Dini na Gado foe na waarheid na ini soifri-retifasi
„Leri mi, o Jehovah foe a pasi foe joe. Mi sa waka na ini joe waarheid.” — PSALM 86:11.
1, 2. (a) Fa wi ben kan ferklari na sani di Gado seti gi libisma? (b) Fa na bijbel e taki foe a wroko foe na anoe foe Gado èn na tranga-ede foe libisma?
KON oen taki dati joe e waka na ini wan dré sabana pe nowan libi de. Wantronso joe e doro na wan moi oso. A oso abi airconditioning, verwarming, w.c. wasi-oso, wasbaki nanga stroom. Na ijskasi nanga den njanjan kasi foeroe nanga njanjan. Na ondrogron kamra abi brandstof nanga boen foeroe tra sani. Wi sa taki dati ala den sani dati ben doe kon somaar drape? Wi ben sa de grantangi efoe na éginari ben aksi joe foe tan ini na oso dati èn foe njan boen foe en?
2 We, na switi grontapoe disi pe wi e libi na tapoe, de netleki na oso dati. Langaten bifo den ben meki a libisma-famiri, dan wi lobi Gado ben meki a grontapoe disi klari sodati a ben sa tron wi oso, èn a ben sorgoe foe ala sani san wi ben sa abi fanowdoe foe ben kan de kolokoe (Jesaja 45:12, 10). Wi no moe gi tangi na a Sorgoeman disi di e sorgoe foe sani sondro foe gridi sma? Na ondro na krakti foe en santa jeje den bijbel wortoe di e kon now èn di skrifi na ini Hebrewsma 3:4 e taki: „A no de foe taki dati ibri oso na sma e bow en, ma a sma di ben meki ala sani na Gado.” Na sari sani e sori ensrefi dati gridisma e tjari densrefi leki sma di e pori tra sma sani na ini a tori foe na wroko foe na anoe foe Gado na grontapoe èn den e go doro foe pori sani. — Deuteronomium 32:3-5.
3. San a bijbel e taki foe a lobi di Gado lobi foe gi sani na ini a ten disi èn na ini a ten di e kon?
3 Srefi gi den gensman foe na waarheid na apostel Paulus ben kan taki: „A no ben libi foe gi kotoigi foe ensrefi foedi a ben doe boen, foedi ai meki alen kon foe hemel èn e gi ten pe foeroe njanjan e meki, foedi a foeroe joe ati pasamarki nanga njanjan èn prisiri” (Tori foe den Apostel 14:7). Omeni moro Jehovah kan blesi den sma di e dini en na ini soifri-retifasi! Awasi den pina nanga lai foe „den laaste dé” disi e poti druk a tapoe wi, tokoe na glori howpoe de dati na Soeverein Masra Jehovah na ini na krosbé ten di e kon séker sa gi wan troe fesa foe boen sani na den sma di lobi en èn dati a sa figi poeroe den watra-ai foe ala fesi. — 2 Timotéus 3:1; Jesaja 25:6-8.
Na wondroe foe na libisma ferstan
4. (a) Den computer koniman tanapoe na fesi sortoe problema? (b) San Jeremia 33:2, 3 e taki foe na Mekiman foe na libisma edetonton?
4 Difrenti jari kaba koni leriman e proeberi foe meki computer di troetroe kan denki. Ma now den e piki dati na a fosi stap kaba den e tan drape. Fa so? We, den e ferteri dati na bow foe na libisma ai e basi den. Efoe den no kan meki sowan sani leki na ai, fa den kan bigin nanga den edetonton, èn fa oiti den kan meki na ferstan? Fa na libisma ferstan de wan wondroe! Ibri seconde hondro miljoen bits (pikin pisi) foe bodoi di e psa go na ini a pisi foe na skin disi foe teki poeroe foe makandra, poti na ini groepoe èn foe tjari dan kon na ini a libi foe sma di e denki. Na computer di go moro fara kaba joe no kan teki gersi nanga en srefsrefi. Fa disi de wan toemsi moi kotoigi foe a koni di psa ala sani foe na lobi Gado di ben meki wi! Wi kan bréti dati wi Mekiman nanga Setiman, Jehovah Gado ben gi wi ferstan èn dati wi kan gebroiki wi edetonton foe leri den „bigi èn dangra sani” di ai tjari kon na krin gi wi tapoe en égi faste ten èn fasi. — Jeremia 33:2, 3.
