Horibaka gi a gemeente

Na heri grontapu milyunmilyun sma e dini Yehovah na ini dusundusun gemeente. Den e du dati nanga prisiri èn den de nanga tangi gi a leri nanga den rai di den e kisi. Den breiti te den man du sani fu horibaka gi a gemeente. Na so yu e denki tu fu a gemeente?

1. Fa yu kan gebroiki yu ten nanga yu krakti fu horibaka gi a gemeente?

Wi alamala kan yepi a gemeente. Yu abi sma na ini yu gemeente di owru noso di siki? Yu kan yepi den fu kon na den konmakandra? Yu kan yepi den na tra fasi? Kande yu kan go na wenkri gi den noso yu kan yepi den nanga wan wroko na oso. (Leisi Yakobus 1:27.) Wi kan krin a Kownukondre zaal tu noso wi kan yepi nanga tra wroko di de fanowdu. Nowan sma no e dwengi wi fu du den sani disi. Wi „de klariklari” fu du den sani disi fu di wi lobi Gado nanga wi brada nanga sisa.​—Psalm 110:3.

Dopu Kotoigi kan du moro sani fu yepi a gemeente. Lepi brada kan dini leki dinari ini a diniwroko èn bakaten den kan tron owruman. Brada nanga sisa di wani du moro na ini a preikiwroko kan dini leki pionier. Son Kotoigi e yepi fu bow konmakandra presi noso den e froisi go na tra gemeente pe moro yepi de fanowdu.

2. Fa wi kan gebroiki wi moni nanga den tra sani di wi abi fu horibaka gi a gemeente?

Wi kan „gi Yehovah grani nanga den gudu di [wi] abi” (Odo 3:9). Wi e si en leki wan grani fu gebroiki wi moni nanga den tra sani di wi abi fu horibaka gi a gemeente èn gi a preikiwroko di e du na heri grontapu. (Leisi 2 Korentesma 9:7.) Den bijdrage di wi e gi na fu yepi den brada nanga sisa tu di e tan na presi pe wan rampu pasa. Furu brada nanga sisa abi a gwenti fu poti moni na wan sei fu gi leki bijdrage. (Leisi 1 Korentesma 16:2.) Wi kan poti wi bijdrage na ini den bijdrage boksu na den konmakandra presi fu wi noso wi kan du dati na a website donate.jw.org. Yehovah e gi wi alamala na okasi fu sori taki wi lobi en. Wan fasi fa wi e du dati na te wi e gebroiki wi moni nanga den sani di wi abi fu horibaka gi a gemeente.

SORTU TRA SANI YU KAN LERI?

3. Wi kan gi bijdrage

Yehovah nanga Yesus lobi en te sma e gi sani nanga den heri ati. Yesus ben prèise wan uma di no ben abi masra moro fu di a ben gi wan bijdrage aladi a ben pôti. Leisi Lukas 21:1-4 èn taki fu den aksi disi:

• Yehovah breiti soso nanga den sma di man gi furu moni?

• Fa Yehovah nanga Yesus feni en te sma e gi bijdrage nanga den heri ati?

Efu yu wani sabi fa den brada e gebroiki den bijdrage fu wi, dan prei a FELEM. Baka dati taki fu na aksi disi:

FELEM: „Gi Yehovah wan presenti” (4:47)

• Fa den brada e gebroiki den bijdrage fu yepi den gemeente na heri grontapu?

4. Wi kan yepi nanga a wroko di musu du

Na ini Bijbel ten den anbegiman fu Yehovah ben wroko tranga fu sorgu gi den presi pe den ben anbegi en. A no soso moni ben de fanowdu. Leisi 2 Kroniki 34:9-11 èn taki fu na aksi disi:

• Fa ibri Israelsma ben yepi sorgu gi na oso fu Yehovah noso a presi pe den ben anbegi en?

Efu yu wani si fa Yehovah Kotoigi e du a srefi sani di den Israelsma ben du, dan prei a FELEM. Baka dati taki fu den aksi disi:

FELEM: Fa fu sorgu gi den konmakandra presi fu wi (3:31)

• Fu san ede a prenspari fu krin a Kownukondre zaal èn fu sorgu taki a tan bun?

• San na wan tu fasi fa yu kan yepi?

5. Brada kan du muiti fu kisi moro frantwortu

Bijbel e gi brada deki-ati fu du muiti fu tyari moro frantwortu na ini a gemeente. Efu yu wani si fa den kan du dati, dan prei a FELEM. Baka dati taki fu na aksi disi:

FELEM: Brada​—Suku fu du wan tumusi bun wroko (5:19)

• San Ryan du fu yepi a gemeente moro?

Bijbel e sori fa wan brada musu tyari ensrefi fu kan tron dinari ini a diniwroko noso owruman. Leisi 1 Timoteyus 3:1-13 èn taki fu den aksi disi:

• Fa brada musu tyari densrefi efu den wani tron dinari ini a diniwroko noso owruman?

• Fa a musu de nanga na osofamiri fu den?​—Luku vers 4 nanga 11.

• Te brada e tyari densrefi soleki fa Bijbel e taki, dan fa dati e tyari wini gi a heri gemeente?

SAN YU LERI?

Yehovah breiti te wi e gebroiki wi ten, wi krakti, wi moni nanga den tra sani fu wi fu horibaka gi a gemeente.

Fa yu ben o piki den aksi disi?

• Fa yu kan gebroiki yu ten nanga yu krakti fu horibaka gi a gemeente?

• Fa yu kan gebroiki yu moni nanga den tra sani fu yu fu horibaka gi a gemeente?

• Na sortu fasi yu wani horibaka gi a gemeente?

TRA SANI DI YU KAN LUKU

Na ini na artikel disi yu o si fu san ede den anbegiman fu Gado no abi fu gi tiende moro.

„Bijbel e taki dati wi musu pai kerki wan di fu tin pisi fu wi moni?” (Web-artikel)

Bijbel e sori taki son frantwortu na gi dopu mansma. Ma san musu psa te wan dopu uma musu tyari den frantwortu disi?

„A frantwortu di owruman abi na ini a gemeente” (A Waktitoren, februari 2021)

Na ini a felem disi yu o si fa wan tu brada e du furu muiti fu sorgu taki den brada nanga sisa kan kisi den buku di den abi fanowdu.

Fa den e seni buku go na Kongo? (4:25)

Na ini na artikel disi yu o si taki a fasi fa na organisâsi fu wi e kisi moni e difrenti fu a fasi fa tra kerki e kisi moni.

„Pe Yehovah Kotoigi e feni a moni fu man du a wroko fu den?” (Web-artikel)