Abi warderi gi na pisi goedoe foe joe di joe moe kisi?

„Feti na baka vréde. . ., aladi joe e loekoe boen. . . dati no wan hoeroeman de, èn ooktoe no wan sma di no abi warderi gi santa sani, soleki Esau, di foe wan preti njanjan ben gi en reti leki fosi geborewan gwe.” — HEBREWSMA 12:14-16.

1, 2. (a) San wl e ferstan na ondro wan goedoe ofoe wan pisi foe wan goedoe? (b) Sortoe aksi e kon na fesi ini na tori foe wan pisi foe goedoe di moro hé?

SMA ben kiri trawan foe dati. Trawan ben dede, sondro dati den ben kisi en oiti. Foeroe sma di ben kisi en wel, ben pori en. San na dati dan? Wan goedoe di de foe kisi. Èn so a e go foeroe ten efoe goedoe na skinfasi de foe kisi.

² Na bijbel e taki 229 tron foe goedoe foe kisi ofoe pisi foe goedoe foe erf, èn moro foeroe geval a e go dan foe na kisi foe doti ofoe sani. Ma Gado Wortoe e taki ooktoe foe wan pisi foe goedoe di de moro hé leki ibri goedoe di wan sma kan kisi nanga jepi foe wan testamenti. Èn na pisi foe goedoe dati di e pasa ala trawan, joe kan kisi, efoe joe no wiswasi en. San na a pisi foe goedoe disi? Soema e gi en? Foe san-ede son sma e lasi en? Fa wi kan sori warderi gi en?

San na a pisi foe goedoe disi?

3. San na a pisi foe a goedoe foe wan kristen, èn foe soema a e komoto?

³ Di den djoe na ini Antiochië ben trowe na boskopoe foe ferloesoe di Paulus ben préki, a ben drai go a den no-djoe, na den „di ben komoto foe den naatsi”. Den now „ben prisiri. . . èn ben prijse a wortoe foe Jehovah, èn ala sma di ben abi na joisti jejefasi gi na tégo libi ben tron bribiman” (Tori. 13:45-48). Ija, na pisi foe goedoe de na tégo libi. Gi wantoe sma disi wani taki „wan goedoe di no e pori èn di no flaka èn di no e flaw . . . na ini den hemel”. Foe soema a goedoe komoto? Foe „na Gado èn Tata foe wi Masra Jezus Kristus”, Petrus ben taki. — 1 Petr. 1:3, 4.

4. Sortoe pisi foe wan goedoe a moro bigi pisi foe na libismafamiri kan kisi?

⁴ Ma fa a de nanga na moro bigi pisi foe na libismafamiri, di no abi wan hemel howpoe? A pisi foe a goedoe foe den kan de volmaakti libi leki sma di de wan pisi foe na „njoen grontapoe”, wan njoen maatschappij foe libisma di bai kon fri nanga na jepi foe na srakti-ofrandi foe Jezus Kristus. A e gi na mogelekheid foe tégo libi tapoe wan planeet di kon meki njoen baka èn pe a doti di sma e doti sani no sa de (Openb. 11:18; 21:3, 4; Joh. 17:3). Fa joe ben sa feni en foe loekoe na a sani disi foe kon leki wan pisi foe a goedoe foe joe? Èn efoe joe e doe dati kaba, joe e warderi a pisi foe a goedoe dati dan troetroe?

Wan gebortoe reti di den ben wisiwasi èn di den ben warderi

5, 6. (a) Soema Esau nanga Jakob ben de? (b) San ben de so spesroetoe ini a tori foe na pisi ofoe a goedoe foe den, èn soema ben de a moro prenspari wan di ben sa kisi a boen-ati dati?

⁵ Foe kan ferstan moro boen na afersi disi foe warderi foe wan goedoe, a boen foe loekoe sjatoe na eksempre foe toe brada. Na wan ben abi bigi warderi gi jeje waarde aladi a trawan ben lasi en warderi gi dati èn nanga dati ben lasi wan toemsi waarti goedoe. A ben de Jakob nanga Esau, den twelengi manpikin foe na Hebrew famiri edeman Isaäk.

