Teki na moro boen pasi foe libi
„Oenoe e kisi kibri nanga na krakti foe Gado ini bribi.” — 1 Petrus 1:4, 5.
1, 2. Ini sortoe situatie wi alamala ben de bifo wi ben teki na „boen njoensoe”, en foe sainde wi kan prisiri foe datede?
NA APOSTEL Paulus ben skrifi gi kristensoema ini Efese ini Asia: „Wan dé oen ben waka leki na seti foe sani foe disi grontapoe . . . ija, na mindri den wi ben tjari wisrefi akroederi den lostoe foe wi skin, di wi ben doe den sani di na skin nanga na prakseri ben wani, en wi ben de pikin foe atibron, leki den trawan. Ma Gado, di foeroe nanga sari-ati, ben meki wi kon na libi makandra nanga na Kristus, foe na bigi lobi ede, di a ben lobi wi, srefi di wi ben de dede ini sondoe — nanga boen-ati-fasi di wi no verdini wi ben kisi jepi.” — Ef. 2:2-5.
2 Wi alamala di e libi ini disi ten en di e proeberi foe dini Gado, ben tjari wisrefi akroederi nanga na skin, bifo wi ben kisi wan sabi foe na waarheid. Ma wi no bréti, dati wi ben gebroiki foe na fri, di Gado ben gi nanga hen boen-ati, foe teki wan sé, en dati wi, di wi doe dati, ben teki wan pasi, di ben poeroe wi foe katibo, wan pasi di e pramisi wi tégo libi?
3. (a) San wi abi fanowdoe foe ondrofeni na kon troe foe na bijbel howpoe foe wi? (b) Fa wi ben teki wan sé en sortoe aksi e kon na fesi efoe wi kan doe dorodoro san wi ben poti na prakseri?
3 Na apostel Petrus ben taigi den fosi-eeuw kristensma, dati Gado ben gi den wan „libi howpoe” (1 Petr. 1:3). Ooktoe wi abi wan troe troe howpoe foe na sani di de na wi fesi. Wi sa lasi ati, foedi na sani di wi e howpoe no kon ete en wi no e si, na howpoe kon troe ete? Na apostel Paulus ben taki: „Efoe wi e howpoe tapoe san wi no e si dan wi e tan wakti nanga waarderi na tapoe” (Rom. 8:25). Efoe foe datede sani no waka leki wi ben verwakti, dan moro foeroe reden de foe sori horidoro en foe tranga na howpoe. Disi wani taki dati te wi ben teki wan tron na pasi foe na troetroe libi, di no de wawan na moro boen wan, ma ooktoe na wan enkri pasi, wi moe tan hori na a bosroiti dati. Wi no kan abi na vertrouw, dati wi sa si na howpoe dati kon troe, efoe wi e degedege en no de stanvaste (Jak. 1:6-8). Wi ben teki wi bosroiti, di wi ben gi wisrefi abra na Gado, bakadati wi ben sori dati wi gi wisrefi abra di wi ben dopoe ini watra. Ma ibri dé wi e kon tanapoe na fesi problema, pe wi moe teki pikin bosroiti en teki wan sé di moe akroederi nanga na fosi bigi bosroiti dati. Wi kan tan teki ibri dé na joisti bosroiti di sa hori wi tapoe na pasi foe libi? Wi kan de seker dati te na joisti ten kon wi sa si na kon troe krinkrin foe na howpoe foe wi?
Tan hori na bosroiti foe joe
4. (a) Foe sainde wi no moe gi pasi dati ferwakti di no ben kon troe foe fowtoe ede no seki wi poeroe foe wi pasi di wi teki? (b) Na lostoe foe na kon troe foe na howpoe foe den, ben tjari kristensma ini na ten di psa go ini sortoe fowtoe fasi?
