Gi joesrefi abra — Na soema? Foe san-ede?
„Ma oenoe de ’wan famiri di (Gado) teki, wan kownoe priesterfamiri, wan santa naatsi (wan naatsi di wije; wan naatsi di gi ensrefi abra), wan pipel foe wan spesroetoe goedoe’.” — 1 Petrus 2:9, Nieuwe-Wereldvertaling; The Jerusalem Bible; The English Bible.
1, 2. (a) Abraham Lincoln ben de wan memre foe den kerki foe na kristenheid, èn fa a ben sori ete, ini en lezing di a ben hori ini Gettysburg na a naatsi di a ben de president? (b) Sortoe libifasi e trowe wan takroe leti tapoe na froetrow di a naatsi disi taki a abi ini Gado, èn fa na tiri di e kon baka na grontapoe moeilijkheid sa de gi na pipel?
FOE ala den kerki foe na kristenheid, no wan foe den kan taki dati na di foe 16 president foe Verenigde Staten foe Amerkan kondre ben de wan memre foe den. Ma di na man disi di ben lobi lési na bijbel, Abraham Lincoln, ben hori wan lezing tapoe 19 november 1863 na Gettysburg, a ben taki den krakti wortoe di e kon now:
„87 jari pasa kaba, wi fosten papa nanga mama ben meki wan njoen naatsi doe kon tapoe na continent disi ini Fri èn di ben gi ensrefi abra na a leri dati ala sma ben meki leki speri foe makandra . . . Ma te joe loekoe en boen, dan wi no de den sma di kan gi na doti disi abra, di kan wije en, di kan santa en. Den dekati man, den di de na libi ete èn den di dede kaba, èn di ben stré dja, ben wije na doti disi, èn disi pasa krinkrin na póti makti foe wi foe poti wan sani a tapoe ofoe foe poeroe wan sani . . . Tapoe wi den libiwan, de moro foeroe na wroko foe gi wisrefi abra dja na a wroko di no kaba, di den sma di ben stré dja, te so fara ben meki go na fesi. Tapoe oenoe de moro foeroe na wroko foe gi wisrefi abra na a bigi wroko di de ete gi wi . . .”
2 Sensi na lezing dati, di de foe memre, tapoe na nationaal berpe foe Gettysburg, Pennsylvania, dan den Verenigde Staten foe Amerkan kondre ben lé gi den wortoe tapoe na dollarmoni: „Tapoe Gado wi e poti wi froetrow.” Aladi a president nanga tra opregti Amerkansma ben gi densrefi krinkrin abra na wan „tiri foe a pipel èn nanga na pipel”, tog na fasi foe tiri disi sa komoto foe grontapoe. Kolokoe dati disi no sa wani taki wan rampoe di o tan gi a pipel, foedi baka dati na kownoe tiri foe Gado di abi ala makti, sa kon ini anoe foe en Kownoe di a poti, Jezus Kristus, leki wan blesi gi ala sma foe na grontapoe disi, nanga ooktoe na Amerkan continent.
3, 4. (a) Sortoe „naatsi” sa kon foe datede na fesi? (b) Foe sortoe wortoe di Jehovah ben taki gi Israël, Petrus ben teki gebroiki gi na njoen „naatsi” disi?
3 Dan wan njoen naatsi sa kon na fesi. Sortoe naatsi na dati? Na naatsi di den wortoe foe santa jeje di e kon now ben taki gi: „Ma oenoe de ’wan famiri di Gado ben teki, wan kownoe priesterfamiri, wan santa naatsi, wan pipel foe wan spesroetoe goedoe’.” — 1 Petrus 2:9.
4 Nanga den wortoe dati na apostel Petrus ben teki wortoe di Gado ben gebroiki gi en pipel Israël di a ben teki, èn di ben de na a ten dati na a bergi Sinaï ini Arabia, soleki skrifi ini Exodus 19:5, 6. Wi e lési drape: „Now dan, efoe joe sa gi jesi na mi sten soifri èn sa hori troetroe mi froebontoe, dan foe ala naatsi joe sa tron mi spesroetoe goedoe, bikasi na heri grontapoe na foe mi. Èn joe sa tron wan kownoekondre foe priester èn wan santa naatsi gi mi.”