⁶ A grantata foe den Abraham ben dede di den ben abi tinaféfi jari. Na goedoe na skinfasi di a ben libi a baka gi en manpikin Isaäk ben de bigi ipi meti èn wan gron pe wan bergi-olo ben de na ini di ben moe gebroiki leki famiri-ber’pe (Gen. 25:5-10). Ma na moro prenspari pisi foe na goedoe no ben abi foe doe nanga goedoe na skinfasi ofoe wan sani di joe ben kan hori nanga anoe. A ben de na pramisi di Jehovah ben gi Abraham èn bakaten ben taki en ete wantron gi Isaäk: „Nanga jepi foe joe siri ala naatsi foe grontapoe séker sa blesi densrefi” (Gen. 22:18; 25:24-26; 26:2-5). Nanga dati ben kon na krin dati na Messias — di troetroe ben de na pramisi „siri” foe Genesis 3:15 — ben sa kon na ini wan pisten na ini a ten di o kon via na famirilin foe Abraham. Foe di Esau ben de na fosi geborewan foe na twelengi dan na a dede foe en papa Isaäk a ben sa abi na wettelek reti tapoe na pramisi disi, èn ooktoe tapoe wan dobroe pisi foe den goedoe na skinfasi. Na aksi de now: A ben abi warderi gi na pisi foe na goedoe foe en?

7. Na sortoe fasi Esau nanga Jakob ben kenki foe makandra te joe loekoe na warderi nanga persoonlekheid foe den? (Gen. 26:34, 35; 28:6-9)

⁷ Di na twelengi ben kon moro owroe, ben kon na krin dati den ben abi wan persoonlekheid di ben kenki krinkrin. Esau ben de wan ontiman di no ben abi rostoe, „di e waka lontoe moro foeroe na ini na firi”, aladi Jakob „ben de wan man sondro fowtoe”, wan sma di ’ben lobi wan geregeld libi’ (Gen. 25:27, Bigi Njoensoe Bijbel; Njoen-Grontapoevertaling). Di wan dé Jakob ben bori wan njanjan foe linzen, Esau ben kon na oso komoto foe a firi èn a ben weri te foe dede, èn a ben abi angri. „Esau dan ben taigi Jakob: ’Meki grantangi mi slorpoe es’esi pikinso foe na redi dati — na redi dati drape, bika mi weri!’” — Gen. 25:30.

8. Sortoe onfroewakti aksi Jakob ben aksi en brada, èn fa Esau ben doe tapoe dati?

⁸ Tapoe a momenti dati Jakob ben aksi en twelengi brada wan aparti sani. A ben taki: „Seri gi mi fosi dan joe fosi gebortoe reti!” (Gen. 25:31). A ben aksi foe na pisi foe a goedoe foe Esau ini a presi foe na preti linzen! Joe denki dati Jakob ben abi foeroe howpoe dati na kenki disi ben abi tjans foe waka boen? A de krin dati a ben prakseri dati. Foe san-ede? Foe di a ben sabi den firi foe en brada èn a ben sabi sortoe waarde a ben abi gi en. A ben loekoe a sani na wan fowtoe fasi? Esau, di troetroe ben taki pasa marki foe a toestand foe en skin, ben piki: „Mi e dede foe angri . . . san mi abi na den reti dati”! Gen. 25:32, GNB.

9. Fa Esau ben de tra fasi leki en brada na ini a tori foe na pisi foe na goedoe?

⁹ Wan ségelmarki ben poti na tapoe na kroederi nanga jepi foe wan sweri, èn Jakob ben gi en brada brede èn na njanjan foe linzen. Esau ben njan en èn ben gwe. Dan a tori di skrifi nanga jepi foe santa jeje e taki nanga krakti: „So pikinso waarde a ben gi na en reti leki moro owroe manpikin” (Gen. 25:32-34 GNB). Ma fa Jakob ben abi wan bigi warderi kontrari nanga dati gi na fosi gebortoereti! A no ben e feti na baka goedoe na skinfasi — wan gron nanga wan ber’pe èn wantoe meti. A ben wani taki na pramisi Messias siri ben kon via na famirilin foe en. A ben wani na jejepisi toe na goedoe. — Teki gersi nanga Mattéus 6:31-33.

Joe ben sa kenki na pisi foe na goedoe foe joe

10. (a) Sortoe moi sani Paulus ben taki na ini a tori foe Esau? (b) Sortoe verband de a mindri hoeroedoe nanga na lasi di Esau ben lasi en fosi gebortoe-reti?