4 Efoe wi tan getrouw, dan Gado no sa gi pasi dati wi meki fowtoe di sa tjari pori. Ma son tron a de gi pasi dati wi lasi pasi sodati wi kan verstan fa a de fanowdoe foe loekoe alaten na hen nanga hen Wortoe. Disi e tranga na matifasi foe wi nanga hen en na horidoro foe wi aladi wi e wakti. Wi e leri foe den fowtoe foe wi, dati a de fanowdoe foe loekoe boen ini na ten di e kon. Ini den hondro hondro jari di pasa, kristensma ben lostoe tranga, dati na njoen seti foe sani ben sa teki na heri tiri foe na grontapoe abra. En foe na égi sjatoe libi foe den ede, den ben lostoe dati a ben sa kon ini na libiten foe den. Den sma di ben proeberi foe „hori boen ini prakseri” na kroetoedé foe Gado, na moro leki na wan okasi ini na historia ben angri na a kon foe na dé dati en ini den égi prakseri den ben proeberi foe meki na kon foe den sani disi kon moro esi (2 Petrus 3:12). Ini na tori disi na apostel Paulus ini na fosi eeuw ben feni hen foe eksempel fanowdoe foe skrifi den kristensma ini Thessalonika „Brada, foe na de-noja foe wi Masra Jezus Kristus en na tjari konmakandra nanga hen, wi e begi oen, no broeja oen denki esesi, noso kon skreki nanga wan taki ofoe nanga wan mofo-boskopoe ofoe nanga wan brifi, di ben sa komoto foe oenoe, di e taki, dati na dé foe Jehovah kon kaba. No meki no wan sma kori oen tapoe no wan fasi, bikasi na dé dati no e kon efoe fosi na fadon komoto foe na troe bribi no kon en na sma foe kroektoedoe no kon na krin, na manpikin foe pori.” — 2 Thess. 2:1-3.
5. (a) Na sortoe fasi krakti verwakti ben gro kon foe na jari 1975? (b) Foe sainde verklaring di ben skrifi foe de voorzichtig, no ben man dati so wan belangstelling gi wan datum ben stop?
5 Ini na ten disi, na faja lostoe disi, di de foe prijse, meki dati moeiti ben doe foe poti datum foe na fri foe pina nanga den moeilijkheid di sma na heri grontapoe e ondrofeni. Di na boekoe Tégoe libi — ini na fri foe den manpikin foe Gado ben kon en pe ben taki dati a ben sa fiti efoe na doesoen jari rigeri foe Kristus ben sa waka paralel nanga na di foe 7 milennium foe na de foe libisma, dan bigi verwakti ben wiki foe na jari 1975. Na a ten dati en ooktoe baka dati, sani ben taki pe krakti ben poti na tapoe dati disi ben de soso wan mogelijkheid. Ma sé foe den voorzichtig sani disi di taki, tra sani ben taki en skrifi di ben sori dati na kon troe foe den sortoe verwakti disi ini na jari dati ben de moro foeroe wan waarschijnlijkheid dan leki soso wan mogelijkheid. Na wan sari sani dati den laatste sani disi di ben taki ben poti den voorzichtig sani di ben taki na baka en den ben meki dati den verwakti di ben wiki kaba ben kon moro tranga.
6. Na Wachttoren foe 15 oktober 1976 ben wani sori dati na frantwortoe foe so wan verwakti ben de soso ofoe na a fosi presi na den lésiman? Tjari disi kon na krin.
6 Ini na Wachttoren foe 15 oktober 1979, pe ben taki dati a no ben de wan verstan sani foe loekoe nomo tapoe wan bepaalde datum, ben tanapoe: „Efoe na verwakti foe wan sma no ben kon troe, foedi a no ben waka baka na redenatie disi, dan a moe poti hensrefi na tapoe foe kenki a fasi disi foe si sani, aladi a moe verstan dati a no a Wortoe foe Gado ben fadon ofoe ben kori hen en meki hen verwakti no kon troe, ma dati hen égi fasi fa a de si sani ben didon tapoe fowtoe fundamenti.” Nanga na wortoe „wan sma”, Na Wachttoren e bedoel alasma na mindri Jehovah Kotoigi di na verwakti foe den no ben kon troe, soboen ooktoe den sma di abi foe doe nanga na poti en skrifi ini boekoe den sani di ben meki den verwakti lontoe na datum dati ben wiki.
7. (a) Sortoe krakti den sortoe libisma fowtoe disi moe abi tapoe wi bribi ini san Gado srefi e pramisi? (b) San na Wortoe foe Gado e poti krakti na tapoe leki na moro prenspari sani?
7 Ma ete reden no de foe na bribi foe wi ini Gado pramisi seki. Wi alamala leki wan bakapisi foe disi e kisi tranga foe ondrosoekoe na afersi disi foe wan kroetoedé moro fini ini na Bijbel. Te wi e doe dati, dan wi e si dati a no a datum de na prenspari punt. Na presi foe dati, a de prenspari foe hori na prakseri dati so wan dé de — pe frantwortoe sa aksi foe wi alamala. Nanga reti Petrus ben taki dati kristensma „ben moe verwakti en hori boen ini prakseri na de-noja foe na dé foe Jehovah” (2 Petr. 3:12). A no wan bepaalde datum ini na ten di e kon de prenspari, ma a de fa wan kristensma e libi dé na dé. A no moe libi no wan enkri dé sondro foe denki dati a de ondro na lobi sorgoe nanga tiri foe Jehovah en moe saka hensrefi na ondro dati, aladi a hori ooktoe na prakseri dati a moe gi frantwortoe foe den doe foe hen.
