Gi na Jehovah den moro boen sani di wi abi
„’Heloe foe na soema di e handri nanga triki, efoe a abi ini na ipi meti foe hen wan man-meti en a de meki wan pramisi na Gado en a de tjari wan meti di no boen leki ofrandi gi Jehovah. Bikasi mi de wan bigi Kownoe’, so Jehovah foe den fetiman taki, ’en mi nen sa de wan frede sani na mindri den naatsi.’” — Maleachi 1:14.
1. Libisoema kan gi Jehovah troe troe wan sani?
A NO de wan vreemde sani, dati onvolmaakti libisoema ben sa denki srefi foe gi wan sani na a Moro Bigi Mekiman? En srefi noti de ini na heri universum, di no de kaba foe hen! Ini hen Wortoe hensrefi e taki: „Na foe mi na solfroe de, en foe mi na gowtoe de” (Hag. 2:8). „Ala den wilder meti foe boesi na foe mi, den meti tapoe doesoen bergi. Mi sabi heri boen ala fowroe foe den bergi, en den boesimeti na firi na foe mi. Efoe mi ben abi angri, mi no ben sa taigi joe; bikasi na fatoe gron na foe mi nanga ala sani, di de drape. Mi sa njan dan na meti foe tranga kaw en dringi na broedoe foe boko-boko?” (Ps. 50:10-13) Jehovah no abi presenti fanowdoe foe no wan soema ooktoe, bikasi a no mankeri no wan sani. A de na wan di e Libi tapoe hensrefi.
2. San David ben erken foe friwani ofrandi di ben tjari go na Jehovah?
2 Leki wan jonkoeman di ben kisi leri ini na Wet foe Mozes, David ben sabi leki na manpikin foe na Juda-soema Isaï, dati Jehovah abi na heri grontapoe (Ex. 19:5). Di jari na baka David ben gi bijdrage foe na tempel, di ben sa bow ini Jeruzalem, a ben taki leki wan begi nanga na Moro Héwan nanga den wortoe disi: „Soema tog na mi en san na pipel foe mi de, dati wi ben sa abi na makti foe kan gi friwani presenti? Bikasi ala sani e kon foe joe en foe joe anoe wi ben gi joe den. O, Jehovah, wi Gado, ala den foeroe sani disi pasa marki, di wi ben sreka foe meki gi joe wan oso foe joe santa nen, foe joe anoe a komoto en alamala na foe joe.” — 1 Kron. 29:14, 16.
3. (a) Sortoe aksi wi ben sa kan aksi tapoe na tori foe gave di wi ka pristeri Jehovah? (b) San na piki foe bijbel tapoe den sortoe aksi disi de?
3 Soboen, David ben erken, dati wi libisoema na no wan fasi wi kan meki na Almakti-wan kon goedoe. Ja, san wi sa gi ooktoe, a de soso wan gi baka foe wan pikin pisi foe san wi ben kisi foe na Fonten foe „ibri boen gave nanga ibri volmaakti presenti” (Jak. 1:17). Disi wani taki, dati na tjari foe gave gi na Mekiman foe wi, no abi warde? A de veragti den ofrandi foe hen dienstknegti di e dini hen nanga den heri ati? Na piki foe Gado Wortoe de Nono. Jehovah Gado e kari sakafasi aanbegiman foe tjari gave gi hen. Ini Psalm 96:8 wi e lési: „Gi Jehovah na glori di e fiti hen nen; tjari wan presenti en kon na den gadri foe hen.”
4. Sortoe gave e prisiri Jehovah?
4 A no de foe taki, dati Jehovah wani boen ofrandi di e komoto foe wan ati di foeroe nanga waarderi. Disi ben sa de gave, pe wan soema no e prakseri hen égi boen en pe ooktoe a de sreka hensrefi boen nanga jepi foe begi. Di na Wet foe Mozes ben abi krakti ete, dan wan Israël-soema foe eksempel no ben kan tjari ibri sortoe meti go na a portoe foe na gadri foe na tabernakel (tenti) en verwakti dati Jehovah teki hen boen. Na Wet de taki: „Efoe wan man pristeri wan gemeenschap ofrandi na Jehovah, foe pai wan pramisi ofoe leki friwani gave, dan a moe de wan meti di boen dorodoro foe den kaw ofoe den pikin meti. A no moe abi no wan mankeri. San breni ofoe ben broko wan sani ofoe di abi wan koti ofoe sowtoe ofoe kraskrasi ofoe linga-woron — no wan foe den disi joe moe pristeri Jehovah.” — Lev. 22:21, 22.
