Tan hori wan diri matifasi

„Go krosibé na Gado, dan hen sa kon krosibé na joe”. — Jak. 4:8

1, 2. (a) Ini sortoe fasi Jehovah de wan soema di lobi foe gi tra soema sani? (b) Ini sortoe gevaar wan soema de, di e degedege, en fa wi kan komoto na pasi foe disi? (c) Bribi kan gro, en a de moro leki wan sani foe wi verstan?

JEHOVAH de wan soema di lobi gi tra soema sani. Wi ben leri kaba ini na tori foe Lukas dati Jehovah e jere den begi foe den soema, di e horidoro ini begi en di e tan na ai. Tra bijbel-skrifiman ooktoe ben kisi krakti nanga Gado jeje foe gi praktisch rai foe den tori foe begi nanga bribi di de so krosibé foe makandra.

² Jakobus e memre wi foe eksempel ini a bigin foe hen brifi, dati wi „moe tan aksi Gado” ofoe a wani gi oenoe na koni foe kaka foetoe gi difrenti tesi en horidoro. A de vermane en warskow: „A moe tan aksi ini bribi, no degedege kwet-kweti.” Na soema di e tan degedege, de „wan toe ati soema”, di no sa kisi noti foe Jehovah. Na presi foe dati, wi wani na bribi foe wi abi na fasi di Jakobus e kari: „Na tesi fasi foe joe bribi e tjari horidoro kon” (Jak. 1:3-8).a Aladi na bribi foe wi na a bigin no de so bigi leki di foe Abraham, tog a kan gro en alaten a moe de troe en no nanga toe ati. Meki den kan taki foe wi foe san Paulus ben skrifi: „da bribi foe oenoe de gro moro moro, en na lobi foe makandra kon tranga toe na ini ibriwan foe oenoe.” Troe bribi no de soso wan afersi foe na verstan, ma leki Paulus ben skrifi ooktoe: „Sori bribi ini joe ati.” Wi moe abi wan boen bewégi foe ati, nanga boen wroko leki bakapisi. — Rom. 4:20; 10:9, 10; 2 Thess. 1:3.

3. Sortoe waarheid e tjari kon na wi prakseri nanga jepi foe tegenstelling ini Jakobus 4:7, 8?

³ Foe sori dati san ben taki na fesi de so, meki Jakobus ben skrifi bakaten: „Krin oen anoe, en soifri oen ati, oen toe-ati-soema.” Jakobus ben taki foe wan toe tegenstelling bifo a ben gebroiki den wortoe disi — soleki Jezus ben doe disi — foe meki waarheid kon na krin di krakti ben moe poti na tapoe: „Saka joesrefi, foe datede, ondro Gado dan, ma kaka foetoe gi Didibri en hen sa lon libi joe. „Go krosibé na Gado, dan hen sa kon krosibé na joe.” — Jak. 4:7, 8.

4. (a) Sortoe fasi foe libi wi moe abi foe kon krosibé na wan soema, en sortoe sani moe troesoe wi? (b) Gado e doe moro gi den sortoe soema disi, dan soso foe bari den wan switikon en sortoe sani seti kaba foe na boen foe ala soema?

⁴ Fa disi de wan dekati foe teki tapoe wan joisti fasi bosroiti ofoe foe de resoluut, nanga wan tranga di e waran joe ati leki wan kaba! Wan soema ben sa kan de resoluut en hori fasti foe di a de hen plekti, ma foe kon krosibé na wan soema, dan wan sani de fanowdoe di e go moro dipi. A moe komoto foe na ati en gi wan soema tranga foe wroko tranga en foe de klari foe tjari ofrandi foe kisi na krosibé matifasi di a wani prisiri hensrefi na ini. Loekoe pikinso, dati Jakobus no e taki, dati efoe wi e go na Gado, dati hen, foe taki hen so, e sidon wakti nomo foe bari wi wan switikon. Kontrari foe dati, efoe wi e waka baka wan definitief fasi foe libi foe kon krosibé na Gado, dan Gado foe hen sé sa doe a srefi toe. Fa a de doe disi? We, a seti wan toe moi sani kaba, soleki hen Wortoe nanga na presenti foe hen Manpikin leki wi Verloesoeman, sodati onvolmaakti, sondoe soema kan kon krosibé na hen. Na seti disi de foe ala soema, di nanga wan opregti, soifri bewégi foe ati wani njan boen foe hen.

