Wan Kownukondre di o tan fu têgo

Wan neti Kownu Nebukadnesar kisi wan dren. A dren ben meki a bruya so te taki a no ben man sribi. A kari den lukuman fu en èn a taigi den: ’Fruteri mi san a dren wani taki.’ Den piki: ’Lespeki Kownu, taigi wi san yu dren.’ Ma Nebukadnesar taigi den: ’Nôno! Na unu musu taigi mi san mi dren. Efu un no du dati mi o kiri unu.’ Den lukuman taigi en: ’Taigi wi san yu dren, dan wi o taigi yu san a dren wani taki.’ A taigi den: ’Unu alamala e pruberi fu kori mi. Taigi mi san mi dren!’ Den piki a kownu: ’Nowan sma na grontapu kan du a sani disi. A sani di Kownu e aksi no kan.’

Nebukadnesar ati bron so te, taki a taigi sma fu kiri ala den koniman fu a kondre. Sobun Danièl, Sadrak, Meisak nanga Abedneikow ben o dede tu. Ma Danièl aksi a kownu fu gi en pikinso ten. Ne en nanga den mati fu en begi Yehovah fu a yepi den. San Yehovah du?

Yehovah meki Danièl kisi wan fisyun pe a si san Nebukadnesar dren èn san a dren wani taki. A tra dei, Danièl go na a futuboi fu a kownu èn a taigi en: ’No kiri nowan fu den koniman. Mi kan fruteri a kownu san a dren.’ A futuboi tyari Danièl go na Nebukadnesar. Danièl taigi a kownu: ’Gado meki Kownu si san o pasa na ini a ten di e kon. Disi na san yu dren: Yu si wan bun bigi popki. En ede ben de fu gowtu. En borsu nanga en anu ben de fu solfru. En bere nanga den bowtu fu en ben de fu kopro. En bonfutu ben de fu isri. En platafutu ben meki fu isri nanga klèidoti. Ne yu si fa wan ston koti puru na ini wan bergi èn a naki a popki na en futu. A popki broko pisipisi, a ben kon fini leki puiri, dan winti wai en gowe. A ston kon tron wan bigi bergi di furu heri grontapu.’

Baka dati Danièl taki: ’Disi na san a dren fu yu wani taki: A kownukondre fu yu na a ede fu gowtu. A solfru na a kownukondre di o kon baka a di fu yu. Baka dati wan kownukondre o kon di o de leki kopro èn a o tiri heri grontapu. A wan di o kon baka dati o tranga leki isri. A lasti kownukondre o prati. Son pisi o tranga leki isri, ma son pisi o swaki leki klèidoti. A ston di tron wan bergi na Gado Kownukondre. A o broko ala den kownukondre disi pisipisi èn a o tan fu têgo.’

Nebukadnesar saka kindi na fesi Danièl, dan a boigi go na gron. A taki: ’Na a Gado fu yu taigi yu san mi dren èn san a dren wani taki. En na a Moro Hei Gado.’ Nebukadnesar no kiri Danièl. A meki a tron edeman fu ala den koniman èn tiriman fu a heri kontren fu Babilon. Yu si fa Yehovah arki a begi fu Danièl?