5. San na wet ben taki foe karoe-ofrandi?
5 Den karoe- ofoe alési-ofrandi ben moe de foe fini blon (Lev. 2:1, 4; 6:14, 15; Num. 15:4). Na wet disi ben poti na wan sé ala grofoe blon, blon di den no ben manari boen. Ja, soso san ben de moro boen ben fiti leki wan ofrandi gi na Santawan, Jehovah.
6. O prenspari na bewégi foe ati ben de foe ben kan teki na slagti-ofrandi foe wan Israël-soema?
6 Ete wan prenspari marki foe na tjari foe ofrandi di Jehovah e teki ben de, dati wan soema ben moe abi na joisti bewégi foe ati. Sondro wan dipi inisé lostoe foe prisiri na Mekiman foe hen, dan wan Israël-soema sa ben tjari foe soso slagti-ofrandi. Loekoe fa krakti e poti tapoe disi ini den wortoe disi: „Sortoe wini mi abi nanga den foeroe slagti-ofrandi foe oenoe?” so Jehovah e taki. „Mi ben kon weri foe bron-ofrandi foe manskapoe nanga na fatoe foe meti di kisi boen njanjan; en ini den pikin skapoe nanga boko-boko mi no ben abi prisiri. Te oenoe e kon alaten baka foe si mi fesi, soema aksi disi foe oen anoe foe waka go na den gadri foe mi? Tàpoe foe go doro foe tjari karoe-ofrandi di no abi warde. Switi-smeri-ofrandi — na wan tegoe sani gi mi. . . . Den njoen moen nanga féstiten foe oenoe mi sili no wani si na ai. Den kon tron wan hebi gi mi; mi kon weri foe tjari den. En te oenoe de bradi oenoe anoe opo, mi e tapoe mi ai gi oenoe. Winsi oenoe e begi foeroe na mi, mi no e jere oenoe; Nanga trowe broedoe, oenoe égi anoe ben kon foeroe” (Jes. 1:11-15). Te opregti lobi foe dini nanga wan geest foe lobi prati sani nanga tra soema no ben de, dan na sori na dorosé foe aanbegi ben de leki tjoekoe foe bai na boen-ati foe Gado. Gado no ben kan teki den kwet-kweti.
NA PRESENTI FOE WI NA JEHOVAH
7. Foe sainde wi no e tjari ini disi ten slagti-ofrandi foe meti?
7 Tra fasi leki den Israël-soema, discipel foe Jezus Kristus no e pristeri slagti-ofrandi tapoe wan altari na skinfasi. Na Wetverbontoe di ben skrifi foe den sortoe ofrandi disi, ben poeroe na pasi tapoe na gron foe na dede foe Jezus na wan pina-oedoe (Kol. 2:13, 14). Disi e meki wi aksi: Sortoe slagti-ofrandi wi kan tjari?
8. San na apostel Paulus ben skrifi ini Rom. 12:1 foe na tjari foe wan slagti-ofrandi en fa wi moe verstan hen wortoe?
8 Na apostel Paulus ben gi tranga na den bribiwan di na geest ben salfoe en di ben sa gi den skin abra en di ben sa kisi na a opo baka foe dede wan glori jeje skin: „Mi e (begi) oen tranga, brada, na den sari-ati foe Gado foe pristeri oen skin leki wan slagti-ofrandi, di de na libi en di de santa en switi na Gado, wan santa diniwroko nanga oen verstan” (Rom. 12:1). Na so fasi den ben kisi tranga foe gebroiki den koni nanga bekwaamheid foe den foe dini na Mekiman. Den pisi foe wan soema skin de wrokosani foe wan soema kan taki en doe sani. Foe den „kan pristeri den skin leki wan libi slagti-ofrandi”, den kristen disi ben moe de foe datede actief en doe ala „sani foe Gado kisi bigi nen” (1 Kor. 10:31). Foe na slagti-ofrandi ben kan de „santa”, den ben moe kibri moreel nanga jeje krinfasi. En soso te den ben meki lobi sondro falsi fasi meki den doe sani, dan na pristeri disi foe den skin ben sa de wan „switi sani” gi Gado (1 Kor. 13:3). Foedi den ben teki na bosroiti nanga den fri wani foe libi soso gi Gado wawan, en den e sori dati nanga wortoe nanga doe, foedi den e verstan dati a de soso wan joisti sani foe na sari-ati di Gado sori, dan den e doe santa diniwroko „nanga den verstan”. Wi ooktoe kan doe na diniwroko foe wi gi Gado nanga wi heri sili, winsi wi abi now wan hemel ofoe wan grontapoe howpoe?
