Oen jongoewan, a libi akroederi den boen prekti nanga gwenti foe a bijbel de na moro boen pasi?
„Mi, Jehovah, na oen Gado, A Sma di e leri oenoe fa foe kisi wini gi oensrefi, A Sma di e meki oen go tapoe na pasi di oen moe waka.” — Jes. 48:17.
1. Foe sanede den jongoejari de wan boen ten ini na libi, ma sortoe fasi son sma e teki?
„DEN dé foe wi jongoe jari de den dé foe wi glori”, na singiman ben skrifi. Foeroe jongoe sma e agri nanga dati, bikasi jongoe jari de wan span ten, sondro na hebi frantwortoe di bigisma abi. Ma foeroe jongoe sma gridi foe kisi toe ala prisiri, di no wawan de foe jongoe sma, ma foe bigisma toe. Na fasi foe den wi kan skrifi so foe den: „Wi no wani wakti; wi wani ala prisiri wantronwantron now.”
2. (a) San son statistiek e tjari kon na krin foe jongoe sma nanga boen gwenti? (b) Joe e bribi dati den sani disi e abi krakti tapoe den jongoe sma ini na kristen gemeente?
2 Na krakti lostoe foe jongoe sma foe njan boen foe ala prisiri di de . . . „ini na bromki foe den libi”, ben abi leki bakapisi dati moro jongoe sma now e gi den srefi abra na seks libi bifo den trow, san nen hoeroedoe, dan ini sortoe tra ten foe na disiten historia toe. Na bigi skwala disi foe fri seks libi ben abi srefi krakti tapoe son jongoewan ini na kristen gemeente. Leki kristen joe ben sa kan aksi joesrefi: ’San e meki a de gi jongoewan ini disi ten, spesroetoe ini den laatste dé disi, so moeilek foe tan krin?’ — Prekiman 11:10; 2 Tim. 3:1-5.
JONGOEWAN TANAPOE ONDRO DRUK
3, 4. (a) Foe sanede a no de makriki foe tan krin? (b) Fa problema e doe kon nanga druk foe na sé foe pikin foe a srefi libiten leki den èn wan fanowdoe foe sma froestan den?
3 Ini den tinijari na seks lostoe e gi bromki. Ini na pisi ten disi, di na bijbel e kari a „bromki foe den jongoe jari”, dan jongoe sma e firi moro foeroe dati trawan foe na tra sekse e hari den tranga. Foe datede a no de wan ongewoon sani, te joe leki wan jongoe sma, e kisi problema nanga seks lostoe. Na grontapoe foe prisiri nanga reclame, di e gi glori na seks e gi faja na a normaal lostoe disi. — 1 Kor. 7:36.
4 Na druk foe na sé foe tra jongoe sma kan de ooktoe bigi, soleki wan kristelek skoro-meisje ben ferklari: „A de troetroe moeilek ini disi ten foe de tra fasi. Wan toe meisje na skoro ben aksi mi ofoe mi ben abi seks kaba nanga wan man. Di mi taki no, dan den alamala ben bigin lafoe. Mi ben kan kré èn mi ben firi foe taki dati a ben de so.” Boiti dati, jongoe sma abi fanowdoe dati sma froestan den, èn kande na oso disi no de so. Den e feni en wan switi sani foe abi wan mati foe behandel den leki „spesroetoe” èn di e arki na en nanga firi gi en. So wan matifasi kan abra go na seks matifasi. Son jongoe sma e lasi den srefi nanga ala den njoen firi disi. Den e aksi densrefi kande: ’So wan sani di de so switi kan de fowtoe? Na libi akroderi den boen prekti nanga gwenti foe a bijbel de troetroe na moro boen pasi?’
NA MORO BOEN PASI
5. (a) San Jesaja 48:17 e taki foe Gado? (b) Akroederi 1 Thessalonika 4:3-8, dan san de Gado wani gi wi tapoe na tori foe boen prekti nanga gwenti?
