Foe san ede a begi „Joe Kownoekondre moe kon” fiti?
„A kownoekondre foe Gado no e kon nanga bigi sani di sma ai kan si, èn sma no sa taki toe: ’Loekoe dja!’ ofoe: ’Drape!’ Bikasi loekoe! a kownoekondre foe Gado de na joe mindri.” — Luk. 17:20, 21.
1, 2. Foe san ede wi kan skrifi foe wi ten leki wan skreki sani, soleki e kon na krin ini boen koranti?
WI ABI Gado kownoekondre fanowdoe? Sref-srefi! Bikasi wi, libisma e psa now a moro tranga ten foe na heri historia. Den ten disi na skreki ten! Foe poti krakti tapoe disi, na Manchester Guardian Weekly foe 7 juni 1981 abi disi foe taki: „Londen, Parijs, Bonn, Rome nanga Brussel sa kan pori krinkrin nanga jepi foe den SS-20-raket di na Sovjet Unie ben poti sensi a bigin foe na moen disi . . . Ibri raket abi dri kernede foe 150 kiloton, sodati na heri explosieve krakti di kan gebroiki gi ibri foto, de 30 tron moro bigi leki di ben gebroiki tegen Hirosjima. Te na Sovjet-Unie ben soetoe 5 foe en SS-20, dan 210 foe den ben sa tan abra gi tra féanti marki, sondro foe gebroiki foe en opolani foe trowe bom, en ondrose-boto ofoe den 1400 intercontinentale raket di alamala abi wan kernlading foe foeroe megaton èn e kibri poti gi prenspari sani di kan psa.”
2 Tapoe na fosi blad foe na tijdschrift Time foe 26 oktober 1981, di ben nen „Gi na grontapoe fetisani”, den ben skrifi foe na situwasi leki „A no de ondro controle, nanga no wan froewakti foe kan stop en”. A de taki foe wan „zaak di ibriwan sma e teki moro nanga moro leki wan normaal sani, ma di de wan skreki sani: gi bigi nanga pikin naatsi na bai èn seri foe fetisani de na moro prenspari wrokosani foe diplomatiek wroko, ’den moro prenspari tité ini a krosi foe grontapoepolitiek’”.
3. (a) Fa na ten foe Noach e akroederi nanga wi ten, soleki e kon na krin ini Genesis 6:11, 13? (b) Sortoe wortoe foe Jezus e kon now troe tapoe wan toemsi moi fasi?
3 Ja, „soleki den dé foe Noach ben de”, na so na grontapoe „kon foeroe nanga ogridoe”, èn nanga wan kefarlek mogelijkheid foe foeroe moro ogridoe di kan tjari rampoe kon (Gen. 6:11, 13; Matt. 24:37). A no de wan wondroe toe dati Jezus, di a ben taki a fesi foe „den sani” di na a kaba foe na grontapoe „ben o go pasa seker” ben ferteri foe „broeja skreki foe den naatsi di no sabi wan pasi foe komoto, aladi den sma e kon weri foe frede èn froewakti foe den sani di e kon tapoe na grontapoe pe libisma e libi”. — Luk. 21:25, 26, 36.
Abi dekati!
4. Foe san ede wi moe de nanga boen froewakti?
4 Ma wi kan froewakti dati a lobi Mekiman foe wi moi grontapoe sa gi pasi dati ogri sma nanga naatsi di lobi soetoe, sa pori krinkrin na wroko foe en anoe? Wi kan prakseri dati Jehovah Gado sa gi pasi dati den sma foe na libisma-famiri „di ben smeti den feti-owroe tron ploegoe” èn di „e anbegi en nanga jeje èn waarheid” kisi pori foe en feanti? (Jes. 2:2-4; Joh. 4:24). Kwetkweti! Èn foe datede meki Jezus ben taki, baka di a ben taki foe den disiten sani di ben o psa, disi: „Te den sani dis bigin foe pasa now, opo tanapoe dan letopoe èn opo joe ede go na tapoe, bika a ferloesoe foe joe e kon krosibé” (Luk. 21:28). Jezus e taki dati wi moe si den difrenti toestand, di e lontoe wi ini na „besroiti foe na seti foe sani” tapoe wan positief fasi èn nanga boen froewakti. — Matt. 24:3-8, 33.