5. Fa den gebroiki den dienstknegti foe Gado di ben gi den srefi abra foeroe tron foe jepi den soema di „wani go krosibé na Gado”?

⁵ Ma Gado e doe wan sani, di de moro foe wan rechtstreekser, persoonlijker fasi? San ini someni geval de na wan enkri factor di e seki na ati foe na soema di e soekoe waarheid en meki a doe wan sani? A no de, boiti wan sabi foe na waarheid, ooktoe na opregti en switi belangstelling foe na sé foe na soema di Gado e gebroiki leki hen dinari? (1 Kor. 3:5). Te na soema di e soekoe waarheid fisiti hen fosi konmakandra nanga Jehovah Kotoigi dan a no e verstan foeroe foe san e taki, ma a de kon baka ondro na indruk foe na opregti, switi fasi di ala soema e sori, soleki ooktoe na persoonlijke aandacht nanga na switikon di e meki klari gi hen. Tapoe na fasi disi a de firi, dati Gado e kon now na hen, leki wan bakapisi foe hen moeiti foe feni na waarheid nanga na Soema di e gi na waarheid. Te safri safri a de go na fesi, a de ondrofeni tra bewijsi foe na tiri en blesi foe Gado, bikasi a de „gi nanga hen heri ati en sondro verwijti”. — Jak. 1:5.

6. Fa wawan disi kan, en san wi moe hori ini prakseri?

⁶ Te safri safri na soema di e soekoe waarheid e tjari tapoe na pasi foe regtvaardiki fasi, dan a de go verstan fa a de wan grani foe den gebroiki hen leki wan vertegenwoordiger foe Jehovah foe jepi trawan baka. Disi kan, foedi hen geest kanti go ini wi ati, sodati wi kan sori na froktoe foe na geest en kan sori wan troe, Gado lobi. — Gal. 5:22, 23; 1 Joh. 4:11.

DE NANGA OPO AI, DE RESOLUUT

7. San e sori a algemene geest foe na brifi foe Jakobus?

⁷ Jakobus ben skrifi na kristen di ben gi densrefi abra en di ben doe den stap foe berouw nanga bekering. Den ben drai baka gi den fasi foe libi foe den foe fositen en den ben gi densrefi abra na Jehovah sondro foe hori wan sani na baka foe doe now na wani foe hen. Soleki e kon na krin ini na algemene geest foe na brifi foe Jakobus, dan foeroe no e libi akroederi den kondisi foe na gi di den gi den srefi abra. Den ben loekoe pasa na fanowdoe foe hori na matifasi dati nanga Jehovah gosontoe.

8. (a) Foe sainde wi no kan si matifasi leki wan sani di no kan trafasi? (b) Nanga sortoe sani Jakobus ben wani jepi den soema di e fadon gwe?

⁸ Matifasi wawan-tron ofoe noiti e tan a srefi. Wi no kan si den leki wan sani di no kan trafasi. Ofoe den e kon moro tranga, aladi a kan go safri safri kande, en leki wan bon kan panja na roetoe foe den go moro dipi ofoe den e go na baka en den e bigin foe dré en froktoe en wiwiri e ondrofeni disi (Ps. 1:1-3). Disi ben pasa nanga na Israël na skin fasi. Jakobus ben lostoe foe sreka den jeje Israëlsoema, di ben fadon gwe tapoe a srefi fasi, bifo a ben lati. A ben tjari na situatie kon na den fesi heri krin, en a ben gersi san troe nanga san falsi tapoe a tori foe den difrenti sortoe foe koni en ooktoe tapoe na tori foe matifasi, soleki a tjari kon na krin ini Jakobus 3:13-18 nanga Jakobus 4:1-6. Dan joe e kisi na waran dekati foe Jakobus ini kapitel 4:7, 8. Disi e akroederi nanga na fasi fa Jehovah ben taki nanga na Israël na skinfasi, soleki wi e lési ini Jesaja 55:6, 7 nanga Maleachi 3:6, 7.

9. (a) San na wan fasi foe feti di Didibri e gebroiki? en fa disi de ini na ten disi? (b) Fa Petrus ini disi ben gi dekati rai?

