San na anbegi?

Anbegi na te wan sma e „sori lespeki nanga lobi gi wan gado”. Na ini son Bijbeltekst a Hebrew wortu nanga a Griki wortu di vertaal nanga „anbegi”, wani taki dati wan sma e lespeki noso e saka ensrefi na ondro wan libisma (Mat. 28:9). A wortu „anbegi” kan abi fu du tu nanga wan sani di wan sma e du fu anbegi a tru Gado noso wan falsi gado (Yoh. 4:23, 24). Sobun, efu wi wani frustan san a wortu wani taki na ini wan Bijbeltekst, dan wi musu luku den tra vers na ini a kapitel.

Wi musu anbegi Yehovah wawan, fu di en na wi Mekiman èn en na a Moro Hei Tiriman (Openb. 4:10, 11). Wi e anbegi Yehovah te wi e sori lespeki gi en leki a Moro Hei Tiriman èn te wi e gi en nen grani (Ps. 86:9; Mat. 6:9, 10). A buku Esekièl e taki fu den tu prenspari sani disi: A reti di Yehovah abi fu tiri èn a nen fu en. Na ini a buku Esekièl den wortu „a Moro Hei Masra Yehovah” skrifi 212 leisi èn den wortu „sabi taki mi na Yehovah” skrifi 53 leisi.​—Esek. 2:4; 6:7.

Ma na anbegi fu wi a no wan firi nomo. Wi musu du sani fu sori taki wi e anbegi Gado (Yak. 2:26). Te wi e gi wisrefi abra na Yehovah, dan wi e pramisi en taki wi o du ala san a e aksi fu wi fu di en na wi Tiriman. Wi e pramisi en tu taki wi o sori dipi lespeki gi a nen fu en. Prakseri san Yesus taki di Satan tesi en a di fu dri leisi. A ben sori taki wi musu anbegi Gado èn wi musu dini en (Mat. 4:10). Leki anbegiman fu Yehovah wi de klariklari fu dini en (Deut. 10:12).a Wi e dini Gado te wi e du sani gi en awinsi a no makelek son leisi. San na den sani dati?

Wi kan du difrenti sani fu dini Yehovah èn Yehovah e warderi ala den sani dati. Te wi e preiki, te wi e teki prati na den konmakandra na ini a Kownukondre zaal, te wi e bow konmakandra presi èn e sorgu gi den, dan wi e dini Yehovah. Wi e dini en tu te wi e hori na Osofamiri Anbegi, te wi e yepi wi brada nanga sisa te rampu miti den, te wi e yepi na den kongres, noso te wi e wroko na Betel (Hebr. 13:16; Yak. 1:27). Te wi e anbegi Yehovah nanga wi heri ati èn nanga wi heri frustan, dan wi o „du santa wroko gi en dei nanga neti”. A e gi wi furu prisiri fu anbegi Yehovah, a Gado fu wi!​—Openb. 7:15.