„Waka na mi baka en mi sa meki joe tron fisiman foe libisoema”
1-3. (a) Foe doe sortoe wroko Jezus ben kari soema foe waka na hen baka. (b) Fa na reactie foe den fosiwan di a ben kari, e sori dati den ben abi bribi?
JOHANNES NA DOPOEMAN ben klari nanga hen wroko, en now na salfoe Jezus ben teki na wroko foe bari na opwindende njoensoe: „Abi berouw, bikasi na kownoekondre foe hemel kon krosibé” (Matt. 3:2; 4:12-17). Ma Jezus Kristus no ben sa meki hen wawan na boen njoensoe bekenti. Di a ben waka na sé na se foe Galiléa, a ben si Simon Petrus nanga Andréas e saka wan srepi ini na se. A ben kari den foe waka na hen baka nanga den wortoe disi: „Waka na mi baka en mi sa meki joe tron fisiman foe libisoema.” Den no ben drai drai. „Wantron wantron” den ben libi den srepi en ben waka baka Jezus. Dan Jezus si Jakobus nanga Johannes ini wan fisiboto en a kari den. „Wantron wantron” den libi na boto nanga na papa foe den en den waka baka Jezus. — Matt. 4:18-22.
2 Aladi Jezus ben leri den njoen discipel disi foe tron „fisiman foe libisoema”, tog a ben gi den wan toemsi moi eksempel. Den ben de alaten nanga hen di „a ben waka lontoe heri Galiléa, aladi a ben leri ini den djoe kerki, en ben préki na boen njoensoe foe na kownoekondre en ben dresi ibri sortoe siki en sortoe mankeri na mindri na pipel”. — Matt. 4:23.
3 Di Jezus ben si ini Kapérnaum, ini Galiléa, Mattéus (Levi) sidon na a belastingkantoro, a ben gi hen na kari disi: „Kon tron mi foetoeboi.” Wantron wantron Mattéus ben tapoe foe go teki belasting en a go waka na Jezus baka (Matt. 9:9; Mark. 2:14). Agen „Jezus ben bigin foe waka lontoe pasa ala den foto nanga dorpoe” foe leri en préki na boen njoensoe, aladi a ben dresi soema toe. Aladi den foetoeboi foe hen ben kon moro foeroe, tog Jezus ben taigi den: „Na kotiwroko bigi, ma pikinso wrokoman de. Begi foe datede na Masra foe na kotiwroko tranga, dati a seni wrokoman go ini na kotiwroko foe hen.” — Matt. 9:35-38.
4. (a) Foe san ede Jezus ben teki apostel? (b) San Jezus e verwakti foe den soema di e waka na hen baka?
4 Na mindri foe den fosi discipel disi, Jezus ben teki now twarfoe, foe den de apostel „sodati den ben sa tan na hen en sodati a ben kan seni den go foe préki” (Mark. 3:14). Bakaten den apostel ben sa tron fundamentston foe na kristen gemeente (Ef. 2:20; Openb. 21:14). Den ben wani en den ben de klari foe doe diniwroko en den ben prisiri foe de nanga Jezus ini na Kownoekondrewroko. Jezus ben leri den en ben gi den na komando foe go na den foto nanga dorpoe en foe visiti den soema na den oso. A ben taki gi den: „Préki te joe e waka lontoe en taki: ’Na kownoekondre foe hemel kon krosibé kaba.’” Jezus ben meki hen discipel sabi dati na wroko no ben sa de makriki en dati foeroe soema ben sa wégri foe arki na den wortoe foe den. Ma den ben moe gi kotoigi, srefi te den ben tanapoe na fesi foe rigeriman nanga soema foe den naatsi. Den ben sa moe abi na geest foe gi densrefi en ben moe de nanga dekati, bikasi Jezus ben taki: „Efoe wan soema no teki hen pina-oedoe en no waka na mi baka, ano de warti gi mi.” — Matt. 10:7-18, 38.
