Hori na „boen njoensoe” tranga!
„Oen e hori en tranga, efoe oen no ben tron foe soso bribiman.” — 1 Kor. 15:2.
1. Foe san-ede meki Paulus ben taki go taki kon so faja foe na boen foe na opobaka?
NA APOSTEL Paulus e tjari en fosi brifi gi den Korintesma kon a wan hémarki nanga wan toemsi moi takimakandra foe na opobaka. Foe san-ede a ben taki go taki kon so faja foe na boen foe na opobaka? A foe wan marki ede foe a momenti dati. Wan gridi, immoreel grontapoe ben de lontoe den kristen dati foe Korinte, èn son sma srefi ben kon ini trapoe foe Satan. Paulus no ben wani dati en lobi brada èn sisa ben tron „bribiman foe soso”, bikasi dati ben sa wani taki pori gi den. A ben wani moro foeroe dati den ben de stanfaste ini a „boen njoensoe” di a ben meki bekenti gi den.
2. (a) Foe san-ede wi moe wroko tranga foe na boen foe a „boen njoensoe”? (b) Fa na opobaka tai makandra ini na „boen njoensoe”?
2 Ooktoe ini disi ten wi e libi ini wan grontapoe di no sabi Gado. Foe datede meki wi, di ben „poti wi howpoe tapoe a libi Gado”, e wroko tranga èn wi e span wisrefi foe na boen foe a „boen njoensoe” (1 Tim. 4:10). A „boen njoensoe” disi e go now foe na „kownoekondre di ben opo foe wi Masra (Jehovah) èn foe en Kristus”. Kristus Jezus nanga en 144.000 kompe-kownoe e kisi na kownoekondre dati, na hemel bergi Sion, nanga jepi foe na opobaka. A moro bigi pisi foe den libisma sa kisi ooktoe na grontapoe kontren foe na kownoekondre nanga jepi foe na opobaka (Openb. 11:15; 14:1; 20:12). Na opobaka de soboen wan foe den aparti marki foe na „boen njoensoe”.
A HOWPOE FOE NA OPOBAKA
3. Fa na leri foe na opobaka de kontrari di foe a sili di no e dede?
3 San de dan na howpoe foe na opobaka disi? Na howpoe disi no abi en roetoe ini a dede di a sili no e dede soleki sma e denki, wan leri di na grontapoe makti foe falsi bribi e leri, inisé èn dorosé foe a kristenheid. Nono, a de wan howpoe gi sili di e dede! A wortoe „opobaka” (Griki: anastasis) de so wan 40 tron ini den kristen Griki Boekoe. A wani taki opobaka foe libi. Foe opo baka kon na libi, dan wan sma moe dede fosi, bikasi libi de a tra sé foe na dede. — Deut. 30:19, 20; Jes. 38:17-19.
4. San e sori dati den fosten djoe ben bribi ini wan opobaka na grontapoe èn no ini wan no dede foe na libisma sili?
4 Ini den Hebrew Boekoe wi no e feni na leri foe na libisma sili di no kan dede. Na prakseri ben de wan vreemde sani dorodoro gi den djoe. Ma foeroe marki de dati den ben bribi ini wan opobaka dja na grontapoe. A de krin dati dati de na reden foe san-ede den ben prakseri dati Jezus ben de kande na ’Johannes na Dopoeman, Elia, Jeremia ofoe wan foe den tra proféti’ di ben opo baka. — Matt. 16:14.
5. Akroederi na prakseri foe Gado, dan Abraham nanga tra fosten dientknekti ben loekoe na a kon foe san?
5 Baka di a ben skrifi foe na getrow waka nanga libi foe na osofamiri foe Henoch, Noach èn Abraham, dan Paulus e taigi wi: „Ini bribi ala den sma disi ben dede, aladi den no ben kisi na kontroe foe na pramisi, ma den ben si en èn bari odi gi en foe farawe èn na publuki den ben meki bekenti dati den ben de vreemde sma nanga wakaman ini na kondre.” Den ben loekoe na a kon foe wan opobaka, di ben sa feni presi ondro na tiri foe „na foto di abi troetroe fundamenti” — Gado kownoekondre ini anoe foe en Messias. Di na getrow Abraham ben kisi tesi tapoe a tori foe na offer foe Isaak, a „ben bribi dati Gado ben kan opo en baka srefi foe dede”. Abraham ooktoe ben poti bribi ini a pramisi, di Gado ben gi en, dati „nanga jepi foe joe siri ala naatsi foe grontapoe sa blesi séker densrefi”. Foe kisi den blesi disi nanga jepi foe na „siri” dati, dan na moro bigi pisi foe den sma foe den naatsi dati logischerwijs sa moe opo baka foe dede. — Gen. 22:18; Hebr. 11:4-19.
