Gado Wortoe abi libl

Soema de troetroe wi naaste?

Wan kroetoeman, wan man di sabi na wet di Gado ben gi Israëlsma, ben opo tanapoe wan dé foe tesi Jezus di a taki: „Leriman, te mi e doe sortoe sani, mi sa kisi tégo libi?” Te a kisi na piki dati wan sma moe lobi Gado dorodoro èn a moe lobi en naaste leki ensrefi, na kroetoeman e aksi: „Soema de dan mi naaste?” Jezus e gi leki piki na tori di a e ferteri now:

Wan djoe ben waka foe Jeruzalem go na Jericho. A man e fadon na ini a anoe foe foefoeroeman, di e poeroe ala sani na en skin, e naki en èn e libi en a baka bijna afoe-dede. Na situwasi ben loekoe takroe bikasi a man no abi foe libi langa moro efoe a no kisi jepi.

We, so Jezus e go moro fara. Toevallig wan priester e waka psa a pasi dati. San a e doe? A no e stop srefi pikinso. Sondro sari na ati a e waka lontoe a man èn a e waka en pasi go.

Baka wan pisten wan leviet e kon, ete wan man di abi na grani foe dini na ini na tempel. Ma ensrefi no e firi sari na ati èn e waka psa sondro foe pristeri jepi na a tra sé foe a pasi.

Ma loekoe pikinso soema na a man di e jepi na djoe di den naki flaw. A de wan Samaritaansma. Disi na wan ferwondroe sani foe di djoe nanga Samaritaansma de féjanti foe makandra. A bijbel e taki: „Djoe no e hori matifasi nanga Samaritaansma”. — Johannes 4:9.

Na Samaritaansma no wawan e tai den soro foe a man èn bakadati opo en poti na tapoe en égi meti, ma a e tjari en go na wan pension èn e tan drape wan pisiten foe sorgoe foe en èn bakadati a e teki, soleki joe kan si, moni foe na waarde foe toe dé moni èn a e gi na a pension-man nanga den wortoe: „Sorgoe gi en, èn san joe sa abi moro fanowdoe leki disi, mi sa pai joe te mi drai kon baka.”

Te Jezus kon klari nanga en tori, a e drai loekoe na kroetoeman èn a e aksi: „Soema foe den dri man disi, leki fa joe prakseri, sori ensrefi leki a naaste foe a man di ben fadon ini na anoe foe foefoeroeman?” Na kroetoeman e piki: „Na sma di ben sori sari ati gi en.” Tapoe disi Jezus e taki: „Go èn doe so toe.” — Lukas 1:25-37.

Fa disi de wan toemsi moi leri di wi alamala kan kisi foe disi! Libisma awinsi sortoe ras, kloroe, nationaliteit ofoe maatschappelek positisi den de, de te now ete wi naaste. Èn efoe wi wani kisi tégo libi dan wi moe lobi den èn doe sani gi den na wan switifasi.