5. Foe san ede Jezus no kan teki son soema leki foetoeboi foe hen?
5 A no ala soema ben teki na kari foe Jezus foe waka na hen baka. Teki foe eksempel na goedoe man di ben teki goedoe moro bigi leki na jeje goedoe di ben kan kon de foe hen efoe a ben préki na boen njoensoe foe na kownoekondre (Matt. 19:16-24). Ooktoe trawan ben kon nanga sani foe den pardon den, soleki na tori ini Lukas 9:57-62 e sori:
„Di den ben de now na pasi e waka wan soema ben taigi Jezus. ’Mi sa waka na joe baka, alwasi pe joe sa go.’ En Jezus taigi hen: ’Den kraboedagoe abi olo en den fowroe foe hemel abi sribipresi, ma Soemapikin no abi wan presi foe poti hen ede.’ Dan a taigi wan trawan: ’Kon de mi foetoeboi.’ Na man ben taki: ’Gi mi pasi foe mi go fosi en beri mi papa.’ Ma a ben taigi hen: ’Meki den dedewan beri den dede foe den, ma go en meki na ala presi na kownoekondre foe Gado bekenti.’ En ete wan trawan ben taki: ’Mi sa waka na joe baka, Masra, ma gi mi pasi foe mi taki fosi adjosi na den osofamiri foe mi.’ Jezus ben taigi hen: ’No wan soema di ben poti hen anoe na a ploegoe en e loekoe na den sani di de na baka, boen nofo gi na kownoekondre foe Gado.’”
6. Fa Jezus ben leri hen foetoeboi en fa a ben gi den tranga, soleki Lukas 10:1-20 e skrifi?
6 Baka di Lukas kari den negatief eksempel disi, a de verteri wan positief pisi. A de skrifi fa Jezus ben teki sébi-tenti foe hen foetoeboi en ben seni den go toe na toe foe wroko na gebied na hen fesi leki pionier. Den ben moe verteri den soema dati „na kownoekondre foe Gado ben kon krosibé foe den” (Luk. 10:1-16). Den sébi-tenti ben abi foeroe prisiri ini na dienst foe den. Ma Jezus ben sori den, dati den ben abi wan moro bigi reden foe kolokoe, foedi a taki: „Abi prisiri bikasi na nen foe oenoe ben skrifi ini hemel.” — Luk. 10:17, 20.
JEZUS E GI WAN EKSEMPEL
7, 8. Verteri foe wan toe winimarki di den fosi „fisiman foe libisoema” ben njan boen foe den, foedi den ben de alaten nanga Jezus ini na wroko?
7 Den bijbel-skrifiman di ben abi Gado jeje, Mattéus, Markus, Lukas nanga Johannes e verteri fa den fosi discipel foe Jezus makandra nanga hen ben teki prati na a préki- nanga leriwroko, en disi ben de toemsi boen gi densrefi leki gi trawan. Jezus ben leri den foeroe wondroe sani foe na kownoekondre, en den waarheid disi den ben kan prati baka nanga soema di ben wani arki. Moro foeroe Jezus ben jepi hen discipel foe abi waarderi foe na toemsi diri matifasi di den ben de nanga Jehovah Gado nanga Kristus Jezus leki srafoe, dienstknegti ofoe basja foe den. — Matt. 6:24; loekoe Lukas 12:37, 42, 43.
8 Jezus ben de leki hen papa wan wrokoman. A ben wani dati ooktoe hen discipel ben de wrokoman di ben meki na kownoekondreboskopoe bekenti. (Joh. 4:34; 5:17; 9:4). Nanga disi na prakseri Jezus ben gebroiki so wan dri jari foe leri hen discipel foe tron „fisiman foe libisoema”. Ooktoe a ben warskow den na fesi, dati soema ben sa handri nanga den tapoe na srefi fasi leki den ben handri nanga hen, na Masra foe den. Den ben si na eksempel foe hen en fa a ben teki pina, foedi a ben gi den wan model, di den ben moe waka soifri na hen baka (Matt. 10:22-26; 1 Petr. 2:21). Jezus ben leri den foeroe sani di a ben kisi foe Gado en den ben si fa a ben meki boen foeroe profétitori kon troe, Ala den sani disi ben tranga na bribi foe den.