5. „Wije” nanga „Gi ensrefi abra”, ini na leti fa na bijbel e gebroiki den wortoe disi, wani taki a srefi?
5 Ini Exodus 19:6 nanga 1 Petrus 2:9, di kari dja na tapoesé, son vertaling e meki den eenvoudige wortoe foe „wan santa naatsi” kon moi, foedi den e vertaal den leki „wan naatsi di wije” ofoe „wan naatsi di gi ensrefi abra”. (Loekoe The Jerusalem Bible; Moffatt; The New English Bible.) Foedi den ben sa teki Jehovah markitiki èn libi akroederi den, dan den Israëlsma ben sa poti aparti leki wan naatsi di wije ofoe di gi densrefi abra. Gado kan „wije” ofoe „gi wan sani ofoe wan sma ofoe wan groepoe sma abra”. Te joe loekoe en foe a sé foe Gado, dan den 2 wortoe kan wani taki a srefi. Ma a de so dati aladi onvolmaakti sma no kan „wije” wan sani, foedi den e meki a tron wan krin sani gi wan santa prakseri, tokoe den ben man tapoe wan joisti èn lobi fasi foe „gi” wan sani èn ooktoe densrefi „abra”.
6. (a) San na naatsi Israël ben doe leki aparti sma èn leki wan groepoe di den ben taki: „Ala san Jehovah ben taki, wi de klari foe doe”? (b) Sortoe kroederi Gado ben meki nanga den, sondro foe dwengi den?
6 Gado ben sori den Israëlsma di ben kon fri, dati den ben sa tron wan santa naatsi gi en, tapoe na kondisi dati den „ben sa gi jesi soifri na en sten èn ben sa hori en froebontoe”. Den ben piki: „Ala san Jehovah ben taki, wi de klari foe doe.” Na so fasi den ben gi densrefi abra leki aparti sma èn leki wan groepoe na a Ferloesoeman foe den, Jehovah Gado. Aladi Jehovah ben teki den kaba, foedi den ben de bakapikin foe Abraham na skinfasi èn aladi a ben fri den komoto foe Egypte tapoe wan wondroe fasi èn ben tjari den pasa na Redi Se, tokoe a ben wakti dati den Israëlsma ben gi densrefi abra na en nanga en anbegi nanga den fri wani. Tapoe na gron foe disi den ben tron na froebontoe pipel foe Jehovah. Wi e lési foe disi:
„Di Mozes ben taki ibri komando foe a Wèt gi na pipel, a ben teki na broedoe foe den jongoe mankaw èn foe den bokoboko nanga watra èn redi wol èn hysop èn a ben foktoe na boekoe srefi èn na heri pipel, a taki: ’Disi de na broedoe foe na froebontoe di Gado ben poti gi joe leki wan verprekti.’” — Hebreër 9:19, 20; Exodus 24:1-8.
7. (a) San ben sa de na situwasi foe djoe ini bakaten famiri-lo? (b) Fa den ben sa kan lasi a status foe den leki sma di ben gi densrefi abra?
7 Foedi bakaten famiri-lo foe djoe ben gebore ini na naatsi disi di ben gi ensrefi abra, dan den ooktoe ben sa de sma di gi densrefi abra èn di ben de ini wan matifasi nanga Gado. Ma efoe den wani leki aparti sma tan abi wan boen presi ini na santa naatsi disi, dan, te den ben e doro na libimarki foe frantwortoe, ben moe waka baka den djoe na a bergi Sinaï èn den ben moe sori krin nanga den bewégi foe den ati èn nanga den libifasi dati den ben gi densrefi troetroe abra na Jehovah. Ja, a tanboen foe den leki naatsi èn srefi a libi foe den ben de ini na tori. Disi de so, foedi Gado kan poeroe na status foe santafasi di a de gi na wan pipel, efoe na pipel disi bewijsi dati den e tjari densrefi tapoe wan fasi di no warti, èn a kan tjari na status disi go abra tapoe den sma di e bewijsi dati den de warti foe dati. Foe datede meki na apostel Petrus ben teki den fosi wortoe foe Gado gi na Israël a skinfasi, dati den ben sa de „wan kownoekondre foe priester èn wan santa naatsi”, èn gebroiki den gi a njoen kristen naatsi di ben doe kon nanga Pinksteren ini na jari 33 G.T. Fa a ben doe kon now dati na èrkènning disi foe wan santa status ben tjari go abra tapoe wan tra naatsi?
