Poti prakseri na tapoe den profétitori
„Na proféti wortoe de moro faste gi wi, èn joe e doe boen foe poti prakseri a tapoe neleki na tapoe wan lampoe di e skijn na ini wan doengroe presi.” — 2 PETRUS 1:19.
1. Sortoe ferwondroe sani Jezus ben tjari kon na krin leki fa Mattéus 16:21-28 e taki?
A DINIWROKO foe Jezus na grontapoe ben e kon na wan kaba. Na ini na birti foe Cesaréa Filippi, noordsé foe Galiléa, na „Manpikin disi foe libisma” ben ferteri en discipel a dede foe en di ben de foe kon èn foe a kon baka foe en na ini na glori foe en Tata. Bakadati a ben taki gi den: „Foe troe, mi e taki gi oen taki sonwan foe den di tanapoe dja, no sa si dede kwetkweti bifo den si na Manpikin foe libisma e kon ini en kownoekondre” (Mattéus 16:21-28). San disi ben sa kan wani taki?
2. (a) Fa den wortoe foe Jezus ben kon troe na ini wan visioen di Petrus, Jakobus nanga Johannes ben si? (b) Sortoe glori sani di ben psa ben sori dja na profétifasi?
2 Sowan siksi moen a baka Jezus ben teki Petrus, Jakobus nanga Johannes go na wan hé bergi, kande na Hermon foe na Anti-Libanon keten. Djaso wan froewondroe sani psa! Jezus en skin ben kenki na fesi den ai èn a sori ensrefi na ini wan brenki leti. Na ini wan visioen den ben si Mozes nanga Elia ben taki nanga en. Foe san-ede Mozes nanga Elia? We, na ini den bijbelboekoe den e meki wi kon sabi Jezus leki na „Proféti” di Mozes ben gersi. Èn wan wroko leki di foe Elia abi foe doe nanga na kownoekondre foe Gado pe Jezus e tiri na ini (Tori foe den Apostel 3:22, 23; Deuteronomium 18:15-19; Maleachi 4:5). A ben de foe dat’ede wan sani di fiti taki na ini na visioen disi foe a kon foe Jezus na ini a moifasi foe en kownoekondre glori di e kon, den ben si den makandra nanga en. — Mattéus 17:1-5.
3. Sortoe wortoe foe Jehovah nen poti krakti tapoe na prenspari fasi foe na visioen?
3 Sosrefi toe a ben de wan sani di fiti taki Jehovah sten ben de foe jere komoto foe hemel, di ben taki: „Disi na mi Manpikin, na lobiwan, di mi ben feni boen.” Gado ben taki den wortoe disi moro fara: „Arki na en.”
4. (a) Foe san-ede na sani dati di ben psa moe meki indruk tapoe oen? (b) Tapoe sortoe „proféti wortoe” 2 Petrus 1:19 e sori?
4 Sortoe krakti na ferwondroe sani ben abi na tapoe a memre foe den apostel dati? Sortoe krakti na sani disi moe abi na tapoe wi na ini disi ten? Sowan dritenti jari na baka Petrus ben kan memre a sani disi ete na ini ala en moifasi. „Foe dat’ede”, a ben taki, „na proféti wortoe e meki kon moro faste gi wi.” Sortoe „profétis wortoe”? We, profétitori, soleki Daniel 7:13, di na transfiguratie e sori taki na troe profétitori di e go foe na boen foe na Manpikin foe libisma na ini na glori foe kownoe-kondre makti! — 2 Petrus 1:16-19; loekoe sosrefi toe Jesaja 9:6, 7.
5. Sortoe prenspari profétitori ben poti a tapoe na „wortoe” disi?
5 Na a ten dati „na proféti wortoe” ben abi ooktoe na ini en den profétitori di Jezus Kristus srefi ben taki. Na ini disi ben de den kownoekondre profétitori foe en foe „na bosroiti foe na seti foe sani”, pe tapoe wan fasi di ai kan si ben sori taki „na Manpikin foe libisma” ben sa kon na ini wan ten foe grontapoe benawtoe di no abi en speri na „tapoe den wolkoe foe hemel nanga krakti èn bigi glori” (Mattéus 24:3-14, 30, 31). Bakaten „na proféti wortoe” ben sa abi na ini en den krakti kownoekondre profétitori di na glori Jezus Kristus ben tjari kon na krin gi na owroe apostel Johannes, soleki dati skrifi na ini Openbaring 1:12-16; 5:5-10; 11:15-17 èn 14:14, 15.
