Orga foe dini Jehovah
„Foe dat’meki mi e libi joe na baka na Kreta, sodati joe ben sa orga ala sani drape.” — TITUS 1:5, The Jeruzalem Bible.
1. San na fosi president foe den Verenigde Staten ben skrifi foe féjantifasi di e doe kon foe wan difrenti na ini kerkidenki?
NA INI wan persoonlek brifi, nanga na datum 20 oktober 1792, na fosi president foe den Verenigde Staten, George Washington ben skrifi: „Foe ala den féjantifasi di ben de na mindri libisma, dan den wan di ben kon foe wan difrenti ini bribi, de den wan di de moro dipi, moro sari wan èn di wi moesoe trowe moro. Mi ben howpoe dati nanga na liberaal firi di e marki a pisiten disi, kristensma foe ibri groepoe ini ibri geval ben sa meki vréde nanga makandra na so wan fasi dati wi bo si dati den kerki trobi foe den noiti ben sa kon so bigi moro dati na vréde na ini na libi-makandra e kon ini kefar nanga dati.”
2. Fa son sma ben doe nanga na bigi difrenti foe fasi foe anbegi?
2 Na ini a ten disi foeroe sma e sari foe na bigi difrenti di de ini fasi foe bribi èn den e tegoe gi ibri banti nanga kerki. Tra sma de wan lidmaat foe wan kerki ma den e taki foe den égi ’persoonlek mati-fasi nanga Gado’. San de den troe tori dan? Gado e bemoei soifri tapoe wan persoonlek basis nanga libisma? San na bijbel e sori?
Gado e broko-ede nanga oen?
3. Fa joe ben sa piki nanga jepi foe tekst na aksi efoe Gado e broko en ede nanga wi leki aparti sma?
3 Na bijbel e tjari kon na krin dati Jehovah foe troe e broko-ede nanga aparti sma. Tapoe na kontren foe libisma demakandra tanapoe foe eksempro ini a Wortoe foe Gado den wortoe disi soleki: „A sma di e spotoe nanga a sma di no abi, ben kosi en Mekiman.” „En di e bedrigi na mendriwan, ben kosi en Mekiman, ma soema e sori boen-ati gi na pótisma, e gi grani na En”, dati wani taki, Jehovah Gado (Odo 17:5; 14:31). Te joe loekoe en boen dan „Gado ben lobi na grontapoe [na libisma-famiri] sote dati a ben gi en wan enkri-gebore Manpikin, sodati ibri sma di e sori bribi ini en no ben sa pori, ma ben sa abi tégo libi” (Johannes 3:16, 36). Boiti dati, na apostel Petrus ben taki: „Mi e si troetroe dati Gado no e teki partij, ma na ini ibri naatsi na sma di e frede en èn e wroko regtvaardikifasi a de teki en” (Tori foe den Apostel 10:34, 35). Jehovah e broko en ede soboen troetroe nanga aparti sma èn e feni den sma boen di e frede en èn di e handri ini regtvaardikifasi.
4. Sortoe aksi e kon na fesi foe wi loekoe?
4 Na ini a bijbel tanapoe ooktoe: „Jehovah e sabi den sma di de foe en” (2 Timotéus 2:19). Ma disi wani taki dati libisma di de na ala pe na ini den foeroe kerki orga di na grontapoe e teri de boen a Gado? Noso wi moe ferwakti dati den sortoe sma disi ben sa sroiti densrefi na wan èn ben sa dini Jehovah na wan orgafasi?
Jehovah — Wan Gado foe orga
5. Den santa engel e doe wroko onafhankelek foe Jehovah?
5 Na Wortoe foe Gado di skrifi ondro en santa jeje krakti e meki wi kon si a fasi fa en e doe sani. Loekoe foe eksempre den hemel pikinso di wi no kan si. Drape broeja de? Kwetkweti! Den miljardmiljard jeje mekisani no e wroko so maar èn onafhankelek foe Jehovah. Na presi foe dati wi e lési: „Blesi Jehovah, o oenoe en engel, kefarlek ini krakti, di e doe en Wortoe, e arki na a sten foe en Wortoe. Blesi Jehovah ala oen legre foe en, oenoe en dinari, di e doe en wani” (Psalm 103:20, 21) A de krin dati den santa engel orga boen foe dini Jehovah