5. (a) Sortoe wondroe foe gro e feni presi soso na ini libisma? (b) Fa den wortoe foe Elihu de wan sani di fiti?
5 Na wondroe foe na libisma edetonton e bigin na ini a moeroe, pe edetonton cel e bigin vorm densrefi dri wiki baka te wan oema hori bere. Den e kon more foeroe na wan krakti fasi: sontron kande wan kwart miljoen cel ini wan minuut. Na ini a fosi jari baka na gebortoe na edetonton foe na baby e kon tron dri tron so moro bigi, san e sori dati den de krinkrin tra fasi leki den edetonton foe sortoe tra meti, èn ooktoe foe afkeskesi-aflibisma. Heri esi kaba na pikin man foe sabi wan tongo èn a kan denki kaba foe sani èn e ferstan kaba moreel afersi èn jeje waarde. Fa den koni disi oiti ben sa gro komoto foe meti sondro ferstan? Elihu nanga leti ben taki foe dat’ede foe wi Gado nanga Bigi Mekiman: „En de a sma di e leri oenoe moro leki den meti foe grontapoe, èn ai meki oensrefi moro koni leki den meki-sani foe hemel di e fré.” — Job 35:10, 11.
6. (a) Sortoe ferklari den Santa boekoe e gi foe na wondroefasi fa libisma ben doe kon? (b) Fa wi kan gebroiki den koni di Gado gi oenoe a tapoe wan lobifasi?
6 Na wondroe disi, na libisma ferstan, e akroederi nanga Genesis 1:27 pe tanapoe: „Gado ben go abra foe meki a libisma, akroederi en prenki èn akroederi a prenki foe Gado a ben meki èn; leki man èn leki oema a ben meki den”. Wi no moe de nanga tangi gi na konifasi fa Gado ben meki wi? David ben de dati séker. A ben prijse Jehovah nanga den wortoe: „Mi sa prijse joe foedi den ben meki mi tapoe wan wondroefasi di e gi frede. Den wroko foe joe de wan toemsi wondroe sani” (Psalm 139:14). Wi no e prijse wi Gado a tapoe asrefi fasi? Boiti foe dati wi mag gebroiki wi edetonton nanga wi skin di Gado ben gi wi foe piki na tjalansi di Satan ben smési go na ini a fesi foe wi Gado. Wi kan dini Jehovah leki sma di e kibri den soifri-retifasi. — Odo 27:11
Horidoro na ini waarheid
7, 8. (a) Sortoe kontrari e kon na krin a mindri waarheid nanga theorie? (b) San sabiman e taki foe evolutie? (c) Foe san-ede moro foeroe wi moe teki evolutie leki lektifasi foe bribi èn foe no tjari en kon na ini tori foe bribi?
7 Na waarheid moesoe wini! Wi di lobi Jehovah, moe hori tranga na a waarheid foedi wi e ferkisi foe waka na baka na libifasi foe soifriretifasi aladi wi e gebroiki wi ferstan. Na waarheid di abi foe doe nanga a meki foe sani de wan troe tori di de faste. Na wan sani di nowan sma kan go djoegoedjoegoe. A ben pasa na tesi foe den doesoendoesoen jari. Baka moro leki wan hondro jari di na bigi lé, na evolutie theorie de, dan a de sofara foe den poeroe en poti a wan sé. Disi no de soso san wi e prakseri. Foeroe wetenschap sma di no e kroetoe sani a fesi sondro foe den soekoe den bewijsi, koniman foe wèt, ondrosoekoeman èn tra sabiman e agri nanga disi, Te ai taki foe den strépunt di de ini a tori foe „den gronprakseri foe evolutie, soleki fa Darwin nanga tra sma ben poti en”, dan The New York Times e taki sjatoe foe a situwasi nanga den wortoe: „Tapoe a kontren disi wan bigi broeja de.” Wan koniman di sabi sani boenboen e skrifi: „Wi e piki dati na ini a bewijs materiaal foe na evolutie boen bigi légi pisi de . . . ija, evolutie de soso wan theorie. Foe teki evolutie de so boen wan sani foe bribi.”