5 Wi hemel Tata ben memre a pipel foe en di a ben taki na sani disi: „Mi, Jehovah, na oen Gado, A SMA di e leri oenoe fa foe kisi wini gi oensrefi, A SMA di e meki oen go tapoe na pasi di oen moe waka?” (Jesaja 48:17). San na a „pasi di wi moe waka” na moreel fasi? „Disi Gado wani (ofoe e aksi) . . . dati oen hori oensrefi farawe foe hoeroedoe; dati ibriwan foe oenoe sabi fa foe kisi ini santa fasi nanga respeki en égi patoe (skin), no ini gridi seks lostoe . . . Bika Gado no ben kari wi nanga primisi foe dotifasi.” — 1 Thess. 4:3-8.
6. (a) San Paulus ben koemanderi salfoe kristen tapoe na tori foe hoeroedoe èn foe san-ede? (b) Foe san-ede disi moe tjari jongoe sma go so fara foe poti prakseri na a libifasi foe den?
6 Na wani foe Gado tapoe a tori foe boen prekti nanga gwenti de krin — ’hori joe skin ondro dwengi’; tan farawe foe hoeroedoe èn dotifasi. Jongoe kristen di gi densrefi abra, oenoe ben kon ini wan krosbé matifasi nanga Jehovah èn oenoe kon de wan pisi foe wan krin organisaatsi. Fa Gado e prisiri ini so wan fasi foe libi! Ma te oenoe ben sa gi oensrefi abra na seks-demakandrara bifo oen trow, dan disi ben de a srefi leki te wan foe den salfoe „memre foe na Kristus” di „de ini wanfasi nanga na Masra”, na seks sé „kon de wán nanga wan hoeroe-oema”. „Meki dati no psa noiti!” na apostel Paulus ben bari taki. A ben sa de wan toemsi bigi afrontoe gi so wan diri matifasi. No wan tra sondoe de precies a srefi leki en, bikasi „na sma di e doe sondoe e sondoe nanga en égi skin”. So wan sondoe kan pori foe troe na jeje matifasi di wi de nanga Gado. A no de wan froewondroe sani dati Paulus ben gi na dekati „foe lon komoto foe hoeroedoe”. Ja, „lowe gwe”! No draidrai foe taki-kon-taki-go foe en. Go tanapoe so farawe foe en — èn esesi! Ma efoe wan sma no „lon komoto” foe so wan libifasi now? — 1 Kor. 6:15-18.
„DOE JOESREFI KROEKTOE”
7-9. (a) San 2 Petrus 2:9-13 e taki foe den sma di e doe hoeroedoe? (b) Fa son sma di ben gi densrefi abra na doti fasi, ben doe kroektoe nanga densrefi?
7 Na apostel Petrus e taki dati den sma ini na gemeente di ben skempi „gloriwan” èn di ben abi foe doe nanga hoeroedoe, te foe kaba „ben e doe densrefi kroektoe leki wan paiman foe kroektoedoe”(2 Petr. 2:9-13). „Na paiman” disi foe kroektoedoe ofoe ogri na seks sé, wani taki foeroe moro leki soso wan siki na a sjenpresi ofoe wan bere sondro foe trow. A abi wan pori krakti tapoe lobi, respeki nanga vréde foe na froestan. Son jongoe sma di go „toemsi fara”, foedi den doe hoeroedoe, nanga sari na ati ben taki foe eksempre:
„A ben de wan froewakti di no ben kon troe. Wan firi foe prisiri, waran nanga lobi no ben de soleki mi ben prakseri. Na presi foe dati, na froestan di mi ben froestan o ogri na doe disi ben de, ben naki.”
„Mi ben kré na heri neti.”
„Mi ben firi misrefi so lagi leki wan dagoe. A ben de wan légi èn tegoe firi. Mi ben lasi ala respeki gi misrefi nanga a meisje. Mi ben si dati mi ben gi na meisje na fowtoe dati en ben gi pasi dati a ben psa.”
