Den no boigi gi a popki

Wan pisi ten baka di Kownu Nebukadnesar kisi a dren fu a bigi popki, a meki wan bigi gowtu popki. A poti a popki na Dura-lagipresi, dan a kari ala den prenspari sma fu a kondre kon drape. Sadrak, Meisak nanga Abedneikow ben musu kon tu. A kownu taigi den sma: ’Solanga unu yere a babari fu den trompeti, den harpu nanga den bigi froiti, unu musu boigi gi a popki! Efu wan sma no boigi, mi o meki den trowe en go na ini wan faya onfu.’ San den dri Hebrew man ben o du? Den ben o boigi gi a popki noso den ben o anbegi Yehovah wawan?

Ne a kownu taigi den pokuman fu bigin prei a poku. Ala sma boigi go na gron èn den anbegi a popki. Ma Sadrak, Meisak nanga Abedneikow no du dati. Sonwan fu den sma di si taki den no boigi, go taigi a kownu: ’Den dri Hebrew man disi no wani boigi gi a popki fu yu.’ Nebukadnesar seni kari den, ne a taki: ’Mi o gi unu ete wan kans fu anbegi a popki. Efu unu no du dati, mi o trowe unu go na ini a faya onfu. Nowan gado o man puru unu na mi anu.’ Den piki en: ’Kownu no abi fu gi wi ete wan kans. A Gado fu wi o frulusu wi. Ma srefi efu a no du dati, toku wi no o anbegi a popki.’

Nebukadnesar kisi bigi atibron. A taigi den man fu en: ’Un faya na onfu seibi tron moro leki fa sma gwenti du!’ Dan a taigi den srudati fu en: ’Tai den man disi èn trowe den go na ini na onfu!’ Na onfu ben faya so te taki di den srudati go krosibei fu en, den dede wantewante. Den dri Hebrew man fadon go na ini a faya. Ma di Nebukadnesar luku go na ini na onfu, a si taki fo man e waka lontu na ini na faya. A kon frede, dan a aksi den heihei man fu en: ’A no dri man wi trowe go na ini a faya? Mi e si fo man èn wan fu den gersi wan engel!’

Nebukadnesar waka go krosibei fu na onfu, dan a bari: ’Un futuboi fu a Moro Hei Gado, un kon na dorosei!’ Ala sma skreki di den si Sadrak, Meisak nanga Abedneikow e waka komoto na ini a faya. Noti no ben pasa nanga den. Den skin, den wiwiri nanga den krosi no ben bron èn den no ben e smeri smoko srefi.

Nebukadnesar taki: ’A Gado fu Sadrak, Meisak nanga Abedneikow na wan bigi Gado. A seni en engel fu frulusu den. Nowan tra gado de leki a Gado fu den.’

Den dri Hebrew man tan gi yesi na Yehovah awinsi san ben pasa. Yu o du dati tu?