8. (a) Fa den wortoe foe Jezus nanga Paulus e poti krakti tapoe na joisti fasi foe na standpunt disi? (b) Wi moe horidoro te na a kaba, ma oten na „kaba” dati de en san wi kan sabi foe na kon foe hen?
8 Jezus ben verteri foe sainde wi moe tan teki so wan standpunt: „Bikasi Libisma Pikin sa kon troe troe ini na glori foe hen papa nanga hen engel, en dan a sa pai ibriwan sma na a libi en waka foe hen” (Matt. 16:27). Na apostel Paulus ben taki toe: „Wi alamala sa tanapoe fesi na kroetoestoeroe foe Gado . . . Na so ibriwan foe wi sa gi hensrefi frantwortoe na Gado” (Rom. 14:10-12). Boiti dati a ben taki: „Wi alamala moe kon na krin na fesi na kroetoestoeroe foe Kristus, sodati ibriwan sma sa kisi san a moe kisi foe den sani di a ben doe nanga na skin, akroederi den sani di a ben doe, efoe na boen efoe na ogri” (2 Kor. 5:10). O langa ete wi abi na ten bifo wi moe gi so wan frantwortoe? Jezus ben taki: „Na sma di ben horidoro te na a kaba, hen sa kisi libi” (Matt. 24:13). Oten na kaba e kon? Na kaba dati kan kon ófoe na a kaba foe na seti foe sani ófoe te na sma dede bifo na ten dati. O langa ibriwan foe wi soboen abi na ten ete? No wan sma kan bereken na dé di a sa dede. Na a srefi fasi Jezus ben taki gi hen apostel foe na ten di Gado kownoekondre sa opo: „Oen no abi reti na tapoe foe kisi sabi foe den ten nanga pisiten di na Tata ben poti ini hen makti” (Tori foe den Apostel 1:7). A de wan sani di nooiti wi kan bereken na fesi oten na kaba foe grontapoe e kon.
Na kon troe foe na howpoe foe wi
9. Sortoe wortoe foe Petrus kan gi wi vertrouw foe tan hori na a bosroiti di wi ben teki?
9 Efoe wan sma e frede, kande foe tesi ede di kan kon, dati a no sa tan hori na hen bosroiti foe dini Gado nanga Kristus, meki a arki dan na den wortoe foe na apostel Petrus. Na apostel disi e gi wi na djaranti dati na howpoe foe wi de wan seker sani efoe wi tan hori na bribi ini Gado en na hen seker pramisi. A de taki: „Oenoe e kisi kibri nanga na krakti foe Gado ini bribi te go miti wan redding di de klari foe kon na krin ini na laatste pisiten” (1 Petr. 1:3-5). San wi e leri foe den wortoe disi?
10, 11. (a) Soema moe kisi troetroe na grani dati wi ben teki na boen njoensoe en foe sainde? (b) Fa Gado e meki sma si na leti foe na waarheid? (c) San 1 Korinte 2:9 e sori foe na vermogen foe libisma foe si nanga égi krakti na waarheid foe Gado?
10 We now, di wi ben poti prakseri tapoe na „boen njoensoe” di ben préki gi wi en di wi ben arki na hen nanga bribi, nanga reti wi ben kan gi wisrefi na grani ini na ten dati, dati wi ben abi na gosontoe verstan foe si na waarde foe hen en foe verstan hen wantron wantron? Nono. „Aladi wi ben swaki ete”, no ben abi na makti foe jepi wisrefi, „aladi wi ben de sondari ete, ja, aladi wi ben de féjanti ete, wi ben kon de verzoen nanga Gado nanga na dede foe hen Manpikin” (Rom. 5:6-10). Na soema wi moe taki tangi foe na boen positie pe wi de now? Jezus ben taki gi hen discipel: „No wan sma no kan kon na mi, efoe na Tata, di ben seni mi, no hari hen” (Joh. 6:44). Nanga wi égi initiatief wi no ben sa kisi nooiti wan sabi foe Gado. Na sondoe, onvolmaakti fasi foe wi, no ben sa gi wi pasi foe disi nooiti.
