Yesus e teki twarfu apostel

Baka di Yesus preiki wán nanga afu yari, a ben musu teki wan prenspari bosroiti. A ben musu luku suma a ben o teki fu wroko makandra nanga en. A ben o gi den sma disi leri so taki den ben kan teki fesi na ini a Kresten gemeente. Suma Yesus ben o teki? Yesus ben wani taki Yehovah yepi en fu teki a bosroiti disi. Dati meki a go na wan bergi pe a ben kan de en wawan, dan a begi a heri neti. A tra mamanten, Yesus kari wan tu fu den disipel kon, dan a teki 12 fu tron en apostel. Yu sabi den nen? Den nen na Petrus, Andreas, Yakobus, Yohanes, Filipus, Bartolomeyus, Tomas, Mateyus, Yakobus a manpikin fu Alfeyus, Tadeyus, Simon nanga Yudas Iskariot.

Den 12 man disi ben o go na ala sei nanga Yesus. Baka di a gi den leri, a seni den go preiki den wawan. Yehovah gi den a krakti fu puru ogri yeye na sma tapu èn fu dresi sikisma.

Yesus ben kari den 12 apostel en mati èn a ben e frutrow den. Den Fariseiman ben feni taki den apostel no ben kisi skoroleri èn taki den ben de leki ala tra sma. Ma dati no ben de so. Yesus ben leri den fa den ben musu du a wroko. Den ben o de nanga Yesus na den moro prenspari momenti fu en libi. Fu eksempre, den ben o de nanga en leti fosi a dede èn baka te a ben o kisi wan opobaka. Furu fu den 12 apostel ben de fu Galilea, a srefi presi pe Yesus ben e tan. Sonwan fu den ben trow.

Den apostel ben de sondusma di ben e meki fowtu. Son leisi den ben e taki sani sondro fu denki èn den ben e teki don bosroiti. Son tron den no ben abi pasensi. Den ben e krutu nanga makandra srefi suma fu den na a moro prenspariwan. Ma den ben de bun sma di ben lobi Yehovah. Baka te Yesus ben o gowe, den ben o du prenspari wroko na ini a Kresten gemeente.