8 Wi hemel Tata e gi wi tranga, dati wi no tan farawe wawan foe hoeroedoe ma ooktoe foe „dotifasi” (1 Thess. 4:7). Aladina wortoe disi wani taki foeroe sari, tog a abi foe doe nanga wan libifasi di ini moreel fasi de wan tegoe sani. Masturbatie (Gi-joesrefi-satisfaksi) de foe eksempre wan „doti” gwenti di foeroe jongoe sma e gi densrefi abra na en. Masturbatie foe troe e gi faja na den „seks lostoe” èn a kan gi wan bigi firi foe fowtoe. Ini a tori foe son wan di no ben doe moeiti tranga foe wini na gwenti disi, dan na patron foe denki foe den ben meki problema kon baka na trow. Wan jongoeman ben si nanga skreki dati na patron foe langaten gi-ensrefi-satisfaksi ben abi leki bakapisi dati baka a trow a no ben man foe doe en trowprekti. Siksi moen foe moeilijkheid ben kon! — 1 Kor. 7:3.
9 Son paar ben gi densrefi abra na a fasi foe den kibri pisi foe den skin, èn disi meki den kon faja a seks sé. Ooktoe disi de wan fasi foe „dotifasi”, èn makriki a kan go abra ini hoeroedoe, soleki e psa foeroe tron. Den doe disi kan foeroe wan sma ati so nanga „seks lostoe”, dati pikinmoro a kan law foe dati! Wán jongoeman ben piki: „Joe e si joesrefi leki wan meti nanga lostoe foe wan meti, wan sani di e pori joe firi.” Den sortoe libifasi disi ben meki den mofo di meki foe trow broko, èn foeroe tron bakaten ben gi problema na den sma di trow. „Wi ben doe pikinmoro ala sani, ma soso hoeroedoe wi no doe ete, èn pikinmoro wi ben pasa na skotoe, bifo wi ben trow”, wan jongoe paar ben piki. „Aladi wi ben kisi jepi foe den owroeman, noiti moro a ben tron soleki a ben de. A ben de toemsi moeilek foe wini na respeki baka di wi ben abi gi makandra.”
10. Foe san-ede „dotifasi” e doe ogri na paar di no trow?
10 Efoe wan sma di no ben trow e bigin foe gi ensrefi abra na wantoe foe den seksueel doe di e droengoe joe èn di de soso foe a trowlibi, dan a man ofoe a oema kan go ini na trapoe foe trow wan sma di no abi den égifasi di de fanowdoe foe wan boen masra ofoe wan boen wefi. Seks abi na fasi foe loekoe psa bigi difrenti di baka a trowlibi e kon baka na fesi èn di e gi problema. Wan sma no abi foe froewondroe foe datede foe san wan stoeka tjari kon na krin, dati foe 265 trow ondro dwengi, pe soboen na bruid ben de nanga bere, dati baka 5 jari soso 15 paar de ete nanga makandra! Tra ondrosoekoe tapoe a kontren disi e tjari kon na krin, dati efoe wan sma gi ensrefi abra na seks bifo a trow, dati en (man ofoe oema) kan doe soetadoe toe tron moro esi leki tra sma. We now, oen jongoe brada nanga sisa, no meki den kori oenoe nanga „soso wortoe” foe sma di e taki dati seks libi bifo joe trow e meki wan moro kolokoe trowlibi kon. (Ef. 5:6). Son sma e taki srefi dati joe e kon siki srefi efoe joe abi seks demakandra baka te joe doro den puberteit jari (den jari pe joe e bigin foe tron wan man ofoe oema). Disi no de troe. Datra noiti tjari siki kon akroederi nanga wan boen libifasi! Ma na wan sari sani dati son sma di ben wani prisiri moro leki lobi, ben firi sari foe na tra pisi foe den libi!
11, 12. (a) Fa Jehovah e aksi strafoe gi hoeroedoe? (b) San Job e taki foe den sma di e tjari densrefi nanga tranga ede na Gado fesi? (c) Sortoe aksi wi sa loekoe now?