9. San Jezus ben leri den foetoeboi foe hen foe na matifasi foe den nanga Gado leki srafoe?
9 Jezus ben gi den tranga leki srafoe foe Gado foe waka baka na eksempel foe hen nanga sakafasi. A ben taki:
„Soema foe oenoe di abi wan srafoe di e ploegoe ofoe di e loekoe na ipi, sa taki gi hen te a komoto foe gron kon na inisé: ’Kon didon na tafra dja wantron wantron’? A no sa taki moro foeroe gi hen: ’Meki wan sani klari gi mi, sodati mi kan kisi mi neti-njanjan, en weri wan fes-koki en dini mi te leki mi kaba nanga njan nanga dringi, en baka dati joe kan njan en dringi’? A no sa taki na srafoe grantangi tog foedi a ben doe den sani di a ben kisi foe doe? Na so joe ooktoe, te joe doe ala sani, di joe kisi foe doe, moe taki: ’Wi de soso srafoe. Wi ben doe san wi ben moesoe doe.’” — Luk. 17:7-10; loekoe 1 Korinte 7:22, 23; Openb. 19:5.
10. Fa na eksempel foe Jezus ben de wan pisi foe na leri di a ben gi hen foetoeboi foe dini Gado?
10 Di na wroko foe Jezus tapoe grontapoe ben e doro hen kaba, a ben tjari hen discipel kon makandra foe na paschafesa, en na a okasi disi a ben gi den foeroe rai nanga dekati. A ben wasi den foetoe ooktoe foe meki den verstan na fanowdoe foe dini trawan, di a taki: „Mi ben gi oenoe na eksempel, sodati oenoe ben sa doe soleki mi ben doe. Foe troe mi taki gi oenoe: Wan srafoe no bigi moro hen masra, ooktoe wan soema di den seni, no de moro bigi leki a soema di ben seni hen. Efoe oenoe sabi den sani disi, kolokoe oenoe de efoe oenoe doe den.” — Joh. 13:15-17.
11. (a) Pe wi e feni na takimakandra foe Jezus nanga hen discipel leki mati? (b) Fa Jezus ben poti na a okasi dati na krakti tapoe bribi nanga wroko? (c) Tapoe sortoe fasi den discipel ben kan doe wroko di ben de moro bigi leki di foe Jezus?
11 Baka di Jezus ben seni Judas na toriman gwe, a ben leri hen erfoe getrouw apostel foe wan njoen fésti — na memre foe na dede foe hen. A ben taki leki boen mati nanga den en a ben sreka den na fesi tapoe na frantwortoe di den ben moe tjari, baka te a ben gwe (Joh. 13:30-16:33). Foe den bewijsi na bribi foe den ini Kristus, dan den discipel ben sa moe doe den srefi wroko leki a ben doe. Datede a ben gi den tranga nanga den wortoe: „Foe troe, mi taki gi joe: na soema di sori bribi ini mi, sa doe ooktoe den wroko di mi e doe; en a sa doe moro bigi wroko leki disi, bikasi mi de gowe na a Tata” (Joh. 14:12). Jezus ben hori na wroko foe hen ini na kondre Palestina, ma na kownoekondrewroko ben moe kon moro bigi baka hen dede nanga opobaka. Den discipel foe hen ben moe teki fesi ini na wroko dati foe na ten di ben kon. Te foe kaba na boen njoensoe foe na kownoekondre ben sa préki tapoe na heri grontapoe leki wan kotoigi gi ala naatsi, en dan na kaba ben sa kon. — Matt. 24:14.