6. San den wortoe foe Job nanga den manpikin foe Korach e sori foe na opobaka?
6 Bakaten na getrow man Job ben aksi: „Wan tranga man kan libi baka efoe a dede?” Job ben bribi dati disi kan. Èn a ben sori a bribi dati foedi a ben aksi Gado foe kibri en ini Sjeool (a gemeenschappelek grebi foe libisma) èn foe prakseri en baka wan faste ten (Job 14:13-15). Ini Psalm 45:16 den manpikin foe Korach ben taki a fesi dati na Messias ben sa abi „Manpikin” di a ben sa poti ini en doesoen jari tiri leki „granman tapoe na heri grontapoe”. Na mindri den „manpikin” disi joe ben sa abi respeki „fostentata” foe en, di a sa tron wan tata gi den foedi a sa wiki den foe dede. — Matt. 1:16; Luk. 3:23-38.
7. (a) Fa den boekoe foe den proféti e taki toe foe na howpoe foe wan opobaka na grontapoe? (b) Foe san-ede na opobaka foe Daniël nanga tra sma sa de „wan moro betre opobaka”?
7 Den proféti ben taki ooktoe foe wan opobaka. Den ben froestan dati a ben sa de wan opobaka na grontapoe (Jer. 25:8; 26:19; Hos. 13:14). Leti bifo en dede, na owroe Daniël ben kisi na pramisi: „Joe sa rostoe, ma joe sa opobaka na a presi foe joe na a kaba foe den dé” (Dan. 12:13). Daniël, di „nanga bribi ben tapoe den mofo foe lew”, ben loekoe na a kon foe „wan moro betre opobaka”. Disi ben sa de wan opobaka foe libi na ondro Gado kownoekondre di opo, kontrari san Elia, Elisa, Jezus nanga den apostel ben doe foe opo sma di bakaten ben dede baka. — Hebr. 11:33, 35.
8. Sortoe prakseri den boskopoeman foe Johannes èn Martha ben abi foe na opobaka?
8 Baka di Jezus ben bigin nanga en diniwroko, dan Johannes na Dopoeman, di ben de ini strafoe-oso, ben seni boskopoeman go na Jezus foe aksi en efoe a de troetroe na Messias. Baka di a ben meki sma kon betre a wan wondroe fasi, Jezus ben taigi den: „Go, ferteri Johannes san oenoe ben si èn ben jere: den brenisma e kon si baka, den lanman e waka, den gwasiman e kon krin èn den dofoewan e jere, den dedewan e opobaka èn a boen njoensoe e ferteri gi den pôtiwan” (Luk. 7:19-23). Na so fasi Jezus no ben bewijsi wawan dati a ben de na Messias, ma a ben bow bribi toe ini san a ben sa doe nanga jepi foe en kownoekondre, te ensrefi ben sa opo den dedewan. Na froestan di den sma ben abi foe en, ben de dati a ben sa de wan opobaka na grontapoe. Martha ben prakseri a srefi foe disi. Disi e kon na krin foe san a ben taki bakaten na Jezus foe na dede Lazarus: „Mi sabi dati a sa opobaka ini na opobaka tapoe na laatste dé.” — Joh. 11:24.
NA HEMEL OPOBAKA
9. Fa a ben doe kon dati Lazarus ben kan kisi na howpoe tapoe wan hemel opobaka?
9 Efoe Jezus no ben wiki Lazarus ini na ten dati, dan Lazarus ben sa abi troetroe wan grontapoe howpoe. Ma Jezus ben doe na wondroe dati wel, foedi foe wan pisi ten a tjari Lazarus komoto foe dede. Sondro degedege, a de so dati Lazarus ben tan na libi te baka na pinksterdé ini na jari 33 G.T., san ben wani taki dati a ben kisi wan extra boen foe en Masra. Tapoe na pinksterdé dati namkoe, a ben sa kon njoen gebore nanga jepi foe Gado jeje foe na howpoe foe libi ini hemel, nanga wan hemel opobaka na en fesi. Fa na okasi foe disi ben doe kon opo?