⁹ Wi kan taki, dati now na srefi situatie de ini seker opzicht? Den . . . „ogri ten . . . di moeiliki foe pasa” en di ben taki na fesi, bigin troe troe kaba, aladi na druk nanga na gevaar, di e kon tapoe soema pe den de toe, e kon moro bigi, spesroetoe gi troe kristen, di de „tapoe a smara pasi foe libi” (Matt. 7:14; 2 Tim. 3:1-5). Didibri e gebroiki moro foeroe toe fasi foe feti nanga wi. Son tron a de tjari hensrefi soleki Petrus ben skrifi, „leki wan lew, di e bari tranga, waka soekoe wan soema foe swari”, baka di nanga frede a ben poeroe wi foe na pasi (1 Petr. 5:8). A de meki skreki situatie kon, kande nationaal ofoe moro tapoe persoonlijk niveau, nanga na prakseri foe dwengi wi foe skeki wisrefi ofoe srefi foe tjari oenoe so fara foe libi krin krin wi kristen konsensi nanga bijbel gronprakseri na wan sé. Na njanjan foe tide, ja, na libi srefi, kan de ini gevaar, nanga den moeiliki afersi tapoe na tori foe wi wrokope ofoe neutraliteit. Soleki wi ben taki kaba, spesroetoe dan na fanowdoe foe tan begi ofoe wi kan abi na koni foe si san wi moe doe, en na krakti foe doe leki den bijbel gronprakseri disi taki. Foe datede meki Petrus e go moro fara foe gi wi dekati: „Ma kaka foetoe gi hen (Didibri), fasti ini bribi . . . Baka te oenoe ben pina wan sjatoe ten, na Gado foe ala boen-ati di wi no verdini, sa meki na leri foe oenoe kon boen dorodoro, hen sa meki oenoe fasti, hen sa meki oenoe kon tranga.” — 1 Petr. 5:9, 10.

10, 11. (a) Sortoe tra fasi Satan e gebroiki, en san e sori dati a de gebroiki disi ini disi ten en sortoe gevaar disi e tjari? (b) Fa wi moe de foe datede nanga opo ai en resoluut?

¹⁰ Na tra fasi foe feti foe Didibri, joe no e si so esi. Dati meki Satan e tan „kenki hensrefi leki wan engel foe leti”. A de tjari hensrefi leki wan sneki, no foe meki joe frede, ma foe bidrigi en foe kori, soleki „na sneki nanga hen triki ben kori Eva” (2 Kor. 11:3, 14). Loekoe, dati na disi na a tactiek di a de gebroiki ini san wi o taki now. A sabi dati hen ten sjatoe. A sabi disi, ma a no wani dati joe sabi disi. Leki wan bakapisi foe na feti ini hemel, di ben feti baka na geboortoe foe na Messias kownoekondre ini 1914 G.T., „den ben iti hen, na bigi sneki go na grontapoe”, aladi a „abi bigi atibron, foedi a sabi dati a abi soso wan pikin ten nomo” (Openb. 12:1-12). Efoe spesroetoe a kan meki den „soema di e hori den gebod foe Gado en e doe na wroko di de ini na gi kotoigi foe Jezus”, bribi dati „na ten foe na kaba” te joe loekoe hen boen no de so sjatoe, dan a wini na stré afoe kaba (Openb. 12:17). Foeroe soema ben sa lasi na firi foe na tranga fanowdoe foe na ten en no tan nanga opo ai. Makriki den broko-ede foe na aladé libi ben sa teki wi krin krin abra. Foe disi, wi moe leri troe troe foe si den sani leki fa Jehovah e si den en wi moe proberi foe verstan fa a de reken a ten, aladi wi e hori den wortoe foe Petrus na prakseri: „Ma na kaba foe ala sani kon krosibé kaba. De foe datede nanga gosontoe verstan en de nanga opo ai tapoe na tori foe begi.” — 1 Petr. 4:7; 2 Petr. 3:8, 9.

¹¹ Ala toe skrifiman, Jakobus nanga Petrus, ben taki foeroe sani di e jepi en gi wi dekati foe de tapoe wan joisti fasi en nanga wan boen ati nanga opo ai en resoluut, aladi wi e poti boen prakseri tapoe begi nanga bribi.

BEGI GI DEN WAN DI DE INI NOWTOE

12. (a) Fa Jakobus e taki to foe kaba foe na tori foe begi? (b) Fa den opziener en den soema di de ini nowtoe e kisi jepi?