12. Sortoe verband de mindri lobi gi Kristus nanga san wi e doe?
12 Ini na laatste okasi disi dati Jezus ben de nanga hen discipel makandra, a ben poti krakti tapoe na fanowdoe foe lobi di e gi hensrefi, nanga den wortoe:
„Efoe joe lobi mi, dan joe sa hori mi komando. Na soema di abi mi komando en a de hori den, de na soema di lobi mi. En na soema di lobi mi, mi Tata sa lobi hen en mi sa lobi hen en mi sa sori misrefi krin na hen . . . Efoe wan soema lobi mi, a sa hori mi wortoe en mi Tata sa lobi hen, en wi sa kon na hen en go libi na hen. Na soema di no lobi mi, no e hori mi wortoe; en na wortoe di oenoe e jere foe mi, no de foe mi, ma de foe na Tata, di ben seni mi” (Joh. 14:15, 21, 23, 24).
Fa a de wan fanowdoe sani foe hori den komando foe Jezus Kristus!
JEZUS PRAMISI WAN JEPIMAN
13. Fa den discipel foe Jezus ben sa kisi jepi baka te a ben gwe en foe doe san den ben sa kisi krakti?
13 Den apostel ben de krosibé foe Jezus. Alaten te den ben wani sabi wan sani ofoe wan bepaald problema ben kon, dan den ben kan taki na kwestie nanga Jezus. Ma now Jezus ben libi den en a ben go na hen Tata. Datede a ben aksi hen Tata foe gi den wan tra jepiman, na jeje foe Gado, di ben sa leri den ala sani di Jezus ben taki gi den en ben sa tjari den kon ini na memre foe den (Joh. 14:16, 17, 25, 26). Disi ben wani taki dati den ben sa moe gi foeroe kotoigi, bikasi Jezus ben verklari: „Te na jepiman ben sa kon, di mi sa seni foe na Tata, na geest foe waarheid, di e komoto foe na Tata, dan dati sa gi kotoigi foe mi; en oenoe foe oenoe sé moe gi kotoigi, bikasi oenoe ben de na mi sensi mi ben bigin.” — Joh. 15:26, 27.
14. Fa den discipel ben sa leri bakaten foeroe moro waarheid?
14 Jezus no ben kan verteri hen discipel ala sani na a ten dati. Nanga na kon foe na santa jeje, den ben sa si sani moro boen en nanga disi den ben sa sreka foe na wroko ini na ten di ben sa kon (Joh. 16:12, 14). Fa disi ben gi dekati! Den soema di e waka baka Jezus leki srafoe foe Gado, kan abi alaten na vertrouw dati den sa kisi nanga wroko foe na santa jeje jepi foe tapoesé nanga tiri ini na waarheid.
15. (a) Foe san ede kristen soema moe tan de alaten krosibé foe Jezus Kristus, soleki disi e kon na krin ini na agersitori foe na figabon? (b) Sortoe pisi kristen lobi abi ini disi?
15 Foe ben kan doe na wroko foe den tapoe wan boen fasi, den foetoeboi foe Jezus ben moe tan de wan nanga hen, sori taki den de hen discipel. Jezus ben agersi disi nanga jepi foe na figabon nanga den taki foe hen en a ben sori den dati leki taki den ben moe tan na a figabon en ben moe meki froktoe, sodati hen Tata ben sa kisi glori. Den ben moe meki froktoe nanga na gi foe kotoigi foe na Kownoekondre en nanga na sori foe wan kristen égifasi. Den soema ben sa si dati den ben de hen discipel, foedi den ben abi troe troe lobi gi makandra. — Matt. 21:43; Joh. 13:34, 35; 15:1-12; loekoe ooktoe Na Wachttoren foe 15 maart 1979.
NO DE WAN PISI FOE DISI GRONTAPOE
16. (a) San Jezus ben leri hen foetoeboi ini Johannes 15:17-22 foe na positie foe den ini grontapoe? (b) Foe san ede a ben gi den na leri disi?
