Begi so na Jehovah dati a jere wi
„A sma di e kon na Gado, moe bribi taki a de èn taki a de pai den sma di e soekoe en tranga.” — Hebr. 11:6.
1-3. (a) San na ondrofeni foe wan pikin meisje e leri wi? (b) Sortoe leri de na ini gi ala papa nanga mama?
A BEN psa ini wan Koninkrijkszaal foe Jehovah Kotoigi. Wan pikin meisje ben tan tjari ensrefi na wan fasi di no fiti aladi en mama ben loek en nanga ogri ai èn ben piri-ai nanga wan safri sten. A mama ben pingi ai gi na papa èn a doe wan sani na a situwasi. A teki en oemapikin anoe èn waka nanga bigi stap go na wan kamra bakasé foe na zaal. A meisje di ben sabi san ben e wakti en, ben bari: „O Jehovah, jepi mi grantangi!”
2 Te so wan sani e ferteri, dan wan sma moesoe lafoe pikinso, èn disi na wan sani di wi kan froestan. Ma a de soso wan laf-tori, ofoe wi kan leri wan sani foe disi? Troetroe wi kan leri wan sani foe disi. A ben sabi na nen foe Gado, a Mekiman; a ben sabi taki a nen Jehovah, wan sani di pikinso pikin meisje sabi. A ben kisi leri foe a waarde foe begi èn a ben sabi taki wan sma kan aksi Jehovah foe jepi en ini ten foe moeilijkheid. A ben de troetroe wan pikin laf-tori taki a ben aksi Gado foe kibri en foe fanowdoe tranga leri. Ma so wan aksi de troetroe soso wan sani di de foe si na pikin meisje di no sabi moro betre? Kwet-kweti. A naatsi Israël ben doe a srefi sani nofotron, spesroetoe ini den dé foe den kroetoeman. Te den ben kisi strafoe di den ben verdini, dan den ben begi Gado foeroetron foe kisi lekti. — Recht. 2:11-18; 4:1-3, 23, 24; 10:6-16; 11:32, 33.
3 Ala kristen papa nanga mama kan teki wan leri foe disi. Bigin froekoe foe poti bribi ini Jehovah go ini joe pikin. Jepi den foe froestan taki Jehovah de wan troetroe sma di e jere begi. Te wan sma leri pikin foe pikinnengreten foe begi, dan disi sa meki taki den frede Gado te den doro na libimarki taki den moe frantwortoe gi densrefi. Teki gersi Ps. 22:9, 10; Spr. 22:6; 2 Tim. 3:14, 15.
FOE SANEDE JOE MOE GO PRAKSERI FOE DEN BEGI FOE JOE
4, 5. (a) Sortoe aksi tapoe a tori foe begi wi ben sa moe aksi wisrefi? (b) Foe sanede den sortoe aksi disi de spesroetoe boen?
4 Ma sortoe rol bégi e pré ini joe libi? Foeroetron joe e si taki joe abi en toemsi druk foe begi srefi? Joe e lon psa kande ini joe begi leki wan masjin, ofoe leki wan wroko di moesoe foe doe? San de na kwaliteit foe joe begi?
5 Den aksi disi di e poti wi foe prakseri de nownow prenspari. Sosrefi mindri Jehovah dienstknegti joe abi sma di no e begi alaten. Trawan e feni taki den begi foe den no abi foe taki no wan sani. Disi de wan sani di wan kristen no moe teki lekti, bikasi na kwaliteit foe en begi e sori en jeje toestand. Wan sma jeje gosontoe na a tra sé didon foe wan bigi pisi ofoe a de froestan en jeje fanowdoe èn ofoe a de doe wan sani na disi (Matt. 5:3). Te wan sma poti prakseri na a kwaliteit foe en begi, dan wan sma kan meki en jeje toestand kon moro boen.
FOE SANEDE WI KAN GO NANGA FOEROE FROETROW NA JEHOVAH
6. Foe sanede wi kan begi nanga froetrow na Gado te wi loekoe san bijbel taki ini Psalm 65:2, Filippi 4:6 nanga 1 Thessalonika 5:17?