11 Ma wi kan soekoe Gado, bikasi ’a no de farawe foe ibriwan foe wi’ (Tori foe den Apostel 17:27). Efoe wi wani soekoe Gado soso ofoe firi hen, dan disi e prisiri Gado. Dan a de kon krosbé foe wi (Jak. 4:8). Jehovah sabi na inisé lostoe foe na sma di e soekoe en a de seni wan sma go na hen nanga na „boen njoensoe” en te na sma e ondrosoekoe, nanga jepi foe na santa jeje di Gado e gi, na Wortoe foe Gado, dan hen ai e kon opo tapoe na situatie foe hen. Efoe a de sori bribi ini san Gado e taki, dan a man foe komoto foe doengroe. Foe na vermogen foe libisma na bijbel e taki: „No wan ai ben si, no wan jesi ben jere, noso ben kon ini na ati foe wan libisma ala san Gado meki klari gi den sma di lobi hen” (1 Kor. 2:9). Efoe Gado no ben abi sari-ati nanga wi en no ben jepi wi leki persoon dan wi no ben kan verstan na waarheid nooiti tapoe na gron foe libisma prakseri nanga lostoe.
12. (a) San wi moe hori alaten ini prakseri foe tan hori na a fosi bosroiti foe wi? (b) Fa Gado kan kibri wi foe gevaar di wi ben sa kan kon na ini foedi wi no e si sani alaten joisti?
12 Now di wi sabi foe datede dati Gado e si wi moeilek toestand en e jepi wi foe senten, dan wi kan verstan fa a kan foe tan hori na a fosi bosroiti foe wi te den jari e pasa. Gado kan meki wi gro srefi ini jejefasi. Soleki Petrus taki, dan na krakti foe Gado e kibri wi. Wi moe erken, te wi tron kristen kaba, dati wi no man foe horidoro nanga winimarki nanga égi krakti, koni ofoe verstan — wi no ben sa man doe hen wisrefi. Na fasi foe si sani foeroetron kon doengroe. Foeroetron wi no e sabi srefi-srefi en wi e kon ini situatie nanga omstandigheden di de toemsi gevaarlek gi na kristen getrouwfasi foe wi (Gal. 6:1). Kande wi e tnapoe tapoe na punt foe doe na wan ofoe tra stap di ben sa kan tjari wi go na pori. Ma Gado di e loekoe, lobi wi en abi sari nanga wi en a de hori na pramisi di a gi na wi en a kan verloesoe wi foe na gevaar tapoe na joisti momenti. Kownoe David foe na Israël foe owroeten ben taki, baka di Gado ben „kibri” hen na so fasi en a ben ondrofeni na sorgoe foe hen: „Joe ben verloesoe mi sili foe na dede — Joe no ben verloesoe mi foetoe foe no fadon — Foedi mi kan waka na fesi foe Gado ini na leti foe den libiwan.” — Ps. 56:13.
Kibri foe broedoepaiman
13, 14. (a) Fa David ben kon gevaarlek krosbé foe trowe broedoe di no abi fowtoe? (b) Fa Abigaïl ben sabi foe drai hen poeroe foe hen fowtoe pasi?
13 Ini 1 Samuël kapitel 25 wan sani skrifi di e sori fa Gado ben kibri David foe hen égi onvolmaakti redenering, nanga firi en verloesoe hen na so fasi. Di David ben libi leki wan sma di ala sma kan kiri leki wan fowroe, foedi a ben moe lowe gi den onti foe kownoe Saul foe kiri hen, dan David nanga den man foe hen ben de alape pe den ben abi na okasi, actief bezig foe jepi en kibri den Israëlsma. Wan sma di den ben jepi, ben de wan boen goedoe Israëlsma, di ben nen Nabal. Di David nanga den man foe hen ben opo den kampoe ini na birti pe den herder foe Nabal ben e sorgoe gi den ipi-meti, dan de man foe David ben de leki wan skotoe gi den tegen foefoeroeman, sondro dati den aksi ofoe teki wan sani foe den dienst foe den. Bakaten, di David ben abi njanjan fanowdoe gi den man foe hen, nanga switifasi David ben aksi Nabal, leki wan Israël brada, ofoe a ben wani jepi hen foe gi hen njanjan. Na presi dati Nabal sori tangi en soleki na wet foe Mozes taki foe na lobi foe jepi trawan, a kosi den man foe David.