11 No frigiti noiti dati „Jehovah de wan sma di e aksi strafoe foe ala den sani disi (hoeroedoe èn dotifasi)” (1 Thess. 4:6). Na strafoe disi kan de ini wan fowtoe konsensi, tranga leri foe na sé foe den owroeman foe a gemeente ofoe na koti foe den bakapisi foe san wan sma ben sai. Te wi abi beraw, dan Jehovah sa gi pardon fri èn a sa tapoe wi sondoe krinkrin. Ma son sma de nanga tranga ede èn e wégri foe poti prakseri tapoe a wét foe Gado. „Soema kan de nanga tranga ede a Gado fesi èn tan sondro mankeri?” Job ben aksi (Job 9:4). Nowan sma! A de wan sani di e gi Jehovah pen foe si so wan tranga ede. A de gi owroeman di e broko den ede pen toe, dati den ben si someni foe wi jongoe sma e pina ondro den trauma di kari dja na tapoesé. Den opziener e froestan dati a no kan foe psa Gado wèt nanga gronprakseri èn drai joesrefi èn prakseri dati joe no sa kisi „mankeri”. Wan kristelek oemapikin di ben abi beraw foe na hoeroedoe di a ben doe, ben taki foe datede gi den owroeman foe na gemeente: „Mi ben sa wani taki gi ibri jongoe sma ini na waarheid: ’No doe en!’ Jehovah e gi joe pardon kande foe joe sondoe, ma kande joesrefi kande noiti. Den takroe memre sa pori joe. A no de warti.” Den owroeman e teki na sé foe Jehovah ini den tranga begi foe den: „O efoe joe ben sa poti troetroe denki na mi komando!” — Jes. 43:18.
12 Ma fa wan kristelek jongoe sma kan waka baka den komando foe Jehovah èn komoto ini na pasi foe den foeroe olo nanga koni trapoe foe hoeroedoe?
OPO JOE ATI GI JOE PAPA NANGA MAMA
13. Fa jongoe sma kan gebroiki Odo 23:26 nanga papa èn mama di frede Gado èn nanga sortoe bakapisi?
13 „Mi manpikin, gi mi tog joe ati, èn meki den ai foe joe abi prisiri ini mi pasi” (Odo 23:26). Na tranga begi disi e sori dati moro e aksi leki gi jesi sondro foe prakseri. Wan jongoe sma moe taki en prakseri nanga foeroe froetrow. Ma leki jongoe sma joe e denki kande dati joe kristelek papa nanga mama no e froestan joe firi. Disi ben de ooktoe na prakseri foe wan kristelek oemapikin di ben abi wan problema nanga masturbatie èn di ben abi jepi fanowdoe. A ben firi en wan hebi sani foe taki nanga en mama foe en. Fa en mama ben sa doe? A sa froestan a tori? „We, di mi ben taki nanga en foe a tori, a ben arki, sondro foe verwijti mi wan sani”, na tini ben taki. „A ben poti en anoe lontoe mi èn a ben taigi mi dati a ben lobi mi èn a ben sa jepi mi foe wini na problema. Wi ben taki sondro foe kibri wan sani èn di wi ben klari, a ben hori mi ini en anoe èn wi ben begi makandra. Sensi a ten dati mi kan taki ala sani nanga en makandra.”