5. Ini sortoe grontapoe wi moe libi èn fa wi moe si na situwasi ete?
5 Ini foeroe presi foe a grontapoe a no de veilig moro foe waka na strati. Na nomroe foe brokotrow e kon moro foeroe srefsrefi, osofamiri e bos, èn a de srafoe foe drug nanga onwettige seks e panja leki wan pestsiki. Ini so wan grontapoe den anbegiman foe Jehovah moe libi. Ma aladi wi de ini a grontapoe, tog wi no abi foe meki a teki wi abra. Wi kan loekoe na situwasi precies soleki Jezus, di a ben taki: „Ini na grontapoe joe sa abi benawtoe, ma abi dekati! Mi ben wini na grontapoe!” — Joh. 16:33.
6. (a) Sortoe toemsi moi eksempre Jezus ben gi foe na „wini foe na grontapoe”? (b) Foe san ede Jezus ben leri wi begi: „Joe kownoekondre moe kon”?
6 Nanga san Jezus ben man foe „wini na grontapoe”? Foe na faste bribi ede ini Gado pramisi Kownoekondre. A ben sabi dati Jehovah tapoe en faste ten èn fasi ben sa tjari na Kownoekondre kon. Jezus ben abi wan bigi waarderi gi en égi wroko leki kownoe foe a ten di e kon. Foe kisi na Kownoekondre, a ben gi ala sani abra di a ben kan kisi na grontapoe leki wan volmaakti libisma. A wani dati wi srefi njan boen foe den ségi foe na Kownoekondre. Foe na reden disi meki Jezus ben leri en discipel: „Joe kownoekondre moe kon” (Matt. 6:10). Ini den hondro-hondro jari di psa miljoen-miljoen sma ben taki foeroe tron den wortoe foe na begi dati. Ma fa pikinso sma ben froestan san na Kownoekondre wani taki troetroe!
Na Kownoekondre — wan troetroe sani
7. (a) San wi kan teki gersi foe froestan dati Gado kownoekondre de wan troetroe kownoekondre? (b) Fa den e teki den tiriman foe a kownoekondre èn foe san ede wi kan de seker dati den sa doe den afersi foe libisma troetroe?
7 Gado kownoekondre de wan troetroe kownoekondre di de. Neleki wi abi te now ete libisma kownoekondre foe eksempre Nederland, België, Bigi Brittannië nanga foeroe trawan, na so Gado kownoekondre de ook toe wan troetroe seti foe tiri. Soleki kownoekondre na grontapoe abi den parlement, den senaat, den Staten di e teki presi foe na pipel, na so toe na kownoekondre foe hemel abi Jezus leki Gado kownoe di poti a wroko, makandra nanga mede-tiriman di den ben verkisi. Ini a tori disi, na Gado srefi teki den poeroe foe na mindri foe betrouwbaar sma. Den de „den sma di Gado verkisi, santa èn di a lobi” (Kol. 3:12). Gado sabi moro boen leki ala sma sortoe égi fasi moe de ini regtvaardiki tiriman, te den wani foe kan doe den afersi foe na libisma famiri, Baka te den kisi opobaka go na a hemel kownoekondre, den 144.001 hemel tiriman sa de ini wan strategisch positie foe tiri den afersi foe na kontren foe na kownoekondre na grontapoe. — Openb. 14:1.
8, 9. (a) Foe san ede na kristenheid e misi foe leri dati na kownoekondre abi borgroe? (b) Ma soema de den borgroe dati, èn den kan prisiri foe sortoe bijbel pramisi? (b) Soema wawan e meki now na „boen njoensoe” bekenti, èn sortoe prisiri kan de now na pisi foe joe?
8 Soema sa de dan den borgroe foe na Kownoekondre? Efoe wi sa go na den bribi foe na kristenheid foe kisi na piki, dan den sa ferteri wi dati borgroe no sa de. Den e waka baka na Griki filosofie dati ala sili no e dede èn dati den e go na „hemel” ofoe na „hel”. Den no e bribi ini na wondroe bijbel pramisi foe wan grontapoe opobaka èn dati Gado ’sa de’ na den libisma èn ’sa figi poeroe ala watra na den ai, èn dati na dede no sa de moro, èn dati sari, babari, pen no sa de moro’ (Joh. 5:28, 29; Openb. 21:3, 4). Ja den miljardmiljardsma foe na libisma-famiri di sa libi dja, tapoe disi grontapoe, foe tego ini wan grontapoe paradijs, sa de den borgroe foe na Kownoekondre. Èn foe ala bribi na grontapoe Jehovah Kotoigi ini disi ten de den wan enkri wan di e ferteri den sma na grontapoe na „boen njoensoe” disi. — Ps. 37:9, 29.
