Yesus e waka na tapu watra

Yesus ben man dresi sikisma èn a ben man wiki dedesma. Ma a ben man basi a winti nanga na alen tu. Baka di Yesus kaba begi na tapu wan bergi, a luku go na a Se fu Galilea èn a si taki winti ben e wai bun tranga tapu a se. Den apostel fu en ben de na ini wan boto èn a ben hebi gi den fu tyari a boto. Yesus saka fu a bergi èn a bigin waka na tapu a watra go miti den. Di den apostel si wan sma e waka na tapu a watra, den ben frede. Ma Yesus taigi den: ’Na mi. Un no musu frede.’

Petrus taki: ’Masra efu na yu, dan taigi mi fu waka kon miti yu.’ Yesus taigi Petrus: ’Waka kon na mi.’ Petrus saka fu a boto aladi a winti ben e wai tranga èn a waka na tapu a watra fu go na Yesus. Di Petrus doro krosibei fu Yesus, a luku a winti èn a kon frede. Ne a firi fa a bigin sungu. Petrus bari: ’Masra yepi mi!’ Yesus langa en anu grabu en, ne a taki: ’Fu san ede yu bigin tweifri? Na bribi yu no abi?’

Yesus nanga Petrus kren go na ini a boto èn wantewante a winti saka. Fa yu denki taki den apostel ben e firi? Den taki: ’Yu na trutru a Manpikin fu Gado.’

A no a leisi disi wawan Yesus ben man basi a winti. Wan tra leisi di Yesus nanga den apostel fu en ben e go na abrasei fu a se, Yesus fadon na sribi na bakasei fu a boto. Ne wan tranga winti bigin wai. Den skwala ben e naki kon na ini a boto èn a boto kon furu nanga watra. Den apostel wiki Yesus. Den bari: ’Leriman wi o dede! Yepi wi!’ Yesus opo, dan a taigi a se: ’Tapu! Tan tiri!’ Wantewante a winti saka èn a se kon tiri. Yesus aksi den apostel: ’Un no abi bribi ete?’ Den apostel taigi makandra: ’Srefi a winti nanga a se e arki en.’ Den apostel leri taki efu den e frutrow tapu Yesus ala ten, den no abi fu frede gi noti.