6. Leki san na osofamiri foe Noach ben bigin baka na Froedoe?
6 Ma san wi kan taki foe na kontren foe na libismafamiri? We, na Froedoe na ini a ten foe Noach ben meki wan kaba kon na ala orga di ben de kande bifo a Froedoe ben kon na grontapoe — ma boiti wan orga. Noach nanga den sébi trawan di ben psa na Froedoe libilibi, ben komoto kon na dorosé foe na ark leki wan osofamiri orga. Na wánfasi anbegi foe Gado ben de gi en wan afersi di ben de moro prenspari moro ala tra sani, bika wi e lési: „Ne Noach bow wan altari gi Jehovah èn a ben teki foe ala krin meti èn foe ala krin mekisani di e fré èn tjari bron-ofrandi tapoe na altari.” Den sma di ben psa libilibi na Froedoe na ini a tori foe bribi no ben go direkt den ègi pasi ma alamala ben de makandra gi a prenspari sani disi di ben psa èn di ben tjari blesi èn leri kon èn wan ferbontoe di Gado ben meki (Genesis 8:8–9:17). Ija, baka na Froedoe na osofamiri foe Noach ben bigin wroko leki wan orga di ben dini Jehovah.
7. San wi e leri foe na orga na ini a boekoe Exodus?
7 Den bakapikin foe Abraham Jehovah ben blesi foeroe èn no wan sma kan taki taki a no ben de so dati te foe kaba den ben tron wan nationaal orga. Na bijbelboekoe Exodus wawan e meki wi si fa den ben kon fri foe katibo foe Egypte èn ben orga tron wan theokratisi! Na boekoe e meki sma sabi Jehovah leki na Gado foe theokratis orga. Efoe den Israëlsma ben gi jesi na a Wet foe Gado, dan den ben kan anbegi en leki wan ordelek, prisiri organisaatsi di e feni kibri. A no de foe taki dati den ben orga foe dini Jehovah.a
8. San e sori dati na dienst na ini Jehovah grontapoe santa presi ben orga boen?
8 Na dienst na ini Jehovah grontapoe santa presi ben sori taki a ben orga toemsi moi. Foe den Levietsma wi e lési foe eksempre: „David orga den na ini afdeling akroederi den manpikin foe Levi: Gerson, Kehath èn Merari”. Na net so toe na „afdeling foe den manpikin foe Aäron” ben poti. Nanga jepi foe Zadok èn Achimelech, „[David] ben orga den akroederi na wroko ini a dienst foe den di den ben kisi . . . den ben orga den akroederi na lot”. Foe den ten a baka wi e lési: „Jojada ben poti waktiman a fesi na oso foe Masra na ondro na tiri foe den Leviet priester èn den Leviet di David ben orga foe hori loekoe na tapoe na oso foe Masra foe tjari bronofrandi gi Masra, soleki skrifi ini a wet foe Mozes nanga prisiri èn nanga singi, soleki David ben komanderi” (1 Kronieken 23:2-6; 24:1-6; 2 Kronieken 23:18, Revised Standard Version) Ija, den afdeling foe priester nanga Leviet ben orga foe dini Jehovah.
Fa a de nanga na kristendom
9. Sortoe bewijsi de dati Jezus Kristus ben orga en bakaman foe na dini foe Jehovah?
9 Di Jezus Kristus ben de na grontapoe, a no ben taki gi ala sma di ben e bribi na ini en dati den ben moe go den égi pasi èn ben moe poti prakseri soso tapoe wan ’persoonlek matifasi nanga Gado’. Na presi foe dati discipel ben kon makandra lontoe Jezus èn a mindri den a ben teki twarfoe man leki apostel. A ben verkisi den baka di a ben psa wan neti na ini begi; a ben de foe dat’ede wan teki foe sma di Jehovah ben feni boen èn di ben doe kon nanga jepi foe en (Lukas 6:12-16). Disi e sori na tapoe orga di ben abi na jepi foe Gado. Boiti dati Jezus ben orga en bakaman kon tron wan groepoe foe kownoekondre prékiman di ben kisi boen instructie. A sori foe eksempre den sani di ben de fanowdoe na den 70 discipel di a ben seni go na tapoe wan orgafasi. — Lukas 10:1-24.
