Kownoekondreprékiman e ferteri pikinso
Den foeroe eilanti e prisiri
JEZUS ben taigi en discipel: „Oenoe sa de mi kotoigi. . . te na den moro farawe kontren foe na grontapoe” (Tori. 1:8). Te foe kaba na komando disi ben sa go te na a bigi westelek pisi foe na Tiri Zuidse, pe na bijkantoro foe na Watch Tower Bible and Tract Society na Guam e hori ai now tapoe na kownoekondre wroko na ini heri Micronesië. Foeroe foe den sma foe den moi eilanti disi e prisiri na ini a ten disi. Foe san-ede? Psalm 97:1 e gi na réde: „Jehovah srefi tron kownoe! Meki na grontapoe de nanga prisiri. Meki den foeroe eilanti prisiri”.
Foeroe tongo e taki na den difrenti eilanti na ini na pisi disi foe na grontapoe, èn dati de wan foe den bigi problema ini na préki foe na boen njoensoe ’Jehovah ben tron kownoe’. A ben de foe dat’ede wan foe den hémarki foe na dini-jari disi dati no wawan na alamoen uitgave foe na Wachttoren na ini féfi foe den moro prenspari tongo ben kon a doro, ma den ben kisi ooktoe Mi boekoe nanga bijbeltori èn na brochure Njan boen foe tégo foe na libi na grontapoe! na ini wan lo tongo foe Micronesië. A de troetroe wan blesi foe abi boekoe di den sma disi di de geïsoleerd na ini den tongo di e taki ini den presi dati, èn a e sorgoe foe wan bigi fanowdoe. Den sma foe den presi e teki den boekoe boen, spesroetoe foe di den kerki foe na kristenheid no e doe foeroe moeiti foe poti boekoe go ini a tongo foe den.
◻ Den zendeling tapoe na moi eilanti Moen, ben ferteri foe eksempre dati Mi boekoe nanga bijbeltori na ini na Truktongo tjari wan heri opo-opo di ososma ben kisi en ini den anoe èn ben meki den mati èn famiri foe den si en. Sma ben tapoe den zendeling na tapoe strati foe aksi foe na boekoe èn sonwan ben kon mamanten kaba bifo arfoe sébi na a zendeling oso foe aksi foe na boekoe. Trawan baka ben go na a departement foe skoro-afersi foe go teki boekoe na wan kotoigi foe Jehovah di e wroko drape.
Wan sma foe skoro-afersi ben aksi fa a doe kon dati Jehovah Kotoigi ben kan foe meki so wan boekoe na ini na Truktongo, aladi den lomsoe nanga anitri de boen langa kaba èn noiti ete den meki so wan sani. Srefi wantoe fosten gensman ben wani abi a boekoe.
◻ Wan ondrofenitori foe den Marshall eilanti e sori fa na bijbelwaarheid kan tjari gi wan osofamiri wanfasi nanga kolokoe. A man ben de wan droengoeman èn wan sma di e smoko hebi, èn ooktoe wan lomsoe di ben de fajafaja ini en kerki. Toe jongoe kotoigi go fisiti den na oso èn aladi en oema no ben wani tokoe a ben teki wan bijbelstudie. Den dri jari di ben waka a baka en oema ben tan kakafoetoe, ma di a ben si fa na waarheid ben kenki a man — a ben tapoe nanga smoko, a no ben droengoe moro èn a ben bigin doe sani makandra nanga en osofamiri — a oema ben arki te foe kaba na a boen njoensoe èn a ben bigin foe prati san a ben leri nanga tra sma. A man nanga oema disi ben meki a trow foe den skrifi na lanti boekoe èn den ben gi den libi abra na Jehovah èn teki dopoe. A man e dini now leki owroeman ini na gemeente, aladi en oema e prisiri foe go na ini na pionierdienst.
Kolokoe nanga vréde ben kon na a oso disi, soleki disi de so nanga someni foe den sortoe oso disi foe den eilanti, di soleki na Psalmsingiman ben taki ben sa prisiri foe di Jehovah ben tron Kownoe. — Ps. 144:15.