A libi baka a trowdei

1, 2. Te problema de na ini wan trowlibi, dan disi wani taki dati a trowlibi no bun? Fruklari dati.

A TROWLIBI na wan kado fu Yehovah. A kan meki wan sma kon de moro koloku. Ma ala trowlibi abi den problema. A kan gersi son leisi leki den problema no e kaba noiti. Disi kan meki taki wan masra nanga en wefi no e firi moro gi makandra leki fosi.

² Son leisi, a trowlibi fu wi o abi problema. A sani disi no musu fruwondru wi. Ma a no te wi trowlibi abi problema, dan dati wani taki dati a trowlibi no bun. Srefi trowpaar di ben abi bigi problema na ini den trowlibi ben feni wan fasi fu lusu den problema èn fu tranga a trowlibi fu den. Fa den du dati?

TRON MORO BUN MATI FU GADO ÈN FU MAKANDRA

3, 4. San kan pasa na ini wan trowlibi son leisi?

³ Wan trowlibi e tyari tu difrenti sma kon makandra di abi den eigi sani di den lobi, den abi den eigi denki, èn den abi den eigi fasi fa den e du sani. Boiti dati, a kan taki a masra nanga a wefi kweki na difrenti fasi èn taki den de fu difrenti kulturu. Wan trowpaar musu meki muiti fu leri sabi makandra èn fu frustan makandra bun. A sani disi e teki ten.

⁴ Son leisi, wan masra nanga en wefi kan bigin poti so furu prakseri na den eigi tori, taki te fu kaba a gersi leki den e libi den eigi libi. San kan yepi den te dati pasa?

5. (a) San kan yepi wan Kresten fu tron wan moro bun mati fu en trowpatna? (b) Fa wi musu si a trowlibi soleki fa Hebrewsma 13:4 e taki?

⁵ Yehovah e gi bun rai di kan yepi yu nanga yu trowpatna fu tron moro bun mati fu en èn fu makandra (Psalm 25:4; Yesaya 48:17, 18). A e taigi wi: „Un alamala musu si a trowlibi leki wan lespeki sani” (Hebrewsma 13:4). Te Yehovah e taigi wi fu si a trowlibi leki wan lespeki sani, dan disi wani taki dati a trowlibi musu prenspari gi wi èn taki wi musu warderi en. Wi no musu si en leki wan lawlaw sani èn wi o du ala san wi man fu no pori en.

LOBI GI YEHOVAH KAN YEPI YU FU ABI WAN BUN TROWLIBI

6. Fa Yehovah e si a trowlibi soleki fa Mateyus 19:4-6 e sori?

⁶ Na Yehovah ben trow den fosi tu sma. En Manpikin, Yesus, ben taki: „Unu no leisi taki a sma di meki den na a bigin, meki wan man nanga wan uma, èn taki a ben taki: ’Dati meki wan man o gowe libi en papa nanga en mama. A o tai hori na en wefi èn den tu sma dati o de wán skin’? Sobun, den no de tu skin moro, ma wán skin. Fu dati ede, san Gado tyari kon na wán nowan sma musu prati” (Mateyus 19:4-6). Sensi a bigin, Yehovah ben wani taki a trowlibi ben musu tan fu ala ten. A ben wani taki den sma na ini wan osofamiri ben musu libi bun nanga makandra èn taki den ben musu de koloku.

7. Fa masra nanga wefi kan abi wan moro bun trowlibi?

⁷ Ma na ini a ten disi, trowpaar e kisi moro stress nanga problema na ini a trowlibi. Son leisi den problema bigi so te taki den denki taki yepi no de èn den no e du muiti moro fu lusu den problema. Ma te wi e frustan fa Yehovah e si a trowlibi, dan dati kan yepi wi.​—1 Yohanes 5:3.

8, 9. (a) O ten wi musu teki a rai fu Yehovah di abi fu du nanga a trowlibi? (b) Fa wi kan sori taki a trowlibi prenspari gi wi?

⁸ Ala ten Yehovah e gi wi rai di bun gi wi. Soleki fa wi si, dan Yehovah taki dati wi „musu si a trowlibi leki wan lespeki sani” (Hebrewsma 13:4; Preikiman 5:4). Efu wi teki a rai disi srefi te a muilek gi wi, dan wi o kisi wini fu dati.​—1 Tesalonikasma 1:3; Hebrewsma 6:10.

⁹ Fu di a trowlibi prenspari gi wi, meki wi no o du noso taki sani di kan pori en. Na presi fu dati, wi wani tron moro bun mati fu a trowpatna fu wi. Fa wi kan du dati?

DEN SANI DI YU E TAKI ÈN E DU MUSU SORI TAKI YU E LESPEKI A TROWLIBI

10, 11. (a) Sortu seryusu problema de na ini son trowlibi? (b) Fu san ede a prenspari taki wi e luku bun fa wi e taki nanga wi trowpatna?