9. Sortoe tranga wi e kisi ini Hebreeën 13:15, 16?
9 Ini na brifi gi den Hebré soema wi e leri moro foe slagti-ofrandi di Gado e teki. Ini Hebreeër 13:15, 16 tanapoe: „We, nanga Jezus wi moe tjari na tangi-ofrandi kon gi Gado alaten, dati de na froktoe foe den soema tongo, di e prijse hen nen. Foe doe boen en foe gi trawan afoe, dati oen no moe frigiti; bikasi so sortoe ofrandi Gado e lobi.” — Hos. 14:2.
10. San de na „froktoe foe wi tongo” en sortoe aksi wi ben kan aksi wisrefi?
10 Te wi e tjari leki ofrandi den „froktoe foe wi tongo”, dan wi sa teki ooktoe prati na a kon troe foe Matteus 24:14: „Na boen njoensoe disi foe na kownoekondre sa préki tapoe na heri grontapoe pe soema e libi leki wan kotoigi gi ala naatsi.” Wi e gi na moro boen sani di wi abi foe na prékiwroko? Wi e teki faja den okasi di de foe gi kotoigi? Na libi foe wi leki kristen de wan di de leki wan eksempel, sodati „na froktoe foe wi tongo” de wan slagti-ofrandi di Gado e teki? — Rom. 2:21, 22.
11. Foe sainde a de wan boen sani foe ondrosoekoe fa wi de nanga kristen konmakandra?
11 Taki na publiki tapoe kristen konmakandra, de ooktoe wan pisi foe wi slagti-ofrandi. Disi wani taki, dati wi moe de te kompe-bribiman e kon makandra foe aanbegi Jehovah. Wi e lostoe foe de makandra nanga trawan foe na srefi diri bribi? Ofoe wi e gi pasi dati tra activiteit nanga afersi foe soso e teki na ten, di wi ben sa kan de nanga wi brada? Wi e doe boen foe waka baka na eksempel foe na psalmsingiman, di ben agersi na faja lostoe foe hen foe de nanga Jehovah Gado nanga na lostoe di wan oema-dia lostoe watra. Sondro watra wan dia no ben sa kan tan na libi (Ps. 42:1, 2). Wi e verstan troe troe, dati sondro Jehovah, „na fonten foe libi watra”, wi no ben kan tan na libi?
12, 13. Fa wi kan njan moro foeroe boen foe kristen konmakandra?
12 Te wi de tapoe konmakandra, dan wi sa wani njan foeroe boen foe den. Disi wi kan doe te wi e soekoe okasi foe waka baka na rai foe bijbel: „En meki wi sorgoe foe makandra toe, te foe meki na lobi nanga ala boen wroko kon moro tranga. . . . gi makandra tranga, en dati oen moe doe moro foeroe, te oen de si na dé e kon moro krosibé” (Hebr. 10:24, 25). Foedi wi sabi dati na bigi dé foe Jehovah foe kroetoe sa kon troe troe, dan disi no de wan boen reden foe loekoe ondro begi san wi kan doe foe tranga oen brada en gi den dekati? Wi no wani tog, dati wan toe foe den kon ini na atibron foe Gado te na dé dati kon (Luk. 21:24-26). San wi e taki e sori, dati wi e broko wi ede opregti nanga den jeje tan boen foe den? Wi e meki kon na fesi nanga den commentaar foe wi tapoe konmakandra lobi, wan onzelfzuchtig belangstelling gi na tégo tanboen foe trawan? Den sani di wi e taki e gi trawan dekati foe tan doe toemsi boen wroko foe préki faja faja „na boen njoensoe” en sori ini ala pisi foe na aladé libi wan libi nanga waka di de wan eksempel?
13 Foe gi trawan tranga „foe meki na lobi en ala boen wroko kon moro tranga”, dan disi e tranga wi toe, foedi wi de poti ini wi geest nanga ati na prensparifasi foe doe wroko di de akroederi nanga bribi. Disi kan abi wan toemsi boen krakti tapoe wi en a de meki wi ondrosoekoe wisrefi en go na fesi ini kristen waka nanga libi. En efoe wi e arki na san trawan e taki en poti na dekati foe bijbel ini wi libi, dan wi e kisi na kolokoe, di trawan e kisi, di de „doeman foe na wortoe”. — Jak. 1:22-25.
14, 15. San den „slagti-ofrandi” foe wi wani taki moro ete, boiti foe gi na jeje fasi?
