„Ibriwan tapoe en presi”
„Ala a ten dati den ben tan tanapoe, ibriwan tapoe en presi, lontoe na kampoe.” — Kroetoeman 7:21.
1, 2. Teki Gado wroko gersi nanga di foe libisma.
SAN e kon ini joe prakseri te joe poti na harmonie foe Gado wroko na abrasé foe na broeja ini na libimakandra foe libisma? Joe no e agri nanga na bijbel-skrifiman di ben abi Gado jeje èn di ben taki: „Bikasi Gado no de wan Gado foe broeja, ma foe vréde”? (1 Kor. 14:33). Den wortoe disi, di na apostel Paulus ben skrifi, e sori dati Gado no de frantwortoe foe na broeja toestand di na grontapoe de na ini. Jehovah sabi fa a moe seti den afersi, sodati ala sani di en wet e tiri, abi wan égi presi. En mekisani di lontoe wi e kotoigi foe disi. A sabi foe libisma di e kon moro foeroe foe na universum e kotoigi alaten agen foe na orde èn controle di de dape. Tapoe sortoe pisi foe na loktoe toe pe libisma poti en telescoop foe loekoe, alaten a de si dati ibri stari èn planéti abi en égi presi èn e bewégi ensrefi nanga orde ini en pasi.
2 Fa wi e si wan heri tra prenki te wi poti wi prakseri tapoe den afersi foe tranga-ede libisma na grontapoe! Someni broeja de, èn stré foe kiri makandra! Na libisma-famiri ini politiek, bribi, maatschappelijk èn ras sé prati èn problema di no man loesoe e wasi psa tapoe den. Doe ogri kon so bigi, dati den no man feni ibri sma di pasa na wet èn kroetoe den. Srefi sroedati ini nationaal legre, foe soema joe e froewakti dati den e doe dienst ondro wan tranga discipline e broko foeroetron den régel.
3. San den e teki gersi kristen, ma sortoe feti den e feti?
3 Foe datede meki a no de wan froewondroe sani dan, dati soleki Jehovah e broko en ede nanga na universum foe stof, na sosrefi toe a de broko ede nanga na vréde èn orde na mindri den sma di e teki presi foe en na grontapoe. Leki en dienstknekti, aparti kristen e teki gersi nanga gedisciplineerde sroedati ini wan legre. Na apostel Paulus ben skrifi dati ibriwan . . . moe de leki „wan loyaal sroedati foe Kristus Jezus” (2 Tim. 2:3, Today’s English Version). Ibriwan foe wi moe abi na lostoe „foe go doro foe feti na toemsi boen feti” (1 Tim. 1:18). Ma wi moe hori ini prakseri dati wi no e feti wan letterlek feti. Wi e feti wan jeje feti. Na feti foe wi de tégen den „grontapoe-tiriman foe na doengroe, tégen den ogri jejekrakti ini den hemel kontren” di wi no kan si nanga ai. — Ef. 6:12.
4. Foe san ede den ros foe Satan tapoe Gado dienstknekti no sa abi winimarki?
4 Ma den georganiseerde krakti ondro na gado foe na seti foe sani e proberi foe tapoe skreki gi Gado dienstknekti, sodati den e lasi ati èn lon gi na feanti (2 Kor. 4:4). Ma a koni disi foe feti foe den gensman, sa fadon srefsrefi, bikasi na Jehovah e tiri den afersi èn en na a Sma di ’e leri wi anoe foe feti’ (Psalm 18:34). Wi e kisi dekati foe na sekerfasi dati „a feti a no foe wi, ma foe Gado” (2 Kron. 20:15). Nanga jepi foe en makti Sroedati-komanderiman, Kristus Jezus, Jehovah sa tjari na stré kon na wan boen wini. Foe datede a de gi en loyaalwan na sekerfasi, dati noiti den sa sjen. Noiti den no sa abi foe hari densrefi poeroe foe den ros foe den gensman. — Ps. 18:25.
