Yu klari kaba fu dopu?

Yu leri furu sani fu Yehovah na a Bijbelstudie fu yu. A kan taki yu tyari wan tu kenki kon fu man du san yu leri. Ma kande toku wan sani e tapu yu fu gi yusrefi abra na Yehovah èn fu dopu. Na ini a les disi wi o taki fu wan tu sani di e tapu sma fu dopu. Wi o si tu san kan yepi yu fu teki a bosroiti fu dopu.

1. O furu yu musu sabi fu Bijbel fosi yu kan dopu?

Efu yu wani dopu yu musu „kon sabi a tru leri finifini” (1 Timoteyus 2:4). Ma disi no wani taki dati fosi yu dopu yu musu sabi a piki tapu ala sani di sma e aksi yu fu Bijbel. Srefi Kresten di dopu wan langa ten kaba e tan leri sani fu Bijbel (Kolosesma 1:9, 10). Ma fosi yu dopu yu musu sabi den prenspari leri fu Bijbel. Efu yu no de seiker efu yu sabi nofo fu Bijbel, dan yu kan taki nanga den owruman.

2. San na wan tu sani di yu musu du fosi yu dopu?

Fosi yu dopu yu musu ’abi berow èn yu musu drai yu libi’. (Leisi Tori fu den apostel 3:19.) Dati wani taki dati yu musu sari fu den sondu di yu ben du fosi yu kon sabi Yehovah èn yu musu aksi en fu gi yu pardon. Yu no musu libi moro leki fosi, ma yu musu libi leki fa Yehovah wani. Wan tra sani di yu musu du fosi yu dopu, na taki yu musu go na den konmakandra èn yu musu preiki makandra nanga a gemeente.

3. Fu san ede yu no abi fu frede fu dopu?

Son sma e frede taki den no o man du san den pramisi Yehovah. Ma Yehovah sabi taki wi o meki fowtu son leisi. Srefi den anbegiman fu Yehovah di kari na ini Bijbel ben meki fowtu son leisi. Yehovah sabi taki wi na sondu libisma. (Leisi Psalm 103:13, 14.) Yehovah breiti te wi e du ala san wi man fu gi yesi na en èn a o yepi wi fu du dati. Yehovah taki dati noti no „man prati wi fu a lobi fu [en]”.​—Leisi Romesma 8:38, 39.

SORTU TRA SANI YU KAN LERI?

4. Kon sabi Yehovah moro bun

O bun yu musu sabi Yehovah fosi yu kan dopu? Solanga yu lobi Yehovah, yu sabi fa a wani taki yu musu libi èn yu e du muiti fu libi so tu, dan yu kan dopu. Prei a FELEM fu si san yepi difrenti sma di e studeri Bijbel fu dopu. Baka dati taki fu na aksi disi:

FELEM: San yu musu du fu kan dopu (3:56)

• San yepi den sma na ini a felem fu dopu?

Leisi Romesma 12:2 èn taki fu den aksi disi:

• Yu e bribi ala den sani di yu e leri na ini Bijbel èn yu e bribi taki Yehovah Kotoigi abi a tru bribi?

• Efu yu e tweifri, dan san yu kan du?

5. San kan yepi yu te wan sani e tapu yu fu dopu?

Te wi wani gi wisrefi abra na Yehovah èn wi wani dopu, dan wi musu tyari wan tu kenki kon di kan muilek gi wi. Kon meki wi luku wan eksempre. Prei a FELEM èn taki fu den aksi disi:

FELEM: Lobi gi Yehovah meki mi teki wan bosroiti (5:22)

• Sortu sani ben meki en muilek gi Narangerel fu dini Yehovah?

• Fa a lobi di a abi gi Yehovah yepi en fu man dopu?

Leisi Odo 29:25 nanga 2 Timoteyus 1:7. Baka dati taki fu na aksi disi:

• San kan gi yu deki-ati te wan sani e tapu yu fu dopu?

6. Yu kan frutrow taki Yehovah o yepi yu

Ala ten Yehovah o yepi yu. Prei a FELEM èn taki fu den aksi disi:

FELEM: Yehovah Gado o yepi yu (2:50)

• Fu san ede a Bijbelstudie na ini a felem ben frede fu dopu?

• San yepi en fu frutrow moro tapu Yehovah?

Leisi Yesaya 41:10, 13 èn taki fu na aksi disi:

• Fu san ede yu kan de seiker taki yu o man du san yu pramisi Yehovah?

7. Yu musu warderi a lobi di Yehovah sori gi yu

O moro yu e prakseri o furu Yehovah lobi yu, o moro yu o warderi den sani di a du gi yu. A sani disi o meki taki yu o wani dini en fu têgo. Leisi Psalm 40:5 èn taki fu na aksi disi:

• Sortu blesi di yu kisi fu Yehovah yu lobi moro?

A profeiti Yeremia ben lobi Yehovah èn a ben lobi a boskopu fu en. A ben si en leki wan grani fu dini Yehovah. A ben taki: ’Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu Yehovah’ (Yeremia 15:16). Piki den aksi disi:

• Fu san ede a de wan grani fu de wan Yehovah Kotoigi?

• Yu wani dopu èn yu wani tron wan Yehovah Kotoigi?

• Wan sani e tapu yu fu dopu?

• San yu denki yu musu du ete fu man dopu?

SAN YU LERI?

Yehovah o man yepi yu fu teki a bosroiti fu dopu, awinsi wan sani de di e tapu yu.

Fa yu ben o piki den aksi disi?

• O furu yu musu sabi fu Bijbel fosi yu kan dopu?

• Sortu kenki yu musu tyari kon fosi yu kan dopu?

• Fu san ede yu no abi fu frede fu dopu?

TRA SANI DI YU KAN LUKU

Na ini na artikel disi yu o si fu san ede yu musu teki a bosroiti fu dopu.

„Yu klari kaba fu dopu?” (A Waktitoren, maart 2020)

Na ini na artikel disi yu o si san yu kan du te wan sani e tapu yu fu dopu.

„San e tapu mi fu dopu?” (A Waktitoren, maart 2019)

Na ini a felem disi yu o si san ben tapu wan man fu dopu.

Fu san ede yu e draidrai fu teki dopu? (1:10)

Wan man di nen Ataa ben draidrai fu dopu. Na ini a felem disi yu o si san yepi en fu teki a prenspari bosroiti disi.

Mi warti nofo fu kisi someni blesi? (7:21)