Gado Wortoe abi libi
Jezus e pramisi wan meki kon njoen baka foe sani
„LOEKOE! Wi ben libi ala sani èn ben kon na joe baka”, na apostel Petrus e taki gi Jezus. „San wi sa kisi dan?” Loekoe pikinso na tapoe na aparti piki foe Jezus Kristus. „Foe troe, mi e taki gi joe: Na ini a meki njoen foe sani, pe na Manpikin foe Libisma e teki presi na tapoe en glori troon, dan oenoe di ben waka na mi baka, sa sidon ooktoe srefi na tapoe twarfoe troon.” — Mattéus 19:27, 28.
Jezus e pramisi djaso now taki Petrus nanga den tra apostel makandra nanga en sa tiri leki kownoe, sa sidon na tapoe troon. Ma oten? „Na ini a meki njoen foe sani”, Jezus e taki. San na a meki njoen foe sani disi? Oten a sa kon troe?
A bijbeltori di Lukas skrifi foe a srefi sani disi e jepi wi foe ferstan san e bedoel nanga „a meki njoen foe sani”. Drape tanapoe: „Petrus ben taki: ’Loekoe! Wi ben libi wi égi sani, ben waka na joe baka.’ [Jezus] ben taki gi den: ’Foe troe, mi e taki gi joe: No wan sma de di e libi oso ofoe oema ofoe brada . . . di no sa kisi séker . . . na ini na seti foe sani di e kon tégo libi.’” — Lukas 18:28-30.
„Na meki njoen foe sani” e sori soboen dja taki a de a srefi leki „na seti foe sani di e kon”. Te Kristus teki presi na ini hemel na tapoe en glori troon makandra nanga den sma di sa tiri nanga en, dan na meki njoen foe wan regtvaardiki seti foe sani e kon na baka (2 Timotéus 2:11, 12; Openbaring 5:10; 14:1, 3). Wan loekoe foe a sortoe foe bigin di Gado ben gi na a fosi papa nanga mama na ini Eden, sa meki wi ferstan san na meki njoen foe sani sa wani taki.
Jehovah Gado ben meki na fosi libisma paar, Adam nanga Eva volmaakti, a ben poti den na ini na djari foe Eden. A ben de ’wan paradijs foe prisiri’. Biginbigin Jehovah ben poti na prakseri dati libisma ben sa libi foe tégo na grontapoe, ben sa prisiri na ini vréde nanga sékerfasi, soleki joe e si dja na tapoe na prenki. Tokoe na paradijs di ben de biginbigin, ben kon pori nanga oproeroe, san baka wan pisiten ben meki na ogri seti foe sani ben doe kon foe de now.
Na prakseri foe Gado foe meki na grontapoe tron wan paradijs sa tan sondro wan kontroe? No kwetkweti! Wi abi na pramisi foe Kristus taki na regtvaardiki seti pe na libismafamiri ben bigin nanga a libi na a grontapoe disi, sa meki njoen baka. Wan drai kon baka sa de foe den toestand foe Eden abra na heri grontapoe. Na Mekiman sa tjari en prakseri di a ben abi fosi foe meki wan regtvaardiki seti foe sani di e tan kon reti. Wi kan prisiri srefsrefi foe na ferwakti disi di abi en roetoe na ini na bijbel! — Psalm 37:29; Openbaring 21:3, 4