LES 29

San e pasa nanga wan sma te a dede?

Wan fowtow fu a bladzijde na ini a buku

Wan sma di yu ben lobi dede? Efu a sani disi miti yu, dan kande yu aksi yusrefi: ’San e pasa nanga wan sma te a dede? Mi o si a sma baka?’ Na ini a les disi nanga a wan na en baka, wi o si fa Bijbel e piki den aksi disi. Den piki disi o trowstu yu.

1. San e pasa nanga wan sma te a dede?

Yesus ben taki dati dede de leki wan dipi sribi. Fu san ede a taki dati? Wan sma di e sribi dipi no sabi san e pasa na en lontu. Na so a de tu nanga wan sma di dede. So wan sma no e firi pen èn a no e pina. Bijbel e taki: „Den dedewan no sabi notinoti.”—Leisi Preikiman 9:5.

2. Sortu wini a e tyari kon gi wi efu wi sabi san e pasa nanga wan sma te a dede?

Furu sma e frede fu dede èn den e frede dedesma. Ma te yu kon sabi san Bijbel e taki fu dede, dan yu no o frede moro. Yesus ben taki: „Unu o sabi san tru èn dati o meki unu kon fri” (Yohanes 8:32). Son kerki e leri taki baka te wan sma dede, en yeye noso en sili e libi go doro. Ma a no dati Bijbel e taki. Sobun, wan sma no e pina baka te a dede. Èn fu di den dedewan no sabi noti, meki den no man du ogri nanga wi. Dati meki wi no abi fu anbegi den dedewan èn wi no abi fu du sani fu no meki den ati bron nanga wi. A no de fanowdu fu begi gi den tu.

Son sma e taki dati den man taki nanga dedesma. Ma a sani dati no kan. Soleki fa wi leri, den dedewan „no sabi notinoti”. Den sma di e denki taki den e taki nanga den dedewan, e taki nanga ogri yeye di e du leki den na sma di dede. Sobun, te yu sabi san e pasa nanga den dedewan, dan dati o kibri yu gi den ogri yeye. Yehovah e warskow wi fu no pruberi fu taki nanga den dedewan, fu di a sabi taki den ogri yeye kan du ogri nanga wi.—Leisi Deuteronomium 18:10-12.

SORTU TRA SANI YU KAN LERI?

Wi o si sortu tra sani Bijbel e taki fu dede. Disi o yepi yu fu si taki Gado lobi wi èn taki a no e strafu sma di dede.

Wan man nanga den tu yongu pikin fu en e sidon na tapu wan bangi. Den de na a beri fu a frow fu en. Mati nanga famiri e tanapu na den lontu fu trowstu den èn fu yepi den.

3. San Bijbel e taki fu den dedewan?

Na heri grontapu sma abi den eigi denki fu san e pasa te wan sma dede. Ma a no ala den denki disi kan tru.

San sma na ini a kontren fu yu e denki fu den dedewan?

Fu kon sabi san Bijbel e leri, dan prei a FELEM.

FELEM: San e pasa nanga den dedewan?—Wan syatu pisi (1:19)

Fowtow: Wan tu pisi fu a felem ’San e pasa nanga den dedewan?—Wan syatu pisi’. 1. Wan dedeskin na ini wan ati-oso bedi. 2. Wan man di e sidon na mindri tu sma na ini wan loko e sribi.

Leisi Preikiman 3:20 èn taki fu den aksi disi:

Te yu luku san a tekst e taki, dan san e pasa nanga wan sma te a dede?
A tekst disi e leri taki te wan sma dede, en yeye noso en sili e libi go doro?

Na ini Bijbel yu kan leisi fu a dede fu Lasarus, wan bun mati fu Yesus. Te yu e leisi Yohanes 11:11-14, dan luku san Yesus e taki fu Lasarus. Baka dati taki fu den aksi disi:

San Yesus taki fu Lasarus di ben dede?
San a sani di Yesus taki e leri wi fu den dedewan?
Fa yu feni den sani di Bijbel e taki fu den dedewan?

4. A e tyari wini kon gi wi te wi sabi san e pasa nanga den dedewan

Te wi sabi san e pasa nanga wan sma te a dede, dan wi no o frede den dedewan. Leisi Preikiman 9:10 èn taki fu na aksi disi:

Dedesma kan du ogri nanga wi?

Te wi e bribi san Bijbel e taki fu den dedewan, dan wi o si taki wi no abi fu anbegi dedesma èn wi no abi fu du sani fu no meki den ati bron nanga wi. Leisi Yesaya 8:19 nanga Openbaring 4:11. Baka dati taki fu na aksi disi:

Fa yu denki Yehovah e firi te wan sma e anbegi den dedewan noso te a e go suku yepi na den?

Fowtow: Sani di sma gwenti du fu gi grani na dedesma. 1. Wan man e kindi na fesi wan grebi. A e begi èn a e poti nyanyan. 2. Dri man e dansi èn den weri kulturu krosi. 3. Wan grupu sma e waka na strati. Den weri masker fu bonyo ede èn den hori popki fu libisma skelet na ini den anu. — Te wi sabi san e pasa nanga den dedewan, dan wi no o hori wisrefi na gwenti di Yehovah no lobi

5. A e trowstu wi te wi sabi san e pasa nanga den dedewan

Furu sma leri taki te den dede, Gado o strafu den gi den ogri di den du. Ma Bijbel e leri taki nowan sma e pina baka te a dede. Srefi sma di du ogri sani no e pina baka te den dede. A sani disi e trowstu wi. Leisi Romesma 6:7 èn taki fu na aksi disi:

A tekst e taki dati te wan sma dede a no abi fu pai gi den sondu fu en moro. Efu dati de so, dan yu denki taki dedesma e kisi strafu fu den fowtu di den meki di den ben de na libi?

O moro wi e kon sabi Yehovah, o moro wi o frustan taki noiti a ben o pina den dedewan. Leisi Deuteronomium 32:4 nanga 1 Yohanes 4:8. Baka dati taki fu den aksi disi:

Yu denki taki wan Gado di abi den fasi di kari na ini den tekst disi, ben o pina wan sma baka te a dede?
Den sani di Bijbel e leri fu dede e trowstu yu? Fu san ede?

SON SMA E TAKI: „Mi e frede san o pasa nanga mi te mi dede.”