¹⁰ Sowan tinanégi hondro jari pasa kaba na apostel Paulus ben gebroiki na eksempre foe Esau foe warskow den fosten kristen. A ben taki: „Feti na baka vréde nanga ala sma . . . aladi joe e loekoe boen dati den no foefoeroe foe no wan sma na no-ferdini-lobi-boenfasi foe Gado . . . èn dati no wan hoeroeman de èn ooktoe no wan sma di no abi warderi gi santa sani, soleki Esau, di foe wán préti njanjan ben gi den reti foe en leki fosi geborewa gwe.” Foe san-ede meki Paulus e tjari wan hoeroeman kon akroederi nanga a libifasi toe Esau? Foe di wan jejefasi soleki di foe Esau kan tjari wan sma go na a mankeri di a abi gi warderi gi santa sani èn disi moro fara kan go na ini moro serjoesoe sondoe, soleki hoeroedoe. — Hebr. 12:14-16.

11. San ben psa nanga son kristen na ini a ten disi?

¹¹ Joe e kon na ini na kori foe kenki na kristen pisi foe a goedoe, na tégo libi, wan sani di e lasi soleki wan preti linzen? Joe e ferakti kande sondro foe joe sabi ’santa sani’? Den ten di ben pasa foe eksempre, son kristen ben fadon gi na disiten morele gi pasi na sani. A gersi taki den no ben abi pasensi leki Esau te a e go foe na prisiri foe wan lostoe na skinfasi. Net soleki Esau ben taigi Jakob: „Gi mi es’esi pikinso foe na redi sani dati foe joe”, den no ben taki te joe e loekoe en leti: „Es’esi! Foe san-ede meki wi sa wakti te leki wi trow?” — Gen. 25:30, GNB; teki gersi nanga Genesis 34:1-4.

12. (a) Fa son sma ben sori dati den no abi warderi gi santa sani? (b) Ma sortoe fasi foe libi sonwan ben teki?

¹² Èn san ben pasa soboen? Na lostoe foe abi seksprisiri awinsi san e pasa ben tron na ’preti linzen’ gi den. Foe dati e kon na doro dati den ben ferakti santa sani, èn ooktoe na matifasi foe den nanga Jehovah èn Jezus Kristus. Den ben wiswasi soifri-retifasi, getrowfasi èn krin libi. Den ben poti na pisi foe na goedoe foe den na ini kefar. Ma sonwan foe den bakaten ben go kisi opregti beraw èn a de krin dati den ben wini na boen nen foe den baka na Gado. — Teki gersi nanga Psalm 51.

Fa a doe kon dati son sma e fadon

13. Sortoe sani kan njan wi jeje waarde na ondro?

¹³ San de na oorzaak foe den hoeroedoe firi disi? A ben sa kan de dati den sma disi ben meki den njan den jeje waarden foe den na ondro? Someni sani kan abi wan verraderlek krakti tapoe wi denki — mati nanga famiriman di no abi den srefi gronprakseri ini den denki leki wi, srefi jeje swaki sma ini a gemeente, wan loesoefasi foe libi a tapoe joe wrokope, degedege ontspanning nanga boekoe, wan fowtoe soekoe na lobi èn firi na sma di no de ini bribi. Ala den sani disi kan tjari wi go na ini hoeroedoe. A kan de dati tapoe na momenti disi wan foe den sani disi abi krakti ta tapoe na waarde bepaling foe joe? — 2 Kor. 6:14; 2 Thess. 3:6.

14. Sortoe kefar de ini a ten disi na ini foeroe foe na prisiri di de?

¹⁴ Joe e si foe eksempre dati joe e loekoe televisieprogramma ofoe film pe den e loekoe pasa hoeroedoe èn srefi e meki a go na fesi? Wi moesoe agri dati den sortoe film disi de toemsi kefarlek moi gi na fadon skin leki wan draiwatra di e soigi den sma di no de nanga ai gwe. Den kan abi wan finifini krakti na tapoe joe denki. Disi e kon krin foe na tranga krakti di homoseksueelsma abi na ini na prisiri foe a grontapoe. Den meki film nanga komediepré pe den e taki boen foe homoseksualiteit. A bakapisi de dati san fosten sma ben si leki wan takroedoe, now den e kari na wan trafasi „wan tra libifasi”! Wi doro na situwasi di na apostel Paulus ben skrifi foe en: „Den lasi ibri ferstan foe boen gwenti, den ben gi densrefi abra na loesoefasi foe libi foe doe na wan gridifasi ala sortoe doti libi.” — Ef. 4:19; 1 Kor. 4:4; Amos 5:14, 15.

