Jezus libi nanga diniwroko

Jezus de agen na oso na ini Kapernaüm

A BARINEN foe Jezus panja ensrefi go now na alasé, èn foeroe sma e reis go na den farawe presi pe ai tan. Ma baka wan toe dé ai drai go baka na Kapernaüm na a Se foe Galiléa. Na njoensoe dati a de agen na oso e go so esi ini a foto èn foeroe sma e kon na a oso pe ai tan. Farisé-man nana leriman foe na wèt e komoto te foe Jeruzalem.

Na ipi sma de so bigi dati den e tapoe na doro èn nowan sma kan go moro na inisé. Na sani seti gi wan troetroe aparti sani di o psa. A sani di e psa na a okasi disi, de toemsi prenspari, bika ai jepi oenoe foe si dati Jezus abi na makti foe poeroe na oorzaak foe na pina foe libisma èn foe gi na gesontoe baka na ala sma di en wani foe den kisi dati.

Aladi Jezus e gi leri na a ipi sma, dan fo man e tjari wan lanman na a oso na tapoe wan bedi. Den wani dati Jezus dresi na mati foe den, ma foe na ipi sma ede den no man go na inisé. Fa disi e meki den mandi! Ma den no e gi abra. Den kren na tapoe a plata dak, e meki wan olo na ini foedi den e poeroe den tegel foe na dak èn den e meki na bedi nanga a lanman saka go leti na sé Jezus.

Jezus ati e bron foe na sani disi di stoor en? Kwetkweti! Joisti a de dipi ondro na indruk foe na bribi foe den. Ai taigi na lanman: „Joe kisi pardon foe joe sondoe.” Ma Jezus kan gi troetroe pardon foe sondoe? Den méster foe wèt nanga den Fariséman e denki dati disi no kan. Den e denki na ini den ati: „Soema moro leki Gado wawan kan gi pardon foe sondoe?”

Jezus sabi a prakseri foe den, èn dati meki ai taigi den: „San de moro makriki, foe taigi na lanman: ’Joe kisi pardon foe joe sondoe’, ofoe foe taki: ’Opo tanapoe èn teki joe bedi èn waka go’.” Sondro foe wakti na tapoe wan piki, Jezus e drai ensrefi loekoe na a man èn e taki: „Opo tanapoe, teki joe bedi èn go na joe oso.” Dan wantewante a man e doe disi èn e waka na fesi foe ala sma nanga en bedi go na dorosé! Nanga ferwondroe den sma e bari taki: „Sowan sani wi no si noiti ete”!

Joe e si dati Jezus e tjari sondoe kon kroederi nanga siki èn dati a kisi pardon foe sondoe abi te make nanga a kon gesontoe? A bijbel e tjari kon na krin dati wi fosi papa Adam, ben sondoe èn dati wi alamala ben kisi den bakapisi foe na sondoe dati, dati wani taki siki nanga dede. Ma ondro Gado Kownoekondre tiri Jezus sa gi pardon na den sondoe foe ala sma di lobi Gado èn di e dini en èn dan ala siki sa poeroe na pasi. Fa dati sa de wan switi sani! Markus 2:1-12; Lukas 5:17-19; Mattéus 9:1-8; Romeini 5:12, 17-19.

◆ Ondro sortoe omstandigheid wan troetroe aparti sani ben feni presi?

◆ Fa na lanman ben kon na Jezus?

◆ Foe san-ede oen alamala abi sondoe, ma fa Jezus gi na howpoe dati a kisi pardon foe wi sondoe èn a kon boen baka te foe kisi wan volmaakti gesontoe de wan sani di kan?