Poti prakseri
6. Foe san-ede na ini a ten disi na proféti wortoe moe abi moro krakti srefi tapoe den?
6 Efoe Petrus nanga en kompe ben de so kaba na ondro na indruk foe na proféti visioen. omeni moro wi moe de na ondro na indruk foe en na ini a ten disi! Now di a Manpikin foe libisma ben kon na ini en glori foe teki presi na tapoe en glori kownoekondre troon na ini hemel, dan a de séker na ten sondro foe draidrai, foe ’arki na en’! Wi e doe boen troetroe te wi poti prakseri na tapoe na proféti wortoe leki wan lampoe di e skijn na ini wan doengroe presi èn meki a skijn na tapoe wi ati. — 2 Korintesma 4:6.
7. (a) Fa Paulus ben poti krakti na tapoe na prenspari fasi foe profétitori? (b) Foe san-ede oen moe poti prakseri na tapoe na ini disi ten?
7 Na apostel Paulus sosrefi toe ben poti kraki taki a de fanowdoe foe teki na proféti boskopoe na ati. A ben skrifi gi den Hebrew kristen taki Gado ben taki nanga jepi foe den proféti ’langa ten pasa kaba na foeroe okasi, tapoe foeroe fasi nanga den fosten tata foe den’ ma ’na a kaba foe den dé (foe na djoe seti foe sani)’ a ben taki nanga den nanga jepi foe wan manpikin. Na proféti wortoe di Jezus ben taki, ben de toemsi prenspari. Te wan sma ben sa poti prakseri a tapoe a ben sa tjari jepi kon gi en. „Dat meki”, Paulus taki, „a de fanowdoe taki wi poti moro prakseri leki wi gwenti a den sani di wi ben jere” (Hebrewsma 1:1-4; 2:1). Now, na „ini na bosroiti foe na seti foe sani [foe na heri grontapoe]”, wi abi moro réde foe arki na den Wortoe foe Jezus. — Mattéus 24:3, 35; teki gersi Jesaja 55:6-11.
8. Fa na proféti wortoe moe gi wi tranga, nanga sortoe winimarki?
8 Ma a moe de krin taki na kisi foe sabi no moesoe de na wan enkri réde foe san-ede wi e poti prakseri na a profétis wortoe. Fara foe dati! A wortoe dati moe gi wi tranga foe waka èn libi leki fa na sabi dati taki èn a moe tjari wi so fara foe doe now, „na ini a laatste pisi foe den dé”, na wani foe Gado (Jesaja 2:2, 3). Na psalmsingiman e taki nanga Jehovah Gado nanga den wortoe: „Joe wortoe na wan lampoe gi mi foetoe, èn wan leti na mi pasi.” A wortoe dati e jepi wi foe tan waka na ini na leti foe na waarheid èn na ini na diri fertrow nanga wi Gado. A e kibri wi foe drifi go wan dé baka na a grontapoe foe Satan (Psalm 119:105; Job 29:3, 4). Foe kisi winimarki di e tan foe na proféti wortoe dan wi moe kweki wan dipi lobi gi na bijbel, teki na heri bijbel boskopoe na ati. Na so fasi wi kan kisi boen réde foe doe a wani foe Gado alaten, kibri wisrefi na ini en lobi. — Markus 12:29-31; 1 Johannes 4:16; Judas 20, 21.
Profétis prenki
9. (a) Foe san-ede oen kan taki, taki na bijbel tori no de dede historia? (b) Sortoe dé foe refensi e prenki na ini?
9 Na tranga-ede foe a Israël foe owroeten a bijbel e skrifi foe en finifini. Foe san-ede? „Leki wan warskow gi wi, di den kaba foe den seti foe sani ben kon na wi.” Disi moe gi wi frede foe Gado, sodati noiti wi sa kweki ’wan ogri ati di no e bribi, foe di wi e hari wisrefi poeroe foe na libi Gado’ (1 Korintesma 10:11; Hebrewsma 3:12; Job 28:28). A tori foe bijbel no de historia di dede. A e gi wi proféti prenki, wortoe di e sori taki Jehovah sa teki refensi njoen baka ma moro bigi leki na ini den dé foe na Israel di ben fadon komoto foe bribi. Na strafoe di Gado ben gi na naatsi disi di ben fadon komoto na bribi na ini 607 bifo G.T. nanga 70 G.T. ben e sori na agersifasi fa heri esi en faja atibron sa kanti trowe na tapoe na kristenheid spesroetoe. Wi e doe boen foe dat’ede foe poti prakseri a tapoe na proféti wortoe dati! — Jeremia 7:28, 32-34; Mattéus 24:3-22.