5. Foe san ede Jehovah ben gi Gideon komando di ben de kontrari den libisma prakseri foe na koni foe feti?
5 Nanga jepi foe na span tori ondro na krakti foe santa jeje foe wan stré di ben stré hondro-hondro jari bifo wi gewoon teri ini den dé foe den kroetoeman ini Israël, Jehovah e poti wi prakseri tapoe wantoe gronprakseri foe feti, di den „sroedati foe Kristus” e doe boen foe poti prakseri a tapoe. Ini na ten foe kroetoeman Gideon wan ipi ogri-jeje-anbegiman, „so foeroe leki den sprenka”, ben fadon go ini na kondre Israël (Kroetoeman 6:5). Jehovah ben gi Gideon rai fa na legre foe Israël moe kakafoetoe gi na sani di ben gersi wan toemsi bigi skreki sani. Kontrari ala libisma prakseri foe a koni foe feti, Gideon ben kisi rai foe meki en legre foe 32.000 man kon tron 10.000 nomo, èn baka dati foe 10.000 kon tron soso 300 man. Nanga na pikin groepoe disi, so Jehovah ben pramisi, „mi sa ferloesoe oenoe”. — Kroetoeman 7:2-7.
6. Ferteri foe na ros di Gideon nanga en 300 man ben ros na kampoe foe Midian.
6 Den 300 ben kisi toetoe nanga bigi légi djogo, nanga frambo inisé foe den djogo. Ini na dipi foe na neti, Gideon ben poti den lontoe na legre-kampoe foe Midian nanga den staman foe den. Den ben kisi na komando foe arki na a marki di Gideon ben sa gi, èn kon dan ini bewégi. Gi jesi loyaal èn hori ensrefi soifri na den feti-komando di Gideon ben gi, ben de toemsi prenspari. Di alamala ben de tapoe den presi, dan Gideon ben gi na marki. Dan den 300 man „ben blo tapoe den toetoe èn broko den bigi djogo (di ben kibri den frambo) èn graboe nanga den kroektoe-anoe den frambo èn nanga den reti-anoe den toetoe foe blo a tapoe èn ben bari: ’A fet-owroe foe Jehovah èn foe Gideon!’ Ala a ten dati, den ben tan tanapoe, ibriwan tapoe en presi, lontoe na kampoe, èn na heri kampoe opo lon èn ben bigin foe bari èn teki foetoe.” Na feanti ben kisi pori. — Kroetoeman 7:19-22.
7. Sortoe aksi e kon foe den sani disi foe na bijbel?
7 Wantoe moi aksi e kon dja na fesi. Jehovah ben sa ben gi foe eksempre den 300 fetiman so wan bigi wini efoe den ben teki en feti-komando lekti? Kon wi taki dati den no ben wakti tapoe na marki foe Gideon. San ben sa pasa efoe den ben misi foe gebroiki soso wán pisi foe den fetisani di Gideon ben gi den? Den ben sa abi winimarki efoe ibriwan foe den ben teki besroiti gi densrefi dati tra boen feti-posisi ben de na a lanki foe na feanti kampoe, di ben moro boen foe tanapoe leki den presi di den ben kisi? Ini disi toemsi prenspari gronprakseri e kon na fesi, di wi moe meki tjari wi ini disi ten, foe di ’den sani disi ben tan kon den abra, sodati wi ben sa si na eksenpre èn ben sa njan boen foe en’. — 1 Kor. 10:11.