8 Ma a teki foe evolutie de troetroe wan sani foe bribi? Wi ben sa taki dati a de moro foeroe wan doe foe lektifasi foe bribi. Bribi abi wan faste fundamenti. Na ini Hebrewsma 11:1 wi e kisi foe jere dati bribi de „na krin sori foe troetroe sani.” Den bewijsi dati na bijbeltori abi en fundamenti tapoe troetroe sani èn dati a de waarheid, de boen foeroe pasamarki (2 Timotéus 3:16, 17; Romeini 15:4). Na a tra sé a de so dati omoro den evolutionistsma e go poti densrefi a tapoe na afersi foe den, omoro sani e kon na tapoe di de kontrari densrefi èn di den lekti bribi-sma e proeberi foe opo feti gi den.
Afkeskesi-aflibisma ben de?
9. Ofoeroe foe den fossiel de foe keskesi-libisma èn pe den moe de na oso?
9 Na ini den 130 jari di evolutionistsma ben soekoe na den fossiel foe den schakel di mankeri a mindri keskesi nanga libisma, dan den ben kon na fesi nanga soso wan sari ipi bonjo. Akroederi na tijdschrift Science Digest dan „ala bewijsi di wi hori nanga anoe di wi abi foe na evolutie foe libisma te now ete kan go na ini wan enkri dede kisi èn dan presi de ete abra!” Dati de sondro degedege na presi pe den sortoe sokari bewijsi disi moe de — nanga na tapoen foe na dede-kisi di spikri stéfi na tapoe!
10. O eerlek den sani di sma di e teken de foe sori fa a ben de nanga den afkeskesi-aflibisma?
10 Den prenki foe afkeskesi-aflibisma di e kon na ini tijdschrift èn di den e gebroiki foe hori baka gi na evolutie theorie de noti moro leki anansie-tori foe na prakseri, di skrifi tapoe a gron foe wantoe pikin pisi foe wan ede krabasi ofoe wan kakoenbe-bonjo. Tapoe bladzijde 1 foe The New York Times foe 16 augustus 1985 foe eksempre wan prenki ben kon foe wan „Amphipiticus, wan foe den froekoe moe hé afkeskesi-aflibisma di wan tekenaar ben teken . . . èn pe libisma ben evolueer komoto foe en”, èn na tapoe dati den fesi nanga anoe foe en nanga wiwiri ben de foe si. Foe san den ben teken kon baka na prenki disi? Na ini na artikel di ben ferteri fa a tori, ben tanapoe: „Na baka sé pisi foe wan ondro kakoenbe makandra nanga na pisi foe na fesisé foe wan kakoenbe, di den feni féfi hondro jari a fesi.” Ma wan heri ede, nanga wiwiri nanga ala sani kan teken troetroe soso tapoe a gron foe toe foe den sortoe bonjo disi? Na ini a artikel den ben kari a nen foe wan Antropoloog (wan sma di e ondrosoekoe fa den ras doe kon) di de na a Harvard universiteit èn di e kari den fossiel disi „wan se foe leti ini wan tégo doengroe”. Ma wi kan teki den gersi troetroe nanga leti?
