Gado meki hemel nanga grontapu

Na Yehovah Gado meki wi. A meki ala sani. A meki den sani di wi man si èn den sani di wi no man si. Fosi a meki den sani di wi man si, a meki bun furu engel. Yu sabi san na wan engel? Engel de leki Yehovah. Wi no man si den, neleki fa wi no man si Gado. A fosi engel di Yehovah meki ben e wroko makandra nanga en. Na engel dati yepi Yehovah fu meki den stari, den planeiti nanga ala tra sani. Wan fu den planeiti dati na grontapu, a moi presi pe wi e libi.

Baka dati Yehovah sreka grontapu gi den meti nanga libisma. A meki a leti fu a son skèin kon na grontapu. A meki den bergi, den se nanga den liba.

San pasa baka dati? Yehovah taki: ’Mi o meki grasi nanga bon.’ Ne ala sortu froktubon, gruntu nanga bromki bigin gro. Dan Yehovah meki ala den meti. A meki meti di e frei, meti di e swen nanga meti di e kroipi. A meki pikin meti soleki konikoni èn a meki bigi meti soleki olifant. Sortu meti yu lobi?

Baka dati Yehovah taigi a fosi engel: „Meki wi meki libisma.” Libisma ben o de tra fasi leki meti. Den ben o man meki ala sortu sani. Den ben o man taki, lafu èn begi Gado. Den ben o sorgu grontapu nanga den meti. Yu sabi suma ben de a fosi libisma? Meki wi go luku.