10. Fa e kon na krin foe na bijbel dati Jezus ben orga en fosten bakaman boen?
10 A de kon na krin foe den kristen Griki boekoe dati Jezus fosten bakaman ben orga boen. Den no ben bow wawan na tapoe na persoonlek lési foe na bijbel. Nono, gemeente ben opo di ben kon geregeld makandra foe stoeka a Wortoe foe Gado. Den gemeente disi no ben de groepoe di ben de tapoe densrefi èn di ben de onafhankelek ma den ben e wroko na ini lobi makandra. Foe eksempre, gemeente ben seni switi odi gi makandra èn groepoe di ben orga na ini Macedonië ’ben tan begi foe na grani foe gi wan sani’ foe jepi den mofina „santawan” na wan tra presi (1 Korintesma 16:19, 20; 2 Korintesma 8:1-7; Kolossesma 4:14-16). Ija, den fosten kristen gemeente ben wroko nanga makandra na ondro na tiri foe wan tiriskin di ben de foe apostel nanga owroeman na Jeruzalem. — Tori foe den Apostel 15:1–16:5.
11. Foe san-ede wi moe ferwakti dati „Gado gemeente” ben orga boen?
11 Na apostel Paulus ben jepi ini a opo foe wantoe foe den boen orga gemeente di ben doe kon foe di Gado ben blesi na prékiwroko. Boiti foe dati, Paulus ben taki dati Jehovah „no de wan Gado foe broeja ma foe vréde”. Na apostel ben sori a tapoe dati „Gado ben orga na skin [foe Jezus Kristus salfoe bakaman]” soleki a ben plisi en. Foe dat’ede meki wi moe ferwakti dati „Gado gemeente” ben orga boen èn ben sa wroko na ini vréde èn wánfasi. — 1 Korintesma 14:33; 12:24, The Riverside New Testament; 1 Timotéus 3:5.
12, 13. (a) San ben taki foe den gemeente di den apostel foe Jezus ben orga? (b) Soema e doe den gemeente afersi a mindri Jehovah Kotoigi, akroederi na model foe na fosi jarhondro?
12 Na historia skrifiman J.L. von Mosheim ben skrifi foe na orga foe Jezus bakaman: „Efoe . . . den apostel foe Jezus Kristus tapoe na komando foe Gado èn na ondro a tiri foe Gado ben handri, wan sani foe san no wan enkri kristen kan degedege foe en, dan wi moe si a structuur dati foe na primitief kerki di den ben kisi foe na kerki foe Jeruzalem, di den apostel srefi ben opo èn orga, leki a kon foe Gado.” — Institues of Ecclesiastical History, Ancient and Modern, Deel I, bladzijde 67, 68.
13 Jehovah Kotoigi abi na overtoigi taki den fosi-jarhondro gemeente foe Jezus bakaman ben orga akroederi na wani foe Gado. Akroederi na model dati meki foe dat’ede ini a ten disi na mindri den Kotoigi opziener nanga dinari ini na diniwroko e poti foe doe gemeente afersi nanga jepi foe na santa jeje. — Tori foe den Apostel 20:28; Filipisma 1:1.
14. (a) Fa ai ben hori a tapoe den fosi jarhondro kristen gemeente? (b) Foe san-ede na apostel Paulus ben libi Titus na Kreta a baka?
14 Na ini na fosi jarhondro den apostel nanga den owroeman na ini Jeruzalem ben abi na algemene loekoe tapoe den gemeente, ala di sonwan na tapoe bepaalde kontren ben abi na loekoe èn wan séker marki foe makti den ben kan gi abra na trawan (Tori foe den Apostel 14:21-23; 15:1, 2). Na so na apostel Paulus ben gi na kristen opziener Titus na wroko foe sorgoe gi bepaalde afersi tapoe na eilanti Kreta na ini na Middellandse se. Ini akroederi nanga dati meki Paulus ben taigi Titus: „Foe dat’ede, mi ben libi joe na baka na Kreta, sodati joe ben kan ala sani drape èn ben sa poti na ini ibri foto owroeman, na a fasi di mi ben taigi joe” (Titus 1:5, JB). Wi kan de toemsi séker foe en dati den instruktie di de foe feni na ini a brifi di skrifi gi Titus, ben jepi en foe doe a wroko foe en sodati den kristen di ben e libi drape ben orga boen foe dini Jehovah.