16 Den soema di de „fisiman foe libisoema”, e sori wan bigi lobi gi makandra. Ma foedi den de foetoeboi foe na Meester Kristus Jezus, dati meki na grontapoe no lobi den. Na grontapoe no ben lobi Jezus, foedi a no ben de wan pisi foe hen (Joh. 15:17-22; 16:1). Na sabi disi e jepi ala troe kristen foe kibri na getrouwfasi foe den ondro tesi — soleki Jezus ben kibri na getrouwfasi foe hen. Den soema di de wan pisi foe na grontapoe, no sabi no Jehovah, no na Soema di hen ben seni kon, Jezus Kristus. Den no e verstan na leri foe Jezus en den no e verstan ooktoe san de kristen lobi. Foedi den e doe den lostoe foe Didibri, dati meki den abi ogri-ati gi den foetoeboi foe Jezus. — Joh. 8:42-44; 14:30; 16:11.
17. San ben sa pasa nanga son kristen, foedi leki foetoeboi foe Kristus den no de wan pisi foe grontapoe?
17 Foedi troe kristen „no de wan pisi foe na grontapoe”, meki den no moe teki na gridi, hémemre geest foe grontapoe di e tjari pratifasi. Disi sa gi den na okasi foe gi Gado glori en leki wan bewijsi foe na discipelwroko foe den meki foeroe froktoe. Ma a sa wani taki dati a sa tjari foeroe benawtoe gi den, soleki Jezus ben warskow:
„Den soema sa iti oenoe trowe komoto foe den djoekerki. Ja, na joeroe e kon, dati ibri wan di kiri oenoe, sa prakseri dati a de sori Gado wan santa dienst.” — Joh. 16:2-4; 15:8-10.
NOITI WAWAN INI NA DIENST FOE GADO
18, 19. (a) Den discipel foe Jezus kan abi na djaranti foe na lobi foe soema, en tapoe na gron foe san? (b) Foe san ede a de prenspari foe verstan dati wan dienstknegti foe Jehovah noiti de hen wawan en san a moe doe datede?
18 Den dienstknegti foe Jehovah kan reken tapoe hen foe na bigi lobi foe hen ede. Jezus ben gi na djaranti disi: „Na Tata srefi abi lobi gi oenoe, foedi oenoe ben lobi mi en oenoe ben bribi dati mi ben komoto foe na Tata leki vertegenwoordiger” (Joh. 16:27). Den dienstknegti foe Jehovah no e wroko den wawan. Leki basja foe Gado den e doe na wroko foe Gado en na pasi de alaten opo gi den foe aksi Jehovah ini begi foe jepi. Jezus ben taki: „Efoe joe aksi na Tata wan sani, a sa gi oenoe hen ini na nen foe mi” (Joh. 16:23, 24). Nanga na kisi di den ben sa kisi Jezus, dan wan moeiliki ten ben sa doro gi hen foetoeboi, soleki a ben warskow na fesi:
„Loekoe! Na joeroe e kon, ja, ben kon, dati oenoe sa panja, ibriwan foe oenoe na a égi oso foe hen, en oenoe sa libi mi wawan, bikasi na Tata de nanga mi. Den sani disi mi ben taki gi oenoe, sodati nanga jepi foe mi oenoe ben kan abi vréde. Ini na grontapoe oenoe sa abi benawtoe, ma abi dekati! mi ben wini na grontapoe.” — Joh. 16:32, 33.
19 Fa a de toemsi prenspari foe hori na prakseri dati wi no de wi wawan, soleki Jezus no ben de hen wawan, di den ben kisi hen! En fa a de fanowdoe foe vertrouw tapoe Jehovah ini begi, spesroetoe ini ten foe benawtoe ofoe moeilijkheid! Jezus ben begi faja faja en nofotron ini na joeroe foe tesi (Matt. 26:36-46; 27:46). Na so ooktoe den foetoeboi foe hen no moe drai drai noiti foe soekoe na jepi foe Jehovah, ma den moe begi hen ini vertrouw nanga bribi. — Matt. 7:7, 8.