10, 11. Sortoe sani wi moe teki gersi nanga makandra foe si taki wi e libi na ini „den laatste dé”? (b) Spesroetoe fa den sekte foe na kristenheid ben meki den profétitori kon troe?
10 Wi e libi troetroe na ini den „laatste dé” foe Satan seti foe grontapoe tirimakti. Joe kan teki na grontapoe foe now gersi nomo nanga den wortoe foe na apostel Paulus na ini 2 Timotéus 3:1-5, 13 foe ferstan a sani dati. Spesroetoe na ondro den broeja sekte foe den kerki foe na kristenheid wi e feni sma „di abi wan fasi foe frede gi Gado, ma no e sori taki den abi na krakti foe en”. Den no abi wan troetroe boskopoe foe ferloesoe. — Teki gersi Mattéus 7:21-23.
11 Den foeroe sekte foe na kristenheid fiti san Jehovah proféti ben skrifi di a ben taki: „Toe takroe sani de di mi pipel ben doe: Mi [Jehovah Gado], na peti foe libi watra, den ben gwe libi, foe meki gi densrefi alen baki, broko alen baki, di no kan hori watra” (Jeremia 2:13). Fa a de wan troe sani taki den sekte foe na kristenheid ben drai den baka gi na Soeverein Masra Jehovah èn den regtvaardiki gronprakseri di tjari kon na krin na ini en Wortoe. Den e tegoe srefi foe gebroiki en nen. Ma presi foe dati, den ben „meki broko alenbaki”, foe di den go na den filosofie nanga theorie foe libisma, go moksi densrefi nanga na politiek foe na grontapoe. Na ini foeroe kondre den kerki foe a kristenheid de so boen leki den dede, foe di den e mankeri jepi, bika den sma no e feni waarheid watra na ini di e gi den kowroe ati. Na a tra sé na kowroe ati jejefasi de psa marki foe feni na mindri den sma di e dini Jehovah getrow. — Jesaja 55:1, 2; 65:13, 14.
San grontapoe tiriman e taki
12. Foe san-ede a de wan soso sani foe poti fertrow na tapoe den libisma tiriman foe tan na libi?
12 No a bijbel wawan e warskow gi a pori foe na grontapoe. Na disiten sekretarsi-generaal foe den Verenigde Naatsi ben taki, taki wi tanapoe now foe na fosi tron na ini na libisma historia „krosbé na a lanki mindri rampoe nanga tan na libi.” Na ini wan foe den memorandum di ben skrifi kaba na in 1958, na fosten Amerkan president Harry Truman ben taki: „Wi tanapoe now na fesi wan bigi pori foe ala sani . . . A pori dati kon krosbé efoe den bigi grontapoe tiriman no tapoe en.” Ma den „bigi tiriman foe grontapoe” ben doe wan sani na ini den 25 jari di sa kaba foe tapoe taki wan pori foe ala sani kon? Na presi foe dati, den e gi moro leki wan miljoen dollar ini wan minuut na den moro didibri fetisani foe pori sani. Na psalmskrifiman ben skrifi foe den sortoe „bigi grontapoe tiriman” disi: „No poti oen fertrow na tapoe bigi man, no na tapoe na manpikin foe libisma a grontapoe, na soema ferloesoe no de.” — Psalm 146:3.
13, 14. (a) Na tapoe sortoe falsi howpoe den kerki fesiman ben sori? (b) Leki fa Jesaja taki, san de na troetroe howpoe?
13 Na sari situwasi de so taki den naatsi no man foe drai na sani di e kon. Srefi den sokari Verenigde Naatsi e sori taki den de moro wan groepoe di e arki den trobi na mindri kondre leki wan wrokosani foe tjari vréde nanga sékerfasi kon. Paus Paulus VI nanga paus Johannes Paulus II ibriwan foe den ben kon na fesi den Verenigde Naatsi nanga foeroe pranpan. Den ben taki, taki na organisaatsi disi ben de a ’laatste howpoe tapoe wanfasi nanga vréde’ foe libisma. Ma disi de so toe?
14 Jehovah e taki na ini en proféti wortoe foe na troetroe howpoe. A ben meki Jesaja ben taki a fesi foe a gebortoe foe wan manpikin di ben sa tron na „Vrédekownoe”. Disi na Kristus Jezus, di kownoe David foe owroeten ben e agersi. Moro fara den e taki na ini na profétitori di e go foe Jezus: „Na a kownoetiri di de psa marki èn na vréde wan kaba no sa kon, na tapoe na troon foe David, abra en kownoekondre, foe poti disi stéfi, foe kraka en nanga jepi foe geregtigheid, nanga jepi foe regtvaardikifasi, foe now, te ten di no abi marki. Ija, na faja foe Jehovah foe den legre sa doe disi” (Jesaja 9:6, 7). Ma fa a faja foe Jehovah ’sa tjari vréde sondro kaba kon’?
