Yesus e gi Lasarus wan opobaka

Yesus ben abi dri bun mati di ben e libi na Betania. Dati na Lasarus nanga den tu sisa fu en, Maria nanga Marta. Wan leisi di Yesus ben de na abrasei fu Yordan-liba, Maria nanga Marta seni a prenspari boskopu disi gi en: ’Lasarus siki te fu dede. Grantangi, kon esi!’ Ma Yesus no go wantewante. A wakti ete tu dei. Na ini a pisi ten dati Lasarus kon dede. Yesus taigi den disipel fu en: ’Meki wi go na Betania. Lasarus e sribi èn mi o go wiki en.’ Den apostel taki: ’Efu Lasarus e sribi, dan dati o yepi en fu kon betre baka.’ Ma Yesus taigi den krin: ’Lasarus dede.’

Di Yesus doro na Betania, Lasarus ben beri fo dei kaba. Bun furu sma ben kon fu trowstu Marta nanga Maria. Di Marta yere taki Yesus kon, a lon go miti en. A taki: ’Masra, efu yu ben de dya, mi brada no ben o dede.’ Yesus taigi en: ’Yu brada o libi baka. Yu e bribi disi Marta?’ Marta piki: ’Mi sabi taki a o kon na libi baka te na opobaka o de.’ Yesus taigi en: ’Mi na a opobaka nanga a libi.’

Baka dati Marta go na Maria èn a taigi en: ’Yesus de dya.’ Maria lon go na Yesus èn den sma go na en baka. A fadon na Yesus futu èn a no ben man stop krei. A taki: ’Masra, efu yu ben de dya, mi brada ben o de na libi ete!’ Di Yesus si o furu Maria ben e sari, dan en srefi bigin krei. Di den sma si taki Yesus ben e krei, den taki: ’Yesus ben lobi Lasarus trutru.’ Ma son sma ben e denki: ’Fu san ede a no yepi en mati?’ San Yesus ben o du now?

Yesus go na a grebi. Wan bigi ston ben tapu a grebi. A taigi den sma: ’Un lolo a ston puru.’ Marta taki: ’Ma na fo dei kaba! A skin fu en musu e tingi.’ Toku den lolo a ston puru, dan Yesus begi: ’Papa, grantangi taki yu arki mi. Mi sabi taki yu e arki mi ala ten, ma now mi e taki meki den sma yere, so taki den kan sabi taki na yu seni mi.’ Dan a bari nanga wan tranga sten: ’Lasarus, kon na doro!’ Ne wan kefalek moi sani pasa: Lasarus komoto na ini a grebi èn den linnen-krosi ben domru en skin ete. Yesus taki: ’Lusu en meki a gowe.’

Furu sma di si disi bigin bribi na ini Yesus. Ma son sma go taigi den Fariseiman san pasa. Sensi a ten dati den Fariseiman ben wani kiri Lasarus nanga Yesus. Yudas Iskariot, di ben de wan fu den 12 apostel, go kibrikibri na den Fariseiman èn a taigi den: ’Omeni unu o pai mi efu mi yepi unu fu feni Yesus?’ Den taki dati den o pai en 30 pisi solfru moni. Dati meki Yudas bigin suku wan okasi fu meki den Fariseiman kisi Yesus.