¹⁰ Difrenti fasi de fa wan sma kan hati en trowpatna. Wi sabi taki Kresten no mag naki den trowpatna, noso du sani fu gi den mankeri. Ma toku wi kan hati makandra nanga den sani di wi e taki. Den wortu fu wi kan sutu leki nefi. Wan uma taki: „Mi masra e naki mi nanga den wortu fu en. Kande yu no e si marki na mi skin, ma te a e taigi mi ala yuru taki mi na wan hebi gi en èn taki mi no warti noti, dan mi e firi en te na ini mi ati.” Wan masra ben taki dati en wefi ben gwenti wisiwasi en èn taki a ben e kosi en. A taki: „Den sani di a e taigi mi, a no sani di bun fu fruteri tra sma baka. Dati meki mi no man taki nanga en. A moro betre gi mi fu tan wroko latilati leki fu kon na oso.” Na ini a ten disi, furu sma abi a gwenti fu kosi èn fu taigi trawan hati sani.

¹¹ Son leisi den sani di masra nanga wefi e taigi makandra e hati moro soro èn a e teki wan heri pisi ten fosi a soro dati drei. A de krin taki Yehovah no wani taki masra nanga wefi musu libi so nanga makandra. Ma toku wi kan hati wi trowpatna sondro taki wi sabi. Kande yu feni taki yu e taki switi nanga yu trowpatna, ma na so yu trowpatna srefi e firi tu? Efu yu taki wan sani di hati yu trowpatna, yu de klariklari fu no taki so moro?​—Galasiasma 5:15; leisi Efeisesma 4:31.

12. San kan meki taki wan sma di trow no de wan bun mati moro fu Yehovah?

¹² A fasi fa yu e taki nanga yu trowpatna te unu de unu wawan noso nanga trawan, prenspari gi Yehovah. (Leisi 1 Petrus 3:7.) Yakobus 1:26 e taki: „Efu wan sma denki taki a e anbegi Gado, ma a no e basi en tongo, dan a e kori ensrefi. A sma disi e anbegi Gado fu soso.”

13. San na wan tra fasi fa wan sma kan hati en trowpatna?

¹³ Tra fasi de tu fa trowpatna kan sori taki den e hori makandra na prakseri. Fu eksempre, fa yu trowpatna ben o feni en efu yu bigin bumui furu nanga wan tra sma? A no abi fu de wan fowtu sani, fu di a kan taki na wroko yu e wroko nomo nanga a sma na ini a preikiwroko noso taki na yepi yu e yepi en nanga wan problema. Ma a sani dati ben o hati yu trowpatna? Wan sisa di trow e taki: „Te mi e si taki mi masra e poti furu prakseri na wan sisa na ini a gemeente, dan a sani dati e hati mi èn mi e firi leki mi no warti noti.”

14. (a) Sortu prenspari sani wi e leri fu Genesis 2:24? (b) San wi musu aksi wisrefi?

¹⁴ Leki Kresten, wi abi a frantwortu fu poti prakseri na wi papa nanga mama èn na wi brada nanga sisa na ini wi gemeente. Ma te wi trow, a moro prenspari frantwortu fu wi na fu poti prakseri na wi trowpatna. Yehovah taki dati wan masra musu „tai hori na en wefi” (Genesis 2:24). Den firi fu wi trowpatna musu prenspari gi wi. Dati meki yu musu aksi yusrefi: ’Mi abi nofo ten gi mi trowpatna? Mi e poti prakseri na en? Mi e sori en taki mi lobi en?’

15. Fu san ede Kresten di trow no musu bumui tumusi furu nanga wan sma di no de den trowpatna?

¹⁵ Te yu e bumui tumusi furu nanga wan sma di no de yu trowpatna, dan dati kan tyari problema kon na ini yu trowlibi. Yu kan kisi a firi taki yu musu fruteri a sma dati ala san yu e firi èn e denki, èn a kan meki taki yu bigin kisi lobifiri gi en (Mateyus 5:28). Den firi dati kan kon tranga so te taki yu go du wan sani di kan pori yu trowlibi.

„UN NO MUSU DOTI A TROWLIBI FU UNU”

16. San masra nanga wefi no musu du soleki fa Bijbel e taki?

¹⁶ Soleki fa wi si kaba, dan wi „alamala musu si a trowlibi leki wan lespeki sani”. Ma a tekst e taki moro fara: „Un no musu doti a trowlibi fu unu, bika Gado o krutu huruman nanga sutaman” (Hebrewsma 13:4). Na ini Grikitongo, a wortu di vertaal nanga „trowlibi” na ini a tekst disi na „trowbedi” èn a abi fu du nanga a sekslibi fu wan masra nanga en wefi (Odo 5:18). Fa wi kan sorgu taki wi no doti a trowlibi?