’Na kownoekondre foe Gado’
15. Fa Jezus ben poti howpoe na tapoe na kownoekondre howpoe?
15 Wan sma di bigi moro leki David, Jezus Kristus, ben taki na fesi foe na totale bigi feti èn na benawtoe di e komoto foe disi na ini wi jarhondro di e meki toetenti. A ben taki a fesi foe den kefarlek sani di ben o psa, den broeja skreki foe den naatsi, na frede froewakti foe den sani di sa kon abra na grontapoe. Moro fara a ben taki: „Te den sani disi bigin now foe psa, opo tanapoe letopo dan èn opo joe ede go na tapoe, bika joe ferloesoe e kon krosbé . . . Te joe e si den sani disi e bigin pasa, sabi dan dati na kownoekondre foe Gado de krosbé” (Lukas 21:10, 11, 25-31). A kownoekondre foe Gado! Dja wi abi na loesoe foe den problema foe na libismafamiri. Na ini den jari san psa wi no ben begi foe na kownoekondre dati? Jezus ben komanderi oenoe na ini den wortoe di e kon now foe doe disi: „Oen moe begi na a fasi disi: ’Wi Tata na ini hemel, joe nen moe de santa. Joe kownoekondre moe kon. Joe wani moe psa soleki na hemel, sosrefi toe na grontapoe.’” — Mattéus 6:9, 10.
16. Na sortoe fasi na kownoekondre foe Gado de „krosbé”?
16 Na proféti wortoe e ferteri wi dati na „kownoekondre foe Gado de krosbé” now. Ma na sortoe fasi? A proféti foe Gado Daniël e tjari disi kon na fesi. Baka di a skrifi foe den kownoekondre ofoe tiri foe na libismafamiri na ini a „ten foe na kaba” a e taki: „Na ini den dé foe den kownoe dati na Gado foe hemel sa opo wan kownoekondre di noiti sa kon na wan kaba. Na kownoekondre srefi no sa go abra na wan tra pipel. A sa masi panja ala den kownoekondre disi èn tjari den kon na wan kaba èn ensrefi sa tan te ten di no abi marki” (Daniël 12:4; 2:44). Soboen na grontapoe no sa kon na wan kaba na ini flam faja ini wan nuleaire faja di sa teki grontapoe pe ala libisma libi o pori. Ma presi foe dati na kownoekondre foeGado sa figi ogri sma nanga naatsi poeroe foe wi grontapoe bol, leki wan sreka gi wan tiri di o de abra na heri grontapoe, di o tan na tapoe a skowroe foe na „Vrédekownoe!” — Jesaja 9:6, 7.
Na refensi foe Gado e kon abra den
17. Foe san na kari foe „vréde nanga sékerfasi” sa de na marki?
17 Den profétitori foe na bijbel ben skrifi spesroetoe gi oen ten. Den e sori wi san sa psa na ini a ten di de wantewante na wi fesi. „Bika ala sani di ben skrifi granwe ben skrifi foe leri wi, sodati nanga jepi foe wi horidoro nanga a jepi foe na trowstoe foe den boekoe, oen ben sa abi howpoe” (Romeinisma 15:4). Na proféti wortoe e skrifi foe a „laatste howpoe tapoe vréde” foe libisma, den VN, leki wan redi kloroe wilder meti. O, a kan heri boen taki na organisaatsi disi — krinkrin ini kroderi nanga na charter foe en, è leki wan kontroe foen aprofétitori na ini 1 Thessalonika 5:3 nanga boen foeroe moeiti sa meki wan sortoe degedege vréde kon, sa teki prati na a kari foe „vréde nanga sékerfasi!” Ma dan Jehovah sa boewégi den „toetoe” foe sroedatisani foe den VN na so wan fasi taki den sa pori na falsi fasi foe anbegi, „Babylon na Bigiwan”, foe soema den sekte foe na kristenheid de a pisi di abi moro fowtoe. Te den „toetoe” dati sa bigin foe feti nanga a Lam, Jezus Kristus, foe di den sa fadon go feti nanga den Kotoigi foe Jehovah di lobi vréde, dan Gado sa meki en feti-owroe foe tjari strafoe, kon na tapoe den naatsi dati nanga den legre foe den, „den no s alon komoto kwetkweti”. — Openbaring 17:3-6
18. (a) San sa psa nanga den naatsi di e go feti nanga a pipel foe Gado, soleki Jesaja ben taki? (b) Fa Gado sa sreka na afersi te foe kaba?
