Yesus e leri den disipel fa den musu begi

Ala san den Fariseiman ben e du, na fu meki sma denki taki den kefalek. Den ben e du bun sani gi sma soso fu meki tra sma si san den du. Den ben e go begi na presi pe furu sma de fu di den wani taki ala sma si den. Den Fariseiman ben e leri langa begi na ede, dan den ben e taki den begi disi na ini den snoga èn na tapu strati pe furu sma kan yere den. Dati meki den sma ben skreki di Yesus taigi den: ’No begi leki den Fariseiman. Den denki taki Gado o lobi a begi fu den te den e gebroiki furu wortu. Te yu e begi, dan yu nanga Yehovah e taki. No taki den srefi sani ibri leisi baka. Yehovah wani taki yu taigi en san de na ini yu ati.

Disi na fa yu musu begi: „Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel.”’ Yesus leri den tu taki den musu begi Gado fu gi den nyanyan ibri dei, fu gi den pardon fu den sondu èn fu gi den tra sani di den abi fanowdu.

Yesus taki: ’Yu no musu stop fu begi. Tan aksi yu Papa Yehovah fu gi yu bun sani. Ala papa noso mama wani gi den pikin fu den bun sani. Efu yu pikin aksi yu wan brede, yu o gi en wan ston? Efu a e aksi yu wan fisi, yu o gi en wan sneki?’

Baka dati Yesus fruteri san a wani leri den: ’Efu unu sabi fa fu gi un pikin bun sani, unu kan de seiker taki un Tata di de na hemel o gi unu santa yeye te unu e aksi en, a no so? A wan-enkri sani di un musu du na fu aksi en.’ Yu e du san Yesus taki? Fu sortu sani yu e begi?