14 Na brifi gi den Hebré soema e gi wi tranga foe prati afoe nanga trawan te wi sorgoe foe den fanowdoe foe den. Den soema disi di na brifi ben skrifi foe den, ben kisi foe jere: „Memre na den fosi dé, di oen ai ben kon opo, o hebi pina oen ben verdrage na da ten. Na wan sé den ben kon en kwinsi oen srefi, oen ben tron leki wan lawsani na soema fesi; en na tra sé oen ben abi gemeenskap nanga den, disi den trawan ben doe nanga den so srefi toe. Bikasi oen ben abi sari-ati nanga den, disi ben de ini boei; en di den ben teki foefoeroe oen goedoe, oen ben verdrage dati nanga prisiri; bikasi oen sabi taki, oen abi wan moro boen goedoe na ini oen ati, disi sa tan te foe alaten na ini hemel” (Hebr. 10:32-34). Wi e sori dati wi e sari den soema di e ondrofeni pina en wi e jepi den?
15 Na situatie pe den dienstknegti foe Gado de na ini, e kenki foeroe. Son wan foe den kande de toemsi pôti. Trawan foe den kan de nanga sari en broko-skin en abi tranga fanowdoe foe trowstoe nanga matifasi. Dan trawan baka kan lasi ati, foedi den abi ernstig égi problema. A de troe dati Jehovah Gado sa sorgoe, dati noiti a libi den regtvaardiki soema (Ps. 37:25). Ma wi no ben sa si wi frantwortoe leki wrokosani foe Gado foe sori switifasi en gi jepi? Na wan boen ernstig sani, te ini disi wi e drai drai. Na apostel Johannes ben skrifi: „Ma efoe wan soema abi goedoe foe disi grontapoe, kaba a de si taki, hen brada mankeri sani, ma a meki hen ati tranga, a no gi hen noti: fa da lobi foe Gado kan tan na hen ini? Oen lobi pikin, no meki wi lobi nanga wortoe ofoe nanga tongo nomo, ma nanga doe en nanga troe.” — 1 Joh. 3:17, 18.
FOE SAINDE WI E KISI NA KARI FOE GI DEN PRESENTI FOE WI
16, 17. Foe sainde Jehovah e kari wi foe tjari slagti-ofrandi?
16 Te wi wani foe kan tjari den jeje slagti-ofrandi foe wi, dan wi moe verstan foe sainde Jehovah Gado e kari wi foe doe disi. Wi hemel Tata sabi kaba den moro dipi prakseri nanga fasi foe wi. Ma, a wani foe wi sori na lobi foe wi gi hen, nanga den positief boen sani di wi e doe gi trawan. A wani nanga ala prisiri, dati hen dienstknegti sori switifasi en nanga na lobi foe prati afoe nanga trawan leki hen (Matteus 5:43-48). Disi e gi hen na okasi foe hari soema kon na hen. Fa so? Nanga na moi fasi foe waka nanga libi, den trawan kan go si, dati troe troe kolokoe e kon ini na doe foe na wani foe Gado. — Matt. 5:16.
17 Foedi na Jehovah Gado ben meki wi, meki a sabi san de moro boen gi wi. Disi de ete wan reden foe sainde a de kari wi foe gi hen den presenti foe wi. Wan geest di lobi gi sani e jepi wi now no wawan foe abi vréde foe wi geest nanga ati, ma ooktoe troe troe kolokoe. Na bijbel e taki: „A moro switi foe gi sani leki foe teki sani” (Tori foe den Apostel 20:35). Boiti dati, wi kan de seker, dati wi hemel Tata sa pai wi bigi now en ini na tégo ten di e kon. Na Pikin foe Gado ben taki: „Efoe joe . . . e gi presenti, dan no meki joe kroektoe anoe sabi san joe reti anoe doe, sodati joe presenti kan de na kibrifasi; dan joe Tata, di e si na kibri presi, sa pai joe na sani na publiki” (Matt. 6:3, 4). „Te joe meki wan fesa-njanjan, go kari dan den pôtiwan, malengriwan, lanwan nanga breniwan; en joe sa de kolokoe, foedi den no abi noti foe kan pai joe baka. Bikasi joe sa kisi paiman ini na opobaka foe den regtvaardikiwan.” — Luk. 14:13, 14.
18. San moe de ini na gi foe sani foe wi en foe sainde?
18 Te wi loekoe ala fini pisi foe den slagti-ofrandi foe wi, dan wi moe taki, dati wi moe de klari foe gi na moro boen sani foe wi tapoe konmakandra, te wi e prati na „boen njoensoe” nanga trawan, en ooktoe ini wi fasi en wi waka nanga libi, ja tapoe ala kontren foe na libi. Wi no moe de nanga toe ati tapoe den toemsi prenspari afersi disi. San de foe lasi de na boen-ati foe Jehovah en na aksi efoe wi sa kisi libi. Meki wi libi foe datede nanga na djaranti foe na bijbel: „Gado no de onregtvaardiki, sodati a frigiti na wroko foe joe nanga na lobi di joe ben sori gi hen nen, foedi joe ben dini den santawan en joe e tan dini den.” — Hebr. 6:10.