11. Fa wi kan teki Jesaja 59:15 kon ini akroederi nanga den sokari afkeskesi-aflibisma?
11 Na edekrabasi foe na Pildown libisma son sma ooktoe ben si en leki „se foe leti”. Na edekrabasi disi ben de sowan fotenti jari langa na ini na middelpunt foe na evolutionaire belangstelling ma na ini 1953 a bere ben poeroe kon na doro leki wan tjari kon makandra foe pisi foe bonjobonjo, foe meti èn foe libisma di tapoe wan bedrigifasi ben tjari kon na makandra leki wan spotoe! Nanga den wortoe foe na proféti Jesaja wi kan taki foe den theoretis af-keskesi-aflibisma disi: „Na waarheid e sori taki a no de.” — Jesaja 59:15.
Wan profétis parallel
12. Sortoe tegoe sani Ezechiël ben si?
12 Na ontrow Jeruzalem foe owroeten de wan agersifasi foe na godelowsoe kristenheid foe now. Na ini na jari 612 G.T. na Soeverein Masra Jehovah ben gi Ezechiël wan visioen pe a ben teki en proféti foe Babylon tjarl go na Jeruzalem. Drape, na ini a fes’sé djari foe na tempel, Ezechiël ben si wan kefarlek toe afkodré sani. Moro fara Jehovah ben meki a boro wan olo di ben de ini a skotoe go moro fara èn meki a kon moro bigi. Baka dati a ben taigi Ezechiël: „Go na inisé èn loekoe den ogri tégoe sani di den e doe dja.” San a ben si? We, na ini den inisé knmra foe na oso foe Jehovah foe anbegi „wan prenki foe meti di e kroipi èn takroe sortoe meti ben de èn ala den koenkoen gado foe na oso foe Israël ben teken alape lontoe tapoe na skotoe”. — Ezechiël 8:1, 7-10.
13. (a) Sortoe parallel situwasi de now na ini na kristenheid? (b) Fa Jezus ben si na bijbeltori fa Gado ben meki sani?
13 Leki wan parallel nanga na visioen disi wi e feni na ini a ten disi wan situwasi, di e seki sma na mindri den kerkileriman foe na kristenheid. A moro bigi pisi foe na „sma disi foe kroektoedoe” ben trowe na bijbeltori fa Gado meki sani (2 Thessalonika 2:3). Ofoe den kerkileriman e doe netleki den sma di ben fadon komoto na bribi na ini a ten foe Ezechiël ala moeiti foe moksi evolutie nanga bijbel, èn den e ferklari dati den fosi kapitel foe Genesis de foe anansitori ofoe tra agersi sani. Den e poti na wetenschappelek axioma na wan sé dati na moro eenvoudig uitleg nofotron de a troewan, den e taki dati na bijbeltori de toemsi onnowsel gi den. Na bigi-memre ferstan foe den e aksi foe wan sani di de moro pasa den ferstan èn di de moro moeilek. Den e poti densrefi moro hé leki Jezus Kristus, di ben sori tapoe na letterlek Genesistori leki „waarheid”. — Johannes 17:17; Mattéus 19:4-6.
14. Fa „owroeman” now e misi foe waka fesi den ipi foe den, èn san disi sa tjari kon?
14 Ezechiël ben si na ini a visioen „sébitenti man foe den moro owroeman foe na oso foe Israël” e doe na anbegi foe den na fesi foe den prenki foe „meti di e kroipi èn takroe sortoe meti” (Ezechiël 8:10, 11). Disi wi kan teki gersi nanga san den disten kerkileriman e doe èn di na publiki e ferteri dati a libisma-famiri ben komoto foe den sortoe meti disi! Den „moro owroeman disi” moesoe teki fesi foe na ipi foe den tapoe na pasi foe waarheid. Ma san Jezus ben taki na ini Mattéus 15:14 no e kon troe na tapoe den? Jezus ben taki: „Den de breni tjariman. Efoe now wan breniman e tjari wan breniman, dan den ala toe sa fadon ini wan olo.” Den kan feni sowan olo ini na „tégo doengroe” pe den evolutionistsma e firifiri lontoe.