¹² Na a kaba foe hen brifi, Jakobus e go moro fara nanga na tori foe begi nanga bribi en now a de loekoe hen foe wan heri tra sé. Fa na situatie de toe, ofoe wi e „ondrofeni pina” now ofoe „wi ati abi prisiri”, wi moe go krosibé na Gado nanga begi ofoe singi foe prijse Gado. Moro fara a de taki foe na begi gi den soema di de ini nowtoe. Gi na soema di e siki na jeje fasi en di e pina na jeje fasi en di e ondrofeni na bakapisi foe disi ini hen verstan nanga firi, den e kisi na rai foe „kari den owroeman foe na gemeente kon na den en meki den begi gi hen”. Disi foe hensrefi na wan marki kaba, dati a abi bribi en dati a sabi pe a moe go foe kisi jepi. Wan soema no e meki wan datra kon na hen efoe a no abi wan seker bribi ini na datra. Loekoe sortoe boen bakapisi disi e tjari kon te a doe so: „En na begi foe bribi sa meki na soema di no e firi hensrefi boen, kon betre, en Jehovah sa opo hen. En efoe a ben doe. sondoe, a sa kisi pardon” (Jak. 5:13-15). Disi e gi troe troe boen tiri, na den soema di de ini nowtoe en na den opziener, di de klari en di wani foe lekti den nowtoe dati.

13. Fa Jakobus e gebroiki Elia leki wan toemsi boen eksempel ini disi?

¹³ Jakobus e go moro fara nanga disi en e taki, nanga den opziener nanga tra lepi brada ini prakseri, dati „na begi foe wan regtvaardikiwan . . . efoe a de wroko, abi foeroe krakti”. Leki wan eksempel foe disi, a de kari den begi foe Elia, di Gado ben jere, fosi „dati alen no ben sa kon”, en na pisi ten dati a ben hori dri nanga afoe jari, en moro fara dati alen ben sa fadon baka. En Elia no ben de wan super soema. A ben de „wan soema nanga den srefi firi leki wi”. — Jak. 5:16-18

14. Fa leki na kaba foe hen brifi Jakobus e gi moro dekati?

¹⁴ Te na a kaba foe hen brifi a de gi moro dekati foe de nanga opo ai foe jepi srefi den wan „di den kori komoto foe na waarheid”, dan a de taki dati na soema „di tjari wan sondari kon baka foe na sondoe pasi foe hen, a de poeroe na sili foe so wan soema foe dede en tapoe foeroe foeroe sondoe” (Jak. 5:19, 20). Fa na kaba disi foe na brifi e gi wi trowstoe! Fa disi kon akroederi moi nanga san Jehovah e skrifi foe hen srefi — „wan Gado foe sari-ati, en boen-atifasi, di no e kisi atibron esesi, en di abi lobi boenfasi nanga waarheid pasa marki, . . . di e gi pardon na fowtoe nanga sondoe”. — Ex. 34:6, 7.

15. Fa Judas tapoe na srefi fasi e kari toe fasi foe jepi soema di de ini nowtoe?

¹⁵ A de wan moi sani foe si dati Judas e tapoe hen brifi na a srefi fasi en e taki dati wi moe „bow wisrefi ini na moro santa bribi foe wi en begi nanga santa jeje”. Hensrefi e poti krakti dati wi moe de nanga opo ai foe loekoe foe jepi den soema di de ini nowtoe, tapoe wan switi, ma tranga fanowdoe fasi: „Go doro . . . foe sori sari-ati gi son wan di e degedege; jepi den e hari den poeroe foe na faja. Ma tan sori sari-ati gi trawan, doe disi nanga frede, aladi joe no wani si na ondrosé-krosi srefi na ai, di ben kon doti nanga na skin” (Jud. 20-23). Soboen, djaso baka wan dekati de gi den wan di lepi. Efoe joe sabi son wan di e degedege ofoe di fadon, foedi den gi densrefi abra na doti-libi, no teki esi na bosroiti foe libi den na wan sé, ma hari den efoe a kon, komoto foe na faja, aladi joe e loekoe boen foe joesrefi no bron joesrefi ofoe foe vlaka joesrefi na wan fasi.

POTI AI BOEN NA JEZUS

16, 17. Tapoe na gron foe sortoe sani Paulus ini na boekoe Hebreer e meki foeroe vergelijking, en na sortoe bosroiti wi e kon?

¹⁶ Gado ben gebroiki na apostel Paulus leki na skrifiman foe na moro bigi pisi foe den brifi foe den kristen Griki Skrifi. Na brifi foe hen gi den Hebrew kristen e gi foeroe praktisch jepi nanga tiri foe bow wan troe en tranga bribi, di e meki wan krosibé matifasi nanga Jehovah en Jezus Kristus kon.