NA AKSI FOE JEZUS INI BEGI
20. San na wan toe foe den punt di Jezus ben kari ini na moi begi di tanapoe ini Johannes 17?
20 Baka di Jezus ben leri hen getrouw discipel na a laatste neti dati foe hen grontapoe libi, a ben opo hen ai go na hemel en a ben seni foe na boen foe den wan begi gi Jehovah di ben seki na ati. A ben verteri ini hen begi, dati a ben kon klari nanga na wroko foe hen tapoe grontapoe, ma dati den foetoeboi foe hen ben de ete ini na grontapoe. Den discipel disi ben sa go doro foe préki na boen njoensoe foe na kownoekondre en meki na nen foe Jehovah bekenti, soleki Jezus ben doe disi. Datede a ben aksi:
„Santa Tata, loekoe den foe joe nen ede, di joe ben gi mi . . . mi ben gi den na wortoe foe joe, ma na grontapoe ben abi ogri-ati foe den, foedi den no de wan pisi foe grontapoe, soleki mi no de wan pisi foe na grontapoe. Mi no e aksi joe foe teki den poeroe foe grontapoe, ma foe loekoe den foe na ogriwan ede. Den no de wan pisi foe grontapoe soleki mi no de wan pisi foe na grontapoe. Santa den nanga jepi foe na waarheid, na wortoe foe joe de na waarheid. Soleki joe ben seni mi go ini na grontapoe, na so mi ben seni den go ini na grontapoe.” — Joh. 17:11, 14-18.
21. Fa Jezus ben taki foe hen vertrouw ini na kon moro bigi foe na kristen gemeente ini na ten di e kon?
21 Jezus no ben begi wawan foe na boen foe den erfoe getrouw apostel, ma na begi foe hen ben abi foeroe moro soema na ini. A ben loekoe na fesi na wan gemeente di ben sa kon moro bigi en di ben sa de tapoe na heri grontapoe en foeroe moro man nanga oema ben sa poti bribi ini Jezus leki wan bakapisi foe na wortoe di den foetoeboi foe hen ben sa préki. Jezus ben taki:
„No foe den wawan mi e begi, ma ooktoe foe den di nanga na wortoe foe den e poti bribi ini mi, foe den alamala kan de wàn soleki joe, Tata, de ini wanfasi nanga mi en mi ini wanfasi nanga joe, dati den ooktoe de ini wanfasi nanga wi, sodati na grontapoe kan bribi dati joe ben seni mi.” — Joh. 17:20, 21.
22. Fa Jezus ben klari na wroko foe hen leki wan Kotoigi foe Jehovah?
22 No langa baka di Jezus ben begi so, den ben kisi hen. Di den ben tjari hen go na fesi na tiriman Pilatus, a gi kotoigi dati hen kownoekondre no de wan pisi foe na grontapoe en foe datede meki den dinari foe hen — di no ben de wan pisi foe na grontapoe — no ben sa feti. Leki na moro prenspari kotoigi foe Jehovah a ben verklari: „Joe srefi taki dati mi de wan kownoe. Na foe disi meki mi ben gebore en na foe disi meki mi ben kon ini na grontapoe foe gi kotoigi foe na waarheid. Ibri soema di tanapoe na a sé foe na waarheid e arki na mi sten” (Joh. 18:33-37). Na so fasi Jezus ben libi wan toemsi moi eksempel, di kristen soema ben kan waka na hen baka ini den jari baka di a ben libi grontapoe. Tapoe na srefi dé dati den ben kiri hen, baka di a ben klari na wroko getrouw, di Jehovah ben gi hen foe doe. (Joh. 17:4). Fa a ben gi hen grontapoe foetoeboiwan toemsi moi eksempel ini na ten foe hen grontapoe diniwroko! Den e kisi tranga foe waka na hen baka leki Jehovah Kotoigi ini na moro bigi wroko foe den leki „fisiman foe libisoema”!