LES 7

Leri sma sani di tru

Lukas 1:3

SAN YU MUSU DU: Sorgu taki den buku noso tra sani di yu e gebroiki e taki sani di tru, so taki yu kan yepi den arkiman fu frustan wan tori krin.

Gebroiki buku noso koranti di sma kan frutrow. Gebroiki Gado Wortu te yu e gi leri. Te a kan, leisi langalanga komoto fu en. Efu yu o taki fu wan sani di wan sabiman kon si, noso efu yu o gebroiki nyunsu fu koranti noso telefisi, dan luku bun taki den tori tru èn luku efu noti no kenki.
Fruklari sani na wan yoisti fasi. Te yu e fruklari wan tekst, dan sorgu taki den sani di yu e taki e kruderi nanga den tra vers fu a kapitel, nanga a boskopu fu Bijbel èn nanga san „a koni srafu di de fu frutrow” e taki fu a tori (Mat. 24:45). Te yu e gebroiki tra buku noso koranti, dan sorgu taki yu no e fruklari sani tra fasi leki san a skrifiman ben abi na prakseri.

No taki sani di no tru èn no kari nomru di no e sori fa sani de trutru. Luku bun taki yu no e taki „furu sma”, aladi a buku e taki fu „wan tu sma”. No taki „ala ten”, te a buku e taki „son leisi” noso no taki dati wan sani de so aladi a buku e taki „kande”.
Taki-go-taki-kon nanga den arkiman. Baka te yu leisi wan tekst noso te yu taki fu sani di komoto na ini wan buku, dan poti aksi noso gebroiki wan agersitori fu meki den arkiman frustan san yu wani leri den.