14. Fa jongoe sma moe si den wèt foe den papa nanga mama di e frede Gado?
14 Ja, jongoe sma ben kisi esesi jepi, foedi den taki nanga den papa nanga mama foe den nanga foeroe froetrow. Den ben kisi „prisiri” ini den pasi foe den papa nanga mama di frede Gado èn den go si den régel nanga tranga leri foe den leki wan diri „keti na neki” na presi foe si den leki wan tranga-ati „keti” di e hori den a baka foe „abi prisiri” (Odo 1:8). Joe de troetroe opregti na fesi foe joe papa nanga mama? Ofoe joe de leki wan jongoe sma di ben piki: „Efoe mi papa nanga mama de ini na birti, dan mi de soleki den wani foe mi de, ma te den no de ini na birti, dan mi e de soleki mi wani foe de?” Te joe abi wan krosbé banti foe matifasi nanga papa nanga mama di e frede Gado, dan joe kan kisi jepi foe komoto na a pasi foe foeroe sari. Den wan di no abi kristelek papa nanga mama, kan go na lepi brada nanga sisa ini a kristen gemeente èn soekoe ooktoe jepi foe den owroeman ini a gemeente. Den de klari foe jepi; soekoe na jepi dati foe datede. — Tit. 2:3, 4; Jak. 5:14, 15.
TJARI JOE SKIN LEKI WAN SRAFOE
15. Fa na apostel Paulus e skrifi foe na libifasi di a waka na en baka ini 1 Korinte 9:27 èn fa wan jongoe sma kan doe so toe?
15 Na apostel Paulus ben taki: „Mi de tranga gi mi skin (mi e naki en te a blaw) èn mi e tjari en leki wan srafoe (no ’en e tjari mi leki wan srafoe’) foe no, te mi préki gi trawan, misrefi poti na wan sé tapoe wan ofoe tra fasi” (1 Kor. 9:27). Paulus no ben meki spotoe nanga ensrefi. Soboen, no meki den skin lostoe foe joe basi joe, ma si na fesi situwasi pe seks lostoe sa wiki èn komoto na den pasi. Joe sabi foe eksempre san sa psa nanga joe skin lostoe te joe e lési boekoe èn joe e si tv-programma nanga film, pe seks e kisi grani. Tan farawe foe disi leki gi wan plaag! Meki mofo (na presi pe disi mag) aladi joe no de klari foe na trowlibi, bepaalde sortoe foe dansi nanga fesa di no de ondro moreel soifri tiri èn pe paar kan go de den wawan aparti, ala disi e wiki na „seks lostoe”. Tan farawe foe den foe datede èn „kiri foe datede joe leden foe skin tapoe na tori foe hoeroedoe, dotifasi, seks lostoe”. — Kol. 3:5.
16. Sortoe sani wan kristelek paar di e hori nanga makandra èn di e sreka densrefi tapoe na trowlibi, moe doe?
16 Spesroetoe te wan paar e hori nanga makandra èn e sreka den srefi foe trow, dan ala toe partij moe hori den omstandigheden foe den na prakseri. Te joe de joe wawan ini wan oto, ini wan oso (te wan sma komoto foe oso kande èn e libi tapoe ensrefi) ofoe tapoe wan tiri presi drape na dorosé, dan paartjes kan kon so fara toemsi nanga makandra. Wan tini foe 17 jari ben taki opregti: „Ala sma kan taki: ’Wi sabi oten wi moe stop.’ Wan sma sabi disi kande toe, ma omeni sma kan doe disi? A moro betre foe tan farawe foe na situwasi. Sorgoe dati trawan de toe pe joe de.” Ja wan chaperon ofoe chaperonne (wan sma di e tjari joe foe kibri joe) kan gi ekstra krakti foe hori ondro joe makti den seks lostoe di e wroko ini joe skin te oenoe de makandra. Ooktoe a de wan koni sani foe poti „skotoe” na den brasa èn bosi foe oenoe èn bepaal o fara oenoe sa go ini oenoe sori foe lobi. Hori joesrefi na dati.
17. A de wan prenspari sani foe loekoe wi demakandra? San-ede?
17 Te na skin e lostoe foe de ini na birti foe den sma di e abi wan loesoe fasi foe libi, „tjari” en dan komoto foe so wan demakandra. „Hori joe pasi farawe foe en (wan hoeroe oema), èn no kon ini na birti foe na doro foe en oso”, na bijbel e koemanderi (Odo 5:8). Na skoro jongoe sma, a no de foe taki, sondro foe den wani e kon ini kontakti nanga foeroe hoeroedoe sma. Ma joe abi prisiri demakandra nanga den? Wan oemapikin foe 18 jari ben tjari na firi foe foeroe jongoe sma kon a fesi di a ben taki: „Joe demakandra abi bigi krakti tapoe joe boen gwenti nanga prekti. Baka te joe jere den taki foe seks, dan joe e kisi gridi foe sabi moro. Joe e aksi joesrefi san seks abi now foe gi. Seks de so kefarlek leki den e taki? Mi sabi dati a so a de go, foedi leki wan bakapisi foe den troe tori disi, mi tanapoe mi wawan foe kweki wan pikin.” — Odo 13:20.