9 Efoe joe ben teki na „boen njoensoe” disi kaba, joe no bréti dan dati wan sma ben prati na howpoe disi nanga joe? Joe no de kolokoe pasa marki foe sabi san Gado kownoekondre sa doe gi na libisma-famiri? Joe no bréti dati aladi di joe e wakti tapoe ala san na Kownoekondre sa doe, joe kan abi wan prati na a santa foe na glori nen foe Na Sma di ben sorgoe foe na kownoekondre dati, wi Gado, Jehovah? Wan moro bigi grani no de now dan foe ferteri na „boen njoensoe disi foe na kownoekondre” na moro sma ete foe na mofina libisma famiri! — Matt. 24:14; Ps. 145:10, 11.
Wi faja begi
10. Foe san ede wi moe begi fajafaja tapoe na tori foe na kownoekondre èn nanga sortoe froetrow?
10 O faja wi moe begi dan dati Gado nen sa kon santa nanga na kon foe na kownoekondre! O bigi wi froetrow moe de dati na Kownoekondre sa „kon” djonsro foe doe a wani foe Gado tapoe na tori foe wi grontapoe! Foe di wi ben tron Gado dienstknekti di ben gi densrefi abra èn dopoe, wi kan abi ook toe na froetrow, dati Jehovah sa jere wi begi foe den sani di wi abi ala dé fanowdoe, foe pardon foe wi sondoe èn foe kibri tegen den triki foe na owroe „sneki” dati, na Didibri. Disi de den sani di Jezus ben leri wi foe begi foe den. — Matt. 6:9-13; Openb. 12:9.
11. Sortoe fermane foe Paulus tapoe a tori foe den grontapoe problema de actueel, èn foe san ede?
11 Wi e libi foe troetroe ini wan ogri-ati, tranga-ati grontapoe, pe a de kon ala dé moro moeiliki gi edeman foe osofamiri foe kakafoetoe gi a kon moro diri foe sani èn tra economia problema. Èn alaten wi moe loekoe boen, sodati wi no fadon na jeje fasi ofoe na moreel fasi ondro den ros foe na feanti. Meki wi tan „begi”, akroederi na fermane foe Paulus ini Efese 6:11-18 „nanga ibri sortoe begi èn tranga begi na ibri okasi ini jeje”, bikasi Gado sa jere troetroe den begi foe en dienstknekti — begi di de akroederi na wani foe en. — Ps. 65:2, 4, 5.
12. Foe san-ede na Kownoekondre moe teki wan prenspari presi ini den begi foe wi?
12 Meki wi begi nanga wi heri „Joe kownoekondre moe kon.” Èn foe san-ede na Kownoekondre moe teki so wan prenspari presi ini wi libi? Foe di a de a wrokosani foe Gado foe ferloesoe na universum foe en granfeanti èn foe ala sma di e meki Satan basi a libi foe den. Na messias kownoekondre de a seti foe En di sa soifri na toemsi bigi nen foe En foe ala sjen di ben poti a tapoe ini den 6000 jari di pasa. Na kownoekondre ini anoe foe Gado Manpikin, Jezus Kristus, sa gebroiki na verzoen krakti foe Jezus ofrandi gi na libisma-famiri, ja, a sa sorgoe srefi dati den miljard-miljard sma di de now ini na grebi, sa opo baka kon na libi (1 Tim. 2:3-6; Openb. 20:12). Joe e sari foe na lasi foe wan sma di joe lobi so te? Joe e sari foe den grontapoe-toestand di e kon moro takroe? Joe no de dan kolokoe foe de wan pisi foe na wan enkri pipel na grontapoe di e poti bribi ini Jehovah nanga en glori Kownoekondre-pramisi? (Ps. 144:15; 146:5). Disi moe de so! Èn foe datede joe moe begi nanga foeroe froetrow: „Joe kownoekondre moe kon.”
SAN NA „KON” FOE NA KOWNOEKONDRE SA DOE
□ A sa poeroe takroedoe, feti, nanga a kwinsi foe trawan.
□ A sa ferloesoe ala sma di e anbegi Gado „nanga jeje èn waarheid”.
□ A sa meki wan troetroe tiri kon nanga tiriman di Gado ben piki teki.
□ A sa opo ala dedesma baka, tjari ala ras kon ini wanfasi leki grontapoe borgroe foe na Kownoekondre.
□ A sa meki tanboen nanga geregtigheid gi ala sma kon ini na presi foe pina nanga bidrigi fasi.
[Prenki na tapoe bladzijde 171]
Soleki libisma tiri de troetroe, na so toe na hemel tiri de troetroe