6 Foe sanede wi kan go nanga foeroe froetrow na Jehovah èn verwakti taki a jere wi begi? Na a fosi presi foedi a de meki wi kon sabi en leki a „Sma di e jere begi” èn di e gi wi komando foeroetron foe begi (Ps. 65:2). En Wortoe abi den sortoe komando leki: „Begi alaten, sodati joe no kon ini tesi” (Matt. 26:41). „Begi gi makandra” (Jak. 5:16). „Tan horidoro ini begi” (Rom. 12:12). „Begi sondro foe tapoe” (1 Thess. 5:17). „No broko-ede foe noti, ma meki ini ala sani nanga begi èn trangabegi makandra nanga taki-tangi joe ati-lostoe kon bekenti na Gado.” — Fil. 4:6.
7. Sortoe man ben de eksempre gi wi te a de kon tapoe a tori foe begi?
7 A bijbel e gi wi eksempre toe di de troetroe indirecte komando gi wi foe begi. Bigin foe Genesis te go doro na Openbaring a tori di skrifi nanga santa jeje e monjo nanga eksempre foe man foe begi. Wi e lési taki Abraham ben begi na Jehovah (Gen. 12:3). Foe sensi a ten di Jezus Kristus ben dopoe ini a Jordaan te leki den ben anga en na a kiri-postoe, a ben begi foeroetron na en Tata (Luk. 3:21; 23:46). Na apostel Paulus e kari a tori foe begi letterlijk someni tintron lési ini en brifi. Nofotron a de taki dati kristensma moe begi gi trawan, a de gi tranga foe begi ofoe a de a aksi trawan foe begi gi en (Fil. 1:9-11; Ef. 6:18, 19). A boekoe Openbaring di na apostel Johannes ben skrifi, e tapoe nanga toe begi. — Openb. 22:20, 21.
8. Foe sortoe réden wi kan go na Gado nanga froetrow?
8 Wan tweede réden foe san-ede wi kan go na Gado nanga froetrow ini begi de, taki en nen de ini a tori. Disi abi na ini en nen ofoe boen-nen leki na „Sma di e jere begi”. Èn foedi en nen tai nanga en pipel, dan wan bewijsi di gersi leki a ben libi en pipel, soema di e loekoe ben sa teki no nanga reti foe ferteri leki nanga disi ben kon na krin taki Jehovah no man foe jepi en tranga-ede dienstknegti. Disi ben sa poti sjen tapoe en nen. Ini Psalm 79:9 wi e lési foe datede: „Jepi wi, o Gado foe wi verloesoe, foe na glori foe joe nen ede; èn fri wi èn tapoe wi sondoe foe joe wani ede.” Mozes, Jozua, David nanga Hizkia ben begi na a srefi fasi (Ex. 32:11, 12; Joz. 7:8; 2 Kon. 19:15-19; Ps. 25:11). Èn na proféti Daniël ben begi so: „O Jehovah, poti prakseri èn doe wan sani. No draidrai . . . bikasi joe égi nen ben kari tapoe joe foto nanga joe pipel” (Dan. 9:19). Ja, efoe wi e tjari Jehovah nen troetroe, dan wi kan begi en foe bepaalde sani tapoe na gron foe dati.
9. Foe sanede wi kan aksi Gado nanga foeroe froetrow sari-ati nanga pardon?
9 Wan derde réden foe sanede wi kan verwakti Jehovah sa jere wi begi, de dati a sabi san wi man èn san wi no man èn a wani jepi wi. A psalmsingiman ben taki en so: „So fara leki pe son de opo de foe pe son e dongo, so fara a ben poeroe wi sondoe gwe. Soleki wan papa e sori sari-ati gi en manpikin, a so Jehovah ben sori sari-ati gi den di e frede en. Bikasi ensrefi sabi eri boen fa wi ben meki, ini prakseri taki wi de stof” (Ps. 103:12-14; loekoe sosrefi toe Psalm 51:5). Soboen, te wi doe wan sondoe, ofoe te wi pori sani, ofoe wi meki wan bigi fowtoe, dan wi kan aksi Jehovah Gado pardon tapoe na gron foe wi swakifasi nanga wi onvolmaakti fasi.
10. Foe sortoe tra réden wi kan go na Gado nanga froetrow, soleki e kon na krin ini a tori foe Job nanga foe Paulus nanga trawan?