18. Sortoe aksi wan jongoe kristen moe loekoe te den e spotoe den foe wan krin libifasi ede?
18 Den Santa Boekoe e ferteri dati son hoeroedoe sma ben sa kon tapoe wan kibri fasi ini a kristelek gemeente. Efoe joe denki dati son sma ini na gemeente de foe na sortoe dati, sori den foe go na den owroeman, sodati den kan kisi jeje jepi. Tapoe a fasi disi joe e sori den troetroe lobi, aladi kande joe e kibri trawan ini na gemeente. A de troe dati son grontapoe sma sa spotoe joe foe joe boen standpunt ede. Ma go prakseri! Joe moe meki sma di de „srafoe foe pori fasi”, ja, di de srafoe foe den égi lostoe broeja joe? (2 Petr. 2:19). Soema abi moro krakti — na loesoe, hoeroedoe oema (ofoe man) „di e lon baka en lobi fréri”, ofoe na krin wenke di leki wan bakapisi foe en moreel krakti kan taki: „Mi de wan skotoe”? (Hésingi 8:10; teki gersi Hoséa 2:7). Soema foe oenoe kan de sa lasi moro esi respeki gi ensrefi èn gi en „wartifasi na tra sma”? — Odo 5:9; Judas 4, 8-13.
19. (a) Soema „ben tjari na skin leki wan srafoe” — na paar di Hésingi e skrifi foe en ofoe Amnon? (b) Fa a bakapisi ben de?
19 Te joe e hori joe skin ini dwengi èn e basi en, dan sondro spétifiri joe kan loekoe baka tapoe na troetroe fréri-ten nanga ten di joe meki mofo foe trow. Prakseri pikinso na a prisiri foe na jongoe Sulamiet meisje nanga en lobi herder-boi di te foe kaba ben tai ini trowlibi. Nanga jepi foe trawan èn nanga den égi moeiti foe den, den ben wini den skin lostoe foe den èn den ben kibri den krinfasi. Alwasi den ben taki lobi wortoe, tokoe den no ben fadon ini hoeroedoe libi bifosi den ben trow, sodati den ben sa meki na prisiri kon moro pikinso, di den ben sa abi, baka te den ben gwenti na makandra ini na trowlibi. Fa den ben de tra fasi leki na Amnon di ben abi wan tranga lostoe, di no ben kan wakti èn „di a skin foe en ben tjari en leki wan srafoe” foe doe hoeroedoe! — Hésingi 2:16; 4:16; 5:1; 1 Sam. 13:1, 2, 10-16.
BOW WAN PERSOONLEK MATIFASI NANGA GADO
20. (a) San kan psa te wan sma no abi wan persoonlek matifasi nanga Gado? (b) San den hoeroedoe sma ben mankeri di Paulus e skrifi foe den ini Romeini kapitel wan?
20 „Noiti mi ben wroko na wan persoonlek matifasi nanga Jehovah”, na 22 jari jongoe oema ben taki, di foe sensi en jongoe jari ben kweki ini wan kristelek osofamiri. „Gado no ben de wan troetroe persoon gi mi. Mi e denki dati foe datede mi no ben abi bisi di mi ben doe hoeroedoe.” Na situwasi foe en ben akroederi nanga na situwasi foe den hoeroedoe sma di Paulus ben taki foe den. Den disi ben „sabi Gado”; den „ben sabi heri boen Gado regtvaardiki bosroiti” ma den ben mankeri „soifri sabi” (Rom. 1:21, 28, 32). „Na moro dipi èn krosbé sabi”, wan persoonlek sabi, di ben moe kweki, ben mankeri. Joe leki jongoe sma abi na persoonlek „joisti sabi” disi? Joe sa moe stoeka joesrefi èn alaten a Wortoe foe Gado foe kan waarderi den égifasi foe Gado krinkrin. Tjari kon ini prakseri fa so wan „soifri sabi” ben tranga den fosten kristen. Ma moro de fanowdoe leki sabi foe wan boekoe.