8. Na soema wi moe loekoe foe na wini ini wi feti?
8 Ini a feti foe wi leki kristen, wi moe erken Jehovah ini ala sani di wi e doe. Wi moe loekoe na en èn poti wi froetrow tapoe en leki na Sma di e gi na wini. Na a tra sé, boen feti-koni foe libisma, na moro krin-ede denki-wroko foe libisma soso. no kan djaranti wi winimarki. „No nanga wan fetimakti, no nanga krakti, ma nanga mi jeje”, Jehovah e taki (Zach. 4:6). Ini wi ala dé stré gi waarheid nanga regtvaardiki fasi, soboen, leki kristen wi no sa waka baka grontapoe prakseri nanga methode, di de kontrari den gronprakseri di Gado ben gi foe tiri en pipel. Te wi e kanti go na a rai foe kondresma, dan disi e sori wan swaki foe bribi ini a makti foe Gado foe kon jepi wi ini ten foe nowtoe. Wi moe abi wan srefi krakti overtoigi leki na bijbel-skrifiman Jakobus (1:5). „Efoe wan sma foe oenoe e mankeri koni, dan a moe tan aksi Gado, bikasi en e gi ala sma foeroe èn sondro verwijti; èn den sa gi en na en.”
„Loekoe a mi fa mi e doe”
9, 10. (a) Soema de ini disi ten wi Komanderiman nanga Tiriman? (b) Fa wi kan loekoe na en, foe di a no de foe si nanga ai?
9 Kristus Jezus, na Moro Bigi Gideon, abi now na heri komando foe en fetiman di wi kan èn di wi no kan si nanga ai. Nanga jepi foe en, Jehovah e tjari kon na krin gi en pipel san en prakseri de èn sortoe pisi ten ben poti gi den sani di moe pasa. Fa a de wan span tori foe froestan dati Kristus Jezus de actief bezig ini a tjari foe en „sroedati” a grontapoe, sodati a de gi den a sekerfasi dati den sa teki prati ini na wini te foe kaba! Akroederi na pramisi foe en, a de „ala dé (na den) te na besroiti foe na seti foe sani”. — Matt. 28:20.
10 Foe di Jezus Kristus, di poti tapoe a troon, de now a Tiriman èn Komanderiman foe ala fetiman gi waarheid nanga regtvaardiki fasi, dan makandra wi kan „loekoe na en fa a de doe”, neleki den 300 ben loekoe fa Gideon ben doe (Kroetoeman 7:17). Ma fa wi kan „loekoe” ini disi ten fa Kristus e doe, foe di a no de foe si nanga ai? Wi e „loekoe” na en na a fasi dati wi e si den marki di a de gi nanga jepi foe na srafoe di wi kan si nanga ai èn di a poti tapoe ala grontapoe afersi foe en kownoekondre (Matt. 24:45-47). Nanga jepi foe a kanari disi di a ben poti na wroko nanga jepi foe na jeje a de meki en pasi nanga feti-koni bekenti gi ala en „sroedati”. Den sroedati disi no kan teki na fri foe hari go na fesi ofoe foe kon de sondro pasensi, foe di sani no e waka leki fa den e si den. Wi Komanderiman di wi no kan si nanga ai e meki den sani pasa ini den ten di a ben poti. Na fasi fa a de si sani de prenspari foe teki na prakseri, no wi égi fasi foe si sani.
Den fetisani di Gado ben gi
11. Sortoe fetisani Gado dienstknekti e gebroiki ini disi ten?
11 Na Moro Bigi Gideon sabi sortoe fetisani en sroedati abi fanowdoe na grontapoe. Wi no abi fanowdoe foe letterlek fetisani. Wi moe feti wan jeje feti. Den fetisani foe wi de foe datede foe „Gado sé krakti foe trowe tranga skotoe sani . . . Wi e trowe redenering na gron èn ibri hé di e opo poti tégen na sabi foe Gado, èn ibri prakseri wi e tjari kon ini katibo foe meki den gi jesi na Kristus” (2 Kor. 10:4, 5). Ala di srefi na gens de, di kan kon tapoe den, tog getrow kristen fetiman moe kon koni ini na gebroiki foe na fetisani di Gado ben gi foe sa man, neleki na apostel Paulus, foe „ferteri (den sma) ala na rai foe Gado”. — Tori foe den Apostel 20:27.
12. (a) Foe san ede na pikin groepoe foe Gideon ben feti so boen? (b) Foe san ede Jehovah dienstknekti ini disi ten e wroko so boen toe?
