Jezus libi nanga diniwroko

A e kari Mattéus

SJATOE baka di Jezus ben dresi na lanman, dan a e waka na ini Kapernaüm go na a Se foe Galiléa. Agen ipi-ipi sma e kon drape na en, èn a e bigin foe gi den leri. Te ai waka psa, ai si Mattéus, di den e kari ooktoe Levi, di e sdon na a belasting kantoro. „Kon de mi bakaman”, de a kari di Jezus e gi en.

Séker kande a de dati Mattéus ben sabi kaba foe a leri foe Jezus, soleki ooktoe Petrus, Andréas, Jakobus, Johannes ben sabi disi di den ben kisi wan kari. Èn net soleki den, na so Mattéus ooktoe e opo doe wan sani wantewante na tapoe na kari. Ai opo tanapoe, ai libi en frantwortoe leki wan belastingman èn ai waka baka Jezus.

Bakaten, kande foe hori wan fesa gi a kari foe en, Mattéus meki wan bigi njanjan na ini en oso. Boiti Jezus nanga en discipel den fosten kompe foe Mattéus de drape toe. Tra djoe ini algemeen e brok’ai gi den man disi foedi den e teki belasting gi den Romein makti di den no wani si na ai srefsrefi. Boiti foe dati, a de so dati nofotron den de so oneerlek, dati den e bedrigi den sma èn den e aksi moro moni foe den leki den sma moe pai leki fa den officieel belasting tarief de.

Efoe den Farisé-man e si dati Jezus didon a tafra na wan fesa njanjan nanga den sortoe sma disi, dan den e aksi en discipel: „Foe san-ede a leriman foe oenoe e njan nanga belastingman èn nanga sondari?” Jezus e jere na aksi foe den èn e piki: „Den gesontoe sma no abi datra fanowdoe, ma den di abi mankeri. Go foe dat’ede èn leri san a wani taki: ’Mi wani sar’ati èn no srakti-ofrandi.’ Bika mi no ben kon foe kari regtvaardiki sma ma sondari.”

A de krin dati Mattéus ben kari den belastingman disi kon na en oso sodati den kan arki na Jezus drape, èn kon gesontoe na jejefasi. Foe dat’ede Jezus e bemoei nanga den sodati den kan kon ini wan gesontoe matifasi nanga Gado. Jezus no e ferakti den sortoe sma disi, soleki den Farisé-man e doe, di e feni densrefi so regtvaardiki. A presi foe dati, nanga sari ati di e bewégi en ai dini te joe loekoe en boen leki wan jeje datra gi den.

Dati Jezus sori sondari sar’ati no wani taki soboen dati ai loekoe psa den sondoe foe den, ma a de wan sori foe wan srefi sortoe safri firi di a sori gi troetroe sikiman. Go prakseri foe eksempre pikinso baka na a okasi dati di nanga foeroe sar’ati a ben langa en anoe èn ben fasi a gwasiman nanga den wortoe: „Mi wani, kon krin.” Meki wi ooktoe sori sar’ati foedi wi e jepi sma di de ini nowtoe, spesroetoe te wi e jepi den na ini jejefasi. Mattéus 8:3; 9:9-13; Markus 2:13-17; Lukas 5:27-32.

◆ Pe Jezus de efoe ai si Mattéus?

◆ Sortoe wroko Mattéus abi èn foe san-ede tra djoe e ferakti den sortoe sma disi?

◆ Sortoe kragi e tjari kon na fesi toe Jezus, èn foe san-ede Jezus e bemoei nanga sondari?

◆ Foe san-ede Jezus e bemoei nanga sondari?