10 Ete wan prenspari réden foe sanede wi kan kon nanga froetrow na Jehovah, de foedi a sa jere wi begi foedi wi de hori wi getrouwfasi. Tapoe a gron foe disi Job ben begi nanga toemsi moi wortoe di a taki: „Gado moe wegi mi tapoe wan opregti wegi, èn a sa moe erken mi sondro-fowtoe-fasi!” (Job 31:6, Petrus Canisius-vertaling) A so Paulus ben aksi kompe-bribiman. „Tan begi gi wi, bikasi wi e froetrow taki wi abi wan opregti konsensi, foedi wi winsi foe tjari wisrefi ini ala sani tapoe wan opregti fasi” (Hebr. 13:18). Dati ini na ai foe Gado wi moe de getrouw, e kon na krin toe ini san na apostel Johannes ben skrifi: „Oen lobiwan, efoe oen ati no e kroetoe wi, dan wi abi fri foe taki na fesi foe Gado; èn san wi e aksi toe, wi e kisi foe en, foedi wi e hori en komando èn wi e doe den sani di de switi ini en ai.” — 1 Joh. 3:21, 22.
BEGI NANGA JEPI FOE ÈN NO NA JEZUS KRISTUS
11. Soso nanga jepi foe soema wi kan go na Gado?
11 Fa wi kan kisi pasi, foe kon na a bigi „Sma di e jere begi”? A ben poti taki disi kàn, soso nanga jepi foe Jezus Kristus. Soso wan mindriman de mindri Gado nanga libisma, èn wan Hépriester, Jezus Kristus (1 Tim. 2:5; Hebr. 7:25, 26). Jezus srefi ben taki disi krin nanga den wortoe: „Nowan sma no e kon na a Tata dan nanga jepi foe mi” (Joh. 14:6). „Foe troe mi taki gi joe taki: Efoe joe aksi a Tata wan sani, a sa gi en na joe ini mi nen . . . Aksi èn joe sa kisi, sodati joe prisiri kan kon foeroe dorodoro.” — Joh. 16:23, 24.
12, 13. (a) Sortoe aksi wi ben sa kan aksi tapoe san na apostel Johannes nanga Stéfanus ben doe? (b) Ma foe sanede den eksempre foe Stéfanus nanga Johannes no kan teki leki reden foe begi wantron wantron na Jezus?
12 Ma son sma e aksi densrefi: ’Ma wi no kan aksi sani wantronwantron na Jezus srefi? A discipel Stéfanus ini en begi no ben taki wantronwantron nanga Jezus, èn na apostel Johannes no ben doe disi sosrefi toe?’ A de troe taki let bifo Stéfanus ben ari en laatste bro, a ben taki: „Masra Jezus, teki mi geest” (Tori foe den apostel 7:59). Èn na apostel Johannes ben begi foe troe: „Amen, kon, Masra Jezus.” — Openb. 22:20.
13 Ma wi e doe boen foe loekoe den omstandigheden. Stéfanus foe eksempre ben kisi wan visioen, bikasi a ben taki: „Loekoe! Mi e si hemel opo èn a Manpikin foe libisma na a reti-anoe foe Gado.” Foedi Stéfanus ben si Jezus ini wan visioen, a ben kan taki wantron wantron nanga na Manpikin foe Gado (Tori foe den Apostel 7:59). Na apostel Johannes ben kisi sosrefi toe wan visioen foe hemel sani (Openb. 1:1, 10; 4:1, 2). Na a ten di Johannes ben si a visioen, a ben si Jezus èn a ben jere a de taki: „En di e gi kotoigi foe den sani disi e taki: ’Ja, mi e kon esi’” (Openb. 22:20). Akroederi nanga dati, Johannes ben gi piki tapoe san a ben jere Jezus ben taki djonsro. Den sortoe sani disi di ben pasa, wi kan teki gersi nanga san ben pasa di na vervolgoeman Saulus foe Tarsus ben go na Damaskus. Jezus Kristus ben sori ensrefi na Saulus nanga den wortoe: „Saul, Saul, foe sanede joe e vervolgoe mi?” Soleki ini a tori foe na apostel Johannes èn foe Stéfanus, Saul e piki Jezus wantronwantron nanga den wortoe: „Soema na joe, Masra?” — Tori foe den apostel 9:4, 5.
NANGA JOISTI RESPEKI
14, 15. San wi fasi, wi wortoe nanga wi sten moe sori te wi e begi, èn foe sanede?
