LES 18

Meki den arkiman leri wan sani

1 Korentesma 9:19-23

SAN YU MUSU DU: Fruteri den arkiman wan tori di o meki den go denki fu san yu e taki èn di o gi den a firi taki den leri wan bun sani.

Prakseri san den arkiman fu yu sabi kaba. Na presi fu taki fu sani di den sabi kaba, yepi den fu si a tori na wan fasi di den no ben si en ete.

Efu yu e taki fu wan tori di furu fu den arkiman sabi kaba, dan no taki tumusi langa fu en. Ma te yu e taki fu wan nyun sani, dan teki moro ten fu taki fu en.
Ondrosuku sani èn denki dipi. Kande yu kan gebroiki wan sani di den arkiman no ben denki fu en noso di den no yere ete, fu tyari wan prenspari penti fu yu lezing kon na krin. Ma denki dipi fosi, so taki yu kan de seiker taki a sani di yu o taki, e fiti.

Te yu e studeri a tori di yu o taki fu en, dan aksi yusrefi sani soleki ’fu san ede, san, o ten, pe, suma, èn fa’. Den aksi disi o yepi yu fu go denki fu a tori. Yu o man hori a lezing fu yu nanga moro faya te yu e poti wan tu fu den aksi disi èn te yu e piki den.
Meki den arkiman si fa a boskopu fu yu kan yepi den. Fruklari fa wan Bijbeltekst noso wan Bijbel tori kan yepi den arkiman na ini a libi fu den. Taki fu wan situwâsi, fu son denki di sma abi èn fu son sani di sma e du, so taki den arkiman kan si fa a tori kan yepi den.