15. Fa wi kan tan farawe foe den trapoe foe hoeroedoe?

¹⁵ San de na loesoe? Tan farawe foe na birti foe na „lagi swampoe foe jajolibi”! Na bijbel e gi na rai „soekoe san boen, èn no san takroe . . . no wani si ogri na ai èn lobi san boen.” Aha, disi na a troetroe tori — na no wani si troetroe san ogri. — 1 Kor. 4:4; Amos 5:14, 15.

16. Sortoe markitiki Paulus ben poti gi kristensma?

¹⁶ Efoe wi ben ferstan na denki foe Kristus, wi no moesoe abi konsensi fonfon tége na soso doe ogri na tra sma, na tegoe ogri-atifasi èn na grofoe hoeroedoe di den e pristeri te now ete na ini moro foeroe prisiri? San moe de na markitiki foe wi te joe e loekoe en boen? Paulus e piki: „Ala san de troe, ala san de foe serjoesoe belang, ala san de regtvaardiki, ala san di de krin, ala san de switi, ala sani foe san den e taki boen foe en, sortoe boenfasi de toe èn ala san e ferdini prijse. tan denki den sani disi.” — Fil. 4:8.

17. (a) San na pornografie? (b) Fa son sma ben doti a jeje foe den? (c) San de na konifasi foe waka nanga libi?

¹⁷ A de séker moro boen èn veilig foe teki na fermane foe na apostel na ati. Ma na wan sari sani dati son sma no ben foeroe na prakseri foe den nanga den boen denki disi, ma alaten e hori densrefi bezig nanga fisti tv-programma, film nanga boekoe.a Na bakapisi de dati den ben doti den jeje nanga ati nanga hoeroedoe èn seks dotilibi. Omoro boen a ben sa de efoe den ben waka na baka na rai foe na apostel: „Brada, no tron jongoe pikin na ini ferstan [ini jeje afersi], ma tron pikinnengre na ini san takroe”! — 1 Kor. 14:20.

Fa wi kan meki wi warderi kon moro bigi

18. San kan de leki wan kibri èn jepi wi foe abi warderi gi santa sani?

¹⁸ Efoe wan sma abi wan tranga banti nanga en papa nanga en mama, dan heri boen a kan ferstan a lobi nanga gronprakseri foe en, sodati a de krin dati moro mendri a sa meki oiti a fesi foe na osofamiri fadon. A srefi de so toe gi na matifasi foe wi nanga Jehovah. Ma fa wi kan meki na matifasi dati kon moro stéfi? Te wi e leri sabi Gado krosbé. Na dipi persoonlek studie foe a Wortoe foe Gado sa jepi wi foe sabi en heri boen èn foe go lobi en sote dati wi sa kakafoetoe gi ibri tesi. Soleki David ben tjari kon na ondro wortoe na ini Psalm 23, dan alaten wi sa firi dati wi Herder, Jehovah de nanga wi. Fa a ben sa de wan don sani foe doe wan serjoesoe fowtoe aladi na Herder de so krosbé! — Hebr. 4:13.

19, 20. (a) Sortoe toe problema de ini a tori foe persoonlek studie? (b) Foe san-ede meki moro pikinso ten gersi taki de now gi persoonlek studie?

¹⁹ Ma toe fundamenti problema e kon na fesi. Na ini na fosi presi persoonlek studie de gi foeroe sma wan hebi. Nanga den leri sistema foe skoro di no de so boen meki foeroe sma now abi bigi moeiti nanga lési. Gi den a e aksi foeroe moeiti foe studeri. Ma ala sani na ini na libi di abi waarde èn di e tan, e kostoe moeiti. Na leri sabi foe Jehovah, na Soeverein Masra foe na universum, wi Tata nanga na Gado foe no-ferdini boenfasi no warti na moeiti dati? — Matt. 6:9; Jak. 4:8.