12 Den sroedati foe Gideon ben moe handri leki wán man èn gebroiki den fetisani foe doro na marki di den wani doro. Na naki broko foe 300 djogo di meki foe tokotoko, na opo na loktoe foe 300 frambo, na babari foe 300 toetoe èn na babari foe 300 sten, di ben kon tapoe den Midiansma foe ala sé ini na tiri doengroe foe na neti, seker ben moro den. A no de now na a srefi fasi so, dati na meki bekenti makandra foe Gado kownoekondre nanga en refrensi e tjari a feanti so fara foe denki dati na boskopoe di e meki bekenti na den de moro bigi èn abi moro gevaar ini en gi den leki de troetroe so? Fa disi doe kon? Foedi ala sma di de wan pisi foe na organisaatsi foe Jehovah pipel, de klarklari foe wroko makandra — ondro a tiri foe a Moro Bigi Gideon, èn nanga jepi foe en „srafoe” di a poti a wroko — ini a meki bekenti foe den spesroetoe boskopoe gi na grontapoe tapoe a joisti ten. Ma na a tra sé, efoe ibri kotoigi foe Jehovah ben sa doe leki fa a plisi en foe oten èn fa a moe meki Gado boskopoe bekenti, dan fa na kotoigiwroko na a heri grontapoe ben kan gi? A de troetroe krin dati a de Jehovah wani dati wi „na mindri makandra abi na srefi jeje fasi di Kristus Jezus ben abi (na Moro Bigi Gideon), sodati wi ini wanfasi nanga wán mofo kan prijse na Gado èn Tata foe wi Masra Jezus Kristus.” — Rom. 15:5, 6.
13, 14. San e gi krakti na a boskopoe foe Jehovah dienstknekti ini disi ten?
13 Na wanfasi krakti de Jehovah jeje èn en Wortoe, na bijbel. Kolokoe, dati wi no e go, ibri aparti, foe leri sma wi égi prakseri foe na bijbel boskopoe. Jehovah ben gi someni jepisani foe kisi wan moro betre froestan ini na fasi foe boekoe, sodati ini wi denki èn ini wi leri wi sa de ini wanfasi. Na a fasi disi wi e komoto na a pasi foe na dede pratifasi èn den foeroe leri foe na Kristenheid nanga na heidendom di e taki kontra densrefi. Na so fasi toe, wi no e doengroe ofoe swaki Gado boskopoe gi den naatsi, foe troe wan boskopoe di abi wan toemsi moi howpoe, ma so toe wan boskopoe foe refrensi èn paiman. Wi e froestan heri boen dati na babari foe na trompeti moe de tranga èn krin. — 1 Kor. 14:8.
14 Fa a de wan sani di fiti foe datede dati wi alamala froestan o warti na fetisani de di Jehovah ben gi foe a feti foe wi! Sosrefi toe a de leri wi boen fa foe gebroiki en, sodati na aparti sma èn na naatsi wan toemsi boen kotoigi kan gi. Sma no e jere na sten foe wan sma di de en wawan e kari ini na sabana, ma nanga jepi foe na kotoigiwroko disi, wan tranga warskow e gi di e psa go fara èn di de foe jere na a heri grontapoe. Na so fasi „Jehovah foe troe e meki en sten bari na fesi en sroedati-makti”. — Joël 2:9, 11.
„Ibriwan sma tapoe en presi”
15. Sortoe fasi foe doe ben sa de wan sani di no ben sa kon ini na prakseri foe wan foe den man foe Gideon?
15 Ini na tori foe Gideon 300 man a no ben de wan sani di ben sa kon ini na prakseri srefi dati wan foe den, baka di den ben sori en na presi foe en, ben sa kakafoetoe, èn ben sa wani kenki en presi nanga di foe wan trawan, ofoe srefi dati en ensrefi ben sa wani teki en égi boen presi. Na a fasi dati a ben sa poti en égi prakseri moro hé leki na prakseri foe na sma di Jehovah e gebroiki foe tjari na feti, namkoe Gideon. A ben sa sori nanga disi, dati a no ben de nanga sakafasi èn no ben kan wakti te leki Jehovah ben feni en na ten foe tjari wan kenki kon. Fa ini ala opregti fasi a ben sa kan bari makandra nanga trawan: „A feti-owroe foe Jehovah èn foe Gideon!” efoe a ben abi so wan fasi?