14 Te wi e go na a bigi Soeverein foe na universum ini begi, dan wi e kon toe na en na a joisti fasi. Wi kan go soso na en nanga na moro bigi respeki di de èn nanga dipi sakafasi. Dati a Wortoe foe Gado e taigi wi taki wi kan kon na Gado nanga „fri foe taki”, no wani taki dati wi kan go na a bigi Mekiman na wan mi-no-ke-fasi ofoe dati wi kan de toemsi famriari nanga en (Hebr. 4:16; 1 Joh. 3:21, 22). Fa a ben sa de sondro foe prakseri èn onjoisti efoe wi ben sa bigin wan begi nanga den wortoe: „Odi, Jehovah!” Wi kan kon nanga fri foe taki foedi wi e poti bribi nanga froetrow dati a de klari foe arki na wi èn foedi wi e kibri wi getrouwfasi. Ma wi moe doe disi nanga dipi respeki. — Teki èn gersi Prediker 5:1, 2.
15 Wi no moe frigiti noiti dati Jehovah Gado de moro hé leki wi. Foedi wi e libi na grontapoe èn abi wan grontapoe skin, meki wi de moro lagi leki den engel ini makti nanga glorifasi (Hebr. 2:7). Boiti dati, wi de sondoe, onvolmaakti sma. Wi moe gebroiki foe dat’ede nanga reti, wortoe nanga wan sten di e sori dati wi e froestan wi matifasi nanga Jehovah Gado, bikasi a de arki soso na den sakafasiwan, ’di e béfi gi en wortoe’ (Jes. 66:2). O boen Jezus Kristus e poti krakti tapoe na gronprakseri disi ini en agersitori foe den toe man di ben go na Jeruzalem foe begi drape! Jehovah Gado no ben poti prakseri na a hémemre Fariséman di ben taki fa a boen, ma a ben jere èn teki na begi foe na sakafasi tolnaar di ben abi berouw. — Luk. 18:9-14.
INI BRIBI ÈN HORIDORO
16. Sortoe tekst e sori o prenspari a de foe abi bribi te wan sma e begi?
16 Ete wan prenspari marki foe Jehovah arki wi, de dati wan sma moe kon ini bribi na en. Na fasi disi, di de wan fundamenti foe na begi, foeroetron Gado Wortoe e tjari en kon ini wi prakseri. Jezus ben taki: „Efoe joe abi bribi di de so bigi leki wan mosterdsiri . . . noti sa de wan sani di no kan gi joe” (Matt. 17:20). Ini Hebreër 11:6 a taki dati wi no moe bribi wawan taki Gado de, te wi wani prisiri en, ma sosrefi toe taki a de pai den sma di „e soekoe en tranga”. Na discipel Jakobus e skrifi: „(Joe) moe tan aksi ini bribi, no degedege kwetkweti, bikasi a sma di e degedege . . . no moe mène taki a sa kisi wan sani foe Jehovah.” — Jak. 1:6, 7.
17. Sortoe rai den Santa Boekoe e gi foe a horidoro ini begi?
17 Efoe wi wani taki Gado jere wi begi, dan wi moe horidoro ooktoe ini begi. Wi moe meki begi de wan gwenti. A bijbel e vermane wi: „Hori faste na a gwenti foe begi” (Rom. 12:12, The New Testament in Modern English, J.B. Phillips). Jezus foeroetron ben poti krakti tapoe a fasi disi foe begi. Ini en bergipréki a ben taki: „Tan aksi èn joe sa kisi; tan soekoe, èn joe sa feni; tan naki, èn doro sa opo gi joe” (Matt. 7:7). Ini en agersitori foe na weduwe, di ben kisi reti foe wan kroetoeman di no ben frede Gado of abi respeki gi wan sma, Jezus ben poti krakti sosrefi toe tapoe o prenspari a de foe horidoro (Luk. 18:1-8). Efoe wi e lostoe fajafaja den sani di wi e aksi Jehovah Gado, dan wi sa „horidoro ini begi” èn „begi sondro foe weri”. — Rom. 10:12; 1 Thess. 5:17.
18. (. . .)?
