Jezus libi nanga diniwroko

Den jongoe jari foe Jezus na oso

DI JEZUS ben gro na ini Nazareth, a ben de wan foto di ben de pikin èn di no ben de prenspari. A ben de na ini a pikin bergikondre foe wan kontren di nen Galiléa, no so fara foe na moi lagipresi foe Jizreël.

Te Jezus, di kande de now toe jari, e kon baka nanga Jozef nanga Maria foe Egypte foe go libi drape, dan a de krin dati a de a wan enkri pikin foe Maria. Ma dati no e tan so foe langa ten. Baka wan pisten Maria e meki Jakobus, Jozef, Simon nanga Judas èn Maria nanga Jozef e kisi ooktoe oemapikin. Te foe kaba dan Jezus abi moro pikinso siksi moro jongoe brada nanga sisa.

Jezus abi ooktoe tra famir’man. Wi sabi wan sani kaba foe en moro owroe neef Johannes di e libi foeroe kilometer moro fara na ini Judéa. Ma moro krosbé na ini Galiléa, Salóme e libi, èn a gersi dati a de wan sisa foe Maria. Salóme trow nanga Zebedéus, èn soboen den toe manpikin foe den, Jakobus nanga Johannes de neef foe Jezus. Wi no sabi efoe Jezus di a ben gro e kon ben psa foeroe ten nanga den boi disi, ma bakaten den tron krosbé kompe, soleki wi sa si ete.

Jozef moe wroko boen tranga foe sorgoe gi na osofamiri foe en di e gro kon. A de wan temreman. Jozef e kweki Jezus leki en égi manpikin èn foe dat’ede meki Jezus sma e kari ’na manpikin foe na temreman’. Jozef e leri Jezus ooktoe a temrewroko èn Jezus de wan boen studenti. Dati ede den sma bakaten e taki foe Jezus: ’Disi na a temreman.’

Na ini a libi foe na osofamiri foe Jozef na anbegi foe Jehovah e teki a moro prenspari presi. Ini akroederi nanga a wet foe Gado dan Jozef nanga Maria e gi den pikin foe den jeje leri ’te den sidon na ini den oso, te den de na pasi e go, te den e didon, èn te den e opo’. Wan djoe kerki de na ini Nazareth èn wi kan de séker foe en dati Jozef e teki geregeld en osofamiri go drape foe anbegi. A moro bigi prisiri foe den den abi na ini den reis di den e meki geregeld go na Jehovah tempel na ini Jeruzalem. Foe den reis disi wi sa taki foe den na ini a tra artikel. Mattéus 13:55, 56; 27:56; Markus 15:40; 6:3; Deuteronomium 6:6-9.

◆ Omeni jongoe brada nanga sisa Jezus ben abi èn fa wan toe foe den nen?

◆ Soema ben de dri bekende neef foe Jezus?

◆ San ben de na grontapoe wroko foe Jezus?