Foe san-ede wi moe orga wisrefi boenboen
15, 16. Foe sortoe réden di ben kari dja wi kan taki dati sma di Jehovah ben teki, no kan abi soso wan ’persoonlek matifasi nanga Gado’ èn no kan de panjapanja na ini ala kerkigroepoe di grontapoe sabi?
15 Te ofara wi ben sori nanga jepi foe na bijbel dati wan boen orga de wan merk foe Jehovah dienstknegti na ini na ten di psa. Den omstandigheid na ini a ten disi no de tra fasi. Foe dat’ede a de gi Jehovah disiten Kotoigi réde foe orga densrefi boenboen.
16 Sma di Jehovah e teki, no kan abi alamala wan ’persoonlek matifasi nanga Gado’ èn de panjapanja ini ala kerkigroepoe di a grontapoe sabi. Jehovah e aksi troe anbegi èn de so fara foe tjari wan kaba kon na Babylon a Bigiwan, na grontapoe makti foe falsi anbegi (Johannes 4:24; Jakobus 1:27; Openbaring 18:1-8). Moro fara den e aksi wanfasi foe wan troe kristen. Spesroetoe na ini a ten disi den moe de makandra na ini wán orga efoe den wani gi jesi dorodoro na a rai foe na apostel Paulus: „Now mi e fermane oenoe, brada, na a nen foe Masra Jezus Kristus, dati oen alamala taki nanga makandra na ini wánfasi èn dati pratifasi no de na oen mindri, ma dati oen de krosbé na ini wánfasi ini na srefi jejefasi èn ini na srefi fasi foe prakseri.” — 1 Korintesma 1:10.
17. Fa den wortoe na ini Hebrewsma 10:24, 25 e sori dati dienstknegti foe Gado èn Jezus Kristus alamala moe de wan pisi foe wán orga?
17 Boiti foe dati, troe kristen no mag libi a miti makandra tapoe den komakandra di e hori geregeld. Disi de spesroetoe na ini a ten disi so, now di na kaba foe na seti foe sani disi e kon krosbé (Hebrewsma 10:24, 25). Efoe troe dienstknegti foe Jehovah Gado nanga Jezus Kristus wani waka na baka na rai dati, dan a no de foe taki taki den alamala moe de wan pisi foe wán orga.
18. (a) Fa e kon na krin na ini 1 Johannes 1:3 dati ala salfoe kristen moe de makandra na ini wán orga? (b) Soema na ini a „ten disi foe na kaba” ben sori densrefi na Jezus bakaman di ben kisi salfoe nanga jeje, èn san de den troe tori foe na wroko makandra na mindri ala Kotoigi foe Jehovah?
18 Na bijbel e aksi dati Jezus salfoe bakaman de nanga makandra. Ini a tori disi na apostel Johannes ben skrifi: „San wi ben si èn jere, wi e ferteri na oenoe ooktoe, sodati ooktoe oen kan abi solidariteit [pisi, demakandra] nanga oenoe. Èn boiti foe dati, na solidariteit foe oenoe de nanga a Tata èn nanga en Manpikin Jezus Kristus” (1 Johannes 1:3; Byington; Njoen Grontapoe vertaling; Authorized Version). Efoe Jezus salfoe bakaman ibriwan foe den ben sa de nomo ’na ini wan persoonlek matifasi nanga Gado’ èn no ben tjari kon na wan na ini wán orga, dan fa den ben kan njan prisiri na ini na solidariteit disi noso kan abi demakandra, deelgenootschap nanga makandra? Den kan doro na marki disi wawan te den orga densrefi. Na ini a ten disi wan „bigi ipi” foe „tra skapoe” ben sroiti densrefi na den bakaman foe Jezus di ben kongebore njoen nanga jeje. Leki fa Jezus ben taki foe sma di ben gersi skapoe, dan wi moe ferwakti dati den „tra skapoe” disi ben sa wroko nanga en salfoe bakaman makandra dorodoro dati den alamala makandra ben sa de „wán ipi” na ondro en leki na ’wán Herder’ (Openbaring 7:9; Johannes 10:16). Èn dati de precies na situwasi di wi e feni na mindri Jehovah Kotoigi na ini a „ten disi foe na kaba” (Daniël 12:4). Leki wán grontapoe bradafasi ala Kotoigi foe Jehovah orga boen foe dini Gado. — Teki gersi 1 Petrus 2:17.