17. (a) Fa furu sma e si sutadu? (b) Fa Kresten e si sutadu?

¹⁷ Son sma no feni taki a fowtu fu waka gi den trowpatna. Ma wi no mag teki a denki disi abra. Yehovah e taigi wi krin taki a no lobi en te sma e du hurudu noso sutadu (Leisi Romesma 12:9; Hebrewsma 10:31; 12:29). Efu wi ben o abi seks nanga wan sma di no de wi trowpatna, dan wi ben o doti wi trowlibi. Na so wi ben o sori taki wi no abi lespeki gi den wet fu Yehovah èn wi no ben o de mati moro fu en. Dati meki wi no musu denki srefi fu du wan sani di kan meki wi du sutadu. Disi wani taki dati wi no musu prakseri sani tu di kan meki wi kisi takru lostu gi wan trawan.​—Yob 31:1.

18. (a) Fu san ede sutadu de a srefi leki te wan sma e anbegi falsi gado? (b) Fa Yehovah e si sutadu?

¹⁸ Di den Israelsma fu owruten ben e hori a Wet fu Moses, sutadu ben de wan seryusu sondu. A ben de a srefi leki te wan sma ben e anbegi falsi gado. Sma ben e kisi dedestrafu gi den sondu disi (Lefitikus 20:2, 10). Fa sutadu de a srefi leki te wan sma e anbegi falsi gado? Te wan Israelsma ben e anbegi falsi gado, dan a no ben hori ensrefi moro na a pramisi di a ben meki taki a ben o gi yesi na Yehovah. Efu a ben du sutadu, dan a no ben hori ensrefi moro na a pramisi di a ben meki taki a no ben o waka gi en trowpatna (Eksodes 19:5, 6; Deuteronomium 5:9; leisi Maleaki 2:14). Soleki fa wi si, dan Yehovah ben e si sutadu leki wan seryusu sondu.

19. San kan yepi wi fu no denki srefi fu du sutadu?

¹⁹ Fa a de na ini a ten disi? Aladi wi no e hori a Wet fu Moses, toku Yehovah e si sutadu leki wan seryusu sondu ete. Noiti wi ben o denki fu anbegi wan falsi gado. Na so a de tu taki noiti wi musu denki srefi fu waka gi wi trowpatna (Psalm 51:1, 4; Kolosesma 3:5). Efu wi ben o waka gi wi trowpatna, dan wi no ben o sori lespeki gi wi trowlibi èn gi wi Gado, Yehovah.​—Luku „Ete wan tu sani” 26.

FA YU KAN TRANGA YU TROWLIBI?

20. San koni e du gi wan osofamiri?

²⁰ San yu kan du fu tranga yu trowlibi? Bijbel e taki: „Na koni o bow wan osofamiri èn a koni fu man si sani krin o meki na osofamiri kon tranga” (Odo 24:3). Wan osofamiri de leki wan oso. Wan oso di bow bun, switi fu tan na ini èn den sma na ini no e frede taki sani o miti den. Na so a trowlibi musu de tu. Wan koni sma o sorgu taki sani e waka bun nanga en osofamiri, taki en trowpatna firi switi èn taki a de koloku.

21. Fa koni kan tranga wan trowlibi?

²¹ Bijbel e taki moro fara: „Koni o meki taki den kamra fu na oso lai nanga ala sortu diri sani èn nanga moimoi sani di warti srefisrefi” (Odo 24:4). Den sani di yu e leri fu Bijbel kan yepi yu fu meki yu trowlibi waka moro bun (Romesma 12:2; Filipisma 1:9). Te yu nanga yu trowpatna e sidon makandra fu leisi Bijbel nanga den buku fu wi, dan taki nanga makandra fa unu kan gebroiki den sani di unu e leri. Suku fasi fu sori lobi nanga lespeki gi yu trowpatna. Du muiti tu fu sori switifasi gi en èn sori en taki yu e prakseri en. Aksi Yehovah fu yepi yu fu kon abi trutru lobi, lespeki gi Gado èn wan tranga bribi. Ala den sani disi o tranga yu trowlibi èn di o meki taki yu trowpatna kon abi moro lobi gi yu.​—Odo 15:16, 17; 1 Petrus 1:7.

22. Fu san ede wi musu sori lobi nanga lespeki gi wi trowpatna èn gi en grani?

²² Wi musu du ala san wi man fu sori lobi nanga lespeki gi wi trowpatna èn fu gi en grani. Dan moro lobi o de na ini a trowlibi èn a o kon moro tranga. Ma san moro prenspari, na taki Yehovah o breiti nanga wi.​—Psalm 147:11; Romesma 12:10.