18 Den kernfetisani foe den naatsi no sa kibri den na ini na „feti dati foe na bigi dé foe Gado a Almaktiwan”, na feti foe Armageddon (Openbaring 16:14, 16). Efoe den fetisani disi sa gebroiki troetroe nanga a bigi krakti foe den pori sani, dan den sa jepi wawan foe a pori foe den naatsi mindri makandra. Na ini den dé foe na boen kownoe Josafa, féjanti legre ben opo go feti nanga a pipel foe Gado di ben gersi taki den no ben abi wan enkri jepi. Ma nanga a mofo foe en proféti Jehovah ben taki gi den: „No frede, no skreki foe na bigi ipi sma disi; bika a no de wan feti foe oenoe ma foe Gado.” Jebovah ben kori den féjanti dati go na ini wan trapoe sodati den ’feti nanga makandra’ te leki den alamala ben dede (2 Kronieken 20:15-23; teki gersi toe Kroetoeman 7:22; Ezechiël 38:21-23; Zacharia 14:13). Leki kaba foe a tori, na „Kownoe foe den kownoe”, makandra nanga en legre foe engel, sa fri ensrefi foe féjanti te leki na laatste wan di tan na libi ete sa dede. Srefi Satan nanga en ogri jeje sa iti go na ini na peti di no abi gron. — Openbaring 19:11-16, 21; 20:1-3.
19. (a) Sortoe leri wi e kisi foe Genesis 18:23-33? (b) Soema wawan sa tan na libi na ini na „bigi benawtoe”?
19 Ma a no de wan skreki sani dati Jehovah sa pori na heri grontapoe seti, sondro dati oiti wan sani foe en sa kon boen baka? Kande son sma e denki neleki Abraham foe Sodom nanga Gomorra, dati efoe srefi 50, ofoe 45, ofoe 30, ofoe 20 ofoe srefi soso 10 regtvaardiki sma ben sa de foe feni na ini na grontapoe, „na Kroetoeman foe na heri grontapoe” no ben sa figi poeroe krinkrin na seti disi (Genesis 18:23-33). Ma na proféti wortoe e sori krin taki ibri pisi foe Satan grontapoe de onregtvaardiki èn moe figi poeroe krinkrin! (Jeremia 25:31-33; Zefanja 3:8) Na wan enkri „skin” di sa ferloesoe komoto foe na „bigi benawtoe” sa de, soleki Jezus Kristus srefi ben taki, „skin” foe en salfoewan di ben teki poeroe nanga den kompe foe den di gersi skapoe. No wan tra sma Jehovah e teri na ini en ai leki regtvaardiki. — Mattéus 24:21, 22; 25:31-33, 46; Johannes 10:16; Habakuk 3:1, 2, 12, 13.
20. Wi moe de na ai foe doe san na ini den laatste dé disi leki Kotoigi foe Jehovah?
20 Na proféti wortoe foe Jehovah tan „haribro” teleki a kon troe te foe kaba. Wi moe tan „loekoe nanga froewakti na disi” (Habakuk 2:3). Meki wi leki Jehovah Kotoigi, foe dat’ede meki bekenti fri èn sondro frede „na dé foe refensi foe na sé foe Gado,” neleki Jezus apostel di ben e taki „fri” foe trowstoe den sma di ben e sari nanga na boen njoensoe foe ferloesoe (Jesaja 61:1, 2; Tori foe den Apostel 4:8-13, 18-20). Meki wi de na ai toe foe poti prakseri na tapoe den wortoe foe Jezus: „Poti prakseri na joesrefi, foe joe ati noiti kon hebi nanga njan èn dringi pasa marki èn sorgoe foe na libi èn na dé dati kon wantewanten na ini wan momenti abra joe leki wan trapoe. Bika a sa kon abra ala sma di e libi tapoe na heri grontapoe. Tan na ai, e begi alaten taki joe man foe psa den sani di o psa troetoe èn foe tanapoe na fesi na Manpikin foe libisma.” — Lukas 21:34-36.
San joe ben sa piki?
◻ Sortoe leri wi kan feni na ini 2 Petrus 1:16-19 nanga tekst di de krosbé nanga dati?
◻ Sortoe winimarki a e tjari kon gi wi te wi ’poti prakseri na tapoe na proféti wortoe’?
◻ Leki fa den profétitori taki, san de krosbé, foe san-ede wi no moe de nanga frede?
◻ San wi moe doe now di a „dé foe refensi” foe Gado e kon krosbé?
[Prenki na tapoe bladzijde 4]
„A feti a no foe joe, ma foe Gado”