19. Foe san-ede a e aksi wroko makandra na inisé foe wán orga di a jeje e tjari na ini a doe foe na préki wroko?
19 A doe foe na komando foe préki èn a meki foe discipel, e aksi ooktoe wroko makandra na inisé wan wánfasi orga (Mattéus 28:19, 20; Tori foe den Apostel 1:6-8). Efoe ibri sma di e taki dati a de wan kristen ben sa de nomo na ini wan persoonlek matifasi nanga Gado èn ben sa sroiti ensrefi zomaar na wan noso tra kerkigroepoe — fa na komando foe gi kotoigi ben kan kon troe? A ben sa wani taki son sma ben sa teki „Sjiboleth” èn trawan „Sibboleth” (Kroetoeman 12:4-6). Fa sma di ben sa jere den sortoe boskopoe disi di no e taki a srefi sani, ben sa kon sabi san den ben sa moe bribi? Salfoe kristen moe go denki ’tranga foe kibri na wanfasi foe na jeje na ini na banti foe vréde di e tjari sani kon na wan’, èn na mindri den soso ’wán Masra, wán bribi, wán dopoe; wan Gado nanga Tata, ala sma moe de’ (Efesesma 4:1-6). Efoe sma wani jere na soifri waarheid, poti opregti bribi na ini na troe Gado, èn kari Jehovah nen nanga na ferwakti foe kisi jepi, dan ala troe kristen moe agri nanga makandra foe abi wan boskopoe di e taki a srefi. Boiti foe dati, wán organisaatsi di na jeje e tjari moe gebroiki na ini a tori foe na sani foe den waarheid getrowprékiman dati foe na „boen njoensoe”. — Romeini 10:11-15.
20. Soso sortoe orga e meki Mattéus 24:14 kon now troe, èn sortoe bewijsi de dati na wroko disi di orga boen abi na boen ai foe Gado?
20 Dan disi e kon ooktoe a tapoe ini akroederi nanga Jezus profétitori foe en „denoja” nanga „na bosroiti foe na seti foe sani”, dati wan wán fasi orga moe de toe di e ’préki na boen njoensoe foe na kownoekondre na ini na heri grontapoe leki wan kotoigi gi ala naatsi bifosi na kaba kon’ (Mattéus 24:3, 14). Na ini na ten disi soso Jehovah Kotoigi e ferteri na boen njoensoe dati na kownoekondre e doe wroko nanga Jezus Kristus leki kownoe foe sensi 1914 na ini Hemel. Moro leki 2.650.000 foe den kownoekondre prékiman disi di orga boen de èn na groepoe foe den e gro es’esi bika Gado e blesi den. — Jesaja 43:10-12; 60:22.
21. San wi e go loekoe tra tron na ini a tori foe Jehovah orga?
21 Fa a de wan grani na ini den moeilek „laatste dé” disi foe de wan pisi foe den bigi ipi di orga so boen foe dini Jehovah! (2 Timotéus 3:1). Gi ala sma di nanga den heri ati de foe Gado, dan wan boen bijbel fundamenti de foe tan dini loyaal nanga en orga pipel. Èn soleki wi kan si, dan boen réde de foe bow nanga Jehovah organisaatsi na wan séker èn kolokoe ten di de na wi fesi.
[Foetoewortoe]
San joe ben sa piki?
◻ Fa den santa engel e wroko na ini wan matifasi nanga Jehovah?
◻ Sortoe bewijsi de dati na owroe Israël ben orga boen?
◻ Fa joe ben sa bewijsi nanga jepi foe na bijbel dati den fosten bakaman foe Jezus ben orga boen?
◻ Foe san-ede meki na préki foe na kownoekondre boskopoe e aksi wroko makandra na a sé foe wán organisaatsi?
[Prenki na tapoe bladzijde 2]
Ini den dé foe David den ben orga afdeling foe priester nanga Levietsma foe dini Jehovah
[Prenki na tapoe bladzijde 3]
Na tiriskin ben sorgoe foe a tiri foe den fosi-jarhondro gemeente di ben orga heri boen