10. Sortoe fowtoe prakseri ben gro kon ini na ten foe Paulus, ma fa a ben bewijsi dati a no de troe?
10 Ini en fosi brifi gi den Korinte kristen, na apostel Paulus e taki foe na opobaka. Son wan foe den ini na gemeente drape, ben taki dati „wan opobaka no de”. A de krin dati den abi na prakseri dati kristen di ben de na libi ben ondrofeni wan ofoe tra jeje „opobaka” èn kande sonwan foe den ben moksi na prakseri disi nanga a filosofie foe Plato foe na sili di no e dede. Wansi fa den fini pisi foe den fowtoe prakseri ben de toe, tokoe Paulus ben feni en wan sani di fiti foe kenki den prakseri foe di a gi wan toemsi boen bewijsi foe na boen foe na opobaka, pe a ben poti krakti tapoe na „boen njoensoe di ben meki den kisi ferloesoe toe”. — 1 Kor. 15:1, 2, 12.
11. Fa na „boen njoensoe” tai ini na howpoe foe wan opobaka?
11 San na „boen njoensoe” disi wani taki? Ini na „boen njoensoe” disi, Kristus de na sma di ala sani e drai lontoe en. Wan foe „den fosi sani” di de prenspari leki fa Paulus ben taki de dati Kristus ben dede, ben beri, èn ben opo baka èn dati a ben sori ensrefi fosi na Cefas (Petrus). Moro fara a ben sori ensrefi na difrenti okasi na 500 èn moro sma ete èn te foe kaba na Paulus srefi. Kristus troetroe ben opo baka ini na jeje! (1 Petr. 3:18). Soleki Paulus e poti toe tron krakti a tapoe, dan den span sani disi ben psa „akroederi den Boekoe” èn den e sori dati alasani di ben taki a fesi foe na Messias de troe. Wi bribi ben sa de wan soso sani efoe a no ben ankra ini na troe tori dati Jezus Kristus ben opo foe dede. — 1 Kor. 15:3-8, 17.
„IBRIWAN SMA INI EN ÉGI RANGORDE”
12. Na sortoe fasi Kristus e tron wan „fosiwan”?
12 Moro fara ini na tori, na apostel e tai na opobaka nanga Jehovah kownoekondre-prakseri, „Now Kristus ben opobaka foe dede, na fosiwan foe den di ben sribi ini dede.” Efoe Kristus de wan „fosiwan”, dan trawan moe de toe di e opobaka foe dede, „ma ibriwan sma ini en égi rangorde”. Trawan moe wakti te na Kristus de-noja ini kownoekondre-makti, te na ferloesoeman, Jezus Kristus, e meki wan bigin foe meki den sma „kon na libi” di foe Adam sondoe ede di den ben kisi e „dede” ofoe ben dede. — 1 Kor. 15:20-23.
13. Fa wi kan taki dati ini na opobaka wi kan taki foe „rangorde”?
13 Baka Kristus, „ini den ègi rangorde”, den 144.000 salfoe Kownoekondre-erfgenaam, di te na a dede foe den ben waka ini Jezus foetoemarki, sa kisi wan opobaka. Na opobaka disi e bigin „ini na ten foe en de-noja (Griki: parousia)”, di ben bigin ini na djoegoedjoegoe jari 1914. Te now ete wan toe foe Kristus jeje „brada” di de na libi e doe dienst na grontapoe, èn ooktoe den disi sa opobaka „ini wan pingi foe na ai” na a ten foe dan dede leki libisma ini a „rangorde” disi. Na so fasi na heri „(jeje) Israël foe Gado” sa tjari konmakandra ini na hemel kownoekondre. — 1 Kor. 15:22, 23, 50-52; Hebr. 2:10-13; Openb. 7:4-8; Gal. 6:16.
14. Fa Paulus e agersi na hemel opobaka?
14 Na apostel e agersi na dede èn opobaka foe den kristen di kon njoen gebore nanga jeje tapoe wan toemsi moi fasi. A de doe disi foe di a de agersi na dede èn opobaka foe den nanga soso wan alési-siri ofoe wan siri foe wan foe den tra njanjan di abi siri, pe wan njoen bon e gro kon foe en (soleki joe kan si na prenki na ondrosé foe wan siri foe tarwe). Ja, na skin di „e sai ini porifasi . . . e opobaka foe no pori moro”, leki wan glori jeje skin di „e tjari na prenki foe na laatste Adam” — na Masra Jezus Kristus. — 1 Kor. 15:35-49.
