Jezus en libi nanga diniwroko

Boskopoe di komoto foe hemel

TE JOE loekoe en boen dan na heri bijbel de wan boskopoe di komoto foe hemel, di oen hemel Tata ben gi oenoe foe leri wi. Ma pikinmoro toe doesoen jari pasa kaba di toe spesroetoe boskopoe ben tjari kon nanga jepi foe wan engel „di e dini krosbé foe Gado”. A nen Gabriël. Meki wi go ondrosoekoe pikinso san ben de den omstandigheden foe den toe prenspari fisiti disi na grontapoe.

A de a jari 3 bifo G.T. Ini den pikin bergi foe Judéa, kande séker no so fara foe Jeruzalem, wan priester foe Jehovah di nen Zacharia e libi. A de boen owroe kaba, net soleki en oema Elisabeth. Èn den no abi no wan pikin. A de na beurt foe Zacharia foe doe wroko leki priester ini a tempel foe Gado na ini Jeruzalem. Wantronwantron Gabriël e sori ensrefi na a let’anoesé foe na switi smeri-altari.

Zacharia kon frede srefsrefi. Ma Gabriël e korostoe en èn e taki: ’Gado ben jere den begi foe joe. Elisabeth sa kisi wan manpikin, èn joe moe kari en Johanes. A sa sreka gi Jehovah wan pipel di meki klari.’ Ma Zacharias no man bribi dati. A gersi wan sani di de so onmogelek dati en nanga Elisabeth tapoe a libimarki foe den ben sa kisi wan pikin ete. Foe dat’ede meki Gabriël e taki: „Foe di joe no ben bribi mi, meki joe no sa kan taki te leki den sani disi pasa.”

Na ini a pisten dati den sma a dorosé e aksi densrefi foe san-ede Zacharias ben ten so langa na ini a tempel. Te a kon a dorosé te foe kaba a no kan taki, ma soso nanga anoe a e sori sani, èn den e froestan dati a ben si wan sani foe tapsé.

Te a ten foe Zacharias foe doe dienst ini a tempel pasa a e go ba oso baka. Sjatoe baka dati a e pasa troetroe, Elisabeth e kisi bere! Ini na froewakti foe na gebortoe foe en pikin, Elisabeth e tan féfi moen na oso, na ini a birti foe sma.

Loekoe! Drape Gabriël e kon baka! Èn nanga soema a e taki now? Nanga wan jongoe oema di no trow ete, foe na foto Nazareth. A nen Maria. Sortoe boskopoe a e tjari a tron disi? Arki! ’Joe sa kisi bere èn kisi wan manpikin èn joe moe kari en Jezus’, Gabriël e taki. ’A sa tron wan bigi kownoe èn noiti wan kaba sa kon na en kownoekondre.’

Wi kan de séker dati Gabriël ben feni en wan grani dati a ben kan tjari den boskopoe disi go. Èn te wi sa lési na ini na tra uitgave foe na tijdschrift disi moro foe Johannes nanga Jezus, a sa kon moro krin gi wi foe san-ede den boskopoe disi di komoto foe hemel de so prenspari. 2 Timotéus 3:16; Lukas 1:5-33.

◆ Sortoe toe prenspari boskopoe ben tjari komoto foe hemel?

◆ Soema ben tjari den boskopoe kon, èn a soema a ben gi den?

◆ Foe san-ede meki den boskopoe ben de so moeilek foe bribi?