8. (a) Sortoe rampoe ben de foe kon tapoe Israël di Petrus ben skrifi en fosi brifi, èn sortoe matifasi mindri Jehovah nanga den djoe ben stop? (b) Soema de foe datede na „naatsi di ben wije”?
8 Di na apostel ben skrifi den wortoe foe 1 Petrus 2:9, dan wan nationaal rampoe ben de foe kon tapoe na djoe pipel. Na foto foe den, Jeruzalem, pe na tempel ben de, ibri momenti den Romein legre ben kan pori en, èn baka dati den ben sa panja go na ala naatsi, soleki Jezus ben taki na fesi (Lukas 21:20-24). Ma leki wan sari sani, den ben trowe ini 33 G.T. Jezus Kristus, na Mindriman foe Gado njoen froebontoe. A so ooktoe na owroe Wètfroebontoe, di na proféti Mozes ben doe wroko gi en leki mindriman, no ben abi krakti moro langa. „San di ben de Israël a skinfasi”, ben trowe now (1 Korinte 16:18; Mattéus 23:38). Jehovah Gado ben meki na njoen naatsi foe na Israël na jeje fasi doe kon (Romeini 9:6; Galacia 5:15, 16). A njoen „naatsi disi di ben wije” abi na ini en, discipel foe Jezus Kristus di Petrus ben skrifi en brifi gi, namkoe den sma „di ben ferkisi akroederi na sabi foe Gado di a sabi sani a fesi, na Tata, nanga na kon santa nanga jepi foe a jeje”. — 1 Petrus 1:1.
9. Gado ben sabi den aparti sma foe a santa naatsi dati a fesi, èn fa den ben de wan „famiri-lo di den ben teki”?
9 Disi no wani taki dati Gado ben sabi den aparti memre a fesi èn dati a ben poti den persoonlek a wroko. A presi foe dati a ben sabi a fesi san ben sa aksi foe ibri aparti memre, ofoe na sma dati ben wani den ben ferkisi en èn den ben teki en ini na santa naatsi. Ooktoe na jeje naatsi disi ben sa meki spesroetoe kon santa nanga jepi foe santa jeje, foedi den memre foe na naatsi ben sa kon njoen gebore nanga jepi foe na santa jeje foe tron jeje manpikin foe Gado (Titus 3:4-7). Ini na santa positsi disi den ben kan doe dienst leki wan „kownoe priesterfamiri”. Leki sma di ben doe kon nanga jepi foe na jeje, den ben de wan „famiri-lo”, wan „famiri-lo di den ben teki”.
10. Sortoe aksi e kon tapoe a tori foe na persoonlek frantwortoe foe den salfoewan, foedi Gado e handri nanga den leki wan „naatsi” ofoe groepoe?
10 Ma na sortoe fasi den sma di de wan pisi foe na njoen naatsi moe gi densrefi abra a Jehovah leki aparti sma? Ibriwan foe den, wansi Gado ben „wije den” ofoe „ben gi den abra” leki wan groepoe ofoe naatsi, moe gi ensrefi abra na Gado sondro kondisi foe den kan teki en leki wan pisi foe na njoen naatsi disi? A bijbel no e taki eenvoudig: ’Bribi ini na Masra Jezus Kristus èn joe sa kisi ferloesoe’? ofoe: ’Abi beraw èn drai joesrefi’? A no de nofo gi wan sma di wani tron wan discipel foe Jezus, wan kristen, dati a bribi soso nomo, abi beraw èn drai ensrefi? Jezus, di a ben de na grontapoe, ben gi ensrefi abra na Jehovah? Meki wi go loekoe pikinso.