15. Fa den kerki fesiman di e teki na evolutie theorie e sori moro fara taki den de wan pisi foe „a sma foe kroektoedoe”?
15 Jehovah ben aksi Ezechiël moro fara: „Joe ben si, o libisma-pikin, san den owroe man foe na oso foe Israël e doe na ini a doengroo, ibriwan na ini na inisé kamra foe a moi sani foe en? Bika den e taki: ’Jehovah no e si oenoe. Jehovah gwe libi a kondre’” (Ezechiël 8:12). Kerkileriman di e tanapoe na baka libisma filosofie, e sori na tapoe netso wan sortoe fasi, dati den de wan pisi foe na „sma foe kroektoedoe”. Den e gwe libi na wèt foe Gado, pe joe abi ooktoe a boekoe Genesis na ini (Tori foe den Apostel 7:53). Den e tjari den ipi foe sma foe den na ini a doengroe foe grontapoe denki, soleki foe eksempre na evolutie theorie di den no bewijsi ete èn di sma no kan bewijsi. Den „lobi a doengroe moro leki na leti” foe na waarheid. — Johannes 3:19.
16. Sortoe kroederi de a mindri „den owroeman” na ini Ezechiël ten èn foeroe kerki fesiman na ini a ten disi?
16 Netleki fa den djoe owroeman ben tjari den falsi anbegi foe den go na ini Jeruzalem, na so falsi kerki tiriman e proeberi ini a ten disi foe hori na a nen kristelek. Ma a bribi na ini evolutie no de kristelek. Na teki foe na theorie disi ben meki dati foeroe sma ben drai baka gi Gado. Èn no moro weiniki a ben sorgoe dati onafhankelekheid, doe ogri nanga tranga èn na terrorisme foe wi di foe twenti jarhondro ben doe kon pe den naatsi èn aparti sma e teki den evolutionair gronprakseri foe „na tan na libi foe den moro boen wan”. Na evolutie theorie e leri libisma dati den no e tjari nowan frantwortoe na fesi foe wan Mekiman (Romeini 9:28). Den libisma ben firi densrefi foe dat-ede fri ’foe doe san den ati firi’, sondro foe denki na Gado.
17. Na sortoe fasi den kerki fesiman di e teki na evolutie theorie e meki wan bigi fowtoe?
17 Kerki tiriman di e teki na evolutie theorie e taki te joe loekoe en leti: „Jehovah no e si wi. Jehovah gwe libi na kondre.” Foedi den e teki a filosofie disi, meki den no e firi densrefi frantwortoe na fesi foe en. Ija, a prakseri di den abi foe Gado e kon doengroe foe di den e poti bribi na ini wan driwanfasi foe gado di joe no kan gi wan ferklari foe en èn di de leki fa den taki wan kibritori. Ini akroederi nanga na fasi disi foe loekoe sani, meki den wani nanga ala prisiri poti noti moro leki na nen foe na wanenkri troe Gado, Jehovah na wan sé foedi den no e kari na nen kwetkweti èn di den poeroe finfini foe den bijbelvertaling foe den. Den frede foe taki kontrari na populair grontapoe evolutieleri.
18. Sortoe frantwortoe di moe gi e wakti na evolutie theorie èn den sma di e hori baka gi en?
18 Jehovah nanga jepi foe wan tra proféti e taki nanga leti: „Foedi na pipel disi kon na mi nanga en mofo èn den e gi grani na mi soso nanga den mofoboeba èn den ati sredi de farawe foe mi èn a frede foe den di den abi foe mi de wan gebod foe libisma di den kisi foe leri, foe dat’ede loekoe mi de dja, na sma di agen e handri tapoe wan wondroefasi nanga a pipel disi, tapoe wan wondroefasi èn nanga wondroesani. Èn a koni foe den koniman foe den moe lasi gwe, èn srefi a ferstan foe den koniman sa kibri” (Jesaja 29:13, 14). Na evolutie theorie di e afrontoe Gado èn den sokari kristen di e teki na theorie disi foe evolutie te foe kaba sa kisi foe doe na ini a dé foe Jehovah faja atibron nanga na gi di den moesoe gi frantwortoe foe dati. — Zefanja 3:8.