¹⁷ A wan sani foe verstan dati Paulus ini na brifi di wi kari na tapoesé e agersi foeroe den djoe di ben de Israël na skinfasi nanga den djoe di ben tron den fosi memre foe na kristen gemeente, di de na jeje Israël en di ben kisi bakaten den heiden na ini. Nanga den vergelijking disi, Paulus e sori fa den Hebrew kristen ben abi foeroe winimarki moro leki den di foe na Israël na skinfasi, aladi disi ben poti wan moro bigi frantwortoe na den tapoe. Ala troe kristen ini disi ten, winsi sortoe bakagron den abi den srefi sani den ooktoe kan tjari kon ini den libi en njan foeroe boen foe dati.

18. Sortoe warskow foe no aksi foe pardon wi, e kon baka ini na brifi disi, en tapoe sortoe sani ini na historia foe Israël a abi hen gron?

¹⁸ Paulus verteri na fesi ini hen brifi, dati, efoe na wortoe di den engel ben taki, di Gado ben gi na Wet, ben moe handri nanga na moro bigi respeki di de, „fa wi sa lon go kibri dan, efoe wi no ke foe so wan bigi boen, di wi Masra srefi ben préki fosi”? (Hebr. 2:1-3; Gal. 3:19). Na a kaba foe na brifi so wan srefi warskow e gi. Baka di a ben taki san ben pasa na a bergi Sinaï, Paulus e skrifi: „Bikasi efoe den soema janda no ben kan lon gwe, disi no ben wani jere hen, di ben taki na grontapoe; fa wi sa kan lon gwe dan, efoe wi no wani jere Hen, disi de foe hemel?” — Hebr. 12:25.

19. Sortoe krakti nanga boen rai e gi foe datede ini Hebreer 3:12-15 nanga 12:25-29?

¹⁹ Tapoe na punt disi na bribi foe wi moe de wan troe troe sani foe kan abi na tesi fasi leki wan marki. Na ati de ini na tori toe. Baka di a ben taki san Gado ben taki gi Israël, dati „alaten den ati foe den e verdwale”, dan Paulus e gi wan krakti warskow foe na boen foe wi alamala: „Loekoe boen, oen brada, foe no wan foe oenoe no moe abi wan ogri ati, disi no de bribi, en disi drai komoto na a libi Gado!” Wi no kan tan tanapoe tapoe wan pe. Efoe wi no „e kon krosibé na Gado” nanga wan bribi di e gro moromoro, te safri safri wi e warderi Jehovah moro boen, dan na gevaar de, dati „wi ati kon tranga nanga na korifasi foe sondoe” en wi e bigin foe fadon gwe, sondro foe wi e si dati srefi. Wi moe jepi makandra ini disi „en tan vermane makandra ibri dé”. Wi sa man wini wawan, „efoe wi hori fasti na a vertrouw di wi ben abi sensi na bigin te na a kaba”. Na fasti vertrouw disi, na bribi disi di no kan fadon, moe horikibri, efoe wi wani kisi „na kownoekondre . . . di no kan seki” nanga den blesi foe hen. — Hebr. 3:10-14; 12:28.

20. Sortoe dekati tapoe na tori foe begi Paulus e gi ini hen brifi, boiti dati a de poti krakti tapoe bribi?

²⁰ Paulus e gi wi ooktoe dekati tapoe na tori foe begi en na fanowdoe „foe poti ai boen tapoe na Jezus, disi de na fesiman foe na bribi foe wi . . . Ja, loekoe boen na hen, di sondari ben fon toemsi nanga mofo; meki oen no kon weri en lasi ati”. Te wi loekoe ala den sani, di a ben ondrofeni, dan a kan abi firi gi den swakifasi foe wi, aladi hensrefi de sondro sondoe en nanga jepi foe hen wi kan go na a „troon foe gnade” en kisi jepi na a reti ten. — Hebr. 4:15, 16; 12:2, 3.

21. Pe en fa Paulus e tjari begi kon akroederi nanga na fetisani di Gado gi wi en sortoe bosroiti disi e meki wi teki?

²¹ Te foe kaba, hori na prakseri, dati soleki Paulus ben skrifi gi den soema foe Efese, dati „begi alaten ini geest” abi foe doe nanga na weri foe na „heri feti sani foe Gado”. En leki Paulus, wi moe begi gi wisrefi nanga gi trawan ofoe wi „kan kisi na koni foe taki . . . foe meki bekenti nanga ala fri foe taki na santa kibritori foe na boen njoensoe”. — Ef. 6:10-20.

[Foetoewortoe]