„Mi ben kon foe doe joe wani”
11. Ondro sortoe froebontoe-seti nanga Gado Jezus ben gebore èn fa a ben kon ondro na froebontoe-seti dati?
11 Ini Galacia 4:4 wi e lési foe na gebortoe foe Jezus leki libisma: „Di na reti ten ben kon, Gado ben seni en Manpikin kon, di ben gebore foe wan oema èn di ben kon tanapoe ondro na wèt (foe Mozes).” Baka en wondroe gebortoe foe wan djoe wenke, dan na besnijdenis foe en tapoe na di foe 8 dé e poti krakti a tapoe dati tapoe na gron foe en gebortoe a ben de wan pisi foe Gado froebontoepipel èn foe na tori disi meki „(Jozef nanga Maria) ben tjari en go na Jeruzalem foe pristeri en na Jehovah”. — Lukas 2:22-24.
12. Leki wan marki foe san, Johannes ben dopoe djoe di ben kon na en, èn foe san-ede a ben kakafoetoe fosi foe dopoe Jezus?
12 Na sma di ben waka na Jezus Kristus fesi, Johannes na Dopoeman, ben seni go na a naatsi di ben gi ensrefi abra foe tjari na naatsi so fara foe kisi beraw. Jezus srefi ben taki: „Mi ben seni go na den lasi skapoe soso foe a oso foe Israël” (Mattéus 15:24). Na boskopoe foe na pipel disi foe Gado di ben gi ensrefi abra ben de toemsi spesroetoe èn a no ben tjari kon tapoe naatsi di no ben de foe Israël. Johannes na Dopoeman ben gi tranga na „den lasi skapoe foe na oso foe Israël foe abi beraw foe den sondoe foe den tége na Wétfroebontoe (Mattéus 3:1-6). „Johannes ben dopoe nanga na dopoe leki wan marki foe beraw èn a ben taigi na pipel dati den ben moe bribi ini na sma di ben e kon baka en, dati de, ini Jezus” (Tori foe den Apostel 19:4). Ma di Jezus ben pristeri ensrefi na Johannes foe dopoe ini watra, dan a de krin dati disi no ben psa leki wan marki foe beraw, bikasi Jezus ben de sondro sondoe èn séker a no ben doe wan sondoe tége na Wètfroebontoe di a ben gebore na ondro. Foedi Johannes ben sabi disi, a ben draidrai foe dopoe Jezus, ma a ben doe leki fa Jezus ben aksi: „Meki a de so a tron disi, bikasi a so fasi a de fiti foe wi doe ala sani di de regtvaardiki” (Mattéus 3:13-17). San a ben mène?
13. (a) Fa Jezus ben meki Psalm 40:7, 8 kon troe? (b) San na dopoe foe Jezus ben agersi?
13 Jezus ben handri dja akroederi nanga san ben skrifi foe en ini na profétitori ini Psalm 40:7, 8: „Nanga dati ini prakseri mi ben taki: ’Loekoe, mi ben kon, ini na lolo foe na boekoe ben skrifi foe mi. Ini a doe foe joe wani, o mi Gado, mi ben abi prisiri.’” Ini Hebreër 10:5-10 a profétitori dati e tjari kon tapoe Jezus, foedi Gado no ben wani ini a tori foe Jezus srakti-ofrandi, di ben offer akroederi na Wétfroebontoe foe Mozes, ma a ben wani leki srakti-ofrandi na volmaakti libisma skin, di Gado ben sreka gi en Manpikin sodati a ben sa offer leki na fundamenti foe wan njoen froebontoe. Di Jezus ben kisi dopoe, a no ben gi ensrefi abra na Gado soboen, foedi a ben de wan memre kaba foe wan naatsi di ben gi ensrefi abra èn ooktoe foedi a no ben abi sondoe, a no ben abi foe drai en libi (Hebreër 7:26). A dopoe foe en ben de moro foeroe wan marki dati a ben pristeri ensrefi na en hemel Tata foe doe en wani moro fara. Ini disi Jezus ben gi wan eksempre foe na dopoe foe en discipel.
14. (a) Sortoe boskopoe Jezus ben bigin foe préki baka di den ben kisi Johannes na Dopoeman? (b) Na beraw nanga na dopoe ben e sreka den sma tapoe san ini na ten dati?