15. Pe na „more betre opobaka” e feni presi, èn soema sa kisi so wan opobaka?
15 Ma den 144.001, makandra nanga Kristus, de den wan enkriwan di e kisi wan opobaka ini a joisti rangorde? Kwetkweti! Ini Hebreër 11:40 den e taigi wi namkoe, dati den e kisi wan opobaka „foe wan moro betre sani”, foe wan hemel jeje staat. Te joe loekoe san, dan disi de moro betre? We, more betre leki na staat di wan sma e kisi ini na opobaka di e feni presi bakaten! Na opobaka disi sa abi na ini en den sma di den e poti leki „granman tapoe na heri grontapoe” èn di redelijkerwijs sa de den fosiwan di sa kisi wan opobaka na grontapoe baka te Jehovah sa wini ini na stré ini Har-mágeddon. Na so fasi den sa man doe den wroko di den sa kisi tapoe na „njoen grontapoe” — na theocratisch maatschappij foe Gado pipel tapoe wan krin grontapoe. Den e kisi „wan moro betre opobaka” foe di disi e feni presi na ondro Gado Kownoekondre, nanga na froewakti foe tego libi gi den sma di e kisi opobaka foe dede. Ini na groepoe disi di dan sa opobaka wi e froewakti foe miti getrow kristen di gi densrefi abra èn di abi now wan grontapoe howpoe èn di foe difrenti sani ede e dede bifo na bigin foe na „njoen grontapoe”. — Jes. 32:1; Openb. 16:14; 21:1, 3, 4.
WAN GROEPOE DI ABI BOEN-EDE
16. Sortoe groepoe abi spesroetoe boen-ede èn ini sortoe grani den e teki prati?
16 Ma wan groepoe de di spesroetoe abi boen-ede. Sortoe groepoe disi ben sa kan de? A de na „bigi ipi” di na apostel Johannes e skrifi finifini foe den ini Openbaring 7:9-17. Den abi na howpoe foe libi foe tego tapoe na „njoen grontapoe”. Leki groepoe den e psa libilibi a „bigi benawtoe” sondro foe abi foe dede oiti. Fa den abi wan bigi grani foe di den „ben wasi den langa krosi foe den ini na broedoe foe na Lam”! Ini disi toemsi prenspari laatste pisi foe den „laatste dé”, now di wan krakti kotoigi moe gi na den naatsi nanga pipel foe na grontapoe, wan sma kan si na „bigi ipi” disi e doe so wan „santa dienst” ini den grontapoe gadri foe Jehovah seti foe anbegi. A „bigi ipi” e teri tapoe a momenti disi moro leki 2.300.000 sma. A „bigi ipi” disi no e ondrofeni „hati faja” foe na kroetoe foe Gado. Èn fa disi doe kon? Foe di „na Lam (Jezus Kristus), di de ini na mindri foe na (hemel) troon, sa tjari den go na wé èn na fonten foe watra foe libi. Èn Gado sa figi poeroe ala watra na den ai”.
17. (a) Sortoe prisiri na „bigi ipi” sa kisi? (b) Fa na wondroe foe na opobaka sa go doro te na a laatste pisi foe en?
17 Den memre foe na „bigi ipi” sondro degedege sa prisiri te den kon tapoe na krin grontapoe èn bari wan switikon gi den getrow-wan di opo baka foe dede. Baka dati, tapoe Gado fasti ten èn tapoe wan orde fasi, ooktoe den miljard miljard sma di de ini den „memre-grebi”, sa kon na doro ini wan algemene opobaka na grontapoe (Joh. 5:28, 29; Openb. 20:12). Fa prisiri sa de na mindri den kolokoe famiri foe den libisma te na maatschappij foe na „njoen grontapoe” e bigin wroko èn Kristus nanga en mede-tiriman e gebroiki den winimarki foe Kristus ferloesoe-ofrandi foe dresi na libisma-famiri èn tjari den kon de volmaakti ini jeje èn skin! — Jes. 65:17, 18; 2 Petr. 3:13.
18. Fa na toemsi bigi prakseri foe Gado nanga wi grontapoe sa kon troe?
18 Doesoen jari sa lon psa leki wán dé, te joe sa loekoe en foe a sé foe Jehovah (2 Petr. 3:8). Na grontapoe sa foeroe nanga wan volmaakti libisma-famiri, precies soleki Jehovah ben abi ini prakseri, di a ben meki na libisma so wan 7000 jari a fesi. En 7000 jari „rostoe”-dé sa kon na wan kaba èn disi no sa de foe soso, foedi a toemsi bigi prakseri foe en nanga wi grontapoe sa kon troe. San now?