14 Na takroe doe disi sondro foe sori tangi ben meki David ati bron sote, dati nanga so wan fo hondro man a ben hari go foe teki refrensi tapoe Nabal nanga hen osofamiri. Ma di na oema foe Nabal, Abigaïl ben kon sabi fa hen man ben handri tapoe so wan wiswasi fasi, a meki esi foe tjari wan bigi presenti foe njanjan gi David. A ben bigin taki nanga David tapoe na gron foe na matifasi foe hen nanga Jehovah foe poti na wraak foe hen na wan sé en a ben taki: „No meki disi de wan reden foe degedege gi joe en no wan naki foetoe gi na ati foe mi masra, èn nanga na trowe foe broedoe sondro reden, èn na meki foe na anoe foe mi masra kon foe jepi.” David ben kon na hen verstan en ben taki: „Blesi foe Jehovah, na Gado foe Israël, di ben seni joe kon na dé disi foe miti mi! En blesi foe na verstan fasi foe joe en blesi foe joe, di ben tapoe mi foe kon ini broedoepaiman en ben meki mi égi anoe kon leki na jepi foe mi.” — 1 Sam. 25:31-33.
15, 16. (a) Efoe David ben go doro nanga hen doe, na sortoe toe fowtoe sani a ben sa doe sondoe, en san ben kibri hen foe dati? (b) Sortoe les wi e leri foe dati, en sortoe krakti disi moe abi tapoe wi?
15 Efoe joe loekoe hen foe libisma sé, dan David ben sa firi dati a abi reti foe hari go foe pai na ogridoe foe Nabal, ma efoe a ben doe dati, dan a ben vertrouw tapoe hensrefi foe teki refrensi nanga kisi reti en a ben sa poti broedoe paiman tapoe hensrefi foedi a ben sa kiri memre foe na osofamiri foe Nabal di no ben doe noti. San ben jepi David? Jehovah ben si en kibri hen foe na sondoe disi.
16 Foe na eksempel disi wi e si dati na pasi di e go na redding, wi no kan tan waka hen foedi wi e vertrouw tapoe wisrefi, na dati alaten wi moe loekoe na Gado, di e hori wakti tapoe wi en di e tjari wi pasa boen. Disi moe gi wi vertrouw en moe meki wi de nanga sakafasi.
17. (a) Wi moe teki dati Gado sa doe moro mendri gi wan sakafasi dienstknegti foe hen ini disi ten? (b) Tapoe sortoe fasi Gado kan kibri wi foe na doe foe bigi fowtoe?
17 Ma ete wan sma ben kan taki: „Ma dati ben de na salfoe kownoe David, nanga soema Gado ben sroto wan verbontoe foe na kownoekondre. Kande a no sa poti someni prakseri tapoe wi.” Wi kan taki troetroe, dati Gado, di ben bai wi nanga na diri broedoe foe hen Manpikin, no sa kibri a srefi fasi na libi foe wi? Dati a de doe troetroe. Soleki Gado ben kibri David foe wan esi esi doe di ben sa tjari rampoe kon foedi a gebroiki Abigaïl, na so a sa kibri wi ooktoe sondro mankeri. Soleki a ben bewégi Abigaïl foe kibri David, na so a kan kibri wi ooktoe nanga jepi foe hen Wortoe na bijbel ofoe hen engel, ofoe wan kristen mati, ofoe nanga sortoe meki bepaalde omstandigheden kon, foe doe wan law sani, efoe wi abi bribi en efoe wi tan waka ini begi wan sakafasi pasi foe poti wi vertrouw tapoe hen.
18, 19. Fa so wan sabi kan gi wi tranga foe hori doro ini na fasi foe libi di wi ben teki, en sortoe aksi moe piki ete?
18 Fa na si disi foe afersi de wan trowstoe en e gi dekati! Gado no e taki: „We, joe sabi now san joe moesoe doe en moro fara joesrefi moe sabi san joe e doe.” Na presi foe dati, a abi tapoe wan lobifasi belangstelling gi na redding foe wi en a de kibri wi actief solanga wi e hori wi bribi actief ini hen en ini na verloesoe-paiman foe hen Manpikin. A „sabi heri boen fa wi ben meki, a abi ini prakseri dati wi de doti”, sodati a sabi, dati wi, efoe den ben libi wi na wisrefi, ben sa fadon ini den moeiti foe wi foe tan hori na wan getrouw fasi foe libi. — Ps. 103:10-14, 17,18; loekoe Psalm 38:4, 22; 40:12, 15; 130:3, 4.
19 Disi wani taki foe wi sé dati bijna wi no abi noti foe doe foe libi getrouw — dati a didon krinkrin na Gado? Kwetkweti, soleki sa sori ini na tra bijbel bespreking.