14 Baka di Jezus ben jere dati den ben kisi Johannes na Dopoeman, a ben bigin gi ensrefi krinkrin na a préki gi Israëlsma di ben gi densrefi abra kaba. „Foe a ten dati Jezus ben bigin préki èn taki: ’Abi beraw, bikasi na kownoekondre foe hemel kon krosibé kaba’” (Mattéus 4:17). Na dopoe leki wan marki foe beraw ben bigin foe kisi njoen krakti baka (Johannes 3:26; 4:1, 2). Di na Moro Bigi Mozes, Jezus Kristus, ben opo go na hemel èn a ben pristeri Jehovah Gado na waarde foe en libisma srakti-ofrandi leki wettelek fundamenti foe verzoening, dan na Wètfroebontoe foe Mozes ben kon na wan kaba èn na fundamenti ben poti foe na „njoen froebontoe” di ben taki na fesi (Jeremia 31:31-34). Tapoe na Pinksterdé ini 33 G.T. den djoe discipel foe Jezus ben tjari foe datede foe na Wètfroebontoe foe Mozes go ini a „njoen froebontoe” di na Moro Bigi Mozes, Jezus Kristus, ben de na Mindriman foe en.
15. (a) San no ben kon na wan kaba wantronwantron gi den djoe, di na Wètfroebontoe no ben boen moro? (b) San ben de now Gado wani gi den djoe di ben broko den ede foe a matifasi foe den nanga Gado?
15 Aladi na Wètfroebontoe now no ben boen moro. a pisi ten foe Gado foe spesroetoe boen-ati èn prakseri gi den djoe, tapoe na gron dati den ben de na siri foe Abraham na skinfasi, no ben kon a wan kaba; na pisi ten disi ben kon na wan kaba pas ini na jari 36 G.T. Soboen srefi baka na fosi kanti foe na santa jeje ini 33 G.T., na apostel Petrus di ben kisi salfoe nanga na jeje ben taki gi wan ipi djoe ini Jeruzalem: „Abi foe datede beraw èn drai joesrefi, sodati joe sondoe kan figi poeroe, sodati ten foe kowroe ati kan kon foe na persoon foe Jehovah èn a kan seni na Kristus di de gi joe, Jezus.” Efoe den ben wani na matifasi foe den nanga Jehovah kon boen leki sma di gi den libi abra, dan den no wawan ben moe abi beraw foe sondoe tégen na Wètfroebontoe, di den ben de na ondro ete, ma den ben moe pristeri densrefi toe leki memre foe a njoen naatsi di e kon, san ben de a ten dati, Gado wani gi ala sma di ben tron discipel foe Jezus Kristus. Wi e si dati disi de so ini san Petrus ben taki a fesi na a pinksterdé gi den djoe di ben „seki dipi ini den ati” foe a prati di den ben abi foe a dede foe Jesus. Petrus ben taki gi den: „Abi beraw, èn ibriwan foe oenoe moe dopoe ini na nen foe Jezus Kristus foe oen sondoe kan kisi pardon, èn oen sa kisi na fri presenti, na santa jeje.” Soboen, moro foeroe sani ben de ini na tori dan soso foe abi beraw èn foe teki na algemene bosroiti foe go handri moro boen tapoe na gron foe bribi ini Jezus. — Tori foe den Apostel 3:19, 20; 2:39-40.
16. (a) San na dopoe ini watra foe den Samariasma di ben besnij ben agersi di na boskopoe foe na kownoekondre ben doro den doro? Foe san-ede? (b) San e sori dati den ben de ini wan froebontoe-matifasi nanga Gado?
16 Bifosi Jesus opo go na hemel, a ben taki gi en apostel, dati den ben sa meki na kotoigi di e go foe en kon moro bigi te na Samaria èn te na den moro farawe kontren foe grontapoe” (Tori foe den Apostel 1:8). Aladi den Samariasma no ben de Israëlsma, tokoe den ben meki den besnij den foedi den ben teki den bijbelboekoe di Mozes ben skrifi èn foedi den ben si en leki na mindriman na mindri den nanga Gado (Lukas 17:16-18). Ini En boen-ati di wi no ferdini a ben de wan prisiri gi Jehovah dati Petrus, bifosi a ben gebroiki wan sroto gi den heiden di no ben besnij, ben sa gebroiki wan spesroetoe sroto foe opo nanga dati okasi gi den Samariasma tapoe a tori foe na kownoekondre foe hemel. Ma foedi den Samariasma no ben teki troetroe ini na Wètfroebontoe foe Mozes èn „den ben anbegi san den no ben sabi”, den ben moe gi densrefi now abra na Jehovah Gado nanga froestan, bifosi den ben dopoe den ini na nen foe na Messias, Jezus, leki Mindriman foe wan njoen froebontoe. Dati baka dati den ben kisi dopoe nanga na santa jeje, ben sori dati den ben teki ini na njoen froebontoe. — Mattéus 16:18, 19; Johannes 4:4-42; Tori foe den Apostel 8:5-5.