19. San e psa baka te na „laatste feanti” tjari kon na wan kaba?
19 Na apostel Paulus e taigi wi: „Dan na kaba, te (Kristus) e gi na kownoekondre abra na en Gado èn Tata, te a tjari kon na wan kaba ala (feanti) tiri èn ala (feanti) makti èn krakti. Bikasi a moe tiri leki kownoe te leki Gado ben poti ala feanti na ondro en foetoe. Leki laatste feanti na dede e tjari kon na wan kaba. . . . (dan) na Manpikin srefi sa saka ensrefi na ondro na Sma di ben poti ala sani na ondro en, sodati Gado de ala sani gi ibriwan sma” (1 Kor. 15:24-28). Dan den sa loesoe Satan, soleki Openbaring 20:7-10 e skrifi foe tesi na getrowfasi foe ibi aparti memre foe na libisma-famiri di tjari kon de volmaakti. Dan en nanga ala sma di e waka baka en sa trowe go ini na agersi „se foe faja”, di de wan agersifasi foe tego pori.
20. Sortoe glori froewakti a den fesi na libisma-famiri abi te a „rostoe dé” foe Gado kon a wan kaba?
20 Te a dé, dati „a rostoe foe Gado foe ala en wroko” foe den grontapoe mekisani, ben kon na wan kaba, dan sondro degedege Gado sa go abra foe doe njoen wroko di sa tan go doro te foe alaten. Den prisiri sma di e libi na grontapoe, èn di ben prisiri alaten ini jongoe krakti, no sa ferferi noiti, te den sa doe sortoe wroko toe, di na Gado nanga wan prakseri sa gi den foe doe. — Gen. 2:3; Jes. 66:22.
TROETROE PRENSPARI
21. Fa wi kan njan boen foe na takimakandra foe Paulus ini 1 Korinte 15?
21 Wi moe hori fasti na a „boen njoensoe”, makandra nanga na opobaka, foedi na opobaka de troetroe prenspari gi ala Gado dienstknekti. Getrow man nanga oema foe owroeten ben poti bribi ini wan opobaka na grontapoe, èn den ben loekoe foe kisi en (Hebr. 11:13-16). Kristus ben kisi opobaka leki na „fosiwan”, soleki hondro-hondro aikotoigi ben taki. Den kristen di ben kisi salfoe nanga na jeje ben préki ini den ten foe den apostel èn ini disi ten „ini na heri mekisani di de ondro hemel” sodati na „boen njoensoe” foe na opobaka ben go lontoe tapoe na heri grontapoe (Kol. 1:23). Èn now di den salfoewan di tan abra e tjari na grontapoe libi èn waka foe den kon na wan kaba foe kisi na hemel paiman foe den, dan wan „bigi ipi”, agen nanga na howpoe foe tego libi na grontapoe, ben teki na den tapoe foe meki bekenti na „boen njoensoe” foe na Kownoekondre. — Matt. 24:14.
22. Sortoe laatste vermane Paulus e gi ini en brifi èn foe san-ede wi abi ala réde foe teki disi na ati?
22 Fa ala den groepoe disi abi wan bigi grani, te den, alamala ini den égi rangorde, doro a marki foe den! Now wi abi foe troe ala réde foe poti prakseri tapoe a vermane di Paulus e gi moro fara: „Tan na ai, tanapoe fasti ini na bribi, tjari oensrefi leki man, kon de makti. Meki ala oen afersi feni presi nanga lobi” (1 Kor. 16:13, 14). Na so fasi a sa de dati foe di wi ben tron bribiman, no ben de foe soso. A sa abi winimarki.
Joe kan piki den aksi disi?
◼ San e sori dati bribi man èn oema foe owroeten ben loekoe a fesi foe kisi wan opobaka na grontapoe?
◼ Omeni tra sma baka Kristus, a „fosiwan”, abi prati na a opobaka ini hemel „ibriwan ini en égi rangorde”?
◼ Oten èn ini sortoe groepoe na opobaka e feni presi na grontapoe?
◼ Fa wán groepoe abi boen-ede foe kisi libi na grontapoe sondro opobaka?
◼ San wi alamala moe doe foe no tron foe „soso bribiman”?
[Prenspari pisi na tapoe bladzijde 109]
WAN GRONTAPOE-MAKTI FOE FALSI BRIBI E POTI EN HOWPOE TAPOE A LERI FOE PLATO, DATI ALA SILI DE SILI DI NO E DEDE NOITI
[Prenspari pisi na tapoe bladzijde 111]
NA TROE KRISTENDOM E HORI NA A HOWPOE DI ABI EN ROETOE INI A BIJBEL FOE NA OPOBAKA KOMOTO FOE GREBI FOE SILI DI NO ABI PRAKSERI MORO
[Prenki na tapoe bladzijde 109]
Na „boen njoensoe” e poti prakseri tapoe Gado Kownoekondre ini anoe foe Kristus, na howpoe dati a paradijs sa kon baka tapoe wi grontapoe