. 21-23). Na dati na apostel Paulus ben taigi Timoteyus di a skrifi: „Na fesi Gado èn na fesi Krestes Yesus di o krutu den libiwan nanga den dedewan . . . mi e taigi yu na wan seryusu fasi: . . . gi sma rai, warskow den èn gi den deki-ati. Du dati nanga ala pasensi èn nanga a koni fu gi sma leri” (2 Tim. 4:1, 2). A kan teki furu ten fu du disi, ma a de wan pisi fu a tranga wroko fu den owruman. A gemeente e warderi a wroko di den owruman e du èn den e sori taki den abi bigi lespeki gi den.​—1 Tim. 5:17.

²³ A moro prenspari sani di den owruman e suku fu du na ini ibri situwâsi pe den si taki wan sma du wan sondu, na fu yepi a sma fu kon abi wan bun matifasi baka nanga Gado. Efu a sma abi berow trutru èn den owruman kan yepi en, dan den o gi en piri-ai te en wawan de noso na fesi den sma di ben de leki kotoigi na a krutu komte. Na so a sma o kisi a yepi di a abi fanowdu èn den trawan o kisi moro lespeki gi Gado (2 Sam. 12:13; 1 Tim. 5:20). Ala ten te wan krutu komte gi wan sma piri-ai, a o lasi wan tu grani. Dati kan yepi a sma di du a sondu fu ’meki en pasi kon grati’ baka te fu kaba (Hebr. 12:13). Bakaten a sma kan kisi den grani disi baka safrisafri efu a de krin taki a e go na fesi.

FA DEN E MEKI BEKÈNTI TAKI WAN SMA KISI PIRI-AI?

²⁴ Efu wan krutu komte kon si taki wan sma abi berow, ma sma na ini a gemeente noso na ini a libimakandra o kon sabi a tori, noso efu den sma na ini a gemeente musu luku bun nanga a sma di du a sondu, dan den musu meki bekènti syatu na a Kresten libi nanga preikiwroko konmakandra taki a sma kisi piri-ai. Den o taki: „[A nen fu a sma] kisi piri-ai.”

TE DEN BOSROITI FU PURU WAN SMA FU A GEMEENTE

²⁵ Son tron a sma di du na ogri sungu go so dipi na ini a sondu libi fu en, taki a no e du muiti fu tyari kenki kon te den brada e suku fu yepi en. Kande a no ben de krin taki a ’du sani di e sori taki a abi berow’ di a krutu komte taki nanga en (Tori 26:20). San musu pasa dan? Te dati de so, dan a de fanowdu fu puru a sma fu a gemeente fu di a no abi berow. Disi e meki taki a no e kisi pasi fu abi demakandra nanga a krin pipel fu Yehovah. Disi de fanowdu fu sorgu taki a sma dati no kisi na okasi fu pori a gemeente. Na a fasi disi den sma fu a gemeente kan tan tyari densrefi na wan krin fasi èn na anbegi fu den o tan krin. A sani dati e kibri a bun nen fu a gemeente tu (Deut. 21:20, 21; 22:23, 24). Di na apostel Paulus kon yere fu a syen fasi fa wan man fu a gemeente Korente ben e tyari ensrefi, dan a gi den owruman a rai fu ’libi so wan man gi Satan . . . . Na so a denki fu den sma na ini a gemeente ben o tan krin’ (1 Kor. 5:5, 11-13). Paulus skrifi tu fu tra sma na ini a ten fu den fosi Kresten di den ben puru fu a gemeente fu di den ben opo densrefi teige a tru anbegi.​—1 Tim. 1:20.

²⁶ Te wan sma di du wan sondu èn di no abi berow musu puru fu a gemeente, dan a krutu komte o taigi a sma san den bosroiti. Den musu sori en krin na ini Bijbel tu fu san ede den teki a bosroiti dati. Te a krutu komte e taigi a sma san na a bosroiti di den teki, dan den o fruteri en taki a kan aksi efu wan tra krutu komte kan luku a tori fu en ete wan leisi efu a feni taki den no krutu a tori fu en bun. A musu skrifi wan brifi pe a e taki krin fu san ede a wani taki wan tra komte luku a tori fu en. A momenti di a sabi sortu bosroiti a komte teki, a e kisi seibi dei fu skrifi a brifi disi. Efu den owruman fu a gemeente kisi so wan brifi, dan den o taki nanga a kring-opziener. A o poti owruman di abi ondrofeni fu dini na ini a komte di o luku a tori fu a sma ete wan tron. Den o du ala san den man fu hori a takimakandra fosi wan wiki pasa, baka te den owruman kisi a brifi. Efu a sma aksi fu den luku a tori fu en ete wan tron, dan den brada no o meki bekènti ete taki den puru en fu a gemeente. Ma den o taigi a sma taki na ini a pisi ten dati a no mag gi piki noso begi na den konmakandra èn taki a no o kisi tra spesrutu grani.