17. (a) Oten èn fa Gado ben go fisiti foe a fosi tron den no-djoe di no besnij „foe teki a mindri den wan pipel foe en nen”? (b) San a dopoe ini watra foe den e agersi?
17 Di ini na jari 36 G.T. di Gado ten foe spesroetoe boen-ati gi den djoe ben kon na wan kaba, dan Gado Jehovah ben poti en prakseri tapoe den no-Israëlsma di no ben besnij, den heidensma, „foe teki na den mindri wan pipel foe en nen” (Tori foe den Apostel 15:14-18). Aladi Petrus ben e gebroiki wan foe den „sroto” ete, den ben seni en go na a osofamiri foe na Romein centurio Cornelius, di ben sori switi fasi gi a djoe pipel. Den heidensma disi ben moe teki na kotoigi di ben go foe Jehovah Gado nanga en glori Messias, bikasi na santa jeje ben kon a tapoe den èn den ben bigin taki ini tongo. Tapoe wan sari-ati-fasi Gado ben bigin „foe gi sma ini den naatsi na okasi foe kon kisi beraw, di a tjari libi kon” nanga jepi foe Jezus Kristus, „na Lam foe Gado di e tjari na sondoe foe grontapoe gowe” (Johannes 1:29; Tori foe den Apostel 11:18). Tapoe a gron foe a gi di den ben gi densrefi abra na Jehovah ini den ati, Jehovah ben teki den toe ini en jeje naatsi. Na santa jeje ben sori dati. Foe datede meki no wan foe den djoe di ben teki na kristendom èn di ben go nanga Petrus, ben kan kakafoetoe gi na komando foe en dati „den ben sa teki dopoe ini na nen foe Jezus Kristus”. Nanga disi na „drai densrefi foe sma foe den naatsi” ben bigin (Tori foe den Apostel 10:1-48; 15:3). Sensi na ten dati, ala sma di ben abi na lostoe foe dini Gado, ofoe den ben de now djoe ofoe heidensma, moe gi densrefi abra na Jehovah ini den ati. Èn tapoe a tori foe a dopoe foe den ini watra, den e pristeri densrefi na Gado doe foe a wani foe Gado gi den, ini a waka baka Jezus.
18. Sortoe aksi e kon now a fesi, èn di wi sa loekoe ini a tra studi?
18 Ma o prenspari a gi foe joesrefi abra de, foe san a dopoe ini watra de wan agersi fasi? Fa disi abi foe doe nanga ferloesoe spesroetoe te joe hori ini prakseri a dé foe Gado atibron na wi fesi? Den sma moe kisi dopoe di no de wan pisi foe Jehovah jeje naatsi, ma di abi na howpoe foe libi na grontapoe foe tego?
JOE KAN PIKI DEN AKSI DI E KON NOW LEKI WAN LOEKOE BAKA FOE SAN WI BEN LERI?
□ Soema ini 1 Petrus 2:9 de na „santa naatsi” ofoe „na naatsi di gi ensrefi abra”?
□ Fa den Israëlsma ini owroeten ben gi densrefi abra na Jehovah Gado?
□ Jezus ben gi ensrefi abra na Gado di a ben kisi dopoe?
□ San na dopoe ini watra foe bribi Samariasma èn heidensma e agersi?
□ San no-djoe di no ben besnij ben moe doe foe tron foetoeboi foe Jezus?
[Prenspari pisi na tapoe bladzijde 51]
Wan njoen naatsi ben doe kon tapoe na dé foe Pinksteren ini a jari 33 foe G.T.
[Prenki na tapoe bladzijde 50]
Den Israëlsma foe owroeten ben gi densrefi abra na Jehovah Gado