LES 30
Den sma fu yu di dede kan libi baka!
Te wan sma fu wi dede, dan a e hati wi èn wi e sari. Dati meki Bijbel e kari dede wan feanti (1 Korentesma 15:26). Na ini les 27, yu leri taki Yehovah o puru dede gi wi. Ma san o pasa nanga den sma di dede kaba? Na ini a les disi wi o taki fu wan tra moi pramisi fu Yehovah. A pramisi taki a o gi milyunmilyun sma di dede wan opobaka, so taki den kan libi fu têgo. Ma a sani dati kan? Pe den sma disi o libi, na hemel noso na grontapu?
1. San Yehovah wani du gi den mati nanga famiriman fu yu di dede?
Yehovah no man wakti fu gi den sma di dede wan opobaka. Yob, wan man di ben abi wan tranga bribi, ben de seiker taki Gado no ben o frigiti en te a ben o dede. A ben taigi Gado: „Yu o kari mi èn mi o piki yu [komoto fu grebi].”—Leisi Yob 14:13-15.
2. Fa wi du sabi taki dedesma man libi baka?
Di Yesus ben de na grontapu Gado ben gi en a krakti fu gi dedesma libi baka. Yesus ben gi wan meisje fu 12 yari nanga a boi fu wan uma di masra ben dede kaba, wan opobaka (Markus 5:41, 42; Lukas 7:12-15). Bakaten Lasarus, a mati fu Yesus, dede. Lasarus ben dede fo dei kaba èn den ben beri en kaba. Toku Yesus gi en libi baka. Di Yesus go na a grebi, a begi Gado èn a taki: „Lasarus, kon na doro!” Èn „a man di ben dede, kon na doro”! (Yohanes 11:43, 44) Prakseri fa den famiri nanga mati fu Lasarus ben e prisiri!
3. Sortu howpu de gi den sma fu yu di dede?
Bijbel e taki: ’Gado o gi sma wan opobaka’ (Tori fu den apostel 24:15). Den sma di Yesus gi wan opobaka di a ben de na grontapu no go na hemel (Yohanes 3:13). Na dyaso na grontapu Yesus gi den libi baka èn den ben breiti taki den ben kisi wan opobaka. Na dati Yesus o du tu na ini a ten di e kon. Heri esi a o gi milyunmilyun sma wan opobaka fu libi fu têgo na ini wan paradijs na grontapu. Yesus ben taki dati ala den sma di Gado o memre o kisi wan opobaka, srefi den wan di sma frigiti.—Yohanes 5:28, 29.
SORTU TRA SANI YU KAN LERI?
Wi o si taki Yesus abi a makti fu gi dedesma libi baka èn taki a wani du dati tu. Wi o si fa a sani dati kan trowstu wi èn fa a kan gi wi howpu.
4. Yesus sori taki a man gi dedesma libi baka
Kon meki wi luku a tori baka fu Lasarus, a mati fu Yesus. Leisi Yohanes 11:14, 38-44. Baka dati taki fu den aksi disi:
Fa wi du sabi taki Lasarus ben dede trutru?—Luku vers 39.
Efu Lasarus ben de na hemel, yu denki taki Yesus ben o meki a kon libi baka na grontapu?
5. Furu sma o kisi wan opobaka!
Leisi Psalm 37:29 èn taki fu na aksi disi:
Pe den milyunmilyun sma di o kisi wan opobaka o libi?
Yesus no o gi soso den anbegiman fu Yehovah wan opobaka, ma furu tra sma o kisi wan opobaka tu. Leisi Tori fu den apostel 24:15 èn taki fu na aksi disi:
Suma fu yu di dede yu wani si baka?
Prakseri a sani disi: Neleki fa a no muilek gi wan papa fu wiki a pikin fu en di e sribi, na so a no muilek gi Yesus fu wiki wan sma di dede
6. A e trowstu wi te wi sabi taki dedesma o kisi wan opobaka
A tori fu na umapikin fu Yairus trowstu furu sma di e sari. Leisi a tori disi di pasa trutru na ini Lukas 8:40-42, 49-56.
Fosi Yesus gi a meisje fu Yairus libi baka, a taigi en papa: „No frede, na bribi yu musu bribi nomo.” (Luku vers 50.) Fu di wi sabi taki dedesma o kisi wan opobaka, dan fa a sani dati e yepi wi te . . .
wan sma di wi lobi dede?
wi de na ini wan situwâsi pe wi kan lasi wi libi?
Prei a FELEM èn taki fu na aksi disi:
Fa na opobaka howpu trowstu a papa nanga mama fu Phelicity?
SON SMA E TAKI: „Mi no man bribi taki dedesma o libi baka.”
San yu e denki?
Sortu tekst yu ben o gebroiki fu sori wan sma taki dedesma o libi baka?
SAN YU LERI?
Bijbel e pramisi taki milyunmilyun sma di dede o kisi wan opobaka. Yehovah wani taki den libi baka èn a gi Yesus a makti fu gi den wan opobaka.
Fa yu ben o piki den aksi disi?
Fa wi du sabi taki Yehovah nanga Yesus wani gi dedesma libi baka?
Pe den milyunmilyun sma di o kisi wan opobaka o libi, na hemel noso na grontapu? Fu san ede yu piki so?
Fu san ede yu de seiker taki den mati nanga famiriman fu yu di dede o libi baka?
TRA SANI DI YU KAN LUKU
Na ini na artikel disi yu o si san yu kan du te yu e sari fu di wan sma fu yu dede.
„Yepi gi den sma di lasi wan lobiwan” (Ontwaakt! Nr. 3 2018)
Bijbel rai kan yepi wan sma di e sari?
San kan yepi pikin-nengre te wan sma di den lobi dede?
Sma o kisi wan opobaka fu go na hemel? Suma no o kisi wan opobaka?