21, 22. Nanga sortoe sani wan tranga matifasi nanga Gado e kon?
21 Begi foe na dipi foe na ati e meki wan krosbé matifasi nanga Gado kon. Wan jongoe kristelek oemapikin di ben fadon go ini hoeroedoe, ma di ben kisi ensrefi baka dati, ben taki:
„Na persoonlek matifasi disi kan tan de wawan nanga jepi foe begi, no routine-begi, ma begi di e komoto wantronwantron foe na ati. Te mi e ferteri Jehovah gewoon san mi e firi na inisé èn mi abi alaten na takimakandra disi, dan mi e froestan dati a de wan troetroe Persoon èn dati a abi belangstelling gi mi libi. Na matifasi foe mi nanga en de na moro prenspari sani ini grontapoe.”
22 Den begi foe joe de so krakti a srefi fasi? Te boiti dati joe tron wan ’kompe-wrokoman foe Gado’ foedi joe e teki prati na a prékiwroko, dan joe afersi nanga marki sa de a srefi leki di foe Gado. Nanga disi, a no de foe taki, wan krosbé banti nanga Jehovah e bow. Hori na prakseri dati joe wawan kan bow na persoonlek matifasi disi nanga Gado. — 1 Kor. 3:9.
23. (a) Na feti nanga hoeroedoe sa go doro foe tego? (b) Foe san-ede joe ben sa wani foe doe ala moeiti foe prisiri Jehovah?
23 Foe troe, na druk de tapoe jongoe sma foe disi ten. Foe tan getrow de wan feti foe ala dé. Ma, te wi psa wan tron „na bromki foe den jongoe jari” dan na feti kan kon de moro makriki. Ma ete, na feti no sa tan go doro foe tego. Heri esi na moro prenspari soetoefajaman na baka na skwala foe hoeroedoe, sa kisi pori. Ini Gado njoen seti di de so krosbé, wan regtvaardiki kontren sa de, di sa meki wi libifasi kon moro makriki. Go prakseri den blesi foe na njoen seti dati. Joe sa agri foe troe nanga den firi foe wan jongoe oema, di ben taki: „Mi e denki foe ala den sani di Jehovah ben doe gi mi èn ben pramisi. A no gi mi abra. A ben blesi mi na someni fasi. Mi sabi dati a wani a moro boen sani, èn mi wani foe prisiri en. Tego libi de warti foe ibri moeiti foe na boen foe Jehovah.” — Rom. 16:20; 2 Petr. 3:13.
[Faki na tapoe bladzijde 33]
◼ San na a wani foe Gado gi kristen tapoe a tori foe hoeroedoe?
◼ Foe san-ede seks „dotilibi” de wan ogri sani gi paar di no trow?
◼ Fa kristen jongoe wan moe si na jepi di abi en roetoe tapoe a bijbel èn di den kristelek papa nanga mama foe den e koemanderi den?
◼ San wan kristelek paar moe doe a fesi te den e sreka densrefi tapoe a trowlibi?
◼ Fa wan krakti persoonlek matifasi nanga Jehovah Gado kan gro?
[Prenki na tapoe bladzijde 29]
Hoeroedoe e gi pen foe na takroe konsensi nanga na lasi foe respeki ede
HOEROEDOE
LASI RESPEKI
[Prenki na tapoe bladzijde 31]
Wan persoonlek matifasi nanga Gado, di kon nanga jepi foe begi, de leki wan kibri