²⁰ Na di foe toe problema de leki fa a gersi, wan mankeri foe ten gi persoonlek studie. Èn tokoe sowan dertig ofoe fotenti jari pasa kaba a gersi taki ten ben de — ten gi takmakandra, ten foe lési, èn foe skrifi brifi, ten foe koiri nanga na heri osofamiri èn ten foe go denki dipi. San tjari na kenki kon? Na ten foe wi de na ondro wan vorm foe inflatie. Te joe loekoe en boen dan a de so dati wan dé nofotron no warti 24 joeroe moro. Fa dati doe kon? Foe di na ini foeroe oso wan foefoeroeman kon di e foefoeroe foeroe warti ten. Joe e erken na foefoeroeman dati? Ija, a de na TV, na krakti foe en di e lan sma. Foe wan studie di den ben meki e kon na krin dati „na gemiddelde Amerkan osofamiri aladé e loekoe sébi joeroe nanga 22 minuut na TV”. Dati de pikinmoro a di foe dri pisi toe wan dé! Omeni ten gemiddeld joe e gi ibridé na a loekoe toe TV? Ala dé na a heri grontapoe miljardmiljard warti joeroe e lasi gwe foe na libi foe di sma sondro foe doe wan sani e sidon a fesi wan TV-toestel. A de troe dati son programma de nanga boen maniri, de wan moi sani ofoe e leri joe wan sani. Ma srefi den dati toe kan teki ten. Na kori di e kon foe tv de boen tranga.

21. Sortoe problema son sma abi kande? (b) San de leki fa joe denki a loesoe?

²¹ Fa kristensma kan tan farawe foe na „foefoeroeman” disi e foetoeroe den? Soso te den hori tranga den anoe na a fasi fa den e prati na ten foe den. Skotoe na ten di joe e loekoe TV. Loekoe sortoe sani moe kon na a fosi presi. Libisma nanga libisma demakandra de moro prenspari leki TV. Joe e firi ferferi foe eksempre efoe na a ten foe na TV-show di joe lobi onferwakti fisiti kon? Èn joe e feni en wan moeilek sani foe kiri na TV, srefi efoe na programa no moi ofoe de takroe? Dan joe abi wan problema. — 1 Kor. 9:24-27.

22. Fa wi kan bai baka na ten di wi e gi na TV, sodati wi abi ten gi tra sani?

²² Sortoe praktis stap joe kan doe foe bai den diri joeroe dati baka, sodati joe kan gi den na persoonlek studi èn na libisma demakandra? Loekoe sortoe programa de warti foe wan kristen kan loekoe èn loekoe soso a dati efoe noti prenspari de foe loekoe. Son sma ben teki wan moro kefarlek maatregel — foe no abi TV kwetkweti na ini oso! Dati na wan persoonlek afersi. Ma na jejefasi séker den no kon moro póti foe di den no abi no wan TV-toestel. — Ef. 5:15, 16.

23, 24. San wi kan doe foe abi troetroe warderi gi na pisi foe a goedoe foe wi? (Hebr. 11:26)?

²³ San wi kan doe efoe wi wani kibri wi diri goedoe, di wi ben kisi èn no wani seri en foe wan ’préti linzen’? Ondrosoekoe san de den moro prenspari sani na ini na libi foe wan kristen. Poti san de den sani di moe kon na a fosi presi èn hori joe na dati. Feti a baka nanga joe heri konsensi foe kisi na presenti foe tégo libi, net soleki na apostel Paulus ben ’feti na baka na marki foe na prijs foe na kari na tapsé’. Sori net leki Jakob bigi warderi gi na pisi goedoe foe joe. Hori net leki Mozes „joe ai boen tapoe na paiman”. — Fil. 1:9, 10; 3:13, 14; Hebr. 11:24-26.

²⁴ Fa wi kan gi wisrefi réde foe doe ala den sani disi? Te wi go studeri a bijbel fajafaja. Poti san joe leri aladé na ini joe libi. Go geregeld na kristen komakandra èn poti joe prakseri boen na a ten di joe de drape. Abi lobi gi regtvaardikifasi èn no wani foe si san de takroe. Nono, no ferakti na pisi foe na goedoe foe joe foe prisiri wan lostoe foe a skin. Na pisi foe a goedoe foe joe foe a tégo libi de warti foeroe moro leki wan ’préti linzen’, sortoe vorm dati ben kan mag teki ooktoe na ini a ten disi! — Hebr. 10:24, 25; 12:12-16.

[Foetoewortoe]

[Prenki na tapoe bladzijde 14]

Joe ben sa kenki a pisi foe joe foe wan goedoe gi wan ’preti linzen’?