18 Tai makandra nanga na horidoro, ini begi, de na fanowdoe foe wi teki na ten foe begi. Wi no moe abi en noiti toemsi druk foe begi. Wi abi foe troe foe doe nanga den fanowdoe sani foe a libi — wi aladé wroko, njanjan, na sorgoe foe wi skin nanga sribi — di e teki a moro bigi pisi foe den 24 joeroe di wi abi ala di. Ma foeroe tra sani no de sosrefi toe di e teki moro foe wi ten leki de fanowdoe? Kande ini disi de na lési foe koranti, na loekoe foe televisieprogramma, na teki prati na sport-activiteit nanga tra sortoe foe prisiri ofoe ontspanning. Efoe wi no e waarderi troetroe na diri grani foe begi, dan wi ben sa kan si taki we libi begi na wan sé, foedi leki wan bakapisi foe den sortoe sani disi wi no abi ten.
OKASI FOE BEGI
19. San de wan toe foe den foeroe okasi di wi abi foe begi?
19 Den okasi di wi abi, de troetroe foeroe. Efoe wi wani „begi sondro foe tapoe”, dan wi moe begi na ala okasi — te wi opo mamanten, te wi e go neti na bedi, bifo wi njan èn ini den ten te wi de na ai na neti. (Loekoe Psalm 5:3; 92:1, 2; 119:147-149, 164; 1 Tim. 4:4, 5). Kande wi moe kaka foetoe gi problema ofoe ten foe druk, ofoe kande wi moe tjari hebi frantwortoe; kande den e aksi wi foe taki nanga wan kristen publiki ofoe taki foe wi bribi fesi rigeriman. Disi de troetroe ten di wi moe ferteri wi sorgoe na Jehovah. Ja, „poti ai tapoe en ini ala joe pasi, èn en sa meki joe pasi kon reti” (Spr. 3:6). Mora fara, alaten te wi kisi wan spesroetoe blesi, spesroetoe te disi de onverwakti ofoe wi ben lostoe en fajafaja, dan tangi moe opo kon ini wi ati gi Jehovah. Ma wi no abi speciale reden foe disi fanowdoe. Wi ati nanga wi froestan alaten kan tjari wi so fara foe tjari tangi kon na fesi.
20. San wi kan taki foe na houding foe wi skin te wi begi?
20 Foedi alaten kan de boen foe begi, dan disi wani taki kande taki wi no moe poti prakseri tapoe na houding foe wi skin? A de troe taki a bijbel no e ferteri dati wi moe abi wan spesroetoe houding te wi e begi, soleki kindi èn fow wi anoe. Ma wi e lési foe sma di ben begi aladi den anoe ben opo na tapoe ofoe di ben kindi ofoe di ben trowe densrefi a gron. (Loekoe Genesis 24:26, 48; 1 Kon. 8:22, 42, 44, 54; Markus 11:25.) Disi ben sa kan sori a tapoe dati a de wan sani di fiti, efoe a kan, foe abi wan houding foe skin di e sori respeki te wi e begi. Na wan gemeente-konmakandra foe eksempre wi ben sa kan opo tanapoe èn boigi wi ede. So wan kenki foe a houding foe wi skin kan jepi wi toe foe poti wi prakseri na wàn gi na begi di e begi foe na boen foe wi. Kindi gersi a de wan toemsi moi houding te wi e begi wi wawan. (Teki gersi Daniël 6:10; Filippi 2:9, 10.) Te bifo wi e go begi wi didon tapoe wi bedi plata, dan wi moe poti prakseri tapoe na vermane foe na apostel foe de nanga ai te wi e begi, no sribi, èn „tan nanga ai”. — Ef. 6:18.
21. Fa wi moe begi foe Gado kan jere wi?
21 Na begi na Jehovah Gado de troetroe wan sani di wi moe si leki wan ernstig sani. Fa a moe meki wi de nanga tangi na ati, dati wi kan go na wi hemel Tata nanga na froetrow dati a de jere wi alaten! A no de foe taki dati disi anga ofoe wi e kon ini bribi na en, nanga jepi foe na joisti kanari, nanga na joisti jejefasi, aladi wi e horidoro ini begi èn no abi en noiti toemsi druk foe begi. Èn efoe joe abi pikin, leri den dan nanga pasensi na prensparifasi foe begi, foedi joe e taigi den foe begi èn foedi joe e gi den wan toemsi moi eksempre.