Gado Wortoe abi libi

Ruth ben abi warderi gi a pipel foe Gado

NA MOI jongoe oema di teken dja na Ruth. A ben libi na ini Moab, na oostoesé foe na Dede Se. Aladi a ben kweki a mindri den Moabietsma, di ben e anbegi falsi Gado, tokoe a ben wani dini sote na troe Gado Jehovah makandra nanga en pipel Israël (Num. 25:1-5). Te a e kisi na okasi foe dati, a e graboe dati nanga en heri ati sodati nanga dati a e meki tra anbegiman foe Jehovah di sabi en leki „wan toemsi boen oema” lobi en. — Ruth 3:11.

Wan angriten na ini Israël ben gi Ruth na okasi disi foe dini Jehovah. Leki wan bakapisi foe wan angriten wan osofamiri foe fo sma hari komoto foe na pikin foto Bethlehem gwe na a kondre Moab. Na osofamiri disi joe e si na tapoe na prenki — Elimelech, en oema Naomi èn den manpikin foe den, Machlon nanga Giljon. Ma sjatoe a baka dati Elimelech e dede. Bakaten Machlon e trow nanga Ruth èn Giljon e trow nanga wan tra Moabitis meisje di ben nen Orpa. Ruth soboen abi wan man èn wan mai di e anbegi Jehovah, èn na so a e leri sabi na troe Gado.

Ma a no langa a bakadati Machlon nanga Chiljon e dede èn den dri oema e tan sondro man ofoe pikin a baka. Joe kan tjari kon a prakseri pikinso fa den e sari. San den moe doe now? Naomi e jere taki na angriten na ini Israël psa. Foe dat’ede meki a e teki na bosroiti foe drai go baka na en égi pipel. Ruth nanga Orpa lobi a mai foe den toemsi èn den e go nanga en makandra. Ma te den de wan pisten na pasi e gwe Naomi e taki, soleki a de foe si dja, na den meisje: ’Drai go baka na oso ibriwan na a oso foe en mama.’

Naomi e bosi den meisje adjosi èn den e bigin kré. „Nono, ma wi sa drai go nanga joe” den e kré. Naomi e taki moro tranga: „Drai go baka, mi oemapikin.” Èn Orpa soboen e drai go baka na en oso. Ma Ruth no e go.

Naomi e taki gi Ruth: „Drai go baka nanga joe swagri di de weduwe.” Ma Ruth e piki nanga overtoigi èn nanga serjoesoefasi: „No tan begi mi tranga foe libi joe èn drai go baka èn foe no waka go makandra nanga joe; bikasi pe joe e go, mi sa go èn pe joe e pasa na neti, mi sa pasa na neti, joe pipel sa de mi pipel èn joe Gado sa de mi Gado” (Ruth 1:1-17). Ruth o drai go baka soboen nanga Naomi èn e tron wan pisi foe na pipel foe na Gado foe Israël.

Joe ben leri sabi netleki Ruth na troe Gado, Jehovah, nanga a pipel di e anbegi en? Efoe dati de so, dan kande joe de nanga net so wan faste bosroiti foe hori baka gi Jehovah dinari ini a ten disi tapoe wan loyaalfasi leki Ruth foe langaten pasa kaba!