16. Fa sakafasi sa jepi wi foe doe wi verprekti?
16 Ini Jehovah seti foe sani ini disi ten, ibriwan foe wi moe abi ini na fosi presi den prakseri foe Jehovah nanga den algemeen belang foe en kownoekondre ini prakseri. Wi moe doe getrow den wroko di wi kisi, wansi tapoe sortoe presi wi de ini na organisaatsi (1 Kor. 4:2). Sosrefi toe wi moe sori sakafasi, sodati a de go na wan sé dati wi e proberi foe poesoe wisrefi poti ini wan moro betre posisi. Ini ala den sortoe situwasi disi na gronprakseri kan gebroiki, di Jezus ben leri, namkoe: „Ala sma di e hé ensrefi, sa kon lagi, èn ala sma di e lagi ensrefi, sa kon hé” (Mat. 23:12). Èn Jakobus e gi na tranga: „Saka joesrefi (no soso ini na ai foe libisma, ma) ini na ai foe Jehovah èn en sa hé joe.” — Jak. 4:10.
17. Jehovah e sori persoonlek belangstelling ini ibriwan foe wi?
17 Foe datede wi kan froestan dorodoro san Kroetoeman 7:21 wani taki, „Ibriwan sma tapoe en égi presi”. Te wi e doe dienst ini Jehovah organisaatsi, meki wi de tevréde dan foe dini ala presi pe Jehovah e poti wi èn doe wi wroko so getrow leki wi kan. Meki wi abi na overtoigi dati Na Sma di e poti prakseri srefi tapoe wan pikin fowroe di e fadon na grontapoe, abi moro foeroe belangstelling gi wi te wi e wroko loyaal na a wroko di wi ben kisi (Matt. 10:29-31). A sabi sortoe leri wi abi fanowdoe èn foe sortoe wroko wi boen foe doe, èn foe datede a de handri na so fasi nanga wi. Wi kan de seker dati a no sa loekoe psa wi. — 1 Petr. 5:10.
18. Foe san ede wi e poti ini disi ten so wan bigi froetrow ini Jehovah?
18 Ini disi ten ala Gado dienstknekti tanapoe ondro na komando foe na Moro Bigi Gideon, Kristus Jezus. Ini wanfasi wi wani doe dienst foe regtvaardiki ofoe poti reti Jehovah nen, aladi wi e saka wisrefi nanga sakafasi na den feti-regel foe en, „ibriwan sma tapoe en presi”. Wi abi ala froetrow dati tapoe na gron foe Jehovah algemene feti-koni wi kan de seker foe na wini te foe kaba. Èn wi e froetrow a tapoe dati Jehovah e si na loyaal gi jesi di wi e gi jesi èn dati a sa pai wi nanga na „troetroe libi” ini en njoen seti, bikasi en Wortoe e verklari: „Kon de faste, sondro foe seki, alaten abi foeroe foe doe ini na wroko foe Masra, nanga na sabi dati joe wroko no de foe soso ini Masra.” — 1 Tim. 6:19; 1 Kor. 15:58.
Joe kan memre den punt disi?
□ Foe san ede na feti-koni foe Gideon ben kenki so bigi foe grontapoe prakseri foe feti?
□ San ben jepi Gideon foe wini dorodoro?
□ Fa Jehovah ini disi ten e hori takimakandra nanga en dienstknekti?
□ Fa „sroedati foe Kristus” moe tanapoe nanga reti nanga den wroko di den kisi?
[Prenki na tapoe bladzijde 213]
Jehovah ben gi wi na toemsi prenspari jepi di wi abi fanowdoe ini wi stré ini disi ten