Doe dienst foe na boen foe na waarheid
19. (a) Foe san-ede foeroe sma ben teki bribi evolutie? (b) Na ini sortoe prisiri safri-ati sma kan abi wan prati now?
19 Wi e libi troetroe na ini wan godelowsoe grontapoe! Falsi fasi foe bribi èn wetenschappelek hémemre di de fowtoe ben meki disi doe kon. Foe den lawfasi di de ini den leri foe „na sma foe na kroektoedoe” den kerki fesiman foe na kristenheid meki foeroe sma ben drai baka gi fasi foe bribi. Sonwan foe den ben tai hori na evolutioe, netso leki wan sma di o dede pikinmoro na watra e graboe hori tranga wan kentiki. Trawan ben teki na bribi na ini evolutie foedi na fasi foe de sondro Gado ini a evolutie theorie gersi foe fri den foe frantwortoe na fesi foe wan Mekiman — Gado. (Teki gersi nanga Romeini 1:21-23). Ma den sakafasi, safri-ati sma foe na libismafamiri e prisiri now foe kisi sabi foe na Soeverein Masra Jehovah, foe na kownoe Jezus Kristus di e tiri èn foe den Kownoekondre prakseri foe Gado, di heri esi sa kon troe tapoe wan glorifasi. — Romeini 16:20; 1 Korinte 15:25, 26
20. (a) Sortoe gran pramisi e kon troe kaba now? (b) Fa disi ben kon troe na ini 1985? (c) Fa joe kan sori dati joe e dini na Gado foe waarheid na ini soifri-retifasi?
20 Fa wi leki Jehovah Kotoigi de kolokoe dati na a heri grontapoe wi ben kon na wan foe meki fajafaja na waarheid bekènti! A jeje foe Gado tapoe wan maktifasi ben wroko tapoe en organisaatsi, sodati wi e si kaba na kon troe foe na pramisi: „Grontapoe séker sa kon foeroe nanga na sabi foe Jehovah soleki den watra e tapoe ooktoe a se” (Jesaja 11:9). Na kotoigi wroko di e doe na a heri grontapoe èn di na ini 1985 Jehovah pipel ben gi, ben abi leki bakapisi dati moro leki 200 tongo sowan 339.351.170 bijbel nanga boekoe di e tjari na bijbel kon na krin ben prati. Moro leki dri miljoen foe wi ben abi na grani foe abi wan prati na a gran prékiwroko di e doe na a heri grontapoe „publiki èn oso foe oso” (Tori foe den Apostel 20:20). Meki Jehovah blesi wi foeroe te wi e feti na baka foe hori wi soifri-retifasi na ini a dini foe Gado.
San joe kommentaar de?
◻ Sortoe wondroe foe na libi edetonton e sori tapoe wan koni Mekiman?
◻ Foe san-ede a de wan fowtoe sani foe taki dati a teki foe na evolutie de wan sori foe bribi?
◻ Omeni bewijsi de dati troetroe afkeskesi-aflibisma ben de?
◻ Wi kan gebroiki Ezechiël 8:7-12 tapoe boen foeroe kerkifesiman na ini a ten disi?
◻ Sortoe bakapisi a e tjari kon foe dini na Gado foe waarheid na ini soifri-retifasi?
[Prenki na tapoe bladzijde 9]
A de eerlek dati tekenaar e teken foe wantoe bonjo di sma feni aflibisma-afkeskesi taki a so den ben tan?
[Prenki na tapoe bladzijde 10]
Jehovah Kotoigi ’foeroe a grontapoe’ nanga sabi foe Jehovah