²⁷ Wan sma di kisi na okasi fu meki wan tra krutu komte arki a tori fu en ete wan tron musu hori na prakseri taki na bun-ati den e sori en te a mag fruteri san e trobi en. Sobun, efu na fu espresi a sma no kon na a konmakandra dati, dan den brada musu du muiti fosi fu kan taki nanga en. Efu den no man miti en, dan den o meki bekènti taki den puru en fu a gemeente.

²⁸ Efu a sma di du a sondu no feni taki a de fanowdu taki wan tra krutu komte luku a tori fu en, dan den owruman o sori en taki a musu abi berow èn den o taigi en san a musu du efu a wani kon baka na ini a gemeente te fu kaba. Disi na wan bun sani fu du èn a o yepi a sma. Den e du disi fu di den e howpu taki a o kenki a fasi fa a e tyari ensrefi, so taki a kan drai kon baka na Yehovah organisâsi te fu kaba.​—2 Kor. 2:6, 7.

FA DEN E MEKI BEKÈNTI TAKI WAN SMA PURU FU A GEMEENTE?

²⁹ Te a de fanowdu fu puru wan sma fu a gemeente, fu di a no abi berow fu a sondu di a du, dan den musu taigi a gemeente syatu: „[A nen fu a sma] no de wan Kotoigi fu Yehovah moro.” Na so fasi den sma na ini a gemeente di lobi Yehovah o frustan taki den no musu abi demakandra moro nanga a sma dati.​—1 Kor. 5:11.

TE WAN SMA NO WANI DE WAN KOTOIGI MORO

³⁰ Wan sma di dopu kan sori taki a no wani de wan Kotoigi moro te a e fruteri trawan dati. A kan tu taki a e du sani fu espresi fu sori taki a no wani de na ini a Kresten gemeente moro. Kande a e go moksi ensrefi nanga wan grontapu organisâsi di e du sani di Bijbel e krutu èn di Yehovah Gado o pori te fu kaba.​—Yes. 2:4; Openb. 19:17-21.

³¹ Luku san na apostel Yohanes ben taki fu sma di ben drai baka gi a Kresten bribi na ini a ten fu en. A ben skrifi: „Fosi, den sma disi ben de nanga wi, ma den gowe libi wi fu di den no ben de leki wi, bika efu den ben de leki wi, dan den ben o tan nanga wi.”​—1 Yoh. 2:19.

³² Gi Yehovah, wan sma di no wani de wan Kotoigi moro no de a srefi leki wan Kresten di no e preiki moro. A kan taki safrisafri wan sma no e preiki moro fu di a no e studeri Gado Wortu doronomo. Noso kande a lasi a faya di a ben abi fu dini Yehovah, fu di a kisi problema noso frufolgu. Den owruman èn den tra brada nanga sisa fu a gemeente o tan du ala muiti fu gi a sma dati a yepi di a abi fanowdu.​—Rom.15:1; 1 Tes. 5:14; Hebr. 12:12.

³³ Te wan sma bosroiti fu no de wan Kotoigi moro, dan den brada e meki dati bekènti na ini a gemeente. Den e taki syatu: „[A nen fu a sma] no de wan Kotoigi fu Yehovah moro.” So wan sma de gi wi leki wan sma di den puru fu a gemeente.

TE DEN BOSROITI FU TEKI WAN SMA BAKA DI DEN BEN PURU FU A GEMEENTE

³⁴ Wan sma di ben puru fu a gemeente noso di no ben wani de wan Kotoigi moro, kan tron wan memre fu a gemeente baka te a sori krin taki a abi berow. A musu sori wan moi pisi ten kaba taki a tapu nanga a sondu libi fu en. A musu de krin taki a wani de wan bun mati fu Yehovah baka. Den owruman musu sorgu taki nofo ten pasa fu si efu a sma abi berow trutru. Kande den o wakti omeni mun, wan yari, noso moro langa srefi efu a de fanowdu. Te den owruman fu wan gemeente kisi wan brifi pe wan sma e aksi fu tron wan Kotoigi baka, dan wan komte o taki nanga a sma. A komte o luku efu a e ’du sani di e sori taki a abi berow’, dan den o bosroiti efu den o teki en baka na ini a gemeente na a pisi ten dati noso efu den no o du dati ete.​—Tori 26:20.

³⁵ Efu a sma di wani tron wan Kotoigi baka ben de na ini wan tra gemeente di den brada ben puru en fu a gemeente, dan wan komte fu a gemeente pe a sma de now kan kon makandra nanga en fu taki nanga en fu a brifi di a skrifi. Efu a komte fu a gemeente dati feni taki a sma kan tron wan Kotoigi baka, dan den o skrifi den owruman fu a fosi gemeente di ben luku a tori fu fruteri den fa den e si a tori. Den tu krutu komte o wroko makandra, so taki den kan de seiker taki den kon sabi ala sani di de fanowdu fu teki a yoisti bosroiti. Ma na a komte fu a fosi gemeente di ben luku a tori o bosroiti efu den o teki a sma baka.

FA DEN E MEKI BEKÈNTI TAKI WAN SMA DE WAN KOTOIGI BAKA?

³⁶ Te a komte de seiker taki a sma di ben puru fu a gemeente noso di no ben wani de wan Kotoigi moro abi trutru berow èn taki a kan tron wan Kotoigi baka, dan den e meki dati bekènti na ini a gemeente pe den ben puru en. Efu a sma de na ini wan tra gemeente now, dan den brada o meki a sani disi bekènti tu na ini a gemeente dati. Den musu taki nomo: „[A nen fu a sma] teki baka leki wan Kotoigi fu Yehovah.”

TE A SMA DI SONDU NA WAN PIKIN DI DOPU KABA

³⁷ Efu wan pikin di dopu kaba ma di no de wan bigisma ete, du wan seryusu sondu, dan den owruman musu sabi disi. Te den owruman e taki nanga so wan pikin, dan a moro bun taki a dopu papa nanga mama fu en de drape tu. Den musu wroko makandra nanga den brada. Den no musu pruberi fu kibri a pikin gi a strafu di a musu kisi. A krutu komte e piri-ai gi a yonguwan disi èn den wani yepi en fu tron wan mati fu Yehovah baka neleki fa den wani yepi bigisma di du wan sondu. Ma efu a de krin taki a yonguwan disi no abi berow, dan den o puru en fu a gemeente.

TE A SMA DI SONDU NA WAN PREIKIMAN DI NO DOPU ETE

³⁸ San musu pasa te wan preikiman di no dopu ete du wan seryusu sondu? Fu di a no de wan dopu Kotoigi, meki den no man puru en fu a gemeente. Kande a no e frustan den leri na ini Bijbel so bun. Dati meki te den gi en rai na wan switi fasi, dan dati kan yepi en fu ’meki en pasi kon grati’.​—Hebr. 12:13.

³⁹ Efu wan sma di no dopu ete du wan seryusu sondu èn efu a no abi berow baka te tu owruman taki nanga en èn du muiti fu yepi en, dan a de fanowdu fu fruteri a gemeente fu a tori disi. Den brada e meki bekènti syatu: „[A nen fu a sma] no e dini moro leki wan preikiman di no dopu.” Dan a gemeente o si a sma dati leki wan grontapusma. Aladi a sma disi no puru fu a gemeente, toku den Kresten brada nanga sisa e luku bun sortu demakandra den abi nanga en (1 Kor. 15:33). Den brada no o teki preikiwroko raportu fu a sma dati.

⁴⁰ A kan taki baka wan pisi ten, wan sma di no dopu ete èn di den brada puru leki wan preikiman wani tron wan preikiman baka. Dan tu owruman o kon makandra nanga en fu luku efu a go na fesi. Efu a e du san Yehovah e taki, dan den brada kan meki bekènti syatu: „[A nen fu a sma] de baka leki wan preikiman di no dopu.”

YEHOVAH E BLESI DEN SMA DI E LIBI NA INI FREIDE ÈN DI E ANBEGI EN NA WAN KRIN FASI

⁴¹ Ala den sma di e kon makandra nanga a gemeente fu Gado na ini a ten disi e prisiri nanga den someni fasi fa Yehovah blesi a pipel fu en. Ala den sani di Yehovah seti gi wi fu leri wi den tru tori fu en switi gi wi so te, taki den e meki wi firi leki skapu na ini wei pe moi grun grasi e gro èn pe furu watra e lon. Yehovah seti sani tu fu kibri wi ondro a tiri fu Krestes leki edeman (Ps. 23; Yes. 32:1, 2). Na ini den lasti dei disi di lai dyugudyugu, wi de na ini wan agersi paradijs èn dati meki wi no e frede.

⁴² Te wi e sorgu taki a gemeente abi freide èn taki a tan krin, dan wi o tan meki a leti fu a Kownukondre skèin (Mat. 5:16; Yak. 3:18). A o gi wi prisiri fu si fa Yehovah e blesi wi, so